Ntọt
Un̄wam Ẹyomde Ẹnọ Mme Kọmiti Otu Ukara
Mme andibuana ke Otu Ukara eke Mme Ntiense Jehovah, emi idahaemi ẹdide owo 12 ke ibat, ẹkaiso ndinam utom ke edinam akpanikọ ke mme utom mmọ. Mmọ kpukpru ini ẹsiwụt esịtekọm ẹban̄a mme anam-akpanikọ “akwa otuowo” ẹmi ẹkọride-kọri ke ibat kaban̄a ifịk ifịk un̄wam mmọ. (Ediyarade 7:9, 15) Ke ẹkerede ẹban̄a akwa n̄kọri emi odude ke ofụri ererimbot, etie nte odot kemi ndinọ Otu Ukara udiana un̄wam. Ke ntre ẹma ẹbiere ndiyom ekese mme andin̄wam, akpan akpan ke otu akwa otuowo, ndibuana ke mme mbono Kọmiti Otu Ukara kiet kiet, oro edi, mme Kọmiti Mbonutom, Umịn̄-n̄wed, Utịm Utom, Unọ Ukpep, ye eke Uwetn̄wed. Ntem, ẹyenam ibat mme andidụk mme mbono kọmiti ẹmi kiet kiet awak osịm owo itiaba m̀mê itiaita. Ke idak ndausụn̄ mme andibuana ke kọmiti Otu Ukara, mme andin̄wam ẹmi ẹyetiene ẹbuana ke nneme ẹnyụn̄ ẹnam nsio nsio utom oro kọmiti oro edinọde mmọ. Obufa ndutịm emi editọn̄ọ ke May 1, 1992.
Ke ediwak isua idahaemi, ibat nsụhọ Mme Ntiense oro ẹyetde aran ke osụhọde ke ibat, ke adan̄aemi ibat mbon akwa otuowo ọkọride akan n̄wakn̄kan ibat oro ẹkedoride enyịn. (Isaiah 60:22) Nnyịn ikọm Jehovah didie ntem ke utịbe utịbe n̄kọri emi! Ke ini ẹkedade obufa enyịn̄ oro, Mme Ntiense Jehovah, ye idatesịt ẹnyene ke 1931, n̄wakn̄kan ibat mme asuanetop Obio Ubọn̄ ekedi 39,372, emi n̄wakn̄kan ibat ke otu mmọ ẹkedọhọde nte idide nditọete Christ oro ẹyetde aran. (Isaiah 43:10-12; Mme Hebrew 2:11) Isua ata ke ukperedem, ke 1991, n̄wakn̄kan ibat mme asuanetop ke ofụri ererimbot ekedi 4,278,820, emi owo 8,850 kpọt ẹkedọhọde nte idide nsụhọ oro ẹyetde aran. Nte ẹkedoride enyịn ke un̄wana N̄wed Abasi, “akwa otuowo” kemi amawak akan nsụhọ “ekpri otuerọn̄” ke se iwakde ikan owo 480 ke 1. (Luke 12:32; Ediyarade 7:4-9) Ke ndise mban̄a n̄kọri udọn̄ n̄kpọ Obio Ubọn̄, nsụhọ ke akpanikọ ẹyom ẹnyụn̄ ẹdara edidianakiet ye un̄wam oro akwa otuowo ẹnọde.
Nte ẹnamde an̄wan̄a ke nsiondi Enyọn̄-Ukpeme emi, odu otu emi anamde utom ye Israel eke spirit mfịn oro ẹmende ẹdomo ye mme Nethinim ye nditọ ikọt Solomon ẹmi ẹkesan̄ade ye nsụhọ nditọ Israel ẹwọn̄ọ ke ntan̄mfep Babylon; mbon oro mîkedịghe nditọ Israel do ẹma ẹkam ẹwak ẹkan mme Levite oro ẹkefiakde ẹnyọn̄ọ. (Ezra 2:40-58; 8:15-20) “Mbon oro ẹyakde ẹnọ” ẹmi ẹdide eke akwa otuowo ẹdi mme Christian iren oro ẹkọride ẹsịm ọyọhọ idaha ẹmi ekese ẹma ẹkenyene ifiọkutom nte utịp edise mban̄a utom use enyịn ke mme n̄kọk itieutom, ke utom oro ẹsan̄ade-san̄a, ye ke otu esop 66,000 ẹmi ẹdude idahaemi ke ofụri isọn̄.
