Didie ke Gospel Ekeme Ndinyene Ufọn Nnọ Fi?
ẸNEN̄EDE ẹda Bible ke akpan n̄wed ke ntak ata ufọn esie—idem ke otu ndusụk mbon oro mînịmke edidu Abasi ke akpanikọ. Nte ededi, ibat ibat owo ẹnen̄ede ẹkot enye man ẹda se enye etịn̄de ẹsịn ke edinam. Akan oro, sia eti mbụk oro enye akamade ebịghide ke se ikperede ndisịm tọsịn isua iba ẹmi ẹkebede, etie nte uwak owo ẹkere ke akpana ẹnam enye ekekem ye eyomfịn, ẹnam ekekem ye ifiọk idahaemi. Nte Gospel edi n̄kpọeset m̀mê se owo mîyomke aba? Baba-o.
Odu iren ye iban, n̄kpri ye ikpọ, ke mme itie miliọn, ẹmi ẹdiọn̄ọde ẹte ke Bible edi ata eti ebiet emi un̄wam otode. Enye edi nte ẹwetde ke mbemiso ikọ Today’s English Version ete: “Bible idịghe sụk ọwọrọiso n̄wed oro anade ẹma ẹnyụn̄ ẹkpono; enye edi Eti Mbụk enyenede kpukpru owo ke kpukpru ebiet—etop oro anade ẹfiọk ẹnyụn̄ ẹda ẹsịn ke edinam ke uwem eke usen ke usen.”
Nso ke Gospel ọwọrọ ọnọ fi? Nte afo amada enye nte n̄kpọ ukpeme ke uwem fo eke usen ke usen? Kere nte eti mbụk ọkọnọde ndusụk owo oro ẹkekpan̄de utọn̄ ẹnọ enye ufọn ke akpa isua ikie ye nte ndusụk owo ẹbọde ufọn ke eyo nnyịn.
Mme Owo Oro Gospel An̄wamde
Ke eyo Jesus eti mbụk ama odụri mme utọ owo nte mme enyene-ifịk ọkọiyak ndien ibanndọ ẹma ẹnyụn̄ ẹkpep akpanikọ aban̄ade uduak Abasi kaban̄a owo. Eti mbụk ama okpụhọde uwem mmọ akamba akamba onyụn̄ ada akwa ubọhọ ọsọk mmọ. Ke uwụtn̄kpọ, ẹma ẹkọk Mary Magdalene emi demon ẹketụhọrede. Zacchaeus, emi ekedide etubom ọbọ tax ke mbemiso, ama ọkpọn̄ ibụk ibụk usụn̄uwem esie. (Luke 8:2; 19:1-10) Ẹma ẹn̄wam mme nnan ye mbon akpamfia ke ini mmọ ẹkekade ẹbịne Jesus, kpa enyeemi ọkọkwọrọde eti mbụk. (Luke 17:11-19; John 9:1-7) Jesus ama ekeme ndidọhọ nte enende ete: “Mme nnan ẹkụt usụn̄, mbon mbụn̄ọ ẹsan̄a, ẹnam mbon akpamfia ẹsana, mme inan ẹkop ikọ, ẹnam mme akpan̄kpa ẹset, ẹnyụn̄ ẹkwọrọ eti mbụk ẹnọ mme ubuene.”—Matthew 11:5.
Nte ededi, se idide akpan n̄kpọ ikan edinam mmọ ẹkop nsọn̄idem ekedi usụn̄ nte eti mbụk okokpụhọrede ediwak mbon oro ẹkedude ke idiọk idaha do nte mme owo. Ẹma ẹnọ mbon esịt akpanikọ idotenyịn kaban̄a ini iso. Mmọ ẹma ẹkọn̄ mbuọtidem mmọ ke Obio Ubọn̄ Abasi—n̄kpọ oro ọkọfọnde akan gospel mfọnido ekededi. (Matthew 4:23) N̄kpa Jesus ikanamke idotenyịn mmọ okpu. Ke etịn̄de nte n̄kpọ ẹketiede ke n̄kpọntịbe oro ẹma ẹkebe, Utom Mme Apostle 5:42 etịn̄ aban̄a mme mbet esie ete: “Kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, ete Jesus edi Christ.” Ke akpa isua ikie, mme owo ke ediwak idụt ẹma ẹbọ un̄wam eke spirit koro mmọ ẹkekpan̄de utọn̄ ẹnọ utọ ukwọrọikọ oro.
