Ima Ẹnyenede Ẹnọ Jehovah Edemede Utuakibuot Akpanikọ
“Ndima Abasi edi emi, ete, nnyịn inịm mbet Esie.”—1 JOHN 5:3.
1, 2. Ye nso uduakesịt ke nnyịn ikpanam n̄kpọ Jehovah?
OTU isenowo edide owo 80 oro ẹtode Japan ke ẹkesan̄a ẹse Ufọkmbono Mme Ntiense Jehovah ke California, U.S.A. Ndiye n̄kann̄kụk, esịnede in̄wan̄ oro ọyọhọde ye inuen oro ẹkotde blue jays, ibiom, ye mme inuen oro ẹkwọde ikwọ, ẹma ẹnam mmọ ẹkam ẹtịm ẹkpere Akwa Andibot mmọ, Jehovah Abasi ẹkan. Ikebịghike andida mmọ isan̄ ama edifiọk ete ke ekpere ndidi kpukpru owo ke otu oro ẹkenam utom uyọhọ-ini nte mme asiakusụn̄. Ntre, ekem, ẹma ẹbụp otu oro mbụme emi ẹsiwakde ndibụp ẹte: “Ntak emi mme asiakusụn̄ ẹwakde ntre ke Japan?” Ndopuyo ama odu ke esisịt ini. Ekem eyenan̄wan kiet ama ọbọrọ ete: “Koro nnyịn imade Jehovah.”
2 Ima ẹnyenede ẹnọ Jehovah—emi onụk nnyịn didie ntem ndisịn ifịk ke utom esie! Edi akpanikọ, idịghe kpukpru owo ẹkeme ndisiak usụn̄. Ke akpanikọ, n̄wakn̄kan ibat ke otu mme asuanetop Obio Ubọn̄ nnyịn ẹmi ẹwakde ẹkan miliọn inan̄ ikemeke ndinam ufan̄ nnọ ifetutom emi. Edi ediwak owo ẹmi ifet mmọ onyịmede ẹnam enye. Nnyịn eken imekeme n̄ko ‘[ndi]buọt idem ye Jehovah, nnyụn̄ nnam se ifọnde,’ iwụtde ima oro nnyịn inyenede ebe ke ndinyene ndusụk ebuana ke utom unam mbet. (Psalm 37:3, 4) Ndien kpukpru mme andituak ibuot nnọ Jehovah oro ẹyakde idem ẹnọ ẹkeme ndibuana ke ndisịn udọn̄ nnọ edu usiakusụn̄, ẹnọde mbon oro ẹsiakde usụn̄ ima ima ibetedem.—Matthew 24:14; 28:19.
3. Nso ukpụhọde ke ana ẹkụt ke ufọt ata ediwak mme okot idem Christian ye Mme Ntiense Jehovah?
3 Ke edide isio ye ata ediwak mme okot idem Christian, oro mmemmem mmemmem ẹdade ido ukpono nte ikpîkpu udiana n̄kpọ ke uwem mmọ, Mme Ntiense Jehovah ẹwụt ufiop ufiop ima ẹnọ Abasi emi onụkde mmọ “ẹbem iso ẹyom Obio Ubọn̄ Esie ye edinen ido Esie.” Emi omoyom n̄waidem, ndien n̄waidem emi odot didie ntem! (Matthew 6:33; 16:24) Enye odu ke n̄kemuyo ye akpa akwa ibet, emi Moses ekebemde iso etịn̄ ndien Jesus ọkọtọn̄ọde ntak etịn̄ ete: “Jehovah Abasi nnyịn, edi Jehovah kiet. Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.”—Mark 12:29, 30; Deuteronomy 6:4, 5.
4, 5. Mmanie ke ẹnyene ndida nte mme anam-akpanikọ, ndien didie ke ẹkeme ndiwụt edinam akpanikọ?
4 Kiet ke otu mbonutom ke ibuot itieutom Mme Ntiense Jehovah ke ndondo emi ama ọdọhọ F. W. Franz, etieibuot Watch Tower Society emi ọsọn̄de ke isua 98 emi ama okodu ke utom uyọhọ-ini ke n̄kpọ nte isua 70 ete: “Brọda Franz, afo edi eti uwụtn̄kpọ ke edinam akpanikọ.” Ndien Brọda Franz ama ọbọrọ ete: “Ih! Afo enyene ndinam akpanikọ.” Oro ama ebiere kpukpru n̄kpọ. Ke sededi ikpehe utom Obio Ubọn̄ oro nnyịn inamde, nnyịn imekeme ndinam akpanikọ.—1 Corinth 4:2; Galatia 3:9.