Ke ndondo emi, ẹma ẹnịm Ufọkn̄wed Utom Obio Ubọn̄ ke ofụri ererimbot man ẹnọ mme esenyịn ye mme asan̄autom unamutom ẹmi ẹn̄wamde mmọ item. Ke United States ikpọn̄, mme esenyịn 59,420 ẹkedụk. Ẹma ẹtịm “mbiowo” ẹmi idem ke ntre ndibiom mbiomo mmọ nte ọfọnde akan.—1 Peter 5:1-3; men Ephesus 4:8, 11 domo.
Ke ibuot itieutom Mme Ntiense Jehovah ke Brooklyn, ndusụk “mbon oro ẹyakde ẹnọ” ẹmenam utom ke ata ediwak isua. Mmọemi ẹsịne mme esenyịn oro ẹkọride ẹsịm ọyọhọ idaha ke otu akwa otuowo ẹmi ẹma ẹkenyene ekese ukeme ye ifiọkutom. Ntre, Otu Ukara emek ibat ibat mme utọ esenyịn oro ndin̄wam ke mme mbono kọmiti Otu Ukara ẹmi. Mmọemi inen̄ekede idi irenowo ẹmi ẹnyenede mbịghi-n̄kan mbụkutom. Utu ke oro, mmọ ẹdi irenowo oro ẹkọride ẹsịm ọyọhọ idaha, ẹmi ẹnyenede ifiọk ke uwem ye mme n̄kpọ oro anamde owo odot oro anamde mmọ ẹdot ndinọ un̄wam ke mme akpan ifetutom. Edinọ mmọ utom ndinam ye kọmiti inọhọ mmọ san̄asan̄a idaha ke uwem. Nte Jesus ẹketịn̄de aban̄a mme mbet esie, “kpukpru mbufo ẹnyụn̄ ẹdi nditọete.” (Matthew 23:8) Nte ededi, ẹyeyak ekese ẹsịn irenowo ẹmi ke ubọk, ndien ke ntre ‘ẹyeyom ediwak n̄kpọ’ ẹto mmọ.—Luke 12:48.
Nnyịn imokop idatesịt ke edisan̄a oro esop Jehovah asan̄ade aka iso iso mfịn. Ke isua duop ẹmi ẹkebede, ẹmenyene se ikperede ndisịm n̄kọri 100 ke itie ikie ke ibat mbon oro ẹnamde utom ke an̄wautom, ke n̄kemuyo ye prọfesi oro aban̄ade Akamba David, Jesus Christ: “N̄kọri ukara esie ye emem idinyeneke utịt.” (Isaiah 9:7, King James Version) Ke ukem usụn̄ oro mme Nethinim ẹkenamde utom ọtọkiet ye mme oku ke ndifiak ndiọn̄ mme ibibene Jerusalem, ntre mfịn prọfesi oro aban̄ade esop Jehovah ke osu: “Ndien nditọ isenowo ẹyebọp ibibene fo.” (Isaiah 60:10; Nehemiah 3:22, 26) Ana ẹkọm mme Nethinim eyomfịn ke ifịk oro mmọ ẹsịnde ke ndibọp utuakibuot akpanikọ, ẹn̄wamde “mme oku Jehovah” ke sededi utom m̀mê edinam oro ẹnọde ke esop Jehovah eke ofụri ererimbot.—Isaiah 61:5, 6.