Ndiwụt Esịtekọm Mban̄a Ọsọn̄urua Enọ Uwem

UWEM—nso ọsọn̄urua inyene ke edi ntem! Ke enye mîdụhe nnyịn ikemeke ndinam baba n̄kpọ kiet. Ini ekededi oro ẹtabade enye, owo ikemeke ndifiak nnyene enye ebe ke ukeme owo. Edieke uwem nnyịn odude ke itiendịk, nnyịn iyenam n̄kpọ ekededi oro owụtde ifiọk nte ikekeme ndinyan̄a enye. Kamse, ndusụk owo ẹkam ẹsiyom un̄wam oro akande eke owo ke ini ẹdude ke nnanenyịn!

Ẹti nnyịn ẹban̄a mbụk Bible aban̄ade ubom oro ọkpọsọn̄ oyobio okomụmde ke inyan̄. Ke ini enye okoyomde ndisịp, “mbon ubom ẹfehe ndịk, kpukpru mmọ ẹnyụn̄ ẹfiori ẹkot abasi mmọ.” Ekem, kpukpru mmọ ẹfiori ẹkot Abasi akpanikọ ẹte: “Mbọk, O Jehovah, kûyak nnyịn itak.” Mbụk Bible oro ọdọhọ n̄ko ete: “[Mmọ] ẹnyụn̄ ẹsion̄o n̄kpọ eke ẹdude ke ubom ẹduọn̄ọ ke inyan̄, man ẹbiomode mmọ ẹnam ubom efere.”—Jonah 1:4-6, 14; men Utom 27:18, 19 domo.

Mme awat ubom oro ẹma ẹkam ẹben̄e idem nditaba inyene obụkidem oro ẹmade ke ukeme ndinyan̄a uwem mmọ. Nnyịn imekeme ndifiak nnyene mme n̄kpọ obụkidem—edi inyeneke uwem. Ndien ke ntak oro nnyịn ke ntụk imade uwem nnyịn, nnyịn imesifiak edem ikpọn̄ n̄kpọndịk. Nnyịn idia udia, isịne ọfọn̄, inyụn̄ ibọk idem nnyịn. Nnyịn imesiyom usọbọ ke ini idọn̄ọde.

Kpa ye oro, Andinọ uwem oyom oto nnyịn se ikande ikpîkpu editiene ntụk unọ idem nnyịn ukpeme. Kamse, uwem edi ọsọn̄urua enọ, ndien enye oto ata n̄kponn̄kan Owo ke ofụri ekondo. Otode ke esịtekọm ofụri esịt oro iwụtde inọ Andinọ ye enọ, nte nnyịn ikpọbọkde uwem? Ndien nte oro ikpesịneke ediwụt ukpono nnọ uwem mbon en̄wen?

Ikpedịghe n̄kpọ n̄kpaidem inọ nnyịn, ndien, nte ke Ibet oro Jehovah Abasi ọkọnọde idụt Israel ama esịne mme ibet oro ẹkenamde man ẹkpeme uwem ye nsọn̄idem mbon en̄wen. (Exodus 21:29; Deuteronomy 22:8) Mme Christian mfịn ẹkpenyene ndikere mban̄a nsọn̄idem ikpọkidem mmọ en̄wen kpasụk ntre. Ke uwụtn̄kpọ, edieke afo enyenede nditọwọn̄ ke ufọk, nte afo ye unana ntịn̄enyịn emesikpọn̄ mme utọ n̄kpọ nte n̄kwa, pin, mîdịghe n̄kpọ oro ẹnyenede nsọsọp iso oro ẹkemede ndinọ eyenọwọn̄ akamba unan ke adade enye ebre mbre ye unana ifiọk m̀mê emende mmọ? Nte mmọn̄ibọk ye n̄kpasịp ibọk oro ẹkemede ndikama n̄kpọndịk ẹdu ke ebiet emi nditọwọn̄ mîkemeke ndikụt? Edieke mmọn̄ ọduọhọde ke isọn̄ufọk, nte afo emesisọp ọkwọhọde enye efep man akpan mbabuat n̄kpọntịbe? Nte afo emesisọp ọdiọn̄ mme n̄kpọutom oro ẹdade odudu ikan̄ ilektrik ẹnam utom ke ini mmọ ẹbiarade? Nte afo emesidiọn̄ n̄kpọisan̄ fo kpukpru ini? Nte afo edi eti awat o-moto? Edieke afo enen̄erede owụt esịtekọm aban̄a nte uwem edide ọsọn̄urua n̄kpọ, eyenụk fi ndiwụt ukpeme oro owụtde eti ibuot ke mme idaha ẹmi ye mme ukem idaha ntre.