5 Edi akpanikọ, ediwak owo ẹkpema ndinam ekese efen efen ke utom Jehovah, edi mme mbiomo N̄wed Abasi m̀mê mme mfịna nsọn̄idem ẹkeme ndibiọn̄ọ mmọ esisịt. Nte ededi, inaha ẹda mbon oro mîkemeke ndisiak usụn̄ nte se mînamke akpanikọ. Ndusụk owo ẹma ẹsọn̄ọ ẹmụm edinam akpanikọ ẹkama ke idak n̄kpọsọn̄ idaha ndien ediwak ini ke ata ediwak isua. Ih, mmọ ẹmenam akpanikọ! Mmọ ẹmenyene ima ẹnọ Jehovah ẹnyụn̄ ẹnam utom ifịk ifịk ke un̄wam ofụri esịt oro mmọ ẹnọde ndutịm ukara esie. Mmọ ẹmewụt ọkpọsọn̄ udọn̄ ke utom usiakusụn̄ ẹmenyụn̄ ẹsịn udọn̄ ẹnọ mbon oro ẹnyenede idotenyịn usiakusụn̄, ediwak ini nditọ mmọ, ndinam n̄kpọ mbịne usiakusụn̄ nte ubọkọkọ ke uwem oro ọfọnde akan kpukpru n̄kpọ efen.—Men Deuteronomy 30:19, 20 domo.
6, 7. Didie ke ẹbuan se ikotịbede oro ẹwetde ke 1 Samuel 30:16-25 mfịn?
6 Ekeme ndinam edinam ima ima edidianakiet eke kpukpru ikọt Abasi an̄wan̄a ke mbụk oro ke 1 Samuel 30:16-25. Ke ekọn̄ oro ẹken̄wanade ye mbon Amalek, “David owot mmọ ọtọn̄ọde ke mfụn̄ mfụn̄ mbubịteyo tutu osịm ke mbubịteyo n̄kpọn̄” onyụn̄ atan̄ ekese mbụme. Ke ẹfiakde ẹnyọn̄ ẹka itienna, ndusụk mbonekọn̄ David ẹma ẹdọhọ ẹte yak owo okûdeme mbụme ọnọ mbon oro mîketieneke mmimọ iwọrọ ika ekọn̄ oro. Edi David ama ọbọrọ ete: “Anie owo n̄ko edikop uyo mbufo ke ikọ ẹmi? N̄kọm udeme andisụhọde ke ekọn̄ eyekem ke udeme anditie ye n̄kpoduoho: mmọ ẹyeda udeme ukem ukem.”
7 Ukem edumbet oro abuana mfịn. Mme asiakusụn̄ ẹdu ke iso ekọn̄ eke spirit nnyịn. Edi kpukpru mmọ eken ke esop ẹnọ ibetedem ofụri esịt, ye eke akpanikọ. Ndien ẹwụt akwa utịp oro osụn̄ọde oto ntan̄ndian utom mmọ ke 1991 ke chart oro etienede kemi.
N̄wọrọnda Ibatutom
8. (a) Nso ke ibatutom ofụri ererimbot ayarade ke se iban̄ade ofụri ibat mme asuanetop ye hour oro mmọ ẹsịnde ke utom Jehovah? (b) Nso mme n̄kpọ udọn̄ ke afo okụt ke mme idụt oro ẹdude obufa obufa ke ntọt ibatutom?
8 Ih, page inan̄ eke magazine emi oro ẹkebemde iso ẹwụt nte ntan̄ndian ukeme eke kpukpru ifịk ifịk mme andituak ibuot nnọ Jehovah eketịpde n̄kpọ esịn ke aduai-owo idem utatutom ofụri ererimbot eke 1991. Ẹma ẹnyene ata ediye n̄wakn̄kan ibat mme asuanetop 4,278,820—kpa n̄kọri ke mbahade 6.5-eke ikie. Mmọemi ẹma ẹsịn hour 951,870,021 (se ikperede biliọn kiet ke akpa ini!) ke utom emi. Ndien tịmfiọk akwa ukeme oro nditọete nnyịn ẹsịnde ke idụt ẹmi ke akpa ẹkedoride ukpan edi kemi ẹdude ke akpa ini ke ntọt ibatutom ofụri ererimbot—Bulgaria, Cameroon, Czechoslovakia, Ethiopia, Mozambique, Nicaragua, Rwanda, ye U.S.S.R.
