Ẹkpeme Ẹbiọn̄ọ Kpukpru Orụk Ukpono Ndem
“Nso ediomi ke temple Abasi odiomi ye ndem?”—2 CORINTH 6:16.
1. Nso ke ataya ye mme temple Israel ẹkeda ẹban̄a?
JEHOVAH enyene temple oro ndisọi n̄kpọ mîdụhe ke esịt. Emi edi se ataya utuakibuot Israel oro Moses ọkọbọpde ye mme temple oro ẹkebọpde ke Jerusalem ke ukperedem ẹkedade ẹban̄a. Mme ufọk oro ẹkeda ẹban̄a “ata ataya,” kpa akwa temple Jehovah eke spirit. (Mme Hebrew 8:1-5) Temple oro edi ndutịm edisan̄a n̄kpere Abasi ke utuakibuot ke isọn̄ uwa ufak Jesus Christ.—Mme Hebrew 9:2-10, 23.
2. Mmanie ẹkabade ẹdi adaha ke akwa temple eke spirit Abasi, ndien nso idaha ke akwa otuowo ẹdara?
2 Christian kiet kiet oro ẹyetde aran akabade edi “adaha ke temple Abasi,” ọbọde itie ke heaven. “Akwa otuowo” eke mme andituak ibuot nnọ Jehovah eken ke “ẹnam n̄kpọ ẹnọ [Abasi]” ke se okụre utuakibuot eke mme Gentile ke temple oro Herod akafiakde ọbọp akadade aban̄a. Ke ntak mbuọtidem ke uwa Jesus, mmọ ẹnyene edinen idaha oro edisụn̄ọde ke ndinịm uwem mbe “akwa ukụt.”—Ediyarade 3:12; 7:9-15.
3, 4. Ẹmen esop eke mme Christian oro ẹyetde aran ke isọn̄ ẹdomo ye nso, ndien edisabade ewe ke ana enye ọbọhọ?
3 Ẹmen esop mme Christian oro ẹyetde aran ke isọn̄ ẹkedomo n̄ko ke ndamban̄a usụn̄ ye temple efen oro ọbọhọde ukpono ndem. Ye mme utọ mbon oro ‘ẹfịkde idiọn̄ọ ke edisana spirit,’ apostle Paul ọkọdọhọ ete: “Ẹma ẹbọp mbufo ẹdori ke enyọn̄ ukot ufọk emi edide mme apostle ye mme prọfet, Christ Jesus ke Idemesie onyụn̄ edi akan itiat inụk: ke Enye ke kpukpru ufọk kiet kiet ẹtịm ẹkpaha ẹkọri ẹwọrọ edi edisana temple ke Ọbọn̄. Ke Enye ke ẹkebọp mbufo nde ẹsịn do, ẹte ẹdi itieidụn̄ Abasi ke spirit.” (Ephesus 1:13; 2:20-22) Owo 144,000 ẹmi ẹfịkde idiọn̄ọ mi ẹdi “oduuwem itiat” oro ‘ẹbọpde ẹsịn ke ufọk eke spirit, ẹnyụn̄ ẹnamde ẹdi ndisana oku.’—1 Peter 2:5; Ediyarade 7:4; 14:1.
4 Sia mme udiana oku ẹmi ẹdide “ufọk eke Abasi ọkọbọpde,” enye iyakke ẹsabade temple emi. (1 Corinth 3:9, 16, 17) Paul ama ọnọ item ete, “Ẹkûbọp idem utịn̄e utịn̄e ye mmọ eke mînịmke ke akpanikọ. Nso udeme ke edinen ido enyene ye ukwan̄ido? Nso ebuana ke un̄wana enyene ye ekịm? Nso ndụk ke Christ odụk ye Belial? Nso udeme ke andinịm ke akpanikọ enyene ye owo eke mînịmke ke akpanikọ? Nso ediomi ke temple Abasi odiomi ye ndem?” Mme Christian oro ẹyetde aran, emi ẹnyenede “Jehovah Ata Ọkpọsọn̄,” ana ẹbọhọ ukpono ndem. (2 Corinth 6:14-18) Mbon oro ẹdide eke akwa otuowo n̄ko ana ẹkpeme idem ke kpukpru orụk ukpono ndem.