Edi n̄kpọ mfụhọ nditịn̄, nte ededi, nte ke ndusụk owo ẹsida uwem mmọ ke ekpri n̄kpọ. Ke uwụtn̄kpọ, anie owo mîfiọkke mfịn nte ke edin̄wọn̄ sika ifọnke ye nsọn̄idem? Edi, ediwak miliọn owo ẹdụk ufụn ẹnọ edu emi, ke adan̄aemi nsọn̄idem mmọ ataharede ke ini kiet kiet oro mmọ ẹn̄wekde idiọk nsụn̄ikan̄ oro. Mmọ en̄wen ẹda n̄kpọsọn̄ ibọk ke idiọk usụn̄, ndien mmọ eken ẹda n̄kpọsọn̄ mmịn, kpukpru emi ọnọde mmọ unan. AIDS edi udọn̄ọ uwot owo emi usọbọ mîdụhe. Edi ediwak owo ẹkpekefep ndimen udọn̄ọ emi edieke mmọ ẹkpeketrede oburobụt ido idan̄, ndusụk orụk n̄kpọsọn̄ ibọk, ye edikịm iyịp nsịn ke idem. Nso n̄kpọ mmọn̄eyet ke unana ediwụt esịtekọm nnọ uwem edi ntem!—Rome 1:26, 27; 2 Corinth 7:1.

Ẹkeme Ndinam Ukpụhọde!

Mbon oro ẹwụtde esịtekọm ẹnọ Akwa Andibot mmọ, Jehovah, ẹnyene okopodudu ntak ndida uwem ke ọsọn̄urua n̄kpọ. Uwem edi edisana enọ esie. Mmọ ke ntre ẹben̄e idem ndinam ukpụhọde ekededi oro ẹyomde man ẹda enye nte enọ otode Abasi. Kere ban̄a ifiọk n̄kpọntịbe aban̄ade Kwaku, andikpep ke Ghana. Nte anana-ibuot ọn̄wọn̄ ọkpọsọn̄ mmịn, enye ke akatahade uwem esie.

Kwaku eti ete: “Mma ndomo ndinyịk n̄wan mi ndikpono mi, emi ekesiwakde ndida n̄kosụn̄ọ ke eneni ye en̄wan, akpan akpan ke ini n̄kpade mmịn. Ke ntak n̄kesisịnde idem ke ebeubọk edin̄wọn̄ ọkpọsọn̄ mmịn, okụk ama esinana mi kpukpru ini, mma nnyụn̄ nsikpu ndien ndien ndinọ okụk ndida n̄n̄wam ubon. Nte an̄wan̄ade, emi ama esiyat n̄wan mi esịt ata etieti. Ke ini ekededi oro okụk okụrede (ndien emi ama esitịbe ndien ndien), mma nsinam se n̄kekeme man n̄kaiso ke un̄wọn̄ mmịn mi. Inikiet mma n̄ka anyan n̄kosịm idaha edida okụk udomo oro n̄kọbọde nditọ ufọkn̄wed mi nnam ufọn nnọ idem. Mma nsika usọrọ un̄wọn̄ mmịn nnyụn̄ nsidep mmịn nnọ mme nsan̄a un̄wọn̄ mmịn mi. Ikebịghike usen unam ibat ama edisịm ọnọ mi. Ke mîkpedịghe nte etubom ufọkn̄wed mi ekesịbede odụk usọp usọp n̄kpakataba utom mi.

