Mme Anditan̄a Obio Ubọn̄ Ke Ẹsịn Ifịk Ke Ofụri Isọn̄
“Mbufo ẹyenyụn̄ ẹdi mme ntiense Mi . . . tutu osịm utịt ererimbot.”—UTOM 1:8.
1. Nso etop ke Jesus ọkọdọhọ ke mme anditiene enye ẹditan̄ade ke eyo nnyịn?
KE INI akanamde utom oro Jehovah ọkọdọn̄de Eyen esie edinam ke isọn̄ an̄wan̄a, Jesus ọkọdọhọ ete: “Mmenyene ndikwọrọ eti mbụk Ubọn̄ Abasi.” (Luke 4:43) Ke ukem usụn̄ oro, ke ini eketịn̄de aban̄a utom oro mme mbet esie ẹdinamde ke isọn̄ ke ini enye afiakde edi nte edidem, Jesus ọkọdọhọ ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.”—Matthew 24:14.
2. (a) Ntak edide akpan n̄kpọ ndisuan etop Obio Ubọn̄ ntatara ntatara? (b) Nso mbụme ke kpukpru nnyịn ikpobụp idem nnyịn?
2 Ntak emi mbụk aban̄ade Obio Ubọn̄ Abasi edide akpan n̄kpọ ntre-e? Ntak oyomde ẹsuan utọ ntatara etop oro ẹban̄a Obio Ubọn̄ oro? Koro enye edide Obio Ubọn̄ Messiah emi ediwụtde unen itie edikara ofụri ekondo Jehovah. (1 Corinth 15:24-28) Ebede ke enye, Jehovah eyebiere ikpe ọnọ editịm n̄kpọ Satan emi odude kemi onyụn̄ osu un̄wọn̄ọ esie ndidiọn̄ kpukpru ubon ke isọn̄. (Genesis 22:17, 18; Daniel 2:44) Ebede ke ndinam ẹnọ ikọ ntiense ẹban̄a Obio Ubọn̄, Jehovah omokụt mmọ oro enye ke oro ebede eyetde aran ndidi mme nsan̄a adia akpa ye Eyen esie. Ebede ke editan̄a Obio Ubọn̄, ẹmenam utom edibahade n̄ko mfịn. (Matthew 25:31-33) Jehovah oyom ẹtọt mme owo ke kpukpru idụt ẹban̄a uduak esie. Enye oyom mmọ enyene ifet ndimek uwem nte mme andidu ke idak Obio Ubọn̄ esie. (John 3:16; Utom 13:47) Nte afo ke enyene ọyọhọ ebuana ke nditan̄a Obio Ubọn̄ emi?
Edori Enyịn Eban̄a Utịt Ini Mme Gentile
3. (a) Nte odotde, nso ikedi ibuotikọ oro C. T. Russell ekeneme ke ntọn̄ọ ntọn̄ọ isan̄ esie nditan̄ mme owo mbok kaban̄a ukpepn̄kpọ Bible? (b) Nso ke mme akpa Nditọ Ukpepn̄kpọ Bible ẹkefiọk kaban̄a itie oro Obio Ubọn̄ Abasi ekpenyenede ke uwem mmọ?
3 Ko ke edem ke 1880, Charles Taze Russell, akpa andiwet magazine Enyọn̄-Ukpeme, ama anam isan̄ akanade usụn̄ ufọt edem edere ye edem usiahautịn United States ndisịn udọn̄ nnọ editọn̄ọ mme otu ukpepn̄kpọ Bible. Nte odotde, ibuotikọ oro enye akadade enyene nneme ekedi “Mme N̄kpọ Ẹban̄ade Obio Ubọn̄ Abasi.” Nte ẹkewụtde ke mme akpa nsiondi Enyọn̄-Ukpeme, Ndito Ukpepn̄kpọ Bible (nte ẹkediọn̄ọde Mme Ntiense Jehovah adan̄aoro) ẹma ẹfiọk ẹte eke edieke mmimọ inyenede ndiwụt ke imodot ndinyene ebuana ke Obio Ubọn̄ Abasi, ke ana mmimọ inịm Obio Ubọn̄ ke akpa n̄kpọ, idade uwem mmimọ, mme ukeme, ye mme inyene mmimọ inam n̄kpọ idara idara ke utom esie. Kpukpru n̄kpọ en̄wen ke uwem ẹnyene ndidi udiana. (Matthew 13:44-46) Mbiomo mmọ ama esịne editan̄a eti mbụk aban̄ade Obio Ubọn̄ Abasi nnọ mbon en̄wen. (Isaiah 61:1, 2) Ke nso udomo ke mmọ ẹkenam emi mbemiso utịt Ini Mme Gentile ke 1914?
