Jehovah—Ọdiọn̄ọ Fo M̀mê Ufan Fo?

“JOHN, nte mmekeme ndimen fi n̄wụt ufan mi? Emi edi—mbọk, nso ikedi enyịn̄ oro?”

Nte akanam afo omokop utọ esuene esuene ndudue oro ke nneme? Emi ọnọ uwụtn̄kpọ aban̄a nte ndusụk owo ẹsidade ikọ oro “ufan” ẹtịn̄ ikọ ke ukwan̄ usụn̄. Ke ata idem n̄kpọ mmọ n̄kukụre ẹtịn̄ ẹban̄a “ọdiọn̄ọ” mîdịghe ke ndusụk idaha ikam idịghe oro. Ndidiọn̄ọ Ete Efiom emi odụn̄de ke edem usụn̄ n̄kan̄ oko edi n̄kpọ kiet; ndidi ufan esie edi ata isio isio n̄kpọ.

N̄wed ukabadeikọ kiet akabade “ọdiọn̄ọ” nte “owo emi owo esisobode ke otu edi emi owo mînyeneke ntotụn̄ọ ọkpọkpọ ebuana.” Enye owụt “unana editịm mmehe, edisan̄a n̄kpere, edinyene ebuana, ye ediyom ufọn owo nte UFAN.”

Unana ntotụn̄ọ ọkpọkpọ ebuana emi an̄wam ndinam an̄wan̄a ntak emi nnyịn isiwakde ndinọ esisịt ntịn̄enyịn mban̄a se itịbede inọ mme ọdiọn̄ọ, ke adan̄aemi nnyịn isinen̄erede isịn idem ke uwem mme ufan nnyịn. Nnyịn imesibuana mme idara mmọ ye mme mfụhọ mmọ, iyakde mmọ ẹtụk nnyịn ntotụn̄ọ ntotụn̄ọ. Nte ededi, ana nnyịn ikpeme mbak idiyak ntụk otụn nnyịn usụn̄ esịn ke edinọhọ ke mme ọkpọkpọ mbubehe mmọ.—1 Peter 4:15.

Ndinyene ntotụn̄ọ ọkpọkpọ ebuana ye mme ufan nnyịn anam an̄wan̄a n̄ko ntak emi nnyịn nte ido edide isidomode ndinem mmọ esịt. Edieke ọdiọn̄ọ okụtde nte ido nnyịn ọdiọkde m̀mê mîdotke, iyatesịt esie ekeme nditre ndinụk nnyịn ndikpụhọde. Edi ufan ke akpanikọ ekeme ndinyene ọkpọsọn̄ odudu, edide edi ke mme n̄kpọ ẹban̄ade edisịnen̄kpọ, ido, m̀mê edu.

Kaban̄a mbuọtidem, ima, ukpono, ye edinam akpanikọ, itieufan odori owo n̄kokon̄ udomo mbiomo akan nte itie ọdiọn̄ọ odoride. Owo emi oyomde itieufan, yak idọhọ, ye unana edibiom mbiomo, ke ata idem n̄kpọ oyom ọdiọn̄ọ kpọt, idịghe ufan. Mme n̄kpet n̄kpet ufan ẹsikop inemesịt ndiyọhọ mme mbiomo oro ntotụn̄ọ ọkpọkpọ ebuana adade edi, ẹdiọn̄ọde ẹte ke emi ọnọ mmimọ ifet ndisọn̄ọ itieufan mmimọ.

Itieufan ye Abasi

Nte Andibot, Jehovah edi Ete eke heaven ubonowo onyụn̄ odot ẹma, ẹkop uyo ẹnọ, ẹnyụn̄ ẹkpono. Edi enye oyom ubonowo ẹnam emi ke ntak ntotụn̄ọ ọkpọkpọ ebuana, idịghe ke ntak ikpîkpu ekikere mbiomo. (Matthew 22:37) Enye n̄ko oyom mmọ ẹma imọ nte Ufan. (Psalm 18:1) Sia “Enye ekebemde iso ama nnyịn,” enye ke idemesie ama onịm mfọnmma itiat idakisọn̄ ọnọ utọ itieufan oro.—1 John 4:19.

