“Ẹsịne Ofụri N̄kpọekọn̄ Abasi”
MME Christian ndisịne n̄kpọekọn̄? Ntak emi mmọ ẹkpebọbọde utọ mbiet mbọbọ ekọn̄ oro-o? Nte mmọ idịghe mme ama emem? (2 Timothy 2:24) Ke akpanikọ, mmọ ẹdi. Edi, kpukpru mme Christian akpanikọ ẹdu ke en̄wan—kpa kiet emi mmọ ẹn̄wanade, idịghe man ẹwot owo, edi man ẹkan.
Ke ekpedide Satan ikọsọn̄ke ibuot, utọ en̄wan oro ikpedịghe se ẹyomde. Edi enye ama ọsọn̄ ibuot, enye ama onyụn̄ abian̄a Adam ye Eve esịn ke ndidiana ye enye ke nsọn̄ibuot esie. Ọtọn̄ọde ke ini oro ndutịm ererimbot oro ọkọride esịne ke ubọk “andidiọk,” Satan kpa Devil. (1 John 5:19) Ana mmọ oro ẹsụkde ibuot ẹnọ nnennen Andikara, Jehovah, ẹbiọn̄ọ odudu ererimbot emi ye andikara esie. Ana mmọ ẹn̄wana kaban̄a uwem eke spirit mmọ. Kaban̄a emi, ẹteme mme Christian ẹte: “Ẹsine ofụri n̄kpọekọn̄ Abasi, man mbufo ẹdikeme ndin̄wana ye n̄kari Satan.”—Ephesus 6:11.
N̄kpọekọn̄
Tịmfiọk ete ke nnyịn iyom “ofụri n̄kpọekọn̄ Abasi” edieke anade nnyịn inyene ọyọhọ ukpeme. Ẹyak nnyịn, ndien, idụn̄ọde ikpehe n̄kpọekọn̄ emi kiet kiet nte apostle Paul ewetde inyụn̄ idụn̄ọde idem nnyịn ye esịt akpanikọ man ibiere m̀mê nnyịn imọbọbọ mbọbọ ọyọhọ ọyọhọ inọ ekọn̄ eke spirit.—Ephesus 6:14-17.
“Ẹsọn̄ọ ẹda ndien: ẹda akpanikọ ẹbọbọ ke isịn.” (Ephesus 6:14a) Ke mme ini Bible mbonekọn̄ ẹkesibọbọ n̄kpaha ikpa emi okponde ukpa ke inch 6. N̄kpaha emi ama esin̄wam ndikpeme isịn. Ke ini owoekọn̄ ọkọbọbọde n̄kpaha esie, emi ama esiwụt ete ke enye odu ke mben̄eidem ọnọ ekọn̄.
Odot didie, ndien, nte ke ẹmen akpanikọ Abasi ẹdomo ye n̄kpaha owoekọn̄! Emi anam enen̄ede an̄wan̄a nte ke nnyịn ikpenyene ndisọn̄ọ mmụm Ikọ akpanikọ Abasi n̄kama ke idem nnyịn, nte n̄kpọ eke idade enye ibọp idem. Nnyịn ikpenyene ndikere ntotụn̄ọ ntotụn̄ọ mban̄a ekikere oro odude ke Ikọ Abasi. Emi eyekpeme nnyịn ọbiọn̄ọ edidi se ẹdade abian̄a ye n̄kari ẹtụn usụn̄. Akan oro, mme ikọ inua Jehovah ẹyenọ nnyịn ibetedem ẹnyụn̄ ẹsọn̄ọ nnyịn idem ke n̄kan̄ eke spirit ẹnyụn̄ ẹsọn̄ọ nsọn̄ọnda nnyịn.
“Ẹsịne edinen ido nte ukwak ikpanesịt.” (Ephesus 6:14b) Ukwak ikpanesịt owoekọn̄ esikpeme ata akpan ndido idem eke obụkidem—kpa esịt. Do, ke n̄kpọekọn̄ eke spirit oro Abasi ọnọde nnyịn, edinen ido ekpeme esịt nnyịn. Ke N̄wed Abasi, esịt nte odotde ada aban̄a se nnyịn idide ke esịt esịt—mme ntụk, ekikere, ye udọn̄ nnyịn. Sia Bible etịn̄de n̄ko ete ke esịt enyene ntụhọ unam idiọk, edi akpan n̄kpọ ndikọri ubiere ndisọn̄ọ mmụm idaha Jehovah kaban̄a edinen ido n̄kama. (Jeremiah 17:9) Inaha ẹwụt nsụkibuot oro ẹsụkde ẹnọ Abasi ke enyọn̄ enyọn̄ mbubịk mbubịk usụn̄; ana enye oto esịt. Emi oyom ete nnyịn ikọri ọkpọsọn̄ ima inọ edinen ido ye ukem ukem ọkpọsọn̄ usua oro inọ se ikwan̄ade. (Psalm 45:7) Ntem ẹyekpeme esịt nnyịn.