4. Ke nso udomo ke ekpri ibat Nditọ Ukpepn̄kpọ Bible ẹkesuan n̄wed ukpep Bible mbemiso 1914?
4 Ọtọn̄ọde ke iduọkisua 1870 osịm 1914, Nditọ Ukpepn̄kpọ Bible ẹkedi esisịt ke ibat. Etisịm 1914, n̄kpọ nte owo 5,100 kpọt ẹkebuana ifịk ifịk ke ndinọ an̄wan̄wa ikọ ntiense. Edi nso utịbe utịbe ikọ ntiense ke oro ekedi ntem! Ke 1881, isua iba kpọt ke ẹma ẹkemịn̄ Enyọn̄-Ukpeme ke akpa ini, mmọ ẹma ẹtọn̄ọ ndisuana n̄wed enyenede page 162 oro, Food for Thinking Christians. Ke ufan̄ ọfiọn̄ ifan̄, mmọ ẹma ẹsuan idem 1,200,000. Ke mme isua ifan̄, ẹma ẹsuan tract miliọn ke mme itie duop ke isua kiet kiet ke ediwak usem.
5. Mmanie ẹkedi mme colporteur, ndien nso orụk edu ke mmọ ẹkewụt?
5 N̄ko ọtọn̄ọde ke 1881, ndusụk owo ẹma ẹnam utom nte mme colporteur ẹmi ẹkwọrọde ikọ. Mmọemi ẹkedi mme andidiọn̄ usụn̄ nnọ mme asiakusụn̄ (mme ọkwọrọikọ uyọhọ-ini) mfịn. Ndusụk mme colporteur oro, ke ẹsan̄ade ke ukot m̀mê ke enan̄ukwak, ẹma ẹsinọ ikọ ntiense ọkpọkpọ ke se ikperede ndidi ofụri ikpehe idụt oro mmọ ẹkedụn̄de. Mmọ eken ẹma ẹnyanade ẹbịne mme an̄wautom esenidụt ndien mmọ ẹkedi mme akpa owo oro ẹkedade eti mbụk ẹsịm utọ ebiet nte Finland, Barbados, ye Burma (oro edide Myanmar idahaemi). Mmọ ẹma ẹwụt ifịk utom isụn̄utom nte Jesus Christ ye mme apostle esie.—Luke 4:43; Rome 15:23-25.
6. (a) Brọda Russell akanam isan̄ ndisuan akpanikọ Bible atara adan̄a didie? (b) Nso efen ke ẹkenam man edikwọrọ eti mbụk akaiso ke mme esen esen an̄wautom mbemiso utịt Ini Mme Gentile?