“Uwem mi okodu ke idiọk idaha. Enyịn ama anan mi, edi ikebịghike mma mfre enyịn mban̄a oro. Ekem mma ntọn̄ọ ndikere mban̄a ediwot idem koro n̄kekerede ke uwem okpu mi. Edi, ami n̄kekemeke ndikịbe mbọhọ mbumehe un̄wọn̄ n̄kpọsọn̄ mmịn. Edi usen kiet ke itie unyam mmịn mma ntiene mbuana ke utọk mbon ukpa-mmịn ndien ẹma ẹkịm mi ke ikwa, ami ke ubiak mma ndifiọk nte ke ima oro nyenede nnọ n̄kpọsọn̄ mmịn eyeda uwem mi usen kiet.

“Ke ofụri ini emi, Mme Ntiense Jehovah ke ẹsiwaha ufọk nnyịn ke ini ke ini, ẹdomode ndinam nnyịn inyene udọn̄ ke Bible. Ami ye n̄wan mi ima isifehe idịbe kpukpru ini sia nnyịn ikekerede ke mmọ ẹkedi mbon mfịna. Ke idaha kiet, nte ededi, mma mbiere nditua mmọ mbọm n̄kpan̄ utọn̄. Ikebịghike ukpepn̄kpọ Bible ama atat mi enyịn ndikụt utịbe utịbe idotenyịn edidu uwem nsinsi ke obufa editịm n̄kpọ Abasi. Nte n̄kekpepde Bible ye un̄wam Mme Ntiense Jehovah, ntre ke esịtekọm oro n̄kenyenede nnọ Jehovah nte Ọnọ-Uwem nnyịn ye kaban̄a enọ uwem esie ọkọkọri otụn̄ọ akan, ndien kpa ntre ke nte item Bible ọfọnde okotụk mi ke idem. Emi ama akaiso esịn udọn̄ ọnọ mi ndinam uwem mi asana. Emi ikedịghe mmemmem n̄kpọ, sia n̄kenyenede ndikaiso mfep n̄kpọsọn̄ mmịn ye n̄kani ufan mi nde. Jehovah, Andikop akam, ama okụt ubiere esịt mi onyụn̄ eyere mi.a

“N̄wan mi, okposụkedi mîdịghe kiet ke otu Mme Ntiense Jehovah, okpono mi ye ido ukpono mi etieti ke ntak akamba ukpụhọde oro enye okụtde ke uwem mi ye ke itie ebuana ndọ nnyịn. Mbọhọidụn̄ nnyịn idịghe aba idimụm en̄wan ke ufọt mi ye n̄wan mi. Ami mmama emem eke ekikere oro nyenede idahaemi. Ke akpanikọ, ndiwụt esịtekọm nnọ Jehovah Abasi nte Ọnọ-Uwem nnyịn, ndinyịme ekikere esie kaban̄a nte uwem ọsọn̄de urua, ye ndinam item esie ke nte ẹkpedude uwem edi n̄kukụre usụn̄uwem oro odotde.”

Enọ Abasi eke Nsinsi Uwem

Ediwak tọsịn owo, ukem nte Kwaku, ẹma ẹbọ un̄wam ẹto Mme Ntiense Jehovah man “ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.” (Ephesus 4:24) Idịghe uwem mmọ eke idahaemi ikpọn̄îkpọn̄ ke mmọ ẹdi ẹdiwụt esịtekọm ẹban̄a edi n̄ko idotenyịn uwem nsinsi ke paradise isọn̄. Bible ọn̄wọn̄ọ ete ke Paradise oro Abasi edinamde, baba andidụn̄ kiet idifiakke ikop uyịre uyịre ubiak otode biọn̄ aba, koro “Jehovah mme udịm [eye]nam akamba udia ọnọ kpukpru mme idụt, n̄kpọ eke enyenede isek.”—Isaiah 25:6.

Kan̄a kemi, uwem, okposụkedi edidi utịbe enọ, esidu sụk ke ibio ini. Kpukpru owo ẹsak iso ẹse n̄kpa, ndien nso n̄kpọ mfụhọ ke n̄kpa edi ntem! Ndikụt owo oro afo amade ọkpọn̄de mme oduuwem aka ndobo udi edi ata n̄kpọ mfụhọ, idịghe ikọ n̄kponinua. Edi ke idak Obio Ubọn̄ Abasi, oro Christ edikarade, un̄wọn̄ọ Jehovah eyesu: “N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:4.

