Nte Afo Ke Anam Ukeme Fo?

“AMI nyenam ukeme mi.” Ikafan̄ ke “edi” ye anyan udịm udịm ntak ke ndiketre ndisịn idem nnam n̄kpọ ẹsitiene mme ikọ ẹmi! Nso kaban̄a uyakidem nnyịn nnọ Jehovah? Nte nnyịn ke inam en̄wọn̄ọ nnyịn oro ndisịn ofụri ukeme nnyịn nnọ enye?

Ndinam uyakidem ọwọrọ ‘owo ndiyak idemesie san̄asan̄a nsịn ke utom m̀mê utuakibuot Abasi mîdịghe ndinam edisana utom.’ Jesus ama anam ekese ndiwụt se uyakidem nnọ Jehovah abuanade ke ndidọhọ: “Edieke owo ekededi oyomde nditiene Mi, yak enye otụk idemesie, onyụn emen [eto ndutụhọ, NW] esie, etiene Mi.” (Matthew 16:24) Owo oro ama akakan̄ idemesie onyụn̄ ayakde idemesie ọnọ Abasi anam edinam uduak Abasi edi akpan n̄kpọ akan ke uwem esie.

Nte mme owo oro ẹma ẹkeyak idem ẹnọ, nnyịn inyene ndidụn̄ọde idem nnyịn nse m̀mê nnyịn ke idu uwem ekekem ye uyakidem nnyịn. Peter ama owụt ntak oro akpanade nnyịn idụn̄ọde idem nnyịn ke ini enye ekesịnde udọn̄ ọnọ mme Christian oro ẹyetde aran ete: “Ẹdọdiọn̄ ẹsịn ifịk ẹnam ikot eke ẹkekotde mbufo ye edimek eke ẹmekde mbufo ọsọn̄ọ ada: koro edieke mbufo ẹnamde mme n̄kpọ ẹmi, mbufo idikọmọke iduọ.” (2 Peter 1:10) Ih, edieke nnyịn inamde ukeme nnyịn, nnyịn idikabakede idi mbon oro mîkwe unen ke n̄kan̄ eke spirit.

Imekeme Ndifori Ukeme Nnyịn

Ke usụn̄ifiọk oro okponde akan, ẹdori enyịn ndikụt kpukpru mme asan̄autom Abasi oro ẹma ẹkeyak idem ẹnọ nte ẹnamde ukeme mmọ, m̀mê ofụri ukeme mmọ, man ẹnem Jehovah esịt. Nte ededi, ukeme nnyịn ke ndinam uduak Abasi ekeme ndikọri. Ye eyeneren isua ita, ndika utom ekeme ndidi n̄kponn̄kan n̄kpọ oro enye ekemede ndinam ndin̄wam eka esie, edi nte enye ọkọride okpon, enye eyekeme ndinam se ikponde ikan oro. Ntre ke edi ye n̄kọri nnyịn ke n̄kan̄ eke spirit—se ikedide ukeme nnyịn ke akpa ekeme nditre ndidi ntre. Onụk nnyịn ndinam ekese nnọ Jehovah.

Ntotụn̄ọ esịtekọm oro nnyịn inyenede inọ Jehovah esidemede nnyịn ndinam ekese. Ọkpọkpọ edikpep Ikọ esie, kpa Bible, anam esịtekọm oro iwụtde ke se enye anamde ọnọ nnyịn ọsọn̄. Ke uwụtn̄kpọ, ke ini nnyịn ye ntịn̄enyịn idụn̄ọrede inyụn̄ itiede ikere iban̄a nte Jehovah okosiode Eyen esie ọdọn̄ man ayak ukpọn̄ esie ọnọ ndifak ubonowo nsio ke idiọkn̄kpọ, onụk nnyịn ndinam n̄kpọ nnọ Anditọn̄ọ ndutịm ufak. (John 3:16, 17; 1 John 4:9-11) Adan̄a nte nnyịn ‘itabide ise nte Jehovah ọfọnde,’ ntre ke edemerede nnyịn esịt ndinam n̄kpọ esie.—Psalm 34:8.