Akpa ete ye eka nnyịn, Adam ye Eve, ẹma ẹdiọn̄ọ Jehovah. Mbụme ekedi: Nte mmọ ẹyenyịme itieufan oro enye ọnọde? Edi n̄kpọ mfụhọ nditịn̄, mmọ ikonyịmeke. Ibụk ibụk ediyom ndida ke idemmọ n̄kpọn̄ Abasi ama ọnọ ekikere aban̄a unana ntotụn̄ọ ọkpọkpọ ebuana. Ke ẹnyịmede ndibọ mme edidiọn̄ eke itieufan oro enye ọkọnọde, mmọ ikonyịmeke ndiyọhọ mme mbiomo esie. Emi eketie nte n̄kpọ eke mmọ ẹkeyomde ndidara inemesịt ye ifụre eke inem inem ebietidụn̄ Paradise mmọ ye unana edinyịme ndikpe okụk ebietidụn̄ oro.

Kpukpru nnyịn, ndusụk owo ke udomo oro okponde akan eke mmọ eken, ima ida edu unana esịtekọm ye nda-ke-idem emi imana. (Genesis 8:21) Ndusụk n̄kparawa owo, ke uwụtn̄kpọ, ẹmeyak ndammana udọn̄ mmọ kaban̄a nda-ke-idem anam mmọ ẹtre ndiwụt esịtekọm nnọ ete ye eka mmọ. Emi omosụn̄ọ ke ata ọsọn̄urua itieufan oro okpodude ke ufọt mmọ ye ete ye eka mmọ ke ofụri eyouwem ndibiara. Okposụkedi emi edide n̄kpọ mfụhọ, nte ededi, itieufan nnyịn ye Ete nnyịn eke heaven ndibiara edi ata akamba n̄kpọ. Ke akpanikọ, enye ekeme ndidi n̄kpọ n̄kpa!

Se Ẹyomde Kaban̄a Itieufan

Ke mbuọtidem mîdụhe, baba itie ebuana kiet, edide ye mme owo m̀mê ye Abasi, ikemeke ndibịghi. Eteekpụk oro Abraham ama ọfiọk emi, ndien oro edi ntak emi enye ọkọsọn̄ọde owụt mbuọtidem esie ke Abasi. Kot Genesis 12:1-5 ye Ge 22:1-18, nyụn̄ kụt n̄wọrọnda uwụtn̄kpọ iba oro aban̄ade mbuọtidem esie ke Jehovah. Ih, “Abraham onịm Abasi ke akpanikọ, ndien ẹbat oro ẹnọ enye ke edinen ido.” Oro edi ntak “[ẹkekotde] enye, ẹte, Ufan Abasi.”—James 2:23.

N̄kpọ efen oro ẹyomde kaban̄a itieufan ye Abasi edi ndida ekekem ye mme mbiomo oro itieufan emi adade edi. Ke ntak usụhọde idaha nnyịn ke ebuana ye Jehovah, mme mbiomo ẹmi nte owụtde ifiọk ẹnen̄ede ẹkpon ẹkan nte ekpedide ke itieufan eke owo. Mmọ ẹka anyan ẹkan nnyịn ndiyom ndinem enye esịt ke ndusụk n̄kpọ—nte nnyịn ikpanamde ye ufan eke owo. Mmọ ẹsịne nnyịn ndiyom ndinem enye esịt ke kpukpru n̄kpọ. Jesus, Eyen Abasi ye ata n̄kpet n̄kpet ufan, ama owụt emi ke ini enye eketịn̄de aban̄a Jehovah ete: “Ami [nnam] se inemde Enye esịt kpukpru ini.”—John 8:29.

