Abasi Ifreke “Ima Enyịn̄ Esie Eke Mbufo Ẹwụtde”
“ABASI ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.” (Mme Hebrew 6:10) Mme ikọ apostle Paul ẹmi ẹdi akpanikọ ọnọ Mme Ntiense Jehovah ke Edem Usiahautịn Europe. Ke ẹnamde n̄kpọ ke edinam akpanikọ ke ufọn enyịn̄ Abasi, ke ediwak isua ẹmi ẹkebede mmọ ẹma ẹnam utom ọkpọsọn̄ ọkpọsọn̄ ke anyanini ke idak ukpan oro akani odudu ukara mbon Soviet okodoride. Jehovah eti nti utom mmọ onyụn̄ an̄wan̄a mme edidiọn̄ Obio Ubọn̄ ọnọ mmọ. Ke uwụtn̄kpọ, ẹyak nnyịn ise ntọt ibatutom isua utom oro ekebede ke idụt ita kpọt ke otu mme ikpehe ẹmi.
Mme Efakutom Akani Soviet Union
Mme efakutom akani Soviet Union ẹtọt ẹte ke isua utom 1992, n̄wakn̄kan ibat mme asuanetop Obio Ubọn̄ ama ọkọri ke mbahade 35 eke ikie—oto ke 49,171 osịm 66,211! Edi ikụreke ke oro, sia mme asuanetop ẹmi ẹkenamde utom ata ifịk ifịk, nte ẹkụtde ebe ke eti n̄kọri ke ibat n̄wed ukpep Bible oro ẹkenịmde, ọkọrọ ye mme magazine. Mmọ ẹma ẹda n̄kpri n̄wed ẹnam n̄kpọ nte ọfọnde n̄ko, ẹnịmde 1,654,559. Oro ama awak ke se ibede utịm ikata akan 477,235 oro ẹkenịmde isua oko! Nso idi utịp ke kpukpru n̄wed ẹmi ẹkenịmde? N̄kọri utịm ikaba ke mme ukpepn̄kpọ Bible. Idahaemi ke ẹnịm mme ukpepn̄kpọ Bible 38,484.
N̄ko, edibuana ke utom usiakusụn̄ unọ un̄wam ama ọdọk ke mbahade 94 eke ikie. Emi nte an̄wan̄ade ama etịp n̄kpọ esịn ke n̄wọrọnda ibat mbufa mbet 26,986 ẹmi ẹkenade baptism, ke ẹmende ẹdomo ye 6,570 eke isua oko, kpa akpa-owo idem n̄kọri ke mbahade 311 eke ikie!
Didie ke ndusụk mbufa owo oro ẹkenade baptism ẹkesan̄a ẹdinyene udọn̄ ke eti mbụk ke akpa ini? Ke ndusụk ini ntotụn̄ọ udọn̄ emi Ntiense oro onịmde ukpepn̄kpọ enyenede ekedi ntak. Esenyịn etiede ibuot ke Moldova obụk ete:
“Ami ye n̄wan mi ima ika ikese n̄wan kiet emi okowụtde udọn̄ ke akpanikọ Bible ke akpa. Ima itọn̄ọ ukpepn̄kpọ Bible ye enye. Nte ededi, ebe esie ikenyeneke udọn̄ ndomo esisịt. Usen kiet ke ini nnyịn ikosụk isan̄ade ke usụn̄ ika ndise enye man ikaiso ke ukpepn̄kpọ, enyọn̄ ama ọdiọk etieti onyụn̄ ọyọhọ ye snow. Ekedi ọkpọsọn̄ n̄kpọ ndikụt owo ndomokiet ke efak, edi nnyịn ima ikosịm ufọk esie ke nnennen ini oro ikonịmde. Enye ama asian ebe esie ete: ‘Omokụt adan̄a nte mbon ẹmi ẹkerede ẹban̄a nnyịn? Mmọ ẹma ẹdi ke nnennen ini kpa ye snow.’ N̄kpọntịbe emi ama anam ebe esie ekere n̄kpọ. Enye ama okpụhọde ekikere esie onyụn̄ etiene abuana ke ukpepn̄kpọ oro, ndien idahaemi enye ye n̄wan esie ẹdi Mme Ntiense ẹmi ẹma ẹkena baptism.”
