Mme Ntiense Jehovah ke Ofụri Ererimbot—Philippine Republic

NSASAT ufiop ufiop isuo 7,083 ẹmi ẹnamde Republic of the Philippines ẹdi enyọn̄ enyọn̄ ikpehe udịm udịm obot oro mmọn̄ ofụkde ubak ubak.a Ndien mme andidụn̄ Philippines 62,000,000 ẹsima ndineme mban̄a se ikperede ndidi ibuot nneme ekededi. Ifụre ifụre edu unyene nneme emi anam eti isọn̄ odu kaban̄a edinọ ikọ ntiense Obio Ubọn̄.

Unọ Ikọ Ntiense ke Ufọkn̄wed

Ke isuo Masbate, n̄kaiferi kiet ke akamba ufọkn̄wed ama ekeme ndinọ andikpep ye nditọ ubet ukpepn̄kpọ esie ikọ ntiense ke ini mbụme emi ibọrọ esidide akpanikọ m̀mê nsu. Enye obụk ete:

“Utịn̄ikọ oro ekedi, ‘Edieke Abasi amade mi, enye idinọhọ mi afanikọn̄ m̀mê ndiyak mi mbọ ufen.’ Ke ini andikpep mi ekesede mme babru nnyịn, enye ama okụt ete ke kpukpru nditọ ubet ukpepn̄kpọ mi ẹkebọrọ akpanikọ ke mîbọhọke ami ikpọn̄. Andikpep mi ama ayak mi nnam an̄wan̄a nditọ ubet ukpepn̄kpọ ntak oro ami n̄kọbọrọde ke edi nsu. Ami mma ndọhọ ke idịghe Abasi ọnọ nnyịn afanikọn̄, okposụkedi enye onyịmede ndutụhọ odu onyụn̄ ayakde ẹdomo nnyịn. Ke ndade Bible mi, emi nsikamade kpukpru ini n̄ka ufọkn̄wed, mma n̄kọk ibuot ye nditọ ubet ukpepn̄kpọ oro ke mme ikọ ẹmi ẹdude ke 1 John 4:8, ‘Abasi edi ima.’ Ke mma n̄kanam an̄wan̄a, andikpep mi ama onịm ke akpanikọ, ọkọn̄ okpokoro esie sụn̄sụn̄, onyụn̄ ọdọhọ ete: ‘Marilou enen.’ Ami n̄kedi n̄kukụre owo oro ekenyenede nnennen ibọrọ ke mbụme emi ndien mma mbọ idiọn̄ọ uben̄wed oro ọfọnde akan.”

Etop Obio Ubọn̄ Odu ke Kpukpru Ebiet

Ke adan̄aemi abuanade ke utom eke ufọk-ke-ufọk ke ikpehe efen ke Philippines, asiakusụn̄ ofụri ini (ọkwọrọ eti mbụk uyọhọ-ini) ama osobo eka emi enyenede n̄kpri nditọ ita. N̄wan emi ama owụt ntotụn̄ọ udọn̄ ke etop Obio Ubọn̄, ndien emi ama anam edi mmemmem n̄kpọ nditọn̄ọ ukpepn̄kpọ Bible ye enye. Okposụkedi ebe esie mîkenemke esịt nte ke n̄wan emi esibọ ukpepn̄kpọ Bible, akpan akpan oto Mme Ntiense Jehovah, ukpepn̄kpọ oro ama akaiso.

Eren oro ama ada ubon esie ọwọrọ aka obio efen, ekerede ete ke emi eyetre ebuana n̄wan esie ye Mme Ntiense. Nte ededi, ikebịghike mbemiso mmọ ẹkeyomde n̄wan emi ekụt ndien enye ama afiak ẹtọn̄ọ ukpepn̄kpọ Bible esie. Ufọn idụhe nditetịn̄, esịt ama ofụt ebe esie. Enye ama ada iyatesịt esie aka utom, ke ebiet emi enye akan̄wan̄ade iyatesịt esie ofụk owo urua esie emi enye ọkọdiọn̄de moto ọnọ. Eren oro ikọfiọkke ke owo urua emi ekedi kiet ke otu Mme Ntiense Jehovah.

Ntiense oro ama anam an̄wan̄a nte ekpedide n̄kpọ oro otịmde ọnọ ofụri ubon ufọn edieke n̄wan esie akade iso ke ukpepn̄kpọ Bible esie. Enye ekpekeme nditọn̄ọ ndida mme edumbet Bible nsịn ke edinam do ke esịt ufọk. Ama ọnọ ekikere n̄ko nte ke ebe oro ke idemesie ekeme ndibọ ufọn ebe ke ndikpep mban̄a Obio Ubọn̄ Abasi.

Nso ikosụn̄ọ ito nneme emi? N̄wan ọbọn̄ emi ama enyene akwa ifụre ndikpep Bible, ndien eren oro ama ebiere ndida ubon esie mfiak n̄n̄yọn̄ akpa itieidụn̄ mmọ. Do n̄wan oro ama anam n̄kọri eke spirit okosịm idaha oro akabarede edi asuanetop Obio Ubọn̄ oro mînaha baptism. Ebe esie n̄ko ama onyịme ukpepn̄kpọ Bible, ndien ofụri ubon ẹma ẹtọn̄ọ ndidụk mme mbonesop Christian.

[Mme Ikọ idakisọn̄]

[Ekebe ke page 8]

IDAHA IDỤT ORO

Isua Utom 1993

N̄WAKN̄KAN IBAT ORO ẸNỌDE IKỌ NTIENSE: 116,576

MBAHADE: Ntiense 1 enyenede 549

MME ANDIDỤK EDITI: 357,388

UKEM MBAHADE MME ASUANETOP ẸDIDE MME ASIAKUSỤN̄: 22,705

UKEM MBAHADE UKPEPN̄KPỌ BIBLE: 94,370

IBAT ẸKENADE BAPTISM: 7,559

IBAT ESOP: 3,332

ỌFIS N̄KỌK ITIEUTOM: MANILA

[Ndise ke page 9]

Edinọ ikọ ntiense ke an̄wa urua ada nti utịp edi

[Ndise ke page 9]

Ọfis n̄kọk itieutom Watchtower Society ke Manila