“Ẹda mben̄eidem ndikwọrọ gospel emem ẹsịne nte ikpaukot.” (Ephesus 6:15) Nte emesịne ikpaukot ke ukot fo ke usụn̄ emi? Nte mmọ ẹsida fi ẹka an̄wautom kpukpru ini man akatan̄a eti mbụk? Nte afo ke odomo ndifori uduot utom ukwọrọikọ ye ukpepn̄kpọ fo? Edi akpanikọ, ndusụk efakutom inyeneke n̄kọri ndomo esisịt. Mme owo ẹkeme ndikop umiọn̄, ndinana udọn̄, m̀mê ndibiọn̄ọ. Idem ukwọrọikọ nnyịn ekeme ndida ukọbọ nsọk nnyịn. Edi ke ndisịn ifịk, mme Christian ẹkeme ndikọri ime, kpa edu emi ọnọde ukpeme ke en̄wan Satan. Okposụkedi ẹkekọbọde, Paul ekedi esịnifịk ọkwọrọikọ, ndien ẹsịn udọn̄ ẹnọ nnyịn ‘ndikabade n̄kpebe enye, kpa nte enye ekekpebede Christ.’—1 Corinth 11:1.
Ndiyọhọ ye utom edikwọrọ Obio Ubọn̄ anam mbuọtidem nnyịn ke eti mbụk ọsọn̄. Akande oro, enye ayak spirit Jehovah ada nnyịn anam utom ke ndiyọhọ uduak esie. Ke akpanikọ, utọ utom oro anam nnyịn idi ekemmọ mme anamutom ye mme angel—idem ye Jehovah Abasi ke idemesie. (1 Corinth 3:9; Ediyarade 14:6) N̄ko ‘ndiyọhọ kpukpru ini ke utom Ọbọn̄’ anam nnyịn ‘isọn̄ọ ida, iyakke n̄kpọ esehede nnyịn.’ (1 Corinth 15:58) Nso utịbe utịbe ukpeme ke emi ọnọ ntem!
“Ẹda mbuọtidem nte otuekọn̄.” (Ephesus 6:16) Ye akamba otuekọn̄ owoekọn̄ eke eyo eset ama esikpeme idemesie ọbiọn̄ mme eduat ye idan̄. Edieke enye okokpụde ndikama otuekọn̄, ẹma ẹkeme ndinọ enye unan idiọk idiọk m̀mê idem ẹwotde. Mme Christian ẹkam ẹsak iso ẹse n̄kpọekọn̄ oro akamade n̄kpa akan—kpa “enyịmikan̄ andidiọk.” Mmọemi ẹsịne kpukpru n̄kari oro Satan adade anam n̄kpọ man anam mbuọtidem nnyịn emem onyụn̄ owot nnyịn ke n̄kan̄ eke spirit. Mmọ ẹsine ukọbọ, abian̄a, n̄kari n̄kari ikpọ ifiọk ererimbot, itọn̄ inyene obụkidem, ye idomo edibuana ke obukpo ido uwem. Man ekpeme nnyịn ọbiọn̄ọ kpukpru ẹmi, nnyịn iyom akamba otuekọn̄. Mbakidem nnyịn baba kiet idinanake ukpeme.
Abraham ye n̄wan esie, Sarah, ẹma ẹnyene ọkpọsọn̄ mbuọtidem. Ke ẹma ẹkebe isua unyene eyen, mmọ ẹma ẹnyene mbuọtidem ke un̄wọn̄ọ Abasi nte ke mfri eyemana ọnọ mmọ. Ke ukperedem, Abraham ama owụt n̄wọrọnda mbuọtidem ke ini enye ekeyerede ikot oro ẹkenọde enye ndiwa Isaac, n̄kukụre eyen esie emi edima Sarah akamande. Jehovah ama omụm Abraham ubọk onyụn̄ ọnọ ukpụhọde uwa. Edi Abraham ama odu ke mben̄eidem ndikop item. Ntak-a? Koro enye ama enyene ọyọhọ mbuọtidem nte ke Jehovah ekpekekeme ndinam eyen esie eset nnyụn̄ nnam mme un̄wọn̄ọ ẹmi ẹken̄wọn̄ọde ẹnọ enye osu.—Rome 4:16-21; Mme Hebrew 11:11, 12, 17-19.