6 Brọda Russell ke idemesie ama asan̄a ntatara ntatara ndisuan akpanikọ. Enye ama esika Canada ndien ndien; ọnọ utin̄ikọ ke Panama, Jamaica, ye Cuba; aka Europe ediwak ini; onyụn̄ asan̄a akanade ererimbot ke isan̄ ukwọrọikọ. Enye n̄ko ama ọdọn̄ irenowo en̄wen ẹka ẹketọn̄ọ ẹnyụn̄ ẹda usụn̄ ke ndikwọrọ eti mbụk ke mme an̄wautom esenidụt. Ẹma ẹnọ Adolf Weber aka Europe ke ufọt ufọt iduọkisua 1890, ndien utom esie ama ọtọn̄ọ ke Switzerland osịm France, Italy, Germany, ye Belgium. Ẹma ẹnọ E. J. Coward aka n̄kan̄ Caribbean. Ẹma ẹnọ Robert Hollister aka Edem Usiahautịn ke 1912. Do, ẹma ẹtịm mme san̄asan̄a tract ke usem duop, ndien ẹma ẹsuan ediwak miliọn tract ẹmi ke ofụri India, China, Japan, ye Korea. Edieke afo okpokodude adan̄aoro, nte esịt fo okpokonụk fi ndisịn ukeme ofụri esịt ndida eti mbụk nsọk mmọ en̄wen ke obio mbufo ye ke mme ebiet efen?
7. (a) Didie ke ẹkeda mme n̄wed mbụk n̄kpọntịbe ndinam edinọ ikọ ntiense atara? (b) Nso ikedi “Photo-Drama of Creation,” ndien owo ifan̄ ẹkekụt enye ke ufan̄ isua kiet kpọt?
7 Nte Ini Mme Gentile ẹkekperede utịt mmọ, ẹma ẹda mme n̄wedmbụk n̄kpọntịbe ndisuan mme ukwọrọikọ Bible oro Brọda Russell ọkọkwọrọde. Mmọ ikọnọhọ akpan nsọn̄uyo ke isua 1914 edi, utu ke oro, ke uduak Abasi ye ubiọn̄ oro odude kaban̄a edisu esie. Se iwakde isịm n̄wedmbụk n̄kpọntịbe 2,000 ke ini kiet, ẹmi mme andikot 15,000,000 ẹkesibọde, ẹma ẹsimịn̄ mme ukwọrọikọ ẹmi kpukpru ini. Ndien, nte ẹkedụkde ntọn̄ọ isua 1914, N̄ka ama ọtọn̄ọ an̄wan̄wa ediwụt “Photo Drama of Creation.” Ke ndise inan̄ oro ekebịghide ke hour 2, enye ama owụt mme akpanikọ Bible ọtọn̄ọde ke edibotn̄kpọ tutu osụhọde osịm Tosịn Isua. Ke ufan̄ isua kiet, mme owo ẹwakde ẹbe miliọn usụkkiet ke ẹtan̄de ẹdian ọtọkiet ke North America, Europe, Australia, ye New Zealand ẹma ẹse enye.
8. Etisịm 1914, idụt ifan̄ ke Nditọ Ukpepn̄kpọ Bible ẹkeda eti mbụk ẹkesịm?
8 Nte ekemde ye mme n̄wetnnịm n̄kpọ oro ẹdude, etisịm utịt utịt ikpehe 1914, ifịk ifịk otu mme ọkwọrọikọ emi ẹma ẹtan̄a ntọt Obio Ubọn̄ Abasi atara osịm idụt 68.a Edi oro ekedi sụk ntọn̄ọ!
