Editịn̄ Ikọ ke Usem—Edinam Oro Ọkọride-Kọri
“ODUDU ama odụk mi edeme ndien ikọ ẹfiọrọ nte mmọn̄ ẹwọrọ. Nso n̄kpọ idara ke ekedi ntem! Mma nnyene ekikere edidi se ẹnamde asana ke utịbe utịbe usụn̄. Ami ntiehe ntre aba toto ke ini oro,” ntre ke owo emi ekenyenede utịbe utịbe ifiọk editịn̄ ikọ ke “usem oro owo mîfiọkke” eketịn̄.
Do afo omokop owo etịn̄de aban̄a ifiọk n̄kpọntịbe oro enye ekenyenede ke editịn̄ ikọ ke “usem oro owo mîfiọkke” ke akpa ini. Ndusụk owo ẹkeme ndibụp nte enende ẹte, ‘Edi nso edi oro?’ Enye aban̄a edinam m̀mê se ẹnịmde ke akpanikọ ke ndusụk ufọkederi emi irenowo ye iban ẹsidọhọde ke spirit Abasi esinụk mmimọ nditịn̄ ikọ ke esen m̀mê utịbe utịbe usem oro mmimọ mîfiọkke.
Emi edi edinam ido ukpono oro ọkọride-kọri. Editịn̄ ikọ ke usem emi ini kiet ko ẹkesede nte edinam mbon Pentecostal ikpọn̄îkpọn̄, idahaemi atara ebe adan̄a akani ido ukpono okosịm mbon Baptist, mbon Episcopal, mbon Lutheran, mbon Methodist, mbon Presbyterian, ye mbon Roman Catholic. Nte owo etiede ke ini odude ke idaha emi edi se ẹtịn̄de ẹban̄a nte akwa idatesịt, idat idat ntụk, n̄kukụt, ye ndap. Ndusụk owo ẹkam ẹkot enye ifiọk n̄kpọntịbe oro owo mîkemeke ndikara. Odu ndedịbe odudu oro atapde owo, emi enyenede ebuana ye editịn̄ ikọ ke usem, m̀mê uyom oro mîsịneke ifiọk.
Ntak Emi Ẹnyenede Udọn̄ Mfịn Ẹban̄a Editịn̄ Ikọ ke Usem?
Ke n̄wed esie oro Tongues of the Spirit, Cyril G. Williams ọnọ ekikere ete ke ekeme ndidi “ebuana odu ke ufọt ekikere edikpu oro owo enyenede, ye udọn̄ editịn̄ ikọ ke ‘usem.’” Enye etịn̄ aban̄a emi nte edinam oro ẹkpọhọrede ẹyak, emi enyenede “odudu ukọkudọn̄ọ nte n̄kpọ oro osụhọrede mfịghe” ye “n̄kpọ oro ọkọkde mfịna esịtidem.” Edikpu ke utom ufọkederi, mfịghe eke ntụk, edikpu ke ubọkọkọ, mfụhọ n̄kpa, mfịghe esịtufọk, m̀mê udọn̄ọ ke ubon ẹdi se ẹsiakde nte se isitịpde n̄kpọ isịn ke utọ idat idat editịn̄ ikọ oro.
Ukem ntre, ke The Psychology of Speaking in Tongues, John P. Kildahl ọdọhọ ete ke “editịmede esịt edi se ẹyomde man ẹkọri ukeme editịn̄ ikọ ke usem.” Otode ọkpọkpọ ndụn̄ọde ye edibụp mbụme ye ntịn̄enyịn, ẹma ẹkụt ẹte ke “mme etịn̄ ikọ ke usem ẹmi ẹwakde ẹkan mbahade 85 eke ikie ẹma ẹnyene in̄wan̄în̄wan̄ ọkpọsọn̄ editịmede esịt mbemiso mmọ ẹtịn̄de ikọ ke usem.” Ke uwụtn̄kpọ, ekaeyen kiet ama oyom nditịn̄ ikọ ke usem man ekpekeme ndibọn̄ akam nnọ eyeneren esie emi ọkọdọn̄ọde udọn̄ọ cancer. Eren kiet ama ọtọn̄ọ nditịn̄ ikọ ke usem ke ufan̄ ini oro enye mîkenyeneke ubiere ndinam ke ini ekemenerede enye itie ke utom. N̄wan kiet ama ọtọn̄ọ nditịn̄ ikọ ke usem ke ufan̄ urua kiet ke ebe esie ama eketiene odụk N̄ka Unọ Un̄wam ndikan mbumehe uda n̄kpọsọn̄ mmịn.
Didie ke Esitie Owo ke Idem?
Owo efen emi eketịn̄de ikọ ke usem ke akpa ini ama ọtọt ete: “Mma n̄kop ọkpọsọn̄ ntụk ke esịtidem mi, ndien idem mi ebịt ye ntọi ibibiak, nyekidem ye mmemidem ke ubọk ye ukot mi.” Se ibuanade ye ifiọk n̄kpọntịbe editịn̄ ikọ ke usem esiwak ndidi esen esen edu oro esitịmerede ndusụk owo. Ke uwụtn̄kpọ, “akayak esisịt etap ndikpan̄a n̄kaiferi kiet nte enye akanyanarede ke akpakaha, itọn̄ esie odoro ke edem akpakaha oro, nditịn̄-ikpat esie ke isọn̄ufọk, ukot esie ẹdoro ibikpai.” Ke ini ufọkederi kiet okodụkde ederi “eren kiet ama esịn mfiak-n̄kabade tọn̄ọde ke utịt ufọkederi kiet tutu osịm eken.”
“Ye ndusụk owo,” nte Prọfesọ William J. Samarin ewetde, “editịn̄ ikọ ke usem edi se ẹyomde man owo ana baptism ke Edisana Spirit.” Ke enye mîdụhe, ẹnam mmọ “ẹkere ẹte ke mmimọ itịmke idot.” Ẹda enye n̄ko “nte ibọrọ akam, nsọn̄ọ edinyene ima ye unyịme Abasi.” Mmọ en̄wen ẹdọhọ ẹte ke enye anam etie nte ke mmimọ imada ekekem ke esịtidem, inyene idatesịt, ye emem, inyụn̄ “inen̄ede ikop odudu” inyụn̄ “itịm idi se ẹdiọn̄ọde.”
Nte editịn̄ ikọ idat idat enen̄ede edi uyarade edinam edisana spirit? Ndi n̄kpọntịbe emi adianade owo osio onịm nte Christian akpanikọ? Nte editịn̄ ikọ ke usem edi ubak utuakibuot oro ẹnyịmede mfịn? Mbụme ẹmi oyom se ikande enyọn̄ enyọn̄ ibọrọ. Ntak-a? Koro nnyịn iyom utuakibuot nnyịn enyene unyịme ye edidiọn̄ Abasi.