5. Ke ẹfiọkde ẹte ke Jehovah odot san̄asan̄a utuakibuot, mme ata Christian ẹnam nso?
5 Odu in̄wan̄în̄wan̄ ye n̄kari n̄kari orụk ukpono ndem. Baba, ukpono ndem ikụreke ke edikpono mme nsunsu abasi ye mme abasi-an̄wan. Enye edi edituak ibuot nnọ n̄kpọ ekededi m̀mê owo ekededi ke ẹsiode Jehovah ẹfep. Nte Andikara Ekondo, enye nte enende oyom onyụn̄ odot ndibọ san̄asan̄a utuakibuot. (Deuteronomy 4:24) Ke ẹfiọkde emi, mme ata Christian ẹnam mme item N̄wed Abasi ẹmi ẹbiọn̄ọde kpukpru orụk ukpono ndem. (1 Corinth 10:7) Ẹyak nnyịn ikere iban̄a ndusụk orụk ukpono ndem oro anade mme asan̄autom Jehovah ẹfep.
Mbiet Ukpono Ndem eke Christendom
6. Nso mme n̄kpọ ndek ke Ezekiel okokụt ke n̄kukụt?
6 Ke adan̄aemi ẹkedude ke ntan̄mfep Babylon ke 612 M.E.N., prọfet Ezekiel ama okụt mme n̄kpọ mbubiam oro mme Jew mbon nsọn̄ibuot ẹkenamde ke temple Jehovah ke Jerusalem. Ezekiel ama okụt “mbiet ufụp.” Ẹma ẹkụt mbiowo 70 ẹfọpde incense ke temple. Ẹma ẹkụt iban ẹtuade ẹban̄a nsunsu abasi. Irenowo 25 ẹnyụn̄ ẹtuakde ibuot ẹnọ utịn. Edinam mbon nsọn̄ibuot emi akada aban̄a nso?
7, 8. “Mbiet ufụp” ekeme ndidi nso, ndien ntak emi enye ekedemerede Jehovah ndifụbe ufụp?
7 Mbubiam n̄kpọ oro Ezekiel okokụtde ke n̄kukụt ẹkeda ẹban̄a ukpono ndem Christendom. Ke uwụtn̄kpọ, enye ama ọdọhọ ete: “Sese, mbiet ufụp emi odu ke edem edere inuaotop itieuwa ke ebiet nte ẹdụkde. Ndien [Jehovah Abasi] ọdọhọ mi, ete, Eyen owo, nte afo omokụt se mmọ ẹnamde? ikpọ mbubiam n̄kpọ ẹmi ufọk Israel ẹnamde mi, man n̄kpọn̄ edisana ebiet mi anyan usụn̄?”—Ezekiel 8:1-6.
8 Ekeme ndidi mbiet ufụp ukpono ndem oro ekedi edisana adaha oro akadade aban̄a nsunsu abasi-an̄wan oro mbon Canaan ẹkesede nte n̄wan Baal abasi mmọ. Se ededi oro mbiet oro ekedide, enye ama edemede Jehovah ndifụbe ufụp koro enye ama abahade san̄asan̄a utuakibuot oro Israel ọkọnọde enye ke ndibiat mme ewụhọ esie: “Ami ndi Jehovah Abasi fo . . . Kûnyene abasi efen ukọrọ ye ami. Kûnam edisọi n̄kpọ unọ idemfo, kûnyụn̄ unam mbiet baba n̄kpọ kiet eke odude ke heaven ke enyọn̄, ye eke odude ke isọn̄ ke idak, ye eke odude ke mmọn̄ ke idak isọn̄; kûnụhọ unọ mmọ, kûnyụn̄ unam n̄kpọ mmọ: koro ami Jehovah Abasi fo ndi Abasi ufụp.”—Exodus 20:2-5.