Ke mme ini efen ufan ufan edu oro Ntiense enyenede ekeme ndinam owo enyene udọn̄ ke eti mbụk. Ebiowo, emi n̄ko otode Moldova, ama enyene ifiọkutom emi:
“Eren kiet oro n̄kawahade ntiene ke efakutom ukwọrọikọ mi ikenyeneke udọn̄ ke Mme Ntiense Jehovah. Enye ọkọdọhọ ete ke imọ idi owo Ufọkederi Orthodox, ukem nte ete ye eteete esie. Ntre enye ama ọdọhọ mi n̄wọrọ n̄kpọn̄ esịt ebiet oro. Nte ededi, mbemiso n̄kọkpọn̄de, enye ama ọnọ mi ifet nditịn̄ ntak ediwaha mi nnọ enye. Mma nnyan ubọk n̄wụt Matthew 28:19, emi ọdọhọde ete: ‘Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye edisana spirit.’ Ndien mma nnọ enye adres itie mbonoesop nnyịn nnyụn̄ nnyọn̄. Ke n̄kpaidem, ke urua kiet ama ekebe eren emi ama edi mbonoesop nnyịn! Enye ama etie tutu edinam okụre. Enye ama anam an̄wan̄a ete ke ofụri urua oro, ke imọ ima itua n̄kpọfiọk ke ntak nsọn̄ido oro ikowụtde ye ami. Ukpepn̄kpọ Bible ama ọtọn̄ọ ke ndondo oro, ndien idahaemi enye edi kiet ke otu nditọete nnyịn.”
N̄wọrọnda n̄kpọ efen ke isua utom emi edi usọp usọp edise mban̄a udọn̄ nditọete nnyịn ke ikpehe oro. Ke ini etuep eke 1991 ye 1992, ẹma ẹnọ udia awakde tọn 400 ye ata ediwak edisịnen̄kpọ irenowo, iban, ye nditọwọn̄ ẹsọk mbon oro ẹkedude ke unana. Ekpere ndidi ẹma ẹnọ mme n̄kpọ oro ẹka kpukpru ikpehe ke efakutom akani Soviet Union, idem tutu osịm Irkutsk ke Siberia ye Khabarovsk, emi ekperede Japan. Ke akpanikọ emi edi uyarade oro otụkde owo ke idem nte ke Jehovah ifreke ima oro nditọete nnyịn ẹwụtde ẹnọ enyịn̄ esie! Idiọn̄ọ ima nditọete emi spirit Jehovah ekedemerede mi ama enyene utịp n̄ko ke ndinam mmọ ẹdiana ọtọkiet ke ubon ofụri ererimbot mmọ. Ke uwụtn̄kpọ, eyenete an̄wan kiet ke Ukraine ama ewet ọfis n̄kọk itieutom ete:
“Un̄wam oro mbufo ẹkenọde nnyịn ama otụk nnyịn ọwọn̄esịt. Mmọn̄eyet ama asiaha nnyịn ke enyịn ndien nnyịn ima ikọm Jehovah Abasi sia mîkefreke iban̄a nnyịn. Edi akpanikọ. nnyịn imokụt nsọn̄ọn̄kpọ eke obụkidem idahaemi, edi ye un̄wam oro okotode nditọete nnyịn ke Edem Usoputịn edibehe, nnyịn imafiak ikop idem ke n̄kan̄ n̄kpọ obụkidem. Idahaemi, ke ntak un̄wam emi mbufo ẹnọde, ubon nnyịn eyekeme ndisịn ekese ini ke utom Jehovah. Ke edide uduak Jehovah, ami ye eyen mi an̄wan iyenam utom usiakusụn̄ unọ un̄wam ke mme ọfiọn̄ ini ndaeyo.”