Obio Ubọn̄ ekedi mfọnn̄kan mbụk ini oro. Nte etop Obio Ubọn̄ ke osụk edi eti mbụk?
Nso ke Eti Mbụk Ọwọrọ Mfịn?
Edieke ọdọn̄de fi ndidu ke emem emem, ererimbot emi enyenede ifụre, do mbụk Obio Ubọn̄ enen̄ede edi eti. Ke akpanikọ, ke ererimbot oro miliọn owo ke mme itie ikie mîdiaha nti udia ẹnyụn̄ ẹkpade biọn̄, ye mme enyene-ndịk udọn̄ọ ẹdịghede uwem kpukpru owo, ye enyenendịk n̄kọri ke ubiatibet, n̄ko ye ntatara unana iwụk ke ndutịm ukaraidem, enye akam edi ata eti mbụk oro ebịghide. Emi owụt n̄kukụre idotenyịn kaban̄a edinam mme n̄kpọ ẹnen̄ede ẹfọn.
Oro edi ntak Jesus eketịn̄de prọfesi aban̄a eyo nnyịn ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:14) Mme ikọ ẹmi ẹmesu ke n̄wọrọnda usụn̄ nte Mme Ntiense Jehovah ẹkwọrọde eti mbụk ke se iwakde ikan idụt 200. N̄wed Catholic kiet, Nova Evangelização 2000, otoro Mme Ntiense kaban̄a emi, ọdọhọde ete: “M̀mọ̀n̄ ke nnyịn ikụt Mme Ntiense Jehovah? Ke mme enyịnusụn̄ ufọk owo. Ndien man owo edi Ntiense Jehovah, ke ẹsiode edidi eke Jehovah ẹfep, owo enyene ndidi ọnọ ikọ ntiense. Ke ntre, nnyịn ikụt mmọ ẹnamde utom, ẹnọde ntọt, ẹwụtde, se mmọ ẹfiọkde.”
Nte ededi, baba owo kiet ibọhọ ufọn ito eti mbụk ke mbuari. Enye edin̄wam mbon oro ẹkopde ẹnyụn̄ ẹnamde kpọt. Ke ndinam n̄kpọ emi an̄wan̄a, Jesus ama otop n̄ke aban̄ade owo oro akakade ndisuan n̄kpasịp. Nsio nsio orụk isọn̄ ẹmi mme n̄kpasịp oro ẹkeduọn̄ọde ẹkewụt nsio nsio orụk idaha esịt oro mme andikop eti mbụk ẹwụtde. Jesus ọkọdọhọ ete: “Ke ini owo ekededi okopde ikọ Obio Ubọn̄ Heaven, mînyụn̄ ifiọkke se ọwọrọde, andidiọk edi editan̄ se ẹkesuande ke esịt owo oro . . . Enyeemi ẹsuande n̄kpasịp ke eti isọn̄, edi owo emi okopde ikọ, onyụn̄ ọfiọkde se enye ọwọrọde; emi onyụn̄ osion̄ode mfri ke akpanikọ, onyụn̄ on̄wụmde idem, ndusụk utịm ikikie, ndusụk utịm ikaata, ndisụk utịm ike edịp-ye-duop.”—Matthew 13:18-23.