9. Didie ke Christendom ekedemede Abasi ndifụbe ufụp?
9 Ndituak ibuot nnọ mbiet ufụp ke temple Abasi ekedi kiet ke otu ikpọ n̄kpọ mbubiam oro mme ọsọn̄ibuot nditọ Israel ẹkenamde. Kpasụk ntre, ẹmesabade mme ufọkederi Christendom ye mme idiọn̄ọ ye mme mbiet oro ẹsuenede Abasi oro abaharede san̄asan̄a utuakibuot oro mmọ ẹdọhọde nte inọde Owo emi mmọ ẹdọhọde nte inamde n̄kpọ inọ. Ẹdemede Abasi n̄ko ndifụbe ufụp koro mme ọkwọrọ ederi ẹsịnde Obio Ubọn̄ esie nte n̄kukụre idotenyịn ubonowo ẹnyụn̄ ẹtuakde ibuot ẹnọ Esop Edidiana M’idụt—“n̄kpọ mbubiam . . . adade ke edisana ebiet,” ke ebiet mîkpanaha enye ada.—Matthew 24:15, 16; Mark 13:14.
10. Nso ke Ezekiel okokụt ke esịt temple, ndien didie ke emi emen udomo ye se ẹkụtde ke Christendom?
10 Ke odụkde temple, Ezekiel ọtọt ete: “Sese, mbiet kpukpru mme andinyọni, ye mme unam mbubiam, ye kpukpru ibọk ufọk Israel ẹkaba ke ofụri ibibene ẹkanade ẹkụk. Owo ata ye duop ẹmi ẹtode ke mbiowo ufọk Israel ẹnyụn̄ ẹda ke otu mmọ . . . kpukpru owo ẹnyụn̄ ẹkama censer mmọ ke ubọk mmọ; ndien incense ọdọk nte akamba nsụn̄ikan̄.” Kam kere! Mbiowo Israel ke temple Jehovah, ẹfọpde incense ẹnọ mme nsunsu abasi, emi mme mbubiam n̄kpọ oro ẹkapde ẹyọhọ ibibene ẹdade ẹban̄a. (Ezekiel 8:10-12) Ke mbiet usụn̄ oro, ẹda mme inuen ye mme unam ikọt ndida mban̄a mme idụt Christendom, ẹmi mme owo ẹnọde utuakibuot. Akande oro, ediwak mme ọkwọrọ ederi ẹdue isop ke ndin̄wam nditụn ediwak owo usụn̄ ke ndikpep ukwan̄ ukpepn̄kpọ edito ke mbiet owo, uduot uwem unam mforo owo utu ke ndimụm akpanikọ Bible aban̄ade mbụk edibotn̄kpọ eke Jehovah Abasi n̄kama.—Utom 17:24-28.
11. Ntak emi mme ọsọn̄ibuot iban Israel ẹketuan̄ade ẹban̄a Tammuz?
11 Ke enyịnusụn̄ inuaotop ufọk Jehovah, Ezekiel ama okụt mme ọsọn̄ibuot iban Israel ẹtuan̄ade ẹban̄a Tammuz. (Ezekiel 8:13, 14) Mbon Babylon ye mbon Syria ẹkeda Tammuz nte abasi ikọn̄ emi ọkọride ke ini ukwọedịm onyụn̄ akpade ke ini ndaeyo. Ikọn̄ ndikpan̄a akada aban̄a n̄kpa Tammuz, emi mme andituak ibuot nnọ enye ẹkesituan̄ade ẹban̄a kpukpru isua ke ini ọkpọsọn̄ ufiop. Ke ini ikọn̄ afiakde esehe ke ukwọedịm, ẹkeda nte ke Tammuz ama afiak oto obio ekpo edi. Ẹkewụt enye ye akpa abisi enyịn esie, kpa tau eke eset oro eketiede nte cross. Emi ekeme nditịm nti nnyịn mban̄a ukpono oro Christendom ọnọde cross ke ido ukpono ndem.
12. Nso ke Ezekiel okokụt mme ọsọn̄ibuot irenowo 25 ke otu nditọ Israel ẹnamde, ndien nso ukem edinam oro ada itie ke Christendom?