9, 10. (a) Didie ke mme asiakusụn̄ ẹnam n̄kpọ ẹban̄a n̄kpọ-ata oro otode n̄kpọsọn̄ ini? (b) Nso nsịnudọn̄ ke ẹnọ ndidụk utom usiakusụn̄?
9 Ke mme isua ndondo emi edu usiakusụn̄ amatara osịm ofụri ererimbot. Idem ke mme idụt oro ẹnọde ifụre utuakibuot ke ata ndondo emi, ibat mme asiakusụn̄ ọmọdọk. Mme idiọk idaha ndutịm uforo ikpanke mme ọsọn̄idem Ntiense ẹmi ndiyak kpukpru se mmọ ẹnyenede nsịn ke utuakibuot Jehovah. (Men 2 Corinth 11:23, 27 domo.) Ke ẹbaharede ukem ukem ke ọfiọn̄ ke ọfiọn̄, mbahade mme asuanetop Obio Ubọn̄ 14 eke ikie ẹma ẹsiak usụn̄. N̄wakn̄kan ibat mme asiakusụn̄ edi 780,202, emi edide ata eti mbahade 18 eke ikie ke kpukpru mme asuanetop.
10 Ke ẹkụtde idatesịt oro mme asiakusụn̄ ẹnyenede, ẹma ẹsịn udọn̄ ẹnọ mmọ efen n̄ko ndidụk utom emi. Edieke afo mûsiakke usụn̄ kan̄a, nte ima oro afo enyenede ọnọ Jehovah ekeme ndidemede fi ndidọhọ, nte nnyịn ikotde ke Isaiah 6:8 ite, “Se mi, dọn̄ mi utom”? Mîdịghe otode ke ifịk ifịk ukpepn̄kpọ Bible fo, nte ikọ Abasi ekpedemede ifịk ifịk udọn̄ ke esịt fo, man afo akpakam anam n̄kaiso usio-ukot ndidụk utom usiakusụn̄? Idem ke ini idomo, ikọ Jehovah ama edemede Jeremiah, tutu eyedi se enye mîkemeke ndimụm idem n̄kama.—Jeremiah 20:9.
Ima Ima Edinam N̄kpọ Nnọ Ubonowo
11. Didie ke edinam ukpepn̄kpọ Bible okụt uforo?
11 Kiet ke otu n̄wọrọnda ikpehe ke ntọt ibatutom isua oro edi n̄kọri ke ibat ukpepn̄kpọ Bible mfọn, ẹnịmde ukpepn̄kpọ Bible 3,947,261, ofụri ini ke ọfiọn̄ kiet kiet ke ofụri ererimbot. Emi edi ima ima ndutịm emi Mme Ntiense Jehovah ẹtienede udọn̄ ẹkewụtde oro mmọ ẹkekụtde ke ini utom mmọ eke ufọk-ke-ufọk. Nnyịn imesikop inemesịt ndinịm ukpepn̄kpọ Bible ye mme owo ke kpukpru idụt ye orụk, inamde utom ye ukem nsịnifịk oro apostle Paul ekenyenede. Enye ‘nditịm n̄kwọrọ ikọ nnọ mme Jew ye mme Greek’ nte eyịghe mîdụhe ama oyom edikpep akpanikọ ke ediwak hour. (Utom 20:20 21) Enye edi ukem ntre mfịn. Mme Ntiense Jehovah ke ẹn̄wam “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.”—1 Timothy 2:4.
12-14. Nso idara idara ntọt ke ẹnyene ẹto Europe?