Ke adianade do, ndutịm unọ un̄wam oro ama ọnọ mbon an̄wa ikọ ntiense koro mme andida nse ẹma ẹkeme ndikụt nte ke Mme Ntiense ẹsịwụt ima ebe ke mme edinam mmọ. Ubon emi otode esop efen ama ewet ete: “Nnyịn ima ibọ un̄wam n̄kpọ obụkidem oro esịnede udia ye edisịnen̄kpọ. Enye amawak etieti! Un̄wam ye nsịnudọn̄ mbufo ẹdi ukpepn̄kpọ ọnọ nnyịn nte ke nnyịn n̄ko inyene ndinam eti n̄kpọ nnọ mmọ efen. Mbon oro mînịmke ke akpanikọ ẹma ẹfiọk ẹban̄a edinam ima emi, ọkọrọ ye mmọ oro ẹnyenede udọn̄ ye ubon mmọ; enye edi ata akamba n̄kpọ ntiense kaban̄a ata itie ebuana nditọete.”
Mme mbono district ition ye mbono ofụri ererimbot kiet oro ẹkenịmde ke June ye July ẹmi ẹkebede, ye ibuotikọ oro “Mme Ọnọ Un̄wana,” ẹkedi uyarade edidiọn̄ Jehovah efen ke ọkpọsọn̄ utom Mme Ntiense esie ye ima oro mmọ ẹwụtde ke ndinam ẹfiọk enyịn̄ esie. Owo 91,673 ẹkedụk mme mbono oro, ndien 8,562 ẹkena baptism. N̄wakn̄kan mme andidụk ekedi ke St. Petersburg, kpa ebiet emi ẹkenịmde mbono ofụri ererimbot, emi owo 46,214—ẹsịnede mme andidụk ẹtode n̄kpọ nte mme idụt 30 ke ofụri ererimbot—ẹkesopde idem ke An̄wambre ke Kirov.
Ke Siberia eren kiet emi edide n̄kpọ nte isua 60 ke emana ama aka an̄wa mbono ke Irkutsk n̄kukụre ndise nte n̄kpọ akade iso. Enye ọkọdọhọ ete: “Kpukpru mme andidụk ẹsịne n̄kpọ nte eyede, ẹnyụn̄ ẹkama iso imam imam, ẹnyụn̄ ẹfọn ido ye kiet eken. Mme owo ẹmi ẹtie nte ubon emi adianade kiet. Owo ekeme ndikụt nte ke mmọ ẹtie ufan ufan idịghe n̄kukụre ke an̄wambre oro edi n̄ko ke edinam mmọ eke usen ke usen. Ami mma mbọ eti n̄wed un̄wam ukpepn̄kpọ Bible nnyụn̄ ntịm n̄kpep mfiọk se orụk esop idi emi. Ami nyom ndinyene ebuana ye Mme Ntiense Jehovah ndinyụn̄ n̄kpep Bible ye mmọ.”
Ke kpa mbono oro ke Irkutsk, emi owo 5,051 ẹkedụkde, n̄wan kiet oro enyenede udọn̄ emi otode Yakut Republic, Siberia, ama etịn̄ ete: “Ami mma nse mme owo ẹmi, nnyụn̄ nyom ndifiori n̄kpo idatesịt. Ami mmọkọm Jehovah etieti ke ndikan̄wam mi ndiọn̄ọ mme utọ owo ẹmi. Mi ke itiembono, ami mmọbọ mme n̄wed, nnyụn̄ nyom nditịn̄ nnọ mbon efen mban̄a enye. Ami mmenen̄ede nyom ndidi andituak ibuot nnọ Jehovah.”