12 Ke esịt okụre temple oro, Ezekiel ama afiak okụt mme ọsọn̄ibuot nditọ Israel irenowo 25 ẹtuakde ibuot ẹnọ utịn—edide edibiat ewụhọ Jehovah oro atuahade ye utọ ukpono ndem oro. (Deuteronomy 4:15-19) Mme okpono ndem oro n̄ko ẹma ẹdian mbubiam ikọn̄ ke ibuo Abasi, ndusụk adade aban̄a ndido idan̄ erenowo. Eyịghe idụhe Abasi mîkeyereke akam mmọ, idem kpa nte Christendom ediyomde un̄wam esie ke ini “akwa ukụt” edi ke ikpîkpu. (Matthew 24:21) Kpa nte mme ọsọn̄ibuot nditọ Israel oro ẹketuakde ibuot ẹnọ utịn oro ọnọde un̄wana ẹkewọn̄ọrede edem ẹwụt temple Jehovah, kpasụk ntre ke Christendom ofụmi un̄wana oro otode Abasi, ekpep mme nsunsu ukpepn̄kpọ, okpono eti ibuot eke ererimbot nte abasi onyụn̄ anam nte ikwe oburobụt ido.—Ezekiel 8:15-18.
13. Ke mme usụn̄ ewe ke Mme Ntiense Jehovah ẹfep idem ke mme orụk ukpono ndem oro Ezekiel okokụtde ke n̄kukụt?
13 Mme Ntiense Jehovah ẹmefep orụk ukpono ndem oro ẹnamde ke Christendom, m̀mê mbiet Jerusalem, oro Ezekiel ekebemde iso okụt. Nnyịn ikponoke mme mbiet oro ẹsuenede Abasi. Okposụkedi nnyịn iwụtde ukpono inọ “mme enyene odudu ẹmi ẹkarade,” nsụkibuot nnyịn nnọ mmọ enyene adan̄a. (Rome 13:1-7; Mark 12:17; Utom 5:29) Utuakibuot nnyịn oro otode esịt enyene Abasi ye Obio Ubọn̄ esie. Nnyịn idaha ukpepn̄kpọ edito ke unam mforo owo ikpụhọ ye ukpepn̄kpọ aban̄ade Andibot ye edibotn̄kpọ esie. (Ediyarade 4:10b) Nnyịn idehede ituak ibuot inọ cross m̀mê ndikpono ekikere owo, akwaifiọk owo, m̀mê mme orụk eti ibuot ererimbot eken. (1 Timothy 6:20, 21) Nnyịn n̄ko imekpeme idem ke kpukpru orụk ukpono ndem eken. Nso idi ndusụk mmọemi?
Mme Orụk Ukpono Ndem Eken
14. Nso idaha ke mme asan̄autom Jehovah ẹda ke ebuana ye “unam” eke Ediyarade 13:1?
14 Mme Christian itieneke ibuana ye ubonowo ke ndikpono ndamban̄a “unam.” Apostle John ọkọdọhọ ete: “N̄kụt unam otode ke inyan̄ ọdọk edi, emi enyenede nnụk duop ye ibuot itiaba; enye onyụn̄ ayara anyanya duop ke nnụk esie . . . Kpukpru mme andidụn̄ ke isọn̄ ẹyetuak ibuot ẹnọ enye.” (Ediyarade 13:1, 8) Mme unam ẹkeme ndida mban̄a “ndidem,” m̀mê odudu ukara ukaraidem. (Daniel 7:17; 8:3-8, 20-25) Ntre ibuot itiaba eke ndamban̄a unam oro ada aban̄a mme odudu ukara ererimbot—Egypt, Assyria, Babylon, Medo-Persia, Greece, Rome, ye Anglo-American enyeoro Britain ye United States of America ẹdianade kiet. Mme ọkwọrọ ederi Christendom ẹwụt akwa unana ukpono ẹnọ Abasi ye Christ ke ndida ubonowo usụn̄ ẹtuak ibuot ẹnọ ndutịm ukaraidem Satan, kpa “ọbọn̄ ererimbot emi.” (John 12:31) Nte ededi, nte mme Christian oro ẹdade san̄asan̄a ye mme andida nnọ Obio Ubọn̄, mme asan̄autom Jehovah ẹsịn ndibuana ke utọ ukpono ndem oro.—James 1:27.
