Ntọt M’ọkwọrọ Obio Ubọn̄
Ẹdiọn̄ Nditọ Ufọkn̄wed Nigeria ke Ntak Edinam Akpanikọ
APOSTLE Paul ekewet ete: “Edieke usụn̄ odude, ẹn̄wana, nte mbufo ẹkekeme, ndidu ke emem ye kpukpru owo.” (Rome 12:18) Nditọ ufọkn̄wed Mme Ntiense Jehovah ke Nigeria ẹda item emi ẹsịn ke edinam, idem ke ini ẹkọbọde mmọ. Nte utịp, Jehovah ọmọdiọn̄ mmọ.
◻ Andikpep kiet ama asua Mme Ntiense Jehovah etieti. Ke ini akam usenubọk kiet, enye ama okot kpukpru Mme Ntiense ẹwọrọ ẹdida ke iso onyụn̄ ọnọ uyo ete mmọ ẹkwọ ikwọ ufre-idụt. Mmọ ẹma ẹsịn, ẹdọhọde ẹte ke mmimọ iyom ndinọ Abasi san̄asan̄a utuakibuot. Andikpep oro ndien ama ada kpukpru mmọ ọwọrọ an̄wa onyụn̄ ọdọhọ mmọ ẹtem mbiet. Kan̄a kemi, nditọ ufọkn̄wed eken ke ẹkekaiso ke ukpepn̄kpọ mmọ.
Ntiense kiet emi edide akamba owo ama ada ekpri n̄wed School and Jehovah’s Witnesses ọsọk andikpep oro, anamde idaha edida san̄asan̄a eke Mme Ntiense Jehovah an̄wan̄a enye. Nte ededi, andikpep oro ama esịn ndineme n̄kpọ mban̄a oro m̀mê ndibọ ekpri n̄wed oro. Ke akpanikọ, enye inikiet inikiet ama anam ufen nditọn̄wọn̄ oro ọsọsọn̄ akan.
Mme uyen Ntiense ẹmi ẹma ẹkaiso ndiyọ ufen emi ẹnyụn̄ ẹkaiso nditem mbiet oro idem ke ini andikpep oro mîkodụhe. Usen kiet andikpep oro ama odịbe ke ebiet oro owo mîkekwe enye ese nte mmọ ẹkade iso ndinam utom ẹnyụn̄ ẹkwọde ikwọ Obio Ubọn̄. Emi ama otịm otụk enye ke idem tutu enye ọdọhọ mmọ ẹfiak ẹka ubet ukpepn̄kpọ, okopde n̄kpaidem aban̄a edu mmọ. Nso ikedi utịp? Andikpep oro idahaemi ke ekpep Bible ye Mme Ntiense Jehovah!
Ke akpanikọ ẹma ẹdiọn̄ nditọ ufọkn̄wed ẹmi ke ntak edinam akpanikọ mmọ nnọ Jehovah ye mme edumbet esie.—Mme N̄ke 10:22.
◻ Ẹma ẹdiọn̄ Ruth ye mme ufan esie n̄ko ke ntak edinam akpanikọ mmọ nnọ ewụhọ Jehovah oro nte ẹkûdi “eke ererimbot.” (John 17:16) Ruth, emi edide isua 18, ọkọtọn̄ọ usiakusụn̄ ke ini enye ekedide isua 12. Enye ye Mme Ntiense efen ẹma ẹsobo ubiọn̄ọ otode mme anamutom ke ufọkn̄wed koro ẹkesịnde ndikwọ ikwọ ufre-idụt. Andikpep kiet ama oyom ndikụt mme ete ye eka nditọiban oro. Ke mmọ ẹma ẹkenam n̄kpọ emi an̄wan̄a, ẹkamade ekpri n̄wed School, andikpep oro ama oyụhọ onyụn̄ etre ndikaiso mfịna nditọ ufọkn̄wed oro.
Nte ededi, usen kiet, andikpep emi otode India ama esuene onyụn̄ ọnọ kiet ke otu nditọiban ẹmi ufen ke iso nditọ ufọkn̄wed ke ini eyenan̄wan oro mîkọkwọhọ ikwọ ufre-idụt. Eyenan̄wan oro ama ọsọn̄ọ ada uko uko anam mbuọtidem esie an̄wan̄a ndien andikpep oro ama ada enye aka iso etubom ufọkn̄wed. Ke mmọ ẹsịmde do, uyen Ntiense oro ama okụt nte ke udiana-etubom ama odu do n̄ko. Ke ata n̄kpaidem esie, etubom ye udiana-etubom oro ẹma ẹtọn̄ọ ndisak. Ke ọwọn̄ọrede ese andikpep oro, etubom ama ọdọhọ ete: “Mma, kûfịna idemfo ye nditọiban ẹmi. Idem ekpedi afo owowot mmọ, mmọ ẹnyịme ndikpa utu ke ndikwọ ikwọ ufre-idụt. Nte akanam afo ukopke etop mmọ?” Ekem enye ye udiana esie ẹma ẹtịn̄ ẹban̄a mbuọtidem ye uko Mme Ntiense Jehovah. Ke etịn̄de ikọ ọnọ eyenan̄wan oro, etubom ama ọdọhọ ke imeseme iban̄a esuene oro ẹkesuenede enye. Ekem enye ama adian do ete: “Kaiso ke mme edinam mbuọtidem fo. Ami mmama ido ukpono ye uko mbufo ke an̄wa ye mi ke ufọkn̄wed.” Ke ukperedem, andikpep oro ọkọbiọn̄ọde mi ama ekpe Ntiense oro ubọk, ọdọhọde ete ke imọ kemi imọfiọk edida san̄asan̄a eke Mme Ntiense.
Nditọ ẹmi ẹketiene uwụtn̄kpọ nditọ Hebrew ita ẹmi mîkabiatke nsọn̄ọnda mmọ ye Abasi ke ndinụhọ nnọ mbiet, n̄ko ye eke Daniel, emi mîketreke ndibọn̄ akam nnọ Jehovah. Jehovah ama ọdiọn̄ irenowo ẹmi koro mmọ ẹkenamde akpanikọ ẹnọ ndinen ibet Abasi.—Daniel, ibuot 3 ye 6.