Moses n̄ko ama enyene orụk mbuọtidem oro nnyịn iyomde. Enye ama esịn inyene Egypt, utu ke oro emekde ndibiom ukụt ye ikọt Abasi. Ntak-a? Koro enye ama enyene mbuọtidem nte ke Jehovah odu n̄ko ke eyeda edinyan̄a ọsọk nditọ Israel. Mbuọtidem Moses ama ọsọn̄ etieti tutu “enye ọsọn̄ọ ada nte n̄kpọ eke okụtde Enyeemi enyịn owo mîkwe.”—Mme Hebrew 11:6, 24-27.
Nte nnyịn imenyene ukem udomo mbuọtidem oro ke Jehovah? Nte itie ebuana nnyịn ye Jehovah enen̄ede otụn̄ọ tutu enye ekpere nditie nte n̄kpọ eke nnyịn ikemede ndikụt enye? Nte nnyịn imonyịme ndinam n̄waidem ekededi oro ẹyomde m̀mê ndiyọ nsọn̄ọn̄kpọ ekededi man isọn̄ọ imụm itie ebuana nnyịn ye Abasi ikama? Nte nnyịn imenyene ọyọhọ mbuọtidem ke Jehovah? (Mme Hebrew 11:1) Ke edide ntre, enyịmikan̄ Satan idikemeke nditịbi otuekọn̄ mbuọtidem nnyịn.
“Ẹyara edinyan̄a nte ndụn ke ibuot.” (Ephesus 6:17a) Ndụn owoekọn̄ ama esikpeme ibuot esie ndien ke ntem mfre—kpa ndido emi ọnọde osịp ye ekikere ndausụn̄. Ẹmen idotenyịn edinyan̄a Christian ẹdomo ye ndụn koro enye ekpemede ekikere. Ẹnam ekikere Christian akabade edi obufa ebe ke nnennen ifiọk, edi mmemmem ye anana mfọnmma owo osụk enyene enye. (Rome 7:18; 12:2) Edieke nnyịn iyakde ekikere owụhọ ke ndedehe ekikere emi abiatde mbuọtidem emi edu ererimbot emi osion̄ode edi, mbuọtidem nnyịn ke edinyan̄a eyekpa mmọn̄ ndien ekeme ndikpa ke akpatre. Ke n̄kan̄ eken, edieke nnyịn kpukpru ini iwụkde ekikere nnyịn ke ikọ Abasi oro ọsọn̄ọde owo idem, idotenyịn nnyịn eyekaiso ayama onyụn̄ an̄wan̄a. Nte afo amayara ndụn edinyan̄a fo enen̄ede ọsọn̄?
“Ẹkama ofụt spirit, emi edide ikọ Abasi.” (Ephesus 6:17b) Ikọ oro ẹsidọhọde ẹte ke edibụmede ntọn̄ọ en̄wan edi mfọnn̄kan ukpeme edi akpanikọ ke ekọn̄ Christian. Nte ikpat nnyịn, emi esịnede mben̄eidem ndikwọrọ gospel emem, ẹdade nnyịn ẹka ke otu mbon oro mînịmke ke akpanikọ, owo ikpọn̄ke nnyịn ye unana n̄kpọ n̄kpemeidem. Ikọ Abasi, kpa Bible, anam n̄kpọ nte okopodudu ofụt ndida nsịbe mme abian̄a ye nsunsu edinịm ke akpanikọ eke spirit nnyụn̄ n̄n̄wam mbon esịt akpanikọ ndikụt uwọrọ-ufụn eke spirit.—John 8:31, 32.
Jesus ama owụt odudu oro n̄kpọekọn̄ emi enyenede ke ini enye, ke akpanikọ, okodude ke en̄wan ye Satan. Ke ini ẹkedomode enye ke wilderness, Jesus ama ekpeme idemesie ọbiọn̄ọ idomo Satan ita ke ndikama Ikọ Abasi mfọn mfọn nnyụn̄ ndọhọ: “Ẹma ẹwet ẹte.” (Matthew 4:1-11) Edieke nnyịn ikpepde ndikama ofụt emi usọ usọ, nnyịn imekeme ndin̄wam mbon nsụkidem ndiwọrọ ke idak odudu Satan. Ndien, n̄ko, mbiowo esop ẹda Ikọ Abasi ndikpeme udimerọn̄ mbiọn̄ọ mbon oro ẹn̄wanade ndibiat mbuọtidem mbon mmemidem.—Utom 20:28-30.
Usọ owoekọn̄ ke ndikama ofụt isidịghe mmemmem mmemmem. Esiyom ukpep ye ediyak idem nsịn ke edinam anyanini, man ẹkama enye ẹnam n̄kpọ usọ usọ. Ukem ntre, ke ekọn̄ eke spirit, oyom ekese ukpepn̄kpọ ye edinam ofụri ini ke an̄wautom man owo akabarede edi enyene-usọ andida Ikọ Abasi nnam n̄kpọ. Ke kpukpru usụn̄, ẹyak nnyịn isịn ukeme oro ẹyomde ke ndidi mme enyene-usọ andikama ofụt eke spirit, inyenede ukeme ‘nditịm nsiak ikọ akpanikọ.’—2 Timothy 2:15.