12 N̄kọri ibat ukpepn̄kpọ Bible ke Edem Usiahautịn Europe aduai owo idem didie ntem! Ke ediwak isua nditọete nnyịn do ẹkenyene ndisisop idem ke n̄kpri otu, ye iso-ọfọn idem akani Enyọn̄-Ukpeme kiet emi ẹkefiakde-fiak ẹmịn̄, oro ẹma ẹkekama ke anyanini odude ọnọ kpukpru owo ke otu oro. Edi idahaemi ke ẹnọ ata ekese Bible ye mme n̄wed Bible ẹka mme idụt oro. Enye anam owo eti Ikwọ Solomon 2:4, King James Version: “Enye [Christ Jesus] ama ada mi odụk ke ufọk usọrọ [eke Spirit], ndien mbọbọ esie emi odude mi ke idem ekedi ima.” Ke ẹnyenede ọkpọkpọ magazine mmọ, ẹmetịm ediwak mmọ idem mfọn mfọn ‘nditịm nsiak ikọ akpanikọ.’—2 Timothy 2:15.
13 Esop kiet enyenede mme asuanetop 103 ke St. Petersburg, Russia, ndondo emi ama ọtọt ukpepn̄kpọ Bible awakde ebe 300. Nte mbun̄wụm ifịk ifịk ukpepn̄kpọ Bible emi, ẹma ẹnịm mbufa Ntiense 53 baptism ke n̄kpasịp ọfiọn̄ itiaita. Se iwakde ikan mbahade iba ke otu mme andibuana ke esop oro ẹdu ke akpanikọ ke ọfiọn̄ itiaita m̀mê osụhọrede akan oro! Ndien mmọ inyeneke mbiowo—sụk asan̄autom unamutom kiet kpọt odu ndise mban̄a n̄kọri eke spirit mmọ.
14 Asuanetop Obio Ubọn̄ kiet ke Estonia ama ọdọhọ eyen ukpepn̄kpọ Bible m̀mê enye akpama ndinọ mme ufan esie ikot nditiene mbuana ke ukpepn̄kpọ. Ke ini Ntiense oro ekedide edisịm ufọk oro ke urua oro eketienede, enye ama okụt mme owo ẹwakde ẹbe 50 nte ẹsopde idem! Nte ededi, ama oyom san̄asan̄a ndutịm kaban̄a n̄kaiso edise mban̄a udọn̄ oro.
15. Nso ke enyene nditịn̄ mban̄a ibat mme andidụk Editi ye baptism?
15 Ediwak owo oro ẹkpepde n̄kpọ ẹkebemiso ẹtabi ebuana Christian ẹse ke ndidụk Editi n̄kpa Jesus. Ke isua emi ekebede, ibat mme andidụk ama ebe 10,000,000 ke akpa ini, owo 10,650,158 ẹkesop idem ke ofụri ererimbot ke esop 66,207 kaban̄a edinam idatesịt emi. Ke ediwak idụt Latin-America, Africa, ye Edem Usiahautịn Europe, ibat mme andidụk ẹma ẹwak utịm ikata m̀mê ikanan̄ ẹkan ibat mme asuanetop Obio Ubọn̄. Idahaemi ana nnyịn itọn̄ọ nditịm idem nnọ Editi oro ẹdinịmde isua emi ke Friday, April 17. Ẹdori enyịn nte ke ata ediwak mbufa nditọ ukpepn̄kpọ Bible oro ẹdụkde Editi ẹyekaiso ndinam n̄kọri mbịne baptism. Kaban̄a baptism, ke 1991 nnyịn ima ifiak ikụt se iwakde ikan owo 300,000 ẹyararede uyakidem mmọ ẹnọ Jehovah Abasi ebe ke edibụhọ ke mmọn̄.
Mme Ama Ubọhọ-Ufụn Abasi
16. Nso aduai-owo idem ntọt ke enyene eto Mbono District “Mme Ama Ubọhọ-Ufụn”?
16 Ikpehe efen oro oyomde ẹtịm ẹfiọk ke isua utom 1991 edi udịm udịm Mbono District “Mme Ama Ubọhọ-Ufụn,” emi idahaemi ama okokụre ke N̄kan̄ Edem Edere Ererimbot edi osụk akade iso ebe odụk 1992 ke N̄kan̄ Edem Usụk Ererimbot. Ke akpa ini, ẹma ẹnịm ọyọhọ ọyọhọ edinam mbono ke ediwak idụt Edem Usiahautịn Europe, emi nditọete nnyịn ẹkopde idatesịt ndida obufa ifụre oro mmọ ẹnyenede ntoro Jehovah. Ke October 1991 ofụri ibat mme andidụk akpa mbono 705 ke idụt 54 edi 4,774,937.
