Mme Mbụme Ẹtode Mme Andikot

Nte ẹyenam mme owo ẹset edieke mmọ mînyịmeke ata Ido Ukpono Christ idahaemi ndien ẹkpade mbemiso akwa ukụt ọtọn̄ọde?

Ọfọn kpukpru nnyịn ndibiọn̄ọ ntụhọ ekededi ndinam n̄kpọ nte mme ebiereikpe, ifiọkde ite ke akpatre ndụn̄ọde, ubiereikpe Jehovah ebe ke Jesus Christ edi se idide akpan n̄kpọ. (John 5:22; Utom 10:42; 2 Timothy 4:1) Edi N̄wed Abasi ọnọ ndusụk nti ntọt ke ibọrọ mbụme oro ẹkebụpde.

Edikwọrọ eti mbụk Obio Ubọn̄ Abasi ke ofụri ererimbot edi akpan ikpehe ‘idiọn̄ọ [edidu, NW] Christ.’ Ẹma ẹkụt idiọn̄ọ emi ọtọn̄ọde ke ntọn̄ọ ntọn̄ọ isua ikie emi. Utom ukwọrọikọ omosụn̄ọ ke edibahade mme owo ẹtode kpukpru idụt ke ndisu n̄ke Jesus aban̄ade “erọn̄” ye “ebot.” Ke ẹkụrede utom ukwọrọikọ ye edibahade emi, “akwa ukụt” eyeda editịm n̄kpọ oro odude kemi okosịm utịt.—Matthew 24:3, 21, 22; 25:31-46.

Jehovah, adianade ye Eyen esie, ẹdibiere m̀mê ẹbat owo ekededi oro ekesịnde etop Obio Ubọn̄ onyụn̄ akpade mbemiso akwa ukụt ọtọn̄ọde nte ebot. Jesus ọkọdọhọ ete ke ebot “ẹyedaha ẹkedụk ke nsinsi edisịbe mfep.” (NW) Ke ntre, nnyịn imekeme ndibiere nte ke mbon oro Abasi ebierede nte ke ẹdi ebot idibọhọ ediset ke n̄kpa. Mmọ ẹnyene ukem ubiereikpe ye mbon oro ‘ẹdibọde ufen nsinsi nsobo’ ke akwa ukụt.—2 Thessalonica 1:9.

Edi nso kaban̄a mbon oro ẹkemede ndidi ikokopke etop Obio Ubọn̄ mfọn mfọn man ke usụn̄ oro esịnede ifiọk ẹkpekeme ndimek m̀mê ẹtre ndimek akpanikọ mbemiso mmọ ẹkekpade ke “ukperedem ini” ẹmi?—2 Timothy 3:1.

Ediwak owo oro ẹkpade ke adan̄aemi utom ukwọrọikọ akade iso mbemiso akwa ukụt nte an̄wan̄ade ẹyebọ ediset ke n̄kpa. Se nnyịn ikotde ke Ediyarade 6:7, 8 iban̄a uwat ndamban̄a mme awat enan̄-mbakara owụt emi. Ediwak owo ẹmekpa nte mbon unọmọ ekọn̄, unana udia, ye ndiọi udọn̄ọ. Sia edide “obio ekpo” ada mbon unọmọ “N̄kpa” emi, ẹyenam mmọ ẹset ke ini Tọsịn Isua Ukara Christ, ke ini obio ekpo asanade kpukpru mme akpan̄kpa ẹmi ẹdude ke enye ayak. (Ediyarade 20:13) Ekeme ndidi ediwak mbon oro ẹdinamde ẹset ẹdidu uwem ẹma ẹkop etop Obio Ubọn̄ ke ndusụk ini mbemiso mmọ ẹkekpade.

Nnyịn ikeme ndiwụt esịtekọm didie ntem nte ke Jesus ikayakke enye inọ mme owo ndibiere m̀mê mmanie ẹbiet erọn̄ n̄ko m̀mê mmanie ẹbiet ebot! Mme anana mfọnmma owo ikemeke ndibiere nnennen nnennen adan̄a ifet oro owo ekenyenede ndikop nnyụn̄ nnyịme eti mbụk. Nte nnyịn imekeme ndifiọk se idaha esịt esie ekedide m̀mê enye ke akpanikọ ama ama edinen ido? Nte nnyịn imekeme ndidomo adan̄a nte ubon esie, idaha ido ukpono esie, m̀mê mme odudu efen ẹkekemede nditụk nte enye akanamde n̄kpọ? Nte an̄wan̄ade nnyịn ikemeke. Edi, nnyịn imekeme ndinịm ke akpanikọ nte ke Jehovah Abasi ye Jesus Christ ẹkeme ndibiere mme utọ n̄kpọ oro ndien ekem ẹsịm ubiereikpe ẹmi ẹdide mfọnmma, eti, edinen.—Deuteronomy 32:4; Isaiah 11:1-5.

Ntem, ntak ndomokiet idụhe nnyịn ndikere m̀mê mmanie ke otu mbon oro ẹkekpan̄ade ke ndondo emi ẹkeme m̀mê ẹkeme nditre ndiset ke n̄kpa. Emi edi n̄kpọ oro owo mînọhọ nnyịn odudu ndinam. (Men Luke 12:13, 14 domo.) Otịm owụt eti ibuot akan nnyịn ndibet mme ubiere ndinen Ebiereikpe, kpa Jehovah Abasi ye Jesus Christ. Emi eyenọ nnyịn ifụre ekikere nte mme asan̄autom Jehovah akan. Emi n̄ko eyen̄wam nnyịn ndinọ ntịn̄enyịn oro ọfọnde akan ke se ẹkenọde nnyịn ndinam—‘ẹka ẹkenam kpukpru mme idụt ẹdi mbet, ẹkpep mmọ ẹnam kpukpru n̄kpọ oro Jesus eketemede.’—Matthew 28:19, 20.

[Ebiet Ẹdade Ndise Ẹto ke page 31]

Erọn̄ Leicester, Meyers