Esenyịn An̄wambre Central ke Alma Ata, Kazakhstan, emi owo 6,605 ẹkedụkde mbono, ama etịn̄ se itienede mi: “Ami mmokop inemesịt mban̄a edu mbufo. Idahaemi ami mmonịm nte ke kpukpru mbufo, n̄kpri ye ikpọ, ẹdi mbon ẹmi ẹdotde ukpono. Ami n̄kemeke ndidọhọ ke mmonịm Abasi ke akpanikọ, edi mmonịm ndisana n̄kpọ oro itie nditọete mbufo anamde ẹdiọn̄ọ ke akpanikọ, ke edu mbufo kaban̄a ufọn n̄kpọ spirit ye eke obụk.”
Akamba owo bodisi kiet ke itiembono Alma Ata ama ọdọhọ ete: “Ami mmosobo ye mbufo utịm ikaba, kpukpru ini ẹmi ke an̄wa mbono. Edi ata akamba n̄kpọ inemesịt ndinam utom ye Mme Ntiense Jehovah.”
Romania
Jehovah ifreke ima enyịn̄ esie oro nditọete ke Romania ẹwụtde n̄ko. Isua utom emi ebede omokụt uwak n̄kpọ inemesịt ọnọ Mme Ntiense. Akpa, ẹma ẹfiak ẹtọn̄ọ ọfis n̄kọk itieutom ke Bucharest. Akpatre utom oro ibet ọnọde unyịme eketre ke 1949. Nditọete iren ye iban 20 ẹnam utom ke ọfis ke obufa itieutom emi. Ọfis n̄kọk itieutom emi ese aban̄a mme asuanetop 24,752—kpa n̄wakn̄kan ibat ofụri ini oro adade n̄kọri mbahade 21 eke ikie awak akan mbahade eke isua oko.
Ke ediwak isua ukwọrọikọ ke ndịbe ẹma ẹkebe, mme asuanetop ke ẹnam ukpụhọde mfọn mfọn ekekem ye an̄wan̄wa utom edinọ ikọ ntiense eke ufọk-ke-ufọk. Ifiọkutom otode Mbahade Obio Ukara Mureş owụt nte ndusụk Mme Ntiense ẹdade ifet ekededi oro ebederede ẹnam n̄kpọ ke eti usụn̄ ke ndikwọrọ ikọ nnọ mbon efen, idem ke ini mmọ ẹkade isan̄. Ọfis n̄kọk itieutom oro ewet ete:
“Asuanetop kiet ama ebiere ndikwọrọ ikọ to ke ubet tren kiet sịm eken. Nte mme owo ẹkenamde n̄kpọ ke ofụri ofụri ama ọfọn, edi ke akpatre ubet, ndusụk mfịna ẹma ẹdemede. Baba kiet ke otu mme akaisan̄ oro ikoyomke ndibọ mme magazine nnyịn ndomokiet. Ke akpatre, eren kiet, ke ọkpọsọn̄ iyatesịt, ama adaha ada onyụn̄ ofiori ete: ‘Mmọn̄ ntop kpukpru magazine fo ke window nduọn̄ọ! Ntak afịnade nnyịn ntre ye ido ukpono fo?’ Asuanetop oro ama ọbọrọ sụn̄sụn̄ ete idem edieke enye otopde mme magazine oro ọduọn̄ọ, owo efen ekeme ndibọ ufọn nto edinam esie—mbon oro ẹditan̄de mme magazine oro. Ke okụtde sụn̄sụn̄ ido oro asuanetop oro okowụtde mi, ama otụk eren oro ke idem tutu enye esịn ubọk ọbọ mme magazine oro onyụn̄ ọtọn̄ọ ndideme ke idemesie nnọ mme akaisan̄ eken ke ubet oro. Ke n̄kpaidem, kpukpru mmọ ẹma ẹbọ magazine kiet kiet. Ke ama ekedeme mmọ ama, eren oro ikenyeneke idem ndomokiet ke idemesie. Ke ntre, asuanetop oro ama obụp enye ete: ‘Ete, nte afo uyomke ndomokiet ke idemfo?’ Ntem eren oro ama esịn ubọk ọbọ akaisan̄ emi ekenyenede idem iba magazine kiet onyụn̄ ọdọhọ ete: ‘Idahaemi ami mmenyene kiet n̄ko!’”