17, 18. (a) Nso ubọhọ-ufụn ke mme andituak ibuot nnọ Jehovah ẹdara ẹnyụn̄ ẹdot enyịn ẹban̄a? (b) Didie ke ubọhọ-ufụn Abasi okpụhọde ye mme ubọhọ-ufụn ererimbot?
17 Jesus ọkọdọhọ mme mbet esie ete: “Akpanikọ eyenyụn̄ anam mbufo ẹwọrọ ufụn.” (John 8:32) Mfịn, akpanikọ Bible omosio ediwak miliọn owo ke ufụn ukpepn̄kpọ Christendom. Ediwak miliọn owo ẹmi ẹmefiọk ẹte ke enọ uwa ufak Jesus oro Jehovah ọnọde eyenam ẹnyan̄a ubonowo “ẹsio ke itie ufụn mbiara, ẹsịn ke itie eyenisọn̄ emi enyenede ubọn̄ eke nditọ Abasi.” (Rome 8:19-22) Nso akwa ifụre ke oro edi ntem—ndidụn̄ ke nsinsi ke paradise isọn̄ ke nnennen adan̄a oro Jehovah ke ima onịmde!—Isaiah 25:6-8; men Utom 17:24-26 domo.
18 Ubọhọ-ufụn oro Mme Ntiense Jehovah ẹdarade kemi, ẹnyụn̄ ẹdoride enyịn ndidara ekese efen efen ke obufa editịm n̄kpọ Abasi ẹto Abasi nnyịn, Jehovah. (2 Corinth 3:17) Mmọ iberike edem ke edinam ukaridem m̀mê eke ukpụhọ ukara ekededi. (James 1:17) Mbak owo edinọ idiọk ukabade ekededi ke n̄kpọ emi, kad mbenọfọn̄ mbono eke 1991 oro Mme Ntiense Jehovah ẹkediande ke ọfọn̄ ke ndusụk idụt Edem Usiahautịn Europe ama akama ikọ emi “Mbono District Mme Ama Ubọhọ-Ufụn Abasi” utu ke sụk “Mme Ama Ubọhọ-Ufụn.”
Ufiop Ufiop Ima Ẹnyenede Ẹnọ Jehovah
19. Didie ke n̄kpet n̄kpet itie ebuana ye Jehovah ebe ke akam ekeme ndisọn̄ọ nnyịn idem?
19 Ima oro nnyịn inyenede inọ Jehovah ye mbuọtidem oro nnyịn ibuọtde ke enye ẹyenam nnyịn isịk ikpere enye ke akam. Edi n̄kpet n̄kpet itie ebuana emi ye Jehovah ebe ke akam aman̄wam nditọete nnyịn ndiyọ ekese nsọn̄ọn̄kpọ ye mme ukọbọ. (Psalm 25:14, 15) Ke ini n̄kponn̄kan idomo esie, Jesus ama ọsọn̄ọ omụm n̄kpet n̄kpet itie ebuana ye Ete esie akama ebe ke akam. (Luke 22:39-46) Utọ n̄kpet n̄kpet itie ebuana oro ye Jehovah ebe ke akam ama ọsọn̄ọ Stephen idem ke ọkpọsọn̄ ubiak n̄kpa usụn̄ Abasi esie. Ke owụkde enyịn ese enyọn̄ nte ẹkeyomde nditọn̄ọ enye ke itiat n̄wot, enye ama ọdọhọ ete: “Sese, mmokụt heaven nte anade inwan̄, mmonyụn̄ n̄kụt Eyen Owo [Jesus] nte adade ke ubọk nnasia Abasi.”—Utom 7:56.
20-22. Didie ke ifiọk n̄kpọntịbe owụt nte ke Abasi esikop akam?
