Mme Ntiense Jehovah ke Ofụri Ererimbot—BAHAMAS

OBIO Ukara Bahamas​—⁠enyenede udịm udịm isuo emi esịnede ikpọ ye n̄kpri isuo 3,000⁠—​anyanarede ana nte ọsọn̄urua n̄kpọitọn̄ ke kilomita 900 ke akpa emi uduot etiede blu blu ye awawa awawa emi odude ke ufọt Florida ye Cuba. Akwa otu mme ọkwọrọ Obio Ubọn̄ ẹdu ke otu owo 267,000 ẹmi ẹdụn̄de do. Ikwọ itoro mmọ anam ẹti Isaiah 42:​10-⁠12: “Mbufo ẹkwọ obufa ikwọ ẹnọ Jehovah, ye itoro esie ke utịt ererimbot, mbufo ẹmi ẹsụhọde ke inyan̄, ye se iyọhọde ke esịt, mbufo mme isuo ye mme andidụn̄ mmọ. . . . Mmọ ẹyetie ke enyọn̄ ikpọ obot ẹsio n̄kpo. Ẹyenịm ubọn̄ ẹnọ Jehovah, ẹnyụn̄ ẹbụk itoro esie ke otu mme isuo.”

Obufa Mbuọtidem Osobo N̄kpọ-Ata

Ke July 1992, asiakusụn̄ ofụri ini kiet (ọkwọrọikọ Obio Ubọn̄ uyọhọ-ini) ama ọnọ anam mbubehe kiet emi enye ọdiọn̄ọde un̄wam ukpep Bible oro, Afo Emekeme Ndidu Uwem ke Nsinsi ke Paradise ke Isọn̄. Ke eren oro ama okokot n̄wed oro ama, enye ama ọdọhọ idemesie ete, ‘Ana ami ndụn̄ọde ido ukpono emi.’ Ke Sunday iba oro ẹketienede, enye ama odụk mme mbonoesop ke nsio nsio Ufọkmbono Obio Ubọn̄ eke Mme Ntiense Jehovah iba. Ekem, ẹma ẹtọn̄ọ ukpepn̄kpọ Bible ye enye. Nte ededi, ọfiọn̄ itiokiet kpọt ke enye ama ọkọtọn̄ọ ukpepn̄kpọ Bible, n̄kpọ-ata ama adaha ada oro edisịnde obufa mbuọtidem esie ke udomo​—⁠kpa usọrọ usen emana.

Ubon anam mbubehe emi ama esịn idem ntotụn̄ọ ntotụn̄ọ ke mme utọ usọrọ emi, edi ima emi enye enyenede ọnọ Ikọ Abasi ama onụk enye ndikaiso ke mme ukpepn̄kpọ Bible esie. Nte ifiọk esie ke akpanikọ eke N̄wed Abasi ọkọkọride, ntre ke ifiọk esie kaban̄a mme usọrọ usen emana ye mme usen nduọkodudu eke ererimbot ye ekikere Jehovah kaban̄a mmọ ọkọkọri.

Ke ini n̄wan eren emi okodiomide usọrọ unọ idem inemesịt ọnọ Usen Ete, eren emi ke usụn̄ owụtde eti ido ama esịn ndibuana. Nte ededi, n̄wan ama ekere ke enye imaha imọ aba ndien ke enye ada ido ukpono esie ke akpan n̄kpọ akan nte adade imọ ye ubon. Enye ke mfọnido ama anam an̄wan̄a nte ke ndida se imọ ikpepde ito Bible nsịn ke edinam aman̄wam imọ ndikabade ndi eti ebe ye ete. Ke akpatre, n̄wan oro ama ọkọri esịtekọm aban̄a ima oro enye ekenyenede ọnọ akpanikọ eke N̄wed Abasi onyụn̄ onyịme ndikpep Bible. Idahaemi eren oro ke onịm ukpepn̄kpọ Bible ye ubon esie. Ndien nso idatesịt ke enye ekenyene ntem ke Mbono District “Ukpepn̄kpọ Abasi” isua oko! N̄wan esie ye eyen esie an̄wan ẹma ẹdu do ẹnyụn̄ ẹkụt nte enye anade baptism.

Mme Anam Uwọrọidụn̄ Ẹkop Obufa Ikwọ

Ediwak tọsin mme ọwọrọ-idụn̄ ke Haiti ke ẹbuak idem ye mbon Bahamas. Oyom mmọ n̄ko ẹkop obufa ikwọ akpanikọ Obio Ubọn̄. Mme Ntiense ẹmi ẹdụn̄de ke Bahamas ẹkop inemesịt nte ke mme ọdọndọ iba ẹmi ẹtode Haiti ye America ẹma ẹdibehe do. Mme owo ẹmi ẹmen̄wam ndinam mbufa otu mbon Haiti ẹmi ẹtọn̄ọde mi ke mme isuo Grand Bahama ye Abaco, ẹsọn̄ idem.

Nte n̄kaiso n̄kpọ un̄wam kaban̄a mbon Haiti ẹmi ẹnyenede udọn̄ ke etop Obio Ubọn̄, akpa mbono district oro akanam ẹnịmde ke usem Creole ke Bahamas ama ada itie ke July 31 osịm August 1, 1993. Mme andidụk ẹma ẹsịm owo 214, ye mbufa owo ita oro ẹkeyakde idem ẹnọ ẹnade baptism. Ediwak mbon Haiti ẹmi ẹkekpepde akpanikọ ke Bahamas ẹma ẹfiak ẹnyọn̄ọ mme isuo mmọ ke anyanini mîdịghe ẹwọrọ ẹkedụn̄ ke ebiet en̄wen man ẹdian uyo ọtọkiet ye eke Mme Ntiense ke n̄kann̄kụk oro ndikwọ itoro nnọ Jehovah.

[Ekebe ke page 8]

IDAHA IDỤT ORO

Isua Utom 1993a

N̄WAKN̄KAN IBAT ẸMI ẸNỌDE IKỌ NTIENSE: 1,294

MBAHADE: Ntiense 1 ke owo 197

MME ANDIDỤK EDITI: 3,794

UKEM MBAHADE MME ASUANETOP ẸDIDE MME ASIAKUSỤN̄: 186

UKEM MBAHADE UKPEPN̄KPỌ BIBLE: 1,715

IBAT ẸKENADE BAPTISM: 79

IBAT ESOP: 22

ỌFIS N̄KỌK ITIEUTOM: NASSAU

[Mme Ikọ idakisọn̄]

[Ndise ke page 9]

Akpa Ufọkmbono Obio Ubọn̄, esịnede n̄kọk itieutom ye ufọkidụn̄ isụn̄utom

[Ndise ke page 9]

Mme Ntiense ẹkwọrọ eti mbụk ifịk ifịk

[Ndise ke page 9]

Milton G. Henschel ye Nathan H. Knorr ye mme isụn̄utom ke Nassau ke n̄kpọ nte isua 45 ẹmi ẹkebede

[Ndise ke page 9]

Obufa n̄kọk itieutom, emi ẹkeyakde ẹnọ ke February 8, 1992