Ẹkpeme Ndibọn̄ Akam, Ẹsọn̄ọ Ẹda
Kpukpru mbak n̄kpọekọn̄ eke spirit nnyịn edi akpan n̄kpọ ọnọ edimụm nsọn̄ọnda n̄kama ye Abasi. Edi didie ke nnyịn ikeme ndisọn̄ọ mmụm n̄kpọekọn̄ emi n̄kama? Ndikpep Bibe kpukpru ini, ndibem iso ntịm idem nnọ mme mbonoesop Christian, ndien ekem inọ ọyọhọ n̄kpan̄ utọn̄ inyụn̄ ibuana ifịk ifịk ke mmọ ẹyen̄wam nnyịn ndisọn̄ọ mmụm n̄kpọekọn̄ nnyịn n̄kama. (2 Timothy 3:16; Mme Hebrew 10:24, 25) Edibuana kpukpru ini ye ifịk ifịk ke an̄wautom adiande ye eti ebuana Christian eyen̄wam n̄ko ndidu ke mben̄eidem nnyụn̄ n̄kpeme ndinịm n̄kpọekọn̄ eke spirit nnyịn ke eti idaha.—Mme N̄ke 13:20; Rome 15:15, 16; 1 Corinth 15:33.
Ndikọri nnennen idaha ekikere edi akpan n̄kpọ n̄ko. Ana nnyịn isịn ndiyak mme mbukpek n̄kpọ ererimbot emi ẹtịmerede nnyịn. Utu ke oro, ẹyak nnyịn inyene ‘mmemmem enyịn.’ (Matthew 6:19-24, NW) Ke ndikpebe Jesus Christ, ana nnyịn n̄ko ikpep ndima edinen ido nnyụn̄ nsua se ikwan̄ade. (Mme Hebrew 1:9) Kpukpru n̄kpọ ẹmi ẹn̄wam nnyịn ndisọn̄ọ mmụm n̄kpọekọn̄ eke spirit oro Abasi ọnọde nnyịn n̄kama.
Ke ama ekeneme aban̄a mbak n̄kpọekọn̄ eke spirit emi kiet kiet, Paul etre ke ndidọhọ: “Ẹda kpukpru akam ye n̄kpeubọk ẹbọn̄ akam ke spirit kpukpru ini, ẹnyụn̄ ẹkpeme ndinam ntem, ẹnyụn̄ ẹda ofụri ifịk ye n̄kpeubọk ẹkpeme ndibọn̄ akam mban̄a kpukpru ikọt Abasi.” (Ephesus 6:18) Mme anam-akpanikọ mbonekọn̄ ẹsinyene nneme kpukpru ini ye ibuot itieutom mbonekọn̄ ẹnyụn̄ ẹnịm mme ewụhọ oro ẹnọde. Nte mbonekọn̄ Christian, nnyịn inyene ndinyene nneme kpukpru ini ye Andikara nnyịn, kpa Jehovah Abasi, ebe ke akwa “etubom mme idụt” esie, kpa Jesus Christ. (Isaiah 55:4) Ẹkeme ndinam emi, idịghe ke enyọn̄ enyọn̄ edibọn̄ akam, edi ebe ke n̄kpeubọk ofụri esịt oro owụtde n̄kpet n̄kpet ebuana ye ntotụn̄ọ ukpono oro ẹnyenede ẹnọ Jehovah. Ke ndinyene nneme ye Jehovah kpukpru ini, nnyịn imọbọ odudu ke usen ke usen ndisọn̄ọ nnyịn idem ke en̄wan emi.
Jesus ọkodọhọ ete: “Ami n̄kakan ererimbot.” (John 16:33) Jehovah n̄ko oyom nnyịn idi mme andikan. Nte ini n̄kpa apostle Paul akasan̄ade ekpere, enye ama ekeme ndidọhọ ete: “Mma n̄n̄wana eti en̄wan, mma mfehe mbuba mi mma, mma nsọn̄ọ mmụm mbuọtidem n̄kama.” (2 Timothy 4:7) Akpakam nnyịn ikeme nditịn̄ ukem ikọ ẹmi mban̄a udeme nnyịn ke en̄wan emi. Edieke nnyịn inen̄erede inyene udọn̄ iban̄a emi, ẹyak nnyịn ‘ikpeme ndin̄wana ye n̄kari Satan’ ke ndisịne ofụri n̄kpọekọn̄ Abasi.—Ephesus 6:11.