Ke ediwak idụt utom ukwọrọikọ Mme Ntiense Jehovah ke ndusụk ini esisobo ubiọn̄ọ otode mme ọkwọrọ ederi Christendom. Ke Romania, mme oku Ufọkederi Orthodox ẹsiwak ndiyat esịt ye Mme Ntiense. Edi emi ikemeke ndikpan Jehovah ndidiọn̄ ikọt esie ke ima enyịn̄ esie emi mmọ ẹwụtde. Esenyịn circuit kiet ewet ete:
“Adianade ye esop n̄kann̄kụk, nnyịn ima iwọrọ an̄wautom ke mme obio-in̄wan̄. Nditọete ikie ẹkebuana. Nnyịn ima ibọ bọs ke ukpeokụk oro akadade nnyịn ke itiat 35 ebe obio-in̄wan̄, okosịm ekpri obio oro. Nnyịn ima inọ ediwak owo ikot ndidụk utịn̄ikọ an̄wa oro ikenyenede ndinịm ke Ufọkmbono Ido Obio. Ndondo oro mbonoesop ọkọtọn̄ọde, oku Ufọkederi Orthodox ama edi nditịmede mbonoesop nnyịn. Ikpọ owo bodisi ẹma ẹdomo ndikpan oku oro. Edi, enye ama esịn ndisụhọde esịt. Enye ama okụt unen ke nditre mbonoesop oro ke ini enye okobomde akrasi ke usụn̄ ẹsisan̄ade ẹdụk ufọk emi. Nte ededi, ediwak mbon n̄kann̄kụk oro ikonyịmeke edinam oku oro ke baba usụn̄ kiet. Ẹma ẹkeme ndien ndinọ kpukpru mbon oro ẹkedude ke mbonoesop oro ọyọhọ ikọ ntiense, ẹma ẹnyụn̄ ẹnịm ediwak n̄wed.”
Ke ndiọkiso, ata esisịt ibat Mme Ntiense ẹdu ke ndusụk ikpehe ke idụt oro. Ke ini asiakusụn̄ ofụri ini kiet ke akpa ini okosịmde mbahade obio ukara Olt, enye okokụt nditọete usụkkiet kpọt ke ofụri mbahade obio ukara oro ye akamba efakutom ndikwọrọ ikọ. Ke isua kiet ama ekebe ibat Mme Ntiense ama ọdọk osịm 27, emi ition ẹkedide mme asuanetop ẹmi ẹkesịnde udọn̄ ẹnọ ẹfiak ẹsọn̄ idem. Asiakusụn̄ oro ama okụt ufọk ke obio Corabia, emi Mme Ntiense ndomokiet mîkodụhe. Ke Mme Ntiense oro ẹma ẹkedu do ke usen 45 kpọt oku n̄kann̄kụk oro ama asuan etop ke radio Craiova ndibiọn̄ọ utom. Enye ọkọdọhọ ete ke mmọ “ẹbụmede ẹdụk” obio Corabia ye mme ukpepn̄kpọ mmọ, ẹdomode ndinam mme owo ẹkpụhọde ido ukpono mmọ. En̄wan emi ama akaiso, ye uduak editre utom nnyụn̄ mbiat enyịn Mme Ntiense ke ikpehe oro. Kpukpru emi ama osịm utịt ke ini nditọete oro ẹkedụkde mbono district ke Bucharest. Oku Ufọkederi Orthodox ke Corabia ama ọnọ ata ọkpọsọn̄ ntọt ke ederi esie ama akasuana ete: “Kpukpru nnyịn inyene ndisịn ntịme ke efak man idemede mme bodisi ẹnam n̄kpọ ndibiọn̄ọ Mme Ntiense, ẹmi ẹma ẹkeyọhọ ofụri ikpehe emi ye mme n̄wed mmọ ẹnyụn̄ ẹbiat mme owo.” Edi okoneyo oro mbemiso mbono oro ẹkeduakde, esen esen n̄kpọ ama otịbe. Otu mbon ntịme ẹma ẹwụri akwa ufọkederi oro ye Ufọkmbono Ido Obio. Ke ntre, mbono usịn ntịme oro ikadaha itie tutu amama!