Nte ekedide ke akpa isua ikie, ekese owo mfịn ẹsịn esisịt ukeme ndifiọk se eti mbụk ọwọrọde. Mmọ idiọn̄ọke se enye ọwọrọde, ndien ntre mmọ ibọhọ mme ufọn esie. Mbon eken ẹwụt esịtekọm ẹnọ eti mbụk ẹnyụn̄ ẹkpep ndinam uwem mmọ ekekem ye uduak Abasi. Ke usụn̄ emi ẹdiọn̄ mmọ. Afo esịne ke ewe otu?
Odudu Oro Gospel Enyenede Mfịn
Mme ifiọk n̄kpọntịbe ẹwụt ẹte ke ndifiọk eti mbụk an̄wam mbon oro ‘mîkenyeneke idotenyịn, mîkonyụn̄ ifiọkke Abasi.’ (Ephesus 2:12; 4:22-24) Roberto otode Rio de Janeiro ama oyom un̄wam. Toto ke uyen esie, enye okodu oburobụt uwem, abuana ke edida n̄kpọsọn̄ ibọk, oburobụt ido, ye uyịpinọ. Ke akpatre ẹma ẹsịn enye ke ufọk-n̄kpọkọbi. Ke adan̄aemi odude do Roberto ama ekpep Bible ye Ntiense emi ekedide esen. Enye ama anam n̄kọri ata etieti ke n̄kan̄ eke spirit tutu ẹsụhọde isua n̄kpọkọbi esie.
Ke ẹma ẹkesana enye ẹyak, Roberto ama osobo n̄kaiferi kiet emi enye okowode inikiet onyụn̄ adade ikan̄ edịghe uwem. Eyenan̄wan emi n̄ko ke ekekpep Bible ye Mme Ntiense Jehovah. Nso ikotịbe? Se itienede mi edi ubak leta emi obụkde n̄kpọntịbe oro: “Mmọ ẹma ẹsobo kiet eken ke Ufọkmbono Obio Ubọn̄ ke akpa ini ke n̄wo oro ama ekebe. Edisobo oro ama otụk mmọ esịt. Mmọn̄eyet idara ama asiaha mmọ mbiba mmọ ẹma ẹnyụn̄ ẹfat kiet eken nte eyeneka eren ye n̄wan. Idahaemi akani inọ emi ye owo emi enye okowode do ke ẹtoro Jehovah.”
Owo efen, Isabel, ama oyom un̄wam n̄ko, koro ẹma ẹdiọn̄ọ enye ke ntak ibụmede iyatesịt esie. Enye ama enen̄ede esịn idem ke ubụpekpo ye ifọt ndien mme demon ẹma ẹtụhọde enye. Nte enye ekekpepde Bible ye Mme Ntiense Jehovah, enye ama okụt ete ke eti mbụk ama enen̄ede an̄wam. Ke esisịt ini ebede, enye ama ọbọhọ odudu mme demon onyụn̄ okpụhọde edu esie—ke akpatre ekpep ndikara esịt esie. Idahaemi enye edi anam-akpanikọ Christian, emi ẹdiọn̄ọde nte owo emi anamde n̄kpọ ke sụn̄sụn̄ ido ye mbon en̄wen.
Ih, eti mbụk idịghe ikpîkpu mbụk. Enye enyene ata odudu ndikpụhọde uwem owo. (1 Corinth 6:9-11) Enye anam se ikam ikande oro. Enye n̄ko anyan ubọk owụt mme edidiọn̄ ini iso.
Mme Edidiọn̄ Ẹsụk Ẹnade ke Iso
Nte ekemde ye Ikọ Abasi, ini iso akama utịbe idotenyịn. Nnyịn iyekụt edisu akam oro Jesus ọkọbọn̄de aban̄a Obio Ubọn̄ Abasi ndidi ye edinam uduak esie ke isọn̄ nte ẹnamde ke heaven. (Matthew 6:10) Ibịghike, eyesio editịm n̄kpọ emi odude kemi ye mbiara ufịk ye afai esie ẹfep, ndien ukara Abasi eke heaven, kpa Obio Ubọn̄ esie, eyekara mbon eti esịt oro ẹkenyịmede ndikpan̄ utọn̄ nnyụn̄ n̄kop uyo nnọ eti mbụk.—Daniel 2:44.