Nditan̄a Obio Ubọn̄ Emi Ẹma Ẹkewụk Ifịk Ifịk
9. Ke ikpọ mbono Cedar Point, didie ke ẹkesịn odudu ke san̄asan̄a usụn̄ ẹnọ utom edinọ ikọ ntiense Obio Ubọn̄?
9 Ke ini Nditọ Ukpepn̄kpọ Bible ẹkesopde idem ke Cedar Point, Ohio, ke 1919, J. F. Rutherford, emi ekedide etieibuot Watch Tower Society adan̄aoro, ama atan̄a ete: “Ubọkutom nnyịn ekedi onyụn̄ edi ndinọ ntọt mban̄a ubọn̄ ubọn̄ obio ubọn̄ Messiah emi edide.” Ke udiana mbono eke Cedar Point, ke 1922, Brọda Rutherford ama owụt akpanikọ oro nte ke utịt Ini Mme Gentile, ke 1914, ‘Edidem ubọn̄ ama ọbọ akwa odudu ke idemesie onyụn̄ ọtọn̄ọ ndikara.’ Ekem, enye ama onịm otuowo esie n̄kpọ emi nnennen ke iso, ọdọhọde ete: “Nte mbufo ẹmenịm ke akpanikọ ete ke Edidem ubọn̄ ama ọtọn̄ọ ndikara? Ẹfiak ndien ẹka an̄wautom, O mbufo nditọ ata edikon̄ Abasi! . . . Ẹtan̄a etop oro ntatara ntatara. Ana ererimbot ẹfiọk ete ke Jehovah edi Abasi ye nte ke Jesus Christ edi Edidem ndidem ye Ọbọn̄ mbọn̄. Emi edi usen eke akande kpukpru usen. Sese, Edidem amakara! Mbufo ẹdi mme isụn̄utom usuanetop esie.”
10, 11. Didie ke ẹkeda radio, mme moto usuanetop, ye mme kad idiọn̄ọ ndida akpanikọ Obio Ubọn̄ nsịm mme owo?
10 Se iwakde ikan isua 70 ẹmebe tọn̄ọ nte ẹkenịm mme mbono Cedar Point oro—ekpere ndisịm isua 80 tọn̄ọ nte Jehovah ọkọtọn̄ọ ndiwụt itie edikara esie ebe ke ukara Messiah Eyen esie. Ke nso udomo ke Mme Ntiense Jehovah ẹnen̄ede ẹnam utom oro ẹnọde mmọ ke Ikọ Abasi? Nso udeme ke afo ke idemfo enyene ke enye?
11 Ke ntọn̄ọ ntọn̄ọ iduọkisua 1920, ẹma ẹkama radio nte n̄kpọutom oro ẹkemede ndida nsuan etop Obio Ubọn̄ ntatara ntatara. Ke iduọkisua 1930, ediwak ufọkutom radio m̀mê udịm udịm ndutịm usuanetop radio ye ndutịm urụk ukopikọ oro akanarede ofụri ererimbot ẹma ẹsuan mme utịn̄ikọ mbono oro owụtde Obio Ubọn̄ nte idotenyịn ererimbot. Ẹma ẹda n̄ko mme moto oro esịnede ukwak utịn̄ikọ ndibre mme utịn̄ikọ Bible oro ẹkemụmde ẹsịn ke ọkpọ umụmikọ ke mme an̄wan̄wa ebiet. Ndien ke 1936, ke Glasgow, Scotland, nditọete nnyịn ẹma ẹtọn̄ọ ndikọn̄ọ mme kad ntọt nte mmọ ẹbede ke mme ikpehe obio mbubehe nditọt utịn̄ikọ an̄wa. Kpukpru ẹmi ẹkedi nti usụn̄ ndinọ ediwak owo ikọ ntiense ke ini oro nnyịn mîkawakke ke ibat.
12. Nte N̄wed Abasi owụtde, nso idi kiet ke otu mfọnn̄kan usụn̄ inọ nnyịn owo kiet kiet ndinọ ikọ ntiense?
12 Ke akpanikọ, N̄wed Abasi anam an̄wan̄a ete ke nte mme Christian, nnyịn owo kiet kiet imenyene mbiomo edinọ ikọ ntiense. Nnyịn n̄kukụre ikemeke ndiyak mme ibuotikọ n̄wedmbụk n̄kpọntịbe m̀mê ndutịm usuanetop radio anam utom oro. Ediwak tọsịn mme Christian oro ẹnamde akpanikọ—iren, iban, n̄kparawa owo—ẹmenyịme mbiomo oro. Nte utịp, utom ukwọrọikọ eke ufọk ke ufọk amakabade edi idiọn̄ọ oro ẹkemede ndida mfiọk Mme Ntiense Jehovah.—Utom 5:42; 20:20.