Ntem, itieufan ye Jehovah, m̀mê ye Eyen esie, idụhe ke isọn̄ oro edibiom mbiomo mîdụhe; enye ọkọn̄ọ ke nnyịn ndidu uwem ekekem ye mme n̄kpọ oro ẹyomde kaban̄a itieufan oro mmọ ẹnịmde. (Se Psalm 15:1-5.) Jesus ama owụt emi in̄wan̄în̄wan̄ ke nneme esie ye mme mbet. Enye ọkọdọhọ mmọ ete, “Mbufo ẹdi mme ufan Mi edieke mbufo ẹnamde n̄kpọ eke ntemede mbufo.”—John 15:14.

N̄kpọ efen oro ẹyomde kaban̄a itieufan edi in̄wan̄în̄wan̄ nneme oro otode esịt. Ke usen n̄kpa esie, Jesus ama ọdọhọ mme anam-akpanikọ mbet esie ete: “N̄kotke aba mbufo mme asan̄autom, koro asan̄autom mîfiọkke se eteufọk esie anamde; edi n̄kot mbufo mme ufan, koro mma mmen kpukpru se n̄kokopde ke inua Ete Mi nyarade nnọ mbufo.” (John 15:15) Ke ndibuana mme ekikere esie ye mme ufan esie, Jesus eketiene uwụtn̄kpọ Ete esie eke heaven, emi Amos 3:7 ọdọhọde: “Ọbọn̄ Jehovah [idinamke] baba n̄kpọ kiet, ke mîbọhọke ini enye ayarade uduak esie ọnọ ikọt esie mme prọfet.”

Nte emi idịghe se isidade itie ke ufọt mme ufan? Nnyịn imekeme nditre ndikop ntụk edibuana mme ifiọk n̄kpọntịbe nnyịn ye Ete Efiom emi odụn̄de ke edem usụn̄ n̄kan̄ eken. Ndien ata akpanikọ edi ke nnyịn idiyomke nditịn̄ mme ndedịbe ekikere ye ntụk nnyịn nnọ enye. Koro, enye edi sụk ọdiọn̄ọ. Edi ye mme ufan nnyịn, kamse, ediwak ini esidi ọkpọsọn̄ n̄kpọ ọnọ nnyịn ndibet.

Ukem oro ke edi ke itieufan nnyịn ye Abasi. Ekeme ndidi ọkpọsọn̄ n̄kpọ ọnọ nnyịn ndibet nditịn̄ ikọ nnọ enye ke akam, iyarade mme n̄kpọ oro nnyịn iyomde, mme udọn̄ nnyịn, ye mme ntotụn̄ọ ekikere esịtidem nnyịn inọ enye. Nte ededi, edieke nneme otode n̄kan̄-kiet, itieufan eyesọp ndikpa. Ntre ana nnyịn n̄ko inyịme ndiyak Abasi etịn̄ ikọ ọnọ nnyịn. Nnyịn inam emi ebe ke nditịm n̄kpan̄ utọn̄ nnọ Ikọ esie oro ẹwetde-wet, itiede ikere item esie, ndien ekem idade enye isịn ke edinam adan̄a nte ikekeme.

Itieufan Jehovah Edi Akpan N̄kpọ Adan̄a Didie Ọnọ Fi?

Man an̄wam fi ọbọrọ mbụme emi, kere ban̄a akpan orụk itieufan eke owo. Edieke afo edide akparawa owo, eyedi afo emenyene udọn̄ ke itieufan oro ekemede ndida n̄kosụn̄ọ ke ndọ. Nte ededi, afo ọmọfiọk ete ke edidi ikpîkpu ọdiọn̄ọ ye nsan̄andọ ini iso ọsọsọn̄ ndidi eti isọn̄ kaban̄a ndọ. Ana ẹbemiso ẹwọn̄ọde itie ọdiọn̄ọ ẹsịn ke itieufan. Ẹkeme ndien ndikọri itieufan emi nnyụn̄ mbot enye akabade edi ata n̄kpet n̄kpet itie ebuana oro ke akpatre edinamde eti isọn̄ odu ọnọ ndọ oro enyenede inem.