Ikpọ ukpụhọde ẹyeda itie nte edinọde mme owo ẹmi ẹnamde akpanikọ ndausụn̄ ndinam isọn̄ akabade edi paradise ke ebiet emi mbon nsụkidem ẹdidụn̄de ke nsinsi. (Psalm 37:11, 29) Ke akpanikọ, edi eti mbụk nte ke ubiatibet, udọn̄ọ, akan̄, usabade n̄kpọ, ye mme ekọn̄ ẹyebe ẹfep ke nsinsi! Nte afo emekeme ndikụt idemfo ye ubon fo ẹdude uwem ke obufa ererimbot oro ke emem ye mfọnmma nsọn̄idem ye unana ndịk kaban̄a udọn̄ọ m̀mê n̄kpa?—Ediyarade 21:4.
Edi akpanikọ, ediwak owo ẹda utọ eti mbụk oro nte n̄kpọ mbubru m̀mê se mîdịghe akpanikọ. Edi mmọ inenke. Eti mbụk ọkọn̄ọ ke ata isọn̄ akpanikọ, ndien enye okpokpụhọde uwem ediwak miliọn owo kan̄a. Ke ntre, kûkop ndịk edieke mbon efen mînịmke.
Kere ban̄a enyene-ọniọn̄ owo emi edepde isọn̄ ke ebiet oro ọtọn̄ọde-tọn̄ọ uforo, odoride enyịn ndinyene udori ke mbubehe esie. Nte owo ekededi ekeme ndiduọhọ enye ke ndida okụk esie nnam n̄kpọ ke usụn̄ emi? Baba. Akam etie nte, mme owo ẹyedọhọ ke enye anam n̄kpọ ọniọn̄ ọniọn̄. Ntak, ndien, mûnamke n̄kpọ ye eti ibuot uban̄a Obio Ubọn̄ unyụn̄ usịn idem, yak idọhọ, ke eti mbụk? Sia ndinyịme eti mbụk ọwọrọde edinyan̄a, idụhe mbubehe ndomokiet oro edidade nti utịp edi akan enye.—Rome 1:16.
Didie ke ekeme ndisịn idem ke eti mbụk? Akpa, nyịme Abasi ọnọ fi ukpep. Ndien nam n̄kpọ nte ekemde ye se afo ekpepde. Nam mme akpan n̄kpọ oro ẹyomde, nte prọfet Hebrew eset ekewetde ete: “Nso ke Jehovah oyom ye afo, ke mîbọhọke ndinam se inende, nnyụn̄ mma ima Abasi, nnyụn̄ nsụk idem nsan̄a ye Abasi fo?” (Micah 6:8) Ndikpep ndisan̄a ye Abasi esida ini ye ukeme. Edi, Mme Ntiense Jehovah, ẹmi ẹken̄wamde Roberto ye Isabel, ẹyenem esịt ndin̄wam fi ke afan̄ emi—nte mmọ ẹken̄wamde ediwak miliọn mbon efen ke mme isua ẹmi ẹkebede.
Ke adan̄aemi ebetde mme un̄wọn̄ọ Abasi ndisu, bọk inyene fo ke edidu uwem nte ekemde ye eti mbụk, adarade ifụre ekikere onyụn̄ ọbọpde n̄kpet n̄kpet itie ebuana ye Abasi. Eyekpeme inyene fo—idụhe mfịghe ndutịm uforo m̀mê unana iwụk ke ukaraidem oro edidịghede enye. Ndien ke akpatre, enye eyeda enyene-ndyọ utịp edi. Nso idi utịp oro? Apostle John ekewet ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.”—1 John 2:17.
[Ndise ke page 7]
N̄kpasịp eti mbụk ọduọn̄ọ ke nsio nsio orụk isọn̄
[Ebiet Ẹdade N̄kpọ Ẹto]
Garo Nalbandian