Mme Efakutom Akani Yugoslavia
Isua utom 1992 ekedi ata ọkpọsọn̄ isua ọnọ nditọete nnyịn ke ikpehe Yugoslavia. Ke ukem ini oro, nte ededi, mmọ ẹma ẹnyene ndusụk idara idara ifiọkutom. Ye esịtekọm, Jehovah ifreke utom mmọ ye ima enyịn̄ esie oro mmọ ẹkewụtde.
Ekọn̄ ekebemiso ọtọn̄ọ ke Slovenia, ekem ke Croatia, ndien ke ukperedem ke Bosnia ye Herzegovina. Ke ufan̄ isua kiet, ke obio ukara kiet, mbufa Idụt ition ẹma ẹdomo ndibahade mme adan̄a, ndinam mbet, ye okụk mmọ. Mme Ntiense ke mme itie ikie ẹkenyene ndifehe n̄kpọn̄ ufọkidụn̄ mmọ n̄koyom ubọhọ nto nditọete mmọ ke mme ebiet efen. Ukem nte mme idụt eken ke Edem Usiahautịn Europe, ẹma ẹmek mme kọmiti ẹsede ẹban̄a mbabuat n̄kpọntịbe ke ikpọ obio ndise mban̄a itieidụn̄, udia, ye edisịnen̄kpọ eke nditọete nnyịn oro ẹdude ke unana. Ke isua utom oro, ẹma ẹdeme n̄kpọ nte tọn udia 55 ẹnọ nditọete ke mme esop ẹmi ẹdude ke mme ikpehe oro ẹnyenede mfịna. Ẹma ẹbọ ediwak leta esịtekọm.
Nditọete ke Dubrovnik ẹbụk nte mmọ ẹkewụtde esịtekọm ke un̄wam oro ẹkenọde mmọ. Nte eyenete an̄wan kiet ọkọnyọn̄de ufọk ye ekwo udia esie, mbọhọidụn̄ kiet ama obụp ebiet emi enye edepde mme nsenunen oro. Eyenete an̄wan oro ama asian enye ete ke edi nditọete imọ eke spirit ke ikpehe efen ẹnọ ẹsọk imọ. Idem ama akpa mbọhọidụn̄ oro. Ke idaha efen eren oro owo mîfiọkke emi otode Slovenia ama okot ebiowo onyụn̄ ọdọhọ ete: “Ami mmokop nte ke Mme Ntiense Jehovah ke ẹdeme mme udia oro mmọ ẹbọde ẹto nditọete mmọ ke eti usụn̄. Ami mma nnọ ediwak ekwo ẹsọk mme owo; nte ededi, mmọ akanam isịmke do. Nte mmekeme ndinọ mme utọ n̄kpọ un̄wam oro ẹsọk mbufo, man mbufo ẹdeme mmọ?” N̄ko, mme n̄wedmbụk n̄kpọntịbe ye radio ẹma ẹtịn̄ n̄kpọ nte ọfọnde ẹban̄a utom unọ un̄wam nnyịn.