20 Jehovah esibọrọ akam oro odude ke n̄kemuyo ye uduak esie. Nte mme andituak ibuot nnọ Jehovah ẹsikụtde ntre ediwak ini, ke uwụtn̄kpọ, ke idụt Africa kiet oro ẹdoride ukpan ke utom Mme Ntiense Jehovah, akpan asiakusụn̄ kiet oro akasan̄ade ke bọs aka edem edere ama akama akamba ekpat oro ọdọn̄ọde mme n̄wed Obio Ubọn̄ ye mme efọkn̄wed ndida n̄kọnọ. Owo oro ọkọdọn̄de mbiomo ke bọs oro ama obụp eyenete oro ete: “Nso idọn̄ọ ke ekpat emi?” Eyenete oro ama asiak akpa n̄kpọ oro okodụkde enye ekikere: “Leta.”
21 Nte ẹkade ke usụn̄, bọs oro ama awat usọp usọp ebe ke itie oro ẹsidụn̄ọrede owo idem ofụri ini, ndien mme borisi ẹsede enyịn ẹban̄a n̄kpọisan̄ ẹma ẹbịne enye ẹnyụn̄ ẹnam enye atuak ada, ẹsede ẹte ke enye ekemen n̄kpọmbet. Mmọ ẹma ẹnọ uyo ẹte kpukpru mbonisan̄ ẹwọn̄ọ ke bọs oro ye nte ke ana ẹdụn̄ọde kpukpru ekpatisan̄. Emi ekedi ini afanikọn̄! Eyenete oro ama asan̄a adaha esisịt ọkpọn̄ otuowo oro ẹkekụnide n̄kụni do ndien, ke ọtọn̄ọde edọn̄, ama ọbọn̄ akam ọnọ Jehovah. Ke ini enye akafiakde edidiana ye otuowo oro, ẹma ẹkûbọde ẹnyụn̄ ẹdụn̄ọde ekpat mbonisan̄ oro kiet kiet ke nde ke nde. Ke ini ẹkeyomde ndikûbọde ekpat eyenete oro, enye ke ndopuyo ama okot Jehovah oyom un̄wam.
22 Borisi oro ama ofiori ete, “Ekpat anie edi emi ndien nso idọn̄ọ ke enye?” Mbemiso eyenete oro ete ikokûbọde inua, ọdọn̄ mbiomo ke bọs oro ama ọbọrọ ete: “Edi leta ẹtode post ọfis ———— ẹka post ọfis ————.” Akamba owo borisi oro ama ọdọhọ ete, “Ọfọn etieti.” Enye ama emen ekpat oro onyụn̄ ayak ọnọ ọdọn̄ mbiomo ke bọs oro. Enye ama odụri enye utọn̄ ete, “Kụt ete ke imonịm enye ke eti itie ke usụn̄ isan̄ oro.” Akpan asiakusụn̄ oro ama ọtọn̄ọ ntak ọtọn̄ọ edọn̄ ndikọm Andikop akam.—Psalm 65:2; Mme N̄ke 15:29.
23. Nso ke Jehovah esinam, ndien kpa ye oro ntak emi enye ndusụk ini esiyakde ukọbọ anam utom esie ama?
23 Emi, nte ededi, iwọrọke ite ke mme andituak ibuot nnọ Jehovah ẹsibọhọ n̄kpọntịbe ofụri ofụri. Ke ndusụk idaha, ke mme ini Bible ye mfịn, Jehovah amanam owụt nte ke imọ imekeme ndinyan̄a ikọt imọ. Edi ke n̄kpọ abuanade edibiere eneni edinam akpanikọ, enye ke ndusụk ini etie nte esiyak ukọbọ anam utom esie ọyọhọ ọyọhọ ama. (Men Matthew 26:39 domo.) N̄ko-n̄ko Jehovah inikiet inikiet isikpemeke ikọt esie isio ke mbabuat n̄kpọntịbe, en̄wan obio m̀mê ubiatibet, okposụkedi ediwụt eti ibuot oro Bible ọnọde ekeme ndinyene ufọn. (Mme N̄ke 22:3; Ecclesiastes 9:11) Nnyịn imekeme ndinyene mbuọtidem, nte ededi, ite ye edide ẹnyan̄a nnyịn ẹsio ke mme idaha idomo m̀mê owo inyan̄ake, ẹyenọ edinam akpanikọ nnyịn utịp idem ke ediset ke n̄kpa edieke oro edide se ẹyomde.—Matthew 10:21, 22; 24:13.
