Dụk Mbono District “Mme Ọnọ Un̄wana”
“SESE, ekịm eyefụk ererimbot, ọkpọsọn̄ ekịm eyenyụn̄ ofụk mme idụt.” (Isaiah 60:2) Mme ikọ oro ẹdi akpanikọ didie ntem mfịn! Ye unana mfan̄a, nsunsu ido ukpono anam mme owo ẹdu ke ekịm kaban̄a orụk utuakibuot emi enemde Abasi esịt. Ntak-a? Koro Satan, kpa abasi eyo emi, “akanamde ikike mmọ eke mînịmke ke akpanikọ okịm.”—2 Corinth 4:4.
Mme Ntiense Jehovah ẹkpụhọde ke n̄wọrọnda usụn̄ ye mbon oro Satan anamde enyịn okịm. Ẹkeme ndida ikọ prọfet Isaiah ẹmi ntịn̄ mban̄a mmọ: “Jehovah eyesiaha ọnọ fi, ẹyenyụn̄ ẹkụt ubọn̄ esie eke odorode fi.” (Isaiah 60:2) Mmọ ẹwụt esịtekọm didie ntem ke ndikọwọrọ ke ekịm ndụk utịbe utịbe un̄wana Abasi! Enye edi un̄wana eke spirit, kpa akpanikọ eke Ikọ Abasi emi atatde owo enyịn ikike, tutu idem mbon oro ẹdide ata nnan ẹkeme ndikụt akpanikọ.
Ke akpanikọ, ẹyom un̄wam. Etie nte ke owo emi n̄kukụre okotde Bible ye unana edibọ ufọn nto un̄wam oro Abasi ọnọde idikwe un̄wana emi. Oro edi ntak emi Jehovah Abasi ọnọde “asan̄autom emi anamde akpanikọ, onyụn̄ enyenede ọniọn̄,” emi ẹkebemde iso ẹtịn̄ ẹban̄a ke Matthew 24:45-47. Mfịn Otu Ukara eke Mme Ntiense Jehovah ada ke ibuot “asan̄autom” oro. Edi ke idak ndausụn̄ otu emi ke ẹnam ndutịm ẹnọ Mbono District “Mme Ọnọ Un̄wana.”
Uduak mbono emi edi ndin̄wam kpukpru ikọt Jehovah ndidi nti mme ọnọ un̄wana, ke n̄kemuyo ye ikọ Paul ke N̄wed Mbon Philippi 2:16. Do, ẹteme mme Christian ẹte ẹyama nte “ntantaọfiọn̄ ke ererimbot.”—Matthew 5:14, 16.
Ke Nigeria, ẹnam ndutịm ẹnọ udịm udịm Mbono District “Mme Ọnọ Un̄wana” nditọn̄ọ ke Friday, November 6. Ke n̄kanika 10:20 usenubọk, ndutịm ikwọukwak eyen̄wam kpukpru owo ndinyene nnennen idaha esịt ye ekikere, ẹben̄ede idem ẹnọ ndutịm eke spirit oro anade ke iso. Usen kiet kiet enyene ibuotikọ esie, ndien ibuotikọ eke Friday edi “Dọn̄ Un̄wana Fo ye Akpanikọ Fo Utom.”—Psalm 43:3.
Ndutịm usenubọk Friday eyekama utịn̄ikọ ibuotikọ mbono, “Mme Ọnọ Un̄wana—Kaban̄a Nso Uduak?” Ke akpanikọ, mme Christian idịghe mme ọnọ un̄wana kaban̄a ọkpọkpọ, ibụk ibụk uduakesịt ndomokiet. Utu ke oro, mmọ ẹnam utom kaban̄a ukem ntak oro akanamde Jesus Christ, Etubom Ọnọ Un̄wana, edi isọn̄, oro edi, man edi ntiense ọnọ akpanikọ onyụn̄ ọnọ enyịn̄ Andibot ubọn̄. Nte odotde, Jesus ama etịn̄ aban̄a idemesie ete: “Adan̄a ini nte ndodu ke ererimbot, ndi un̄wana ererimbot.” (John 9:5) Ntem, enye ama ọkpọn̄ uwụtn̄kpọ ọnọ nnyịn nditiene nsan̄a ke nde ikpat esie. (1 Peter 2:21) Edinam uwemeyo eke akpa usen oro eyewụt utịn̄ikọ ye drama oro ọkọn̄ọde ke Bible oro aban̄ade Edidem Josiah, emi edidide akpan n̄kpọ udọn̄ ọnọ mme uyen.
Ibuotikọ eke Saturday edi “Mbufo Ẹdi Un̄wana Ererimbot . . . Yak Un̄wana Mbufo Ayama.” (Matthew 5:14, 16) Ndutịm usenubọk eyekama nneme oro ọdọhọde “Ndiyak Un̄wana Mbufo Ayama.” Ifet eyedu ọnọ mbon oro ẹma ẹkeyak idem ẹnọ Jehovah ndina baptism. Ndutịm uwemeyo eyewụt atat-owo enyịn nneme emi ọdọhọde “Ndisịn Un̄wana ke Edidu ye Ediyarade Christ.”
Ibuotikọ oro ẹmekde ẹnọ Sunday, kpa ọyọhọ usen ita ye akpatre usen mbono oro, edi “Ẹkaiso Ndisan̄a Nte Nditọ Un̄wana.” (Ephesus 5:8, NW) Ndutịm usenubọk eyesịne nneme emi ọdọhọde “Ndise Mban̄a Kiet Eken ke Esịt Ubon Christian,” emi edinemede aban̄a mme mbiomo ubon. Utịn̄ikọ eyedu n̄ko oro edinamde an̄wan̄a se ndisụk ibuot nnọ Abasi ye Christ ọwọrọde.
Mbono emi eyesịm ata etịn̄e esie ke uwemeyo Sunday ye utịn̄ikọ an̄wa emi ọdọhọde “Ẹtiene Un̄wana Ererimbot.” Utịn̄ikọ emi eyesịne edineme mban̄a John 1:1-16 eyenyụn̄ owụt ufọn edinyene ifiọk Bible, ọsọn̄ọde owụt nte ke Jesus Christ edi un̄wana ererimbot. Ẹyeberi mbono emi ye ufiop ufiop item ẹte “Ẹkaiso Ndisan̄a ke Un̄wana.”
Wụt esịtekọm fo nọ usọrọ eke spirit oro Jehovah ọnọde mi ebe ke esop esie emi ẹkụtde ke enyịn. Du ke itie ọtọn̄ọde ke ikwọ ediberede ke usenubọk Friday tutu ẹbọn̄ akam ediberi ke uwemeyo Sunday. Nọ ọyọhọ n̄kpan̄utọn̄ ke kpukpru se ẹditịn̄de ke mbot utịn̄ikọ. Wet mme akpan n̄kpọ editi man an̄wam fi owụk ekikere ke se ẹdinemede ye kaban̄a edinam ndụn̄ọde ke ini iso. Ke akpatre, nam ndutịm ndibuana ke ndusụk orụk utom unyịmesịt. Ntem, afo eyedara edidiọn̄ idịghe eke edibọbọ ikpọn̄ edi n̄ko n̄kponn̄kan edidiọn̄ eke edinọnọ.—Utom 20:35.