15. Didie ke ikọt Jehovah ẹse nta mbre eke ererimbot, ndien nso ke Ntiense kiet eketịn̄ aban̄a emi?
15 Ikọt Abasi n̄ko ẹfep idem ke edikpono mme ọwọrọetop ebre mbre unọ idem inemesịt ye mbre mbuba eke ererimbot. Ke ama akakabade edi Ntiense Jehovah, ataikwọ kiet ama ọdọhọ ete: “Ikwọ unọ idem inemesịt ye eke unek ekeme ndidemede mme idiọk udọn̄ . . . Andibre esikwọ aban̄a inemesịt ye mbọm oro ndusụk mme andikpan̄ utọn̄ ẹkemede ndikere nte ananade ke nsan̄andọ mmọ. Ẹsiwak ndidiọn̄ọ ọkwọ ikwọ ke se enye ọkwọde aban̄a. Ndusụk ntaikwọ oro ami ndiọn̄ọde edi se iban ẹnen̄erede ẹma ke ntak emi. Ndondo oro owo odụkde obụhọ ke mfụmmfụm ekikere ererimbot emi, enye ekeme ndida okosịm enye ndikpono andinam n̄kpọ oro. Emi ekeme nditọn̄ọ ke ata mfefere usụn̄ oro mînọhọ unan ndomokiet ebe ke owo oro ndiyom n̄wedikwọ emi owo oro ewetde nte n̄kpọ editi. Edi ndusụk owo ẹsiwak ndida ata mbre oro nte uwụtn̄kpọ mmọ, ndien ke ndinọ enye ukpono eke mîdotke, mmọ ẹnam enye edi ndem. Mmọ ẹkeme ndidian ndise owo emi ke ibibene ẹnyụn̄ ẹtọn̄ọ ndisịne ọfọn̄ nnyụn̄ n̄kama idem nte enye esinamde. Oyom mme Christian ẹnyene ke ekikere nte ke ntotụn̄ọ ukpono enyene Abasi kpọt.”
16. Nso iwụt ite ke ndisana angel ẹsịn ukpono ndem?
16 Ih, Abasi ikpọn̄ odot ntotụn̄ọ ukpono m̀mê utuakibuot. Ke ini John ‘ọkọduọde ke isọn̄ ndituak ibuot nnọ angel’ oro okowụtde enye mme utịben̄kpọ, edibotn̄kpọ eke spirit oro ama esịn ndibọ ukpono ke usụn̄ ekededi edi ọkọdọhọ ete: “Kûnam: ndi asan̄autom ye afo ye nditọete fo mme prọfet, ye mmọemi ẹnịmde ikọ n̄wed emi. Tuak ibuot nọ Abasi.” (Ediyarade 22:8, 9) Mbak oro inyenede inọ Jehovah, m̀mê ntotụn̄ọ ukpono oro inyenede inọ enye, esinam nnyịn ituak ibuot inọ enye ikpọn̄îkpọn̄. (Ediyarade 14:7) Ntem, ata uten̄e Abasi ekpeme nnyịn osio ke ukpono ndem.—1 Timothy 4:8.
17. Didie ke nnyịn ikeme ndikpeme mbiọn̄ọ ukpono ndem eke oburobụt ido idan̄?
17 Oburobụt ido idan̄ edi orụk ukpono ndem efen oro mme asan̄autom Jehovah ẹsisịnde. Mmọ ẹfiọk ẹte ke “baba anam use kiet, m̀mê anam mbubiam ido, m̀mê esịn esịt ke n̄kpọ owo, emi edide okpono ndem, inyeneke udeme ke Obio Ubọn̄ Christ ye Abasi.” (Ephesus 5:5) Ukpono ndem abuana koro ọkpọsọn̄ udọn̄ ẹnyenede ẹnọ obukpo inemesịt akabade edi n̄kpọ oro ẹkponode. Mme edu Abasi ẹdu ke itiendịk ke mme idiọk udọn̄ idan̄. Ke ndiwọn̄ọde enyịn ye utọn̄ esie nnọ n̄wed ndise idan̄, owo esịn itie ebuana ekededi oro enye ekenyenede ye edisana Abasi, Jehovah, ke itiendịk. (Isaiah 6:3) Man ẹkpeme idem ke utọ ukpono ndem oro, ndien, ana mme asan̄autom Abasi ẹfep mme n̄wed ndise idan̄ ye ikwọ oro ẹkemede ndisabade owo. Mmọ ẹnyene ndisọn̄ọ nyịre ọkpọsọn̄ ke mme ufọn n̄kpọ eke spirit ẹmi ẹkọn̄ọde ke N̄wed Abasi, ndien ana mmọ ẹkaiso “ẹmen obufa owo ẹsịne, emi ẹbotde ebiet Abasi ke edinen ido ye edisana ido akpanikọ.”—Ephesus 4:22-24.