Asan̄autom uyọhọ-ini kiet ekerede Jetter ama ọdiọn̄ọ emi. Man enye anam ntotụn̄ọ ndụn̄ọde ke se enye ekekpepde, enye ama osio ekpri ubet kiet ke ufọk esie onịm ọnọ oro. Enye ama otịm ubet emi man enye ekeme ndinọ ntịn̄enyịn ke adan̄aemi anamde ndụn̄ọde. Enye enyene Watch Tower Publications Indexes ọkọrọ ye mme eboho Enyọn̄-Ukpeme (Ikọmbakara) ye Awake! ke itie ubonn̄wed esie. Enye ọdọhọ ete, “Ke ini ndụn̄ọrede ntọt oro enyenede ufọn, nsimen̄eke ndibuana enye ye mmọ en̄wen.”

Nte ededi, kpa nte edidia inem inem udia ke ini ke ini mîsụkke owo udọn̄ edidia udia ofụri ini, ntotụn̄ọ edidụn̄ọde Bible ini kiet ibiatke udọn̄ edidia udia eke spirit eke usen ke usen. Ruth ama ọfiọk emi, koro ke adan̄a nte enye ekemede nditi mfiak edem, ubon esie ẹma ẹsikot Bible ọtọkiet kpukpru usenubọk ye mbubịteyo ke ẹma ẹkedia udia ẹkụre. Idahaemi, ke edide isua 81 ke emana, ke ama ekesịn se ibede isua 60 ke utom uyọhọ-ini, enye osụk esikokot Bible kpukpru ini ke ama ekedemede ke n̄kanika 6 usenubọk. Ndondo oro enye ọbọde mme magazine Enyọn̄-Ukpeme ye Awake!, Ruth esidiomi ini ndikot mmọ. Enye esikot ibuotikọ kiet n̄kpọ nte ikata m̀mê ikanan̄ mbemiso enye ekpepde emi ke esop. Enye ọdọhọ ete, “Ndikpep Ikọ Abasi edi se afo oyomde man akaiso ọsọn̄ idem ke mbuọtidem.” Emi n̄ko aman̄wam enye ndikaiso ke utom isụn̄utom ke ediwak isua.

Ndinam Ukeme Nnyịn ke Ndin̄wam Mbon En̄wen

Ntotụn̄ọ ye ukpep Ikọ Abasi ofụri ini anam ifịk nnyịn ndinam n̄kpọ Abasi ọkọri, ndien n̄kpọ oro odude nnyịn ke esịtidem onụk nnyịn ndinam ekese. (Men Jeremiah 20:9 domo.) Utọ ifịk oro okonụk Hirohisa ndinam utom esie mma ọyọhọ ọyọhọ. (2 Timothy 4:5) Enye okodụn̄ ke ufọk emi eka kpọt esede enyịn ye n̄kpri nditọeka inan̄. Ke ini enye okodude ke ini uyen, Hirohisa ama an̄wam ubon esie ke n̄kan̄ okụk ke ndidemede ke n̄kanika ita usenubọk man ada mme n̄wedmbụk n̄kpọntịbe ọsọk mme owo. Enye ama oyom ndinam ekese ke nditịn̄ nnọ mbon efen mban̄a Jehovah, ntre Hirohisa ama esịn n̄wed eben̄e utom usiakusụn̄, nte ẹkotde utom uyọhọ-ini eke Mme Ntiense Jehovah. Kpa ye oro enye ekedide eyenọwọn̄, enye ama adara ndin̄wam mbon en̄wen ẹbuana ye enye ke ndinam ukeme mmọ nditoro Jehovah.

Ndinam ukeme nnyịn ke ndin̄wam mbon en̄wen esịne ndikabade nnyene ifịk ke utom nnyịn. Inikiet Jesus ama esịn udọn̄ ọnọ mme mbet esie ete: “Edieke mbufo ẹfiọkde mme n̄kpọ ẹmi, ọfọfọn ọnọ mbufo ke mbufo ẹnamde mmọ.” (John 13:17) Naomi edi eti uwụtn̄kpọ ke ndida mme ekikere oro esop Jehovah ọnọde man ifori utom nnyịn nsịn ke edinam. Ama esisọn̄ enye ndinyene nneme ye isenowo ke ufọk ke ufọk ikonyụn̄ iwakke ndifiọk se enye ekpetịn̄de ke ini adade ke enyịnusụn̄. Mbiomo ke esop ẹma ẹkpak enye ndida mme ekikere oro ẹkụtde ke n̄wed Reasoning From the Scriptures nsịn ke edinam, ke ikpehe “Introductions for Use in the Field Ministry” (Mme Ntọn̄ọikọ Ndikama ke Utom An̄wautom).a Enye ama esimụm mme ntọn̄ọikọ oro ẹdude ke idak ibuotikọ “Family/Children” (Ubon/Nditọ) esịn ke ibuot onyụn̄ odomo ese ediwak ini. Nte utịp, enye ama ekeme ndinyene nneme ye n̄wanndọ emi okodude ke iduọk isua 30. Idem mbemiso Naomi ekekemede ndinam mfiakn̄ka, n̄wan emi ama edi Ufọkmbono Obio Ubọn̄. Ẹma ẹdiomi ukpepn̄kpọ Bible. N̄wanndọ emi ye ebe esie idahaemi ẹdi mme Christian oro ẹma ẹkena baptism, ẹdarade inem uwem ubon ye nditọ mmọ.