Ndisịm Ofụri Ekondo
13, 14. (a) Ntak emi ndusụk Ntiense ẹwọrọde ẹka mme obio efen, idem mme idụt efen, man ẹkenam utom ukwọrọikọ mmọ? (b) Didie ke ima ima edikere mban̄a oro ẹnyenede ẹnọ mbon isọn̄ emana an̄wam ke ndisuan eti mbụk?
13 Ke ẹfiọkde ẹte ke ẹnyene ndikwọrọ etop Obio Ubọn̄ ke ofụri ekondo, ndusụk Mme Ntiense Jehovah emekere akpan akpan ẹban̄a se mmọ ẹkemede ndinam ke idemmọ man ẹsịm mme ebiet oro ọwọrọde ọkpọn̄ obio mmọ.
14 Ediwak owo ẹkekpep akpanikọ ke ẹma ẹkewọrọ ẹkpọn̄ obio emana mmọ. Okposụkedi ẹkemede ndidi ẹkewọrọ ke ntak ufọn n̄kpọ obụkidem, mmọ ẹma ẹkụt n̄kpọ oro ọsọn̄de urua akan, ndien ndusụk owo ẹma ẹkụt nte obiomode mmimọ ke idem ndifiak nnyọn̄ idụt m̀mê obio emana mmọ man ẹkebuana akpanikọ oro. Ntre, ke ntọn̄ọ ntọn̄ọ isua ikie emi edikwọrọ eti mbụk ama atara osịm Scandinavia, Greece, Italy, mme idụt Edem Usiahautịn Europe, ye ediwak ikpehe eken. Idem idahaemi, ke iduọkisua 1990 emi, etop Obio Ubọn̄ emi ke atara ke ukem usụn̄ oro.
15. Ke mme iduọkisua 1920 ye 1930, nso ke ndusụk owo oro ẹnyenede mbiet edu oro ẹtịn̄de ke Isaiah 6:8 ẹkenam?
15 Ke ẹdade item Ikọ Abasi ẹsịn ke edinam ke uwem mmọ, ndusụk owo ẹma ẹkeme ndinọ idemmọ unyịme unyịme ndinam utom ke mme ebiet oro akanam mmọ mîdụn̄ke. W. R. Brown (emi ẹkesiwakde ndikot “Bible Brown”) ekedi kiet ke otu mmọemi. Ke 1923, man anam utom ukwọrọikọ akaiso, enye ama ọkpọn̄ Trinidad aka Edem Usoputịn Africa. Ke mme iduọkisua 1930, Frank ye Gray Smith, Robert Nisbet, ye David Norman ẹkedi ndusụk ke otu mbon oro ẹkedade etop Obio Ubọn̄ ẹka mben esụk edem usiahautịn Africa. Mbon eken ẹma ẹn̄wam ndinam utom ke an̄wautom ke South America. Ke ntọn̄ọ ntọn̄ọ iduọkisua 1920, George Young, owo Canada, ama abuana ke ndinam utom ke Argentina, Brazil, Bolivia, Chile, ye Peru. Juan Muñiz, emi akanamde utom ke Spain, ama anam utom ke Argentina, Chile, Paraguay, ye Uruguay. Kpukpru mmọemi ẹma ẹwụt edu ebietde enyeoro etịn̄de ke Isaiah 6:8: “Se mi, dọn̄ mi utom.”
16. M̀mọ̀n̄ ke ẹsiode mme akpan ikpehe oro mme owo ẹdụn̄de ẹfep, ke ẹkenọ ikọ ntiense mbemiso isua ekọn̄?
16 Edikwọrọ eti mbụk ke okosịm mme ikpehe oro ẹkam ẹdude nsannsan. Mme ubom oro Mme Ntiense ẹkesiwatde ẹma ẹsika mme ine Newfoundland, esụk Norway ebe odụk Mbịt Mbịt N̄kan̄ Edere Edere, mme isuo Pacific, ye mme esụkmbehe Ufọt Edem Usụk ye Edem Usiahautịn Asia.