Idahaemi, kere. Adan̄a ukeme didie ke ata ediwak owo ẹsisịn ndikọri utọ itieufan emi? Ini ye okụk ifan̄ ke mmọ ẹsibiat ke nditọn̄ọ ndien ekem ke ndimụm enye n̄kama? Adan̄a ediwak ini didie ke mmọ ẹsibiat ke ndikere mban̄a enye? Ke nso udomo ke mmọ ẹsinam mme ndutịm—mîdịghe ẹwụt unyịme ndikpụhọde mme ndutịm—ye uduak ndifori mîdịghe ndimụm itie ebuana emi n̄kama?

Ndien bụp idemfo: ‘Didie ke emi emen udomo ye ukeme oro nsịnde ke ndikọri itieufan ye Andibot mi mîdịghe ndifori nnyụn̄ nnam enye ọsọn̄ idem? Adan̄a ediwak ini didie ke ami nsida ke ndinam ntre? Ke nso udomo ke itieufan ye Jehovah odu mi ke ekikere? Ke nso udomo ke ami nnam mme ndutịm—mîdịghe n̄n̄wụt unyịme ndikpụhọde mme ndutịm—ye uduak ndifori ndien ekem ndisọn̄ọ mmụm itie ebuana emi n̄kama?’

N̄kparawa Christian ẹkpenyene nditịm mfiọk nte ke kpukpru itieufan eke owo, esịnede enyeoro ekemede ndida ke akpatre n̄kosụn̄ọ ke ndọ, ẹdi udiana akpan n̄kpọ ọnọ itieufan oro anade mmọ ẹnyene ye Andibot mmọ. Ntak edi oro ẹsịnde udọn̄ ẹnọ mmọ ke Ecclesiastes 12:1 ẹte: “Nyụn̄ ti Andibot fi ke ini afo edide akparawa.” Ediwak owo ke ẹnam emi ke ndinam utom an̄wan̄wa nte mme asan̄autom Abasi, ediwak mmọ ẹmi ibat akade-kaiso ndikọri ẹnam utom nte mme ọkwọrọikọ uyọhọ-ini, m̀mê mme asiakusụn̄.

Kpa ye nsụkuyo ye unana udọn̄ ke ido ukpono oro akanarede mmọ ẹkụk, mmọemi ẹsida uko uko ke n̄kan̄ Jehovah ke ini mmọ ẹkopde nsunsu isụn̄i ye edori ikọ oro ẹtịn̄de ẹdian enye. Nte emi idịghe se Jehovah nte enende ekpekemede ndidori enyịn ndikụt nto mme ufan esie? Nte emi idịghe se nnyịn n̄ko ikpodoride enyịn ito mme ufan nnyịn? Ndien nte emi ikpanamke esịt nnyịn adat ke ini nnyịn ikụtde mme ufan nnyịn ẹnamde emi ifịk ifịk n̄ko ye ke ofụri esịt?—Men Mme N̄ke 27:11 domo.

Ih, itieufan ye Abasi—idem ye mme owo—esida mme mbiomo oro anade ẹyọhọ edi edieke anade itieufan oro ebịghi. Owo oro mînyịmeke ndibiom mme mbiomo ẹmi, m̀mê oro mîben̄eke idem ndinam uyakidem nnọ Abasi ndien ekem ọyọhọ enye, ekeme n̄kukụre ndidi ọdiọn̄ọ Jehovah. Nte ededi, enye ifiọkke kan̄a idatesịt oro odude ke edinyene Enye nte Ufan.

[Ndise ke page 25]

Abraham ama ọbuọt idem ye Abasi ndien ẹkekot enye ufan Jehovah