Eyenete emi akanade baptism ke mbono ofụri ererimbot ke Zagreb ke 1991 ama ọdiọn̄ọ aban̄a nsọn̄ọn̄kpọ emi ekedemerede onyụn̄ edep ofụri ufọk unyamudia. Enye ama atan̄ udia oro okonịm ke ufọk esie emi ekperede ikpehe obio oro ẹn̄wanade ekọn̄. Nte unana udia ekenen̄erede ọsọn̄ ubọk, udia emi ama akabade edi ata edidiọn̄ ọnọ nditọete.
Ẹma ẹkeme ndibọ n̄wed unyịme man akamba moto mbiomo emen mme n̄kpọ udia ẹmi ọsọk nditọete oro ẹkọn̄ akande okụk ke Sarajevo. Nnyịn imenem esịt ndidọhọ nte ke edinam udeme udia oro ama okụt unen.
En̄wan emi amada uwem mbio obio. Ke mfụhọ, etisịm utịt isua utom emi, nditọete nnyịn iren ye iban itiokiet ẹma ẹduọk uwem mmọ, ndien ndusụk ẹma ẹda unan.
Nte ededi, ediwak ifiọkutom ẹwụt ẹte ke ofụri ofụri, edi n̄kpọ ukpeme ndidi kiet ke otu Mme Ntiense Jehovah. Ke idaha kiet nditọete ke ẹkenam isan̄ ndikodụk mbono district ke Belgrade ke ini mbonekọn̄ ẹkenamde bọs oro atuak ada, ẹbụpde m̀mê mme owo ke ndusụk ido ukpono efen ẹdu ke otu mmọ. Nditọete ẹma ẹbọrọ ẹte ke ndomokiet idụhe. Mmọ ẹkenyene ndiwụt mme n̄wed idiọn̄ọ mmọ, ndien ndusụk mmọ ẹma ẹnyene enyịn̄ oro owụtde ete ke anaedi mmọ ẹdi mbon ido ukpono oro. Mbonekọn̄ oro ẹma ẹdori mmọ ikọ nte ke ẹsosu, edi nditọete oro ẹma ẹsan̄a ye n̄wed oro owụtde ke mmọ ẹwọrọ ẹkpọn̄ ufọkederi oro; okposụkedi ẹkemande mmọ ẹsịn ke ido ukpono oro, mmọ ẹma ẹtịn̄ ẹte ke mmimọ idahaemi idi Mme Ntiense Jehovah, inamde isan̄ ika ndikodụk mbono mmimọ. Ye emi mbonekọn̄ oro ẹma ẹyak mmọ ẹbe ẹka isan̄ mmọ.
Mme asiakusụn̄ ke ẹka iso ke utom mmọ ye ọkpọsọn̄ ifịk, ndien ẹkụt nte emi edide ata n̄kpọ nsịnudọn̄ ke utom oro. Enyọn̄-Ukpeme, ye ndiye ikpaedem esie ke ọyọhọ uduot, edi se ẹkabarede ke ukem ini ke kpukpru mme akpan usem eke ikpehe idụt emi. Enye ke ọnọ mme ama akpanikọ ye edinen ido ‘udeme udia mmọ ke edikem ini’ ke n̄kan̄ eke spirit. (Luke 12:42) Ke isua utom 1992, mbufa nditọete iren ye iban 674 ẹkena baptism.
Ke akpanikọ, Abasi ifreke utom oro nditọete ke Edem Usiahautịn Europe ẹnamde ye ima enyịn̄ esie oro mmọ ẹwụtde. N̄ko-n̄ko, enye oyom ete kpukpru mme andituak ibuot nnọ enye, inamke n̄kpọ m̀mê mmọ ẹdụn̄ ke mmọn̄, ẹtiene eti item oro Paul akafiakde ọnọ, ke Mme Hebrew 6:11, emi ọdọhọde ete: “Ọdọn̄ nnyịn nte kpukpru mbufo ẹwụt kpa orụk ifịk oro, man ẹnyene ọyọhọ idotenyịn tutu osịm utịt.”