17. (a) Etisịm 1935, idụt ifan̄ ke Mme Ntiense ẹkesịm? (b) Ntak emi utom mîkokụreke ini oro?
17 Ke n̄kpaidem, etisịm isua 1935, Mme Ntiense Jehovah ke ẹkesịn idem ẹkwọrọ ikọ ke mme idụt 115, ndien mmọ ẹma ẹsịm idụt 34 en̄wen edide ke mme isan̄ unọ ikọ ntiense m̀mê ke mme n̄wed oro ẹnọde-nọ ẹka. Edi, owo ikokụreke utom oro. Ke isua oro Jehovah ama atat mmọ enyịn ndikụt uduak esie nditan̄ “akwa otuowo” emi ẹdibọhọde nnennen ẹdụk obufa ererimbot esie mbok. (Ediyarade 7:9, 10, 14) Akamba utom edinọ ikọ ntiense okosụk ododu!
18. Ke utom editan̄a Obio Ubọn̄, nso udeme ke Ufọkn̄wed Gilead ye Ufọkn̄wed Unọ Mme Asan̄autom Ukpep ẹnyene?
18 Idem ke ini Ekọn̄ Ererimbot II okomụmde isọn̄ ẹkenyụn̄ ẹdoride ukpan ke n̄wed ye utom Mme Ntiense Jehovah ke ediwak idụt, Watchtower Bible School of Gilead ama ọtọn̄ọ ndinọ mme isụn̄utom ini iso ukpep man ẹkpenam n̄kponn̄kan utom editan̄a Obio Ubọn̄ oro okosụk osụhọde ke ofụri ererimbot. Tutu osịm mfịn emi, mme andikụre ukpep ke Gilead ẹmenam utom ke se iwakde ikan idụt 200. Mmọ ẹnam se ikande edinịm mme n̄wed ndien ekem ẹkpọn̄ ẹka mme ikpehe en̄wen. Mmọ ẹmenịm mme ukpepn̄kpọ Bible, ẹtịm mme esop, ẹnyụn̄ ẹnọ mme owo ukpep ndibiom mme mbiomo ukara Abasi. Ke ata ndondo emi, mbiowo ye mme asan̄autom unamutom oro ẹkụrede ukpep ẹto Ufọkn̄wed Unọ Mme Asan̄autom Ukpep ẹmen̄wam n̄ko ke ndiyọhọ mme akpan udọn̄ oro ẹnyenede n̄kpọ ndinam ye utom emi ke ikpọ isọn̄ itiokiet. Ẹmesịm eti itiat idakisọn̄ ẹnọ n̄kaiso n̄kori.—Men 2 Timothy 2:2 domo.
19. Ke nso udomo ke mme asan̄autom Jehovah ẹnam n̄kpọ ẹban̄a ikot oro ẹnọde ndikanam utom ke mme ebiet oro udọn̄ okponde akan?
19 Ndi mmọ en̄wen ẹkpekeme ndin̄wam ke ndise mban̄a ndusụk efakutom oro owo mînamke utom? Ke 1957, ke ikpọ mbono eke ofụri ererimbot, ẹma ẹsịn udọn̄ ẹnọ mme owo kiet kiet ye mme ubon—Mme Ntiense Jehovah oro ẹkọride ẹsịm ọyọhọ idaha—ndikere mban̄a ediwọrọ n̄ka mme ikpehe oro udọn̄ okponde akan n̄kanam utom ukwọrọikọ do. Ikot emi ekenen̄ede ebiet enyeoro Abasi ọkọnọde apostle Paul, emi okokụtde eren kiet ke n̄kukụt eben̄ede enye ete: “Be di ke Macedonia, dinyan̄a nnyịn.” (Utom 16:9, 10) Ndusụk owo ẹma ẹnam uwọrọidụn̄ emi ke mme iduọkisua 1950, mmọ eken nte ini akakade. Mme owo ẹwakde ẹsịm tọsịn kiet ẹma ẹwọrọ ẹka Ireland ye Colombia; ediwak owo ikie ẹma ẹwọrọ ẹka mme itie en̄wen. Ediwak tọsịn ke mme itie duop ẹma ẹwọrọ ẹka mme ikpehe oro udọn̄ okponde akan ke idụt mmọ.—Psalm 110:3.