Ẹfep Idiọkitọn̄ ye Edisịn Esịt ke N̄kpọ Owo
18, 19. (a) Nso idi idiọkitọn̄ ye edisịn esịt ke n̄kpọ owo? (b) Didie ke nnyịn ikeme ndikpeme mbiọn̄ọ idiọkitọn̄ ye edisịn esịt ke n̄kpọ owo emi edide ukpono ndem?
18 Mme Christian n̄ko ẹkpeme idem ke idiọkitọn̄ ye edisịn esịt ke n̄kpọ owo, emi enyenede n̄kpet n̄kpet ebuana ye orụk ukpono ndem. Idiọkitọn̄ edi ebeubọk m̀mê ọkpọsọn̄ udọn̄ ndinyene n̄kpọ, ndien edisịn esịt ke n̄kpọ owo edi idiọkitọn̄ ke n̄kpọ ekededi oro enyenede owo efen. Jesus ama odụri owo utọn̄ aban̄a edisịn esịt ke n̄kpọ owo onyụn̄ etịn̄ aban̄a ọdiọkitọn̄ owo inyene oro mîkenyeneke ufọn ito inyene esie ke ini akpade okonyụn̄ odude ke mfụhọ koro mîkenyeneke “inyene ke n̄kan̄ Abasi.” (Luke 12:15-21) Paul nte odotde ama ọnọ ekemmọ mme andinịm ke akpanikọ item ete: “Ẹwot mbak idem mbufo ẹmi ẹdude ke isọn̄. Ẹkpọn̄ . . . edisịn esịt ke n̄kpọ owo, emi edide ukpono ndem.”—Colossae 3:5.
19 Mbon oro ima okụk akarade, ye idiọkitọn̄ kaban̄a udia ye edin̄wọn̄ n̄kpọ, m̀mê udọn̄ kaban̄a odudu ẹnam mme utọ udọn̄ oro ẹdi ndem mmọ. Nte Paul okosiode owụt, owo idiọkitọn̄ edi okpono ndem ndien ididaha Obio Ubọn̄ Abasi inyene. (1 Corinth 6:9, 10; Ephesus 5:5) Ntre, ẹkeme ndisio mbon oro ẹma ẹkena baptism ẹmi ẹnamde ukpono ndem nte mbon idiọkitọn̄ ẹfep ke esop Christian. Ebede ke edida N̄wed Abasi nsịn ke edinam ye edikọbọ ke edibọn̄ akam, nte ededi, nnyịn imekeme ndifep idiọkitọn̄. Mme N̄ke 30:7-9 ọdọhọ ete: “Mmeben̄e fi n̄kpọ iba [Jehovah Abasi]: kûsịn mi ke mmen̄ka n̄kpaha kan̄a: men mi abian̄a ye ikọ nsu ke idem fep, nịm anyan ebiet: kûnọ mi ubuene, kûnyụn̄ unọ mi inyene; bọk mi ke udia udeme mi: mbak ndiyụhọ, ndien n̄kan̄ fi, ndien ndọhọ nte, Anie edi Jehovah? Mbak ndinyụn̄ mbuene, ndien nyịp inọ, nnyụn̄ nsuene enyịn Abasi mi.” Utọ edu oro ekeme ndin̄wam nnyịn ikpeme idem ke idiọkitọn̄ ye edisịn esịt ke n̄kpọ owo emi edide ukpono ndem.
Ẹkpeme Idem ke Edikpono Idem Nte Ndem
20, 21. Didie ke ikọt Jehovah ẹkpeme ẹbiọn̄ọ edikpono idemmọ nte ndem?
