Mme Mbụme Ẹtode Mme Andikot

Nte Pharaoh ama ọdọ Sarah, kpa n̄wan Abraham, ata edidọdọ, nte ẹsịnde enye ke Genesis 12:19 ke ndusụk edikabade Bible?

Baba, ẹma ẹbiọn̄ọ Pharaoh ndida Sarah (Sarai) nte n̄wan esie. Ntre, owo ikasabakede ukpono ye uku oro Sarah ekenyenede.

Ẹn̄wam nnyịn ndikụt emi ke ndidụn̄ọde idaha oro okodude ke udọn̄ikọ n̄wed emi. Akan̄ ama enyịk Abraham (Abram) ndika n̄koyom ubọhọ ke Egypt ke esisịt ini. Enye ama okop ndịk ete ke uwem imọ eyedu ke itiendịk do ke ntak ediye n̄wan esie, Sarah. Abraham ikobonke eyeneren kan̄a ito Sarah, ntre edieke enye akpade ke Egypt, udịm Mfri eyetre, kpa Mfri oro edibede ke enye kpukpru ubon ke isọn̄ ẹkụt mfọn. (Genesis 12:1-3) Ntre Abraham ama eteme Sarah ete ọdọhọ ke imọ idi eyeneka imọ an̄wan, koro enye ke akpanikọ ekedi eyenete esie an̄wan.—Genesis 12:10-13; 20:12.

Ndịk oro enye okokopde ikananake nsọn̄ọ. Eyen ukpepn̄kpọ oro, August Knobel ama anam an̄wan̄a ete: “Abram ama eben̄e Sarai ete owụt idemesie nte eyeneka imọ an̄wan ke Egypt man ẹkûwot imọ. Edieke ẹkedade enye nte n̄wan oro ọdọde ndọ, mbon Egypt n̄kukụre ẹkpekekeme ndinyene enye ebe ke ndiwot ebe ye andinyene enye; edieke ẹdade enye nte eyeneka, usụn̄ ama odu ndibọ eyeneka eren esie enye ebe ke ufan ufan usụn̄.”

Mbọn̄ Egypt, nte ededi, ikodụkke ediomi ye Abraham iban̄a Pharaoh ndidọ Sarah. Mmọ n̄kukụre ẹkeda ediye Sarah ẹdụk ke ufọk Pharaoh, ndien andikara Egypt ama ọnọ owo oro ẹkedade nte eyeneka do, kpa Abraham, mme enọ. Edi ke etienede emi, Jehovah ama ada ufen amia ufọk Pharaoh. Ke ini ẹkeyararede idaha oro okodude ẹnọ Pharaoh ke ndusụk usụn̄ oro owo mîsiakke, enye ama ọdọhọ Abraham: “Nsinam afo ọdọhọde ete, Ke enye edi eyen uka? ndien m̀mê ami n̄kpadada enye ndọ [“anam ami mma nnyom ndida enye nte n̄wan mi,” NW]: se n̄wan fo ndien, da, nyọn̄.”—Genesis 12:14-19.

The New English Bible ye mme edikabade Bible eken ẹkabade ikọ enyọn̄ emi ẹwetde ke sịghisịghi ubọkn̄wed ke ufan̄ikọ oro nte “anam ami mma nda enye nte n̄wan” m̀mê ukem ikọ ntre. Ke adan̄aemi mîdịghe ukwan̄ edikabade nte ededi, utọ ikọ ntre ekeme ndinọ ekikere nte ke Pharaoh ama ọdọ Sarah ata edidọdọ, nte ke ndọ ekedi ataata n̄kpọ oro ẹma ẹkenam ẹkụre. Ẹkeme ndifiọk nte ke Genesis 12:19, ikọedinam usem Hebrew oro ẹkabarede “ndida” odu ke idaha oro mîwụtke ọyọhọ ọyọhọ edinam, emi owụtde edinam emi mîkụreke kan̄a. New World Translation akabade ikọedinam usem Hebrew emi ke n̄kemuyo ye udọn̄ikọ ye ke usụn̄ oro owụtde idaha ikọedinam oro in̄wan̄în̄wan̄—“anam ami mma nnyom ndida enye nte n̄wan mi.”a Okposụkedi Pharaoh ‘okoyomde ndida’ Sarah nte n̄wan esie, enye ikanamke kan̄a edinam m̀mê usọrọ ekededi emi oro akabuanade.

Okposụkedi ẹsiwakde ndisụk Abraham uyo ke ntak edinam esie ke n̄kpọ emi, enye akanam n̄kpọ ke ufọn Mfri oro ẹken̄wọn̄ọde ndien ke ntre ke ufọn ofụri ubonowo.—Genesis 3:15; 22:17, 18; Galatia 3:16.

Ke mbiet idaha oro akakamade n̄kpọndịk, Isaac ama ọdọhọ n̄wan esie, Rebekah, ete okûyarade idaha esie nte ọdọndọ. Ke ini oro eyeneren mmọ, Jacob, emi udịm Mfri ediwọrọde oto, ama amamana ndien nte an̄wan̄ade ekedi akparawa owo. (Genesis 25:20-27; 26:1-11) Edi, se ikedide uduak nnennen edinam emi ekeme ndidi ekedi ukem ye eke Abraham. Ke ini akan̄ Isaac ye ubon esie ẹkedụn̄ ke n̄kann̄kụk oro edidem Philistine emi ekekerede Abimelech akakarade. Edieke enye ọkpọkọfiọkde ete ke Isaac ọkọdọ Rebekah, ekeme ndidi Abimelech okpokoyom usụn̄ ndiwot kpukpru mbon eken ke ubon Isaac, emi ọkpọkọwọrọde n̄kpa ọnọ Jacob. Ke afan̄ emi n̄ko, Jehovah ama osịbe odụk man ekpeme mme asan̄autom esie ye udịm Mfri oro.

[Mme Ikọ idakisọn̄]