24. Nso ima ima enọ ke Jehovah ọnọ, ndien didie ke nnyịn ikeme ndinam n̄kpọ mban̄a ima esie?
24 Ima ima enọ Jehovah enyene ndyọ didie ntem! Enye ndinọ ubonowo isọn̄ emi ye kpukpru se idude ke enye edi n̄wọrọnda uwụt ima esie. (Psalm 104:1, 13-16; 115:16) Ndien enọ ima oro Jehovah Abasi ọnọde Eyen esie, Jesus Christ, ndifak ubonowo nsio ke idiọkn̄kpọ ye n̄kpa edi akakan enọ ima oro akanam ẹnọde. “Abasi akada emi ayarade ima emi enye amade nnyịn, kemi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye. Ima odu ke orụk usụn̄ emi, itoho ke emi nnyịn ikamade Abasi, edi oto ke emi Abasi akamade nnyịn, onyụn̄ osiode Eyen Esie ọdọn̄, ete, edidi usio-isop mme idiọkn̄kpọ nnyịn.” (1 John 4:9, 10) Ke ndinam n̄kpọ mban̄a ima oro, nnyịn ikpakam itịm ifiọk “nte, n̄kpa ye uwem, ye mme angel ye mbọn̄, ye n̄kpọ eke ẹdude kemi, ye n̄kpọ eke ẹdidide, ye mme odudu, ye ukon̄ ye utụn̄ọ, ye n̄kpọ efen ekededi eke ẹbotde, idikemeke ndidianade nnyịn ke ima Abasi, emi odude ke Christ Jesus Ọbọn̄ nnyịn.”—Rome 8:38, 39.
Ke Ndidụn̄ọde Ibuotikọ Emi
◻ Ndinam akpanikọ ọwọrọ nso?
◻ Ke mme ikpehe edinam ewe ke nnyịn ikeme ndiwụt ima nnọ Jehovah?
◻ Mme ikpehe ewe ke ntọt ibatutom isua oko ke afo ama akan?
◻ Didie ke nnyịn ikeme ndiwụt esịtekọm nnọ mme ima ima enọ Jehovah?
[Ekebe ke page 15]
NTAK EMI MME ASIAKUSỤN̄ ẸWAKDE NTRE-E?
Nte ẹdọhọde, ke isua 2,600 mbon Japan ẹkedi ifịk ifịk mme andituak ibuot nnọ ndidem mmọ. Ke mme ekọn̄ eke isua ikie-20 emi ikpọn̄, se iwakde ibe mbonekọn̄ Japan miliọn inan̄ ẹmeduọk uwem mmọ, koro mmọ ekekerede ẹte ke ukpono efen idụhe oro okponde akan edikpa nnọ edidem-abasi mmọ. Edi mbonekọn̄ Buddha ye Shinto ẹma ẹkụt edikpu ke Ekọn̄ Ererimbot II, ndien ke oro ebede edidem oro ama akan̄ ke imọ idịghe abasi. Nso ikekeme ndisịri ufan̄ ido ukpono emi? Ke inemesịt, ukpepn̄kpọ Bible oro mme isụn̄utom eke Mme Ntiense Jehovah ndien ke ukperedem Mme Ntiense Jehovah ẹtode idụt oro ẹkenịmde ama an̄wam ediwak owo ndifiọk ata Abasi, Jehovah, ndinyụn̄ nnyak uwem mmọ nnọ enye. Uyakidem emi ọwọrọ ekese n̄kpọ ọnọ Mme Ntiense ẹtode Japan. Edieke ke akpa mmọ ẹkekemede ndiyak uwem mmọ nnọ edidem-abasi, ye ọkpọsọn̄ nsịnifịk didie ntem ke mmọ kemi ẹkpesịn odudu mmọ nte mme asiakusụn̄ ke ndituak ibuot nnọ odu-uwem Abasi ye Andibot ekondo —kpa Ọbọn̄ Andikara Jehovah!
[Chart ke page 10-13]
IBATUTOM ISUA UTOM 1991 EKE MME NTIENSE JEHOVAH KE ORỤRI ERERIMBOT
(Se magazine)
[Ndise ke page 16]
Mme Ama ubọhọ-ufụn Abasi—mme andituak ibuot nnọ Jehovah ẹdụkde mbono ke Prague, August 9-11, 1991