20 Ikọt Jehovah n̄ko ẹkpeme idem ke edikpono idemmọ nte ndem. Ke ererimbot emi edi ọsọ n̄kpọ owo ndinam idemesie ye uduak idemesie edi ndem. Udọn̄ kaban̄a uwọrọetop ye ubọn̄ ẹmenam ediwak owo ẹnam n̄kpọ ke ukwan̄ usụn̄. Mmọ ẹyom ẹnam uduak mmọ, idịghe eke Abasi. Edi nnyịn ikemeke ndinyene itie ebuana ndomokiet ye Abasi edieke inyenede ntụhọ edikpono idem nte ndem ebe ke ndiyom ukwan̄ usụn̄ ndinam uduak idem nnyịn inyụn̄ idomode ndikara mbon efen. (Mme N̄ke 3:32; Matthew 20:20-28; 1 Peter 5:2, 3) Nte mme anditiene Jesus, nnyịn imọkpọn̄ mme abian̄a abian̄a n̄kpọ eke ererimbot.—2 Corinth 4:1, 2.
21 Utu ke ndiyom uwọrọetop, ikọt Abasi ẹnam n̄kpọ nte ekemde ye item Paul emi: “Mmọdo m̀mê mbufo ẹdiade, m̀mê ẹn̄wọn̄de, m̀mê ẹnamde n̄kpọ ekededi, ẹnam kpukpru ẹnọ Abasi ubọn̄.” (1 Corinth 10:31) Ke ndidi mme asan̄autom Jehovah, nnyịn isọn̄ọke iyịre ke usụn̄ nnyịn ke ido ukpono ndem edi inam uduak Abasi ye idatesịt, inyịmede ndausụn̄ otode “asan̄autom emi anamde akpanikọ, onyụn̄ enyenede ọniọn̄” inyụn̄ ibuana ọyọhọ ọyọhọ ye esop Jehovah.—Matthew 24:45-47.
Ẹdu ke Ukpeme!
22, 23. Ke nso usụn̄ ke nnyịn ikeme ndikpeme mbiọn̄ọ kpukpru orụk ukpono ndem?
22 Nte ikọt Jehovah, nnyịn inụhọke inọ edisọi mbiet. Nnyịn n̄ko imekpeme idem ye n̄kari n̄kari orụk ukpono ndem. Ke akpanikọ, ana nnyịn ikaiso ifep kpukpru orụk ukpono ndem. Nnyịn ke ntre inam nte ekemde ye item John emi: “Ẹkpeme idem ke ndem.”—1 John 5:21.
23 Edieke afo edide kiet ke otu asan̄autom Jehovah, da ubieresịt fo oro Bible ọnọde ukpep ye ukeme ukere n̄kpọ fo nnam n̄kpọ kpukpru ini. (Mme Hebrew 5:14) Ndien edu ukpono ndem eke ererimbot emi idibiatke fi edi eyetie nte mme anam-akpanikọ nditọ Hebrew ita oro ye akpa mme anam-akpanikọ Christian. Afo eyenọ Jehovah san̄asan̄a utuakibuot, ndien enye eyen̄wam fi ekpeme idem ke kpukpru orụk ukpono ndem.
Nso Idi Mme Ekikere Fo?
◻ Didie ke Mme Ntiense Jehovah ẹfep mme orụk ukpono ndem oro Ezekiel okokụtde ke n̄kukụt?
◻ Nso idi “unam” eke Ediyarade 13:1, ndien nso idaha ke mme asan̄autom Jehovah ẹda kaban̄a enye?
◻ Ntak anade ẹkpeme ẹbiọn̄ọ edikpono nta mme ebre mbre inemesịt ye mbre mbuba?
◻ Didie ke nnyịn ikeme ndikpeme idem ke edikpono idem nte ndem?
◻ Ntak ẹkade iso ẹkpeme idem ke kpukpru orụk ukpono ndem?
[Ndise ke page 26]
Nte afo ọmọfiọk nte mme n̄kpọ mbubiam oro ẹkekụtde ke n̄kukụt Ezekiel adade aban̄a ukpono ndem eke Christendom?
[Ebiet Ẹdade N̄kpọ Ẹto]
Ndise (eke enyọn̄ ubọk ufien) ọkọn̄ọ ke foto Ralph Crane/Bardo Museum