Ndinam Ukeme Nnyịn ke Ndiwụt Ọkpọkpọ Udọn̄

Nnyịn n̄ko imekeme ndikpebe apostle Paul, emi ọkọdọhọde ete: “Nnanam kpukpru n̄kpọ kaban̄a gospel, man ami nde nnyene udeme ke esịt.”—1 Corinth 9:22, 23.

Hatsumi owụt edu emi. Ke adan̄aemi Hatsumi okodude ke an̄wan̄wa utom ukwọrọikọ, n̄wan kiet ama etịn̄ ufan ufan ke urụk ukopikọ ete ke imọ inyeneke ifet nditịn̄ ikọ. Uyoikọ enyeneufọk oro ekedi ata sụn̄sụn̄, ntre Hatsumi ama akaiso ndisika n̄kese enye. Enyeneufọk emi n̄kukụre ekesibọrọ ikọ ke urụk ukopikọ, akananam iwọrọke idi idisobo ye Hatsumi. Emi ama akaiso ke isua iba ye ubak.

Usen kiet Hatsumi ama okpụhọ ini oro enye ekesikade, akade ke utịt utịt uwemeyo. Owo ndomokiet ikọbọrọke. Nte ededi, nte enye okosụk ọwọrọde, uyo oro enye ọdiọn̄ọde ama obụp ke edem esie ete, “Afo edi anie?” N̄wan oro okosụk ọnyọn̄ edi idahaoro. Ke okopde enyịn̄ Hatsumi, enye ama ọbọrọ usọp usọp ete, “Oh, afo esidi edise mi. Sọsọn̄ọ ke ndikere mban̄a mi kpukpru ini.” Sia n̄wan emi ama eketre ukpepn̄kpọ Bible esie ye Mme Ntiense Jehovah ke ebiet efen, enye ama okop bụt etieti ndiberede usụn̄ nnọ Hatsumi. Ẹma ẹfiak ẹtọn̄ọ ukpepn̄kpọ Bible, ndien enyeneufọk oro ke anam n̄kọri ata mfọn mfọn. Nte nnyịn imekere ukem ntre iban̄a mme owo oro nnyịn isisobode ke utom ukwọrọikọ eke ufọk-ke-ufọk?

Nam Ukeme Fo

Jehovah esinem esịt aban̄a ukeme oro nnyịn isịnde ke ndinam n̄kpọ esie. Enye ebiet ete oro eyen esidade enọ ọsọk. Ke ediwak isua ẹbede, enọ ekeme ndikpụhọde etiene isua ye ukeme eyen oro. Kpasụk nte ete okopde inemesịt ndibọ enọ ofụri esịt ekededi oro eyen esie ọnọde enye, ntre ke Jehovah esinen̄ede onyịme utom ofụri esịt nnyịn nte ekemde ye n̄kọri eke spirit nnyịn.

Nte ededi, ufọn idụhe ndimen ukeme nnyịn ndomo ye eke mbon en̄wen. Nte Paul etịn̄de, nnyịn imenyene ntak ndikop idatesịt kaban̄a idem nnyịn, “idibụreke ke idem owo en̄wen.” (Galatia 6:4) Akpakam nnyịn ikaiso ndinam ntọt apostle Peter emi: “Ẹnyene ifịk ndien [“ẹnam ukeme mbufo,” NW], man Enye okposịm mbufo nte ẹtiede ke emem, ẹnana ntọi, ẹnyụn̄ ẹnana ndo.”—2 Peter 3:14.

[Mme Ikọ idakisọn̄]

[Ndise ke page 29]

Nte afo ke anam ukeme fo ndida mme ekikere oro ẹnọde kaban̄a utom an̄wautom nsịn ke edinam?