Ke ini oro enọ uwem eyetara ke utịbe utịbe udomo. Mme andibọhọ akpatre ukụt ke isọn̄ emi ẹyenyene ifet edidụk ọyọhọ ọyọhọ uwem. Ndien adan̄aoro, ebede ke ediset ke n̄kpa, kpa edida owo mfiak ndi uwem, Jehovah Abasi eyefiak ada ọsọn̄urua enọ uwem esie ọnọ mbon oro ẹdede ke n̄kpa. (John 5:24, 28, 29) Emi ediwọrọ mbonima ye mme abak-Abasi eke eset ndifiak ndi!

Nte kpukpru emi ọfọn akan ndidi akpanikọ? Baba, koro “ikọ baba kiet eke otode Abasi idinanake odudu.”—Luke 1:37; men Job 42:2 domo.

N̄ko-n̄ko, Jehovah Abasi ke idemesie ọmọnọ ubonowo ubiọn̄ nte ke kpukpru emi ẹyeda itie. Didie? Ebe ke ndiwa owo oro esịt esie amade akan, edima Eyen esie, kpa Jesus Christ, man afak nnyịn osio ke idiọkn̄kpọ ye n̄kpa. N̄wed Mbon Rome 8:32 ọsọn̄ọ ọnọ nnyịn ete: “Enye [Jehovah Abasi] emi mîkesịnke ndinọ Eyen Esiemmọ, edi ayakde Enye ọnọ ke ibuot nnyịn kpukpru, Enye edikeme didie nditre ndinọ nnyịn kpukpru n̄kpọ ndian ye Enye?” Bible asian nnyịn ete ke emi eyesịne edinam ubonowo asana ọbọhọ mbiara ido uwem ye edisio kpukpru orụk ukwan̄ikpe, ubiatibet, ye afai mfep. (Isaiah 11:9) Owo idisehe uwem aba nte didie didie n̄kpọ.

Idem idahaemi, ke idak mme idaha unana mfọnmma, uwem ekeme ndidi ata inem inem n̄kpọ. Anie mîsikopke inemesịt iban̄a inem inem ufuọn̄ udia, mbịtmbịt ofụm ke ufiop ufiop usen, ndikụt akamba obot, uyai uyai usoputịn, ndobo ndobo idịm oro efehede, ndiye uduot frawa, inem inem uyo ikwọ, m̀mê ikwọ oro mme inuen ẹkwọde? Tuak da ke esisịt ini. Kere, ndidara mme utọ n̄kpọ oro ke nsinsi ekpetie didie?

Nte owụt ifiọk, ndien, nditop ọsọn̄urua ifet edidu uwem ke nsinsi nduọk ke ntak inemesịt ekpri ini ekededi oro idiọk ibụk ibụk usụn̄uwem ekemede ndinọ? (Men Mme Hebrew 11:25 domo.) Nte owụtde ifiọk, Bible eteme nnyịn ete ‘ikûdu aba uwem nnyịn oro osụhọde inọ udọn̄itọn̄ esịt owo, edi idu inọ uduak Abasi.’ (1 Peter 4:2) Nnyịn imesịn udọn̄ inọ fi ufiop ufiop, ih, imakpak fi, ite anam ntre ebe ke ndikpep Ikọ Abasi, kpa Bible, onyụn̄ ada mme n̄kpọ oro ekpepde esịn ke edinam. (John 13:17) Afo ndien eyedidu ke eti itie ebuana ye Jehovah, kpa Abasi oro ọyọhọde ye eti ido ye mbọm, oro ekemede ndinọ fi utịp nsinsi uwem!

[Mme Ikọ idakisọn̄]

[Ndise ke page 5]

Nte usụn̄uwem fo owụt esịtekọm oro enyenede ọnọ uwem?

[Ndise ke page 7]

Obufa ererimbot Abasi eyenam nnyịn idara inem uwem ke nsinsi!