20. (a) Toto ke 1935, nso ke ẹnam ke ndisu prọfesi Jesus oro ke Matthew 24:14? (b) Ke ufan̄ isua ifan̄ ẹmi ẹkebede, didie ke ẹnam utom emi awara?
20 Ye edidiọn̄ Jehovah ke idem ikọt esie, utom editan̄a Obio Ubọn̄ ke enyene n̄kọri ke udomo oro ananade mbiet. Ọtọn̄ọde ke 1935 ibat mme asuanetop emekpere nditọt utịm ike anan̄, ndien udomo n̄kọri ke otu mme asiakusụn̄ amawak akan udomo n̄kọri ke ibat mme asuanetop ke mbahade 60 eke ikie. Ẹketọn̄ọ ndutịm edinịm ukpepn̄kpọ Bible ke iduọkisua 1930. Idahaemi ke ẹnịm se iwakde ikan mme ukpepn̄kpọ Bible miliọn inan̄ ye ubak kpukpru ọfiọn̄ ke ẹbaharede ukem ukem. Ọtọn̄ọde ke 1935 dọk ẹmesịn mme hour biliọn 15 ke utom editan̄a Obio Ubọn̄. Ẹmekwọrọ eti mbụk kpukpru ini idahaemi ke mme idụt 231. Nte ebederede mme efakutom ke Edem Usiahautịn Europe ye Africa ẹnọ edikwọrọ eti mbụk ifụre ifụre, ẹmeda mme mbono ofụri ererimbot mfọn mfọn ndinọ mme owo etop Obio Ubọn̄ in̄wan̄în̄wan̄. Nte Jehovah ọkọwọn̄ọde anyanini ko ke edem, ke Isaiah 60:22, enye ke akpanikọ ‘ke anam utom emi awara ke ekemini esie.’ Nso akwa ifet ke edi ntem ọnọ nnyịn ndibuana ke enye!
Ndisịm Kpukpru Owo Nte Ẹkekeme ye Eti Mbụk
21, 22. Nso ke nnyịn ke idem nnyịn ikeme ndinam man idi Mme Ntiense oro ẹtịmde ẹkụt unen ke ebiet ekededi oro nnyịn inamde utom?
21 Ọbọn̄ idọhọke kan̄a ke ẹkụre utom oro. Ediwak tọsịn owo ke ẹsụk eyenyịme utuakibuot akpanikọ. Ntem mbụme edemerede edi, Nte nnyịn ke inam kpukpru se ikemede ndida ini oro ime Jehovah ayakde odu ọnọ utom emi nnam n̄kpọ ke eti usụn̄?—2 Peter 3:15.
22 Idịghe kpukpru owo ẹkeme ndiwọrọ n̄ka efakutom oro owo mîsinamke utom kpukpru ini. Edi nte afo ke ada mme ifet oro ebederede ọnọ fi anam n̄kpọ ọyọhọ ọyọhọ? Nte afo emesinọ mme nsan̄a utom fo ikọ ntiense? mme andikpep ye mme nsan̄a ufọkn̄wed? Nte afo omokpụhọde ekekem ye mme ukpụhọde idaha oro odude ke efakutom fo? Edieke, nte utịp mme ukpụhọde idaha ke utom, ibat ibat owo ẹsidude ke ufọk ke uwemeyo, nte afo omokpụhọde ndutịm fo man ekeme ndika mbịne mmọ ke mbubịteyo? Edieke ẹbọpde mme ufọkidụn̄ ke usụn̄ oro isenowo oro owo mînọhọ ikot mîkemeke ndidụk, nte afo emesinọ ikọ ntiense ke urụk ukopikọ m̀mê edinọ ikọ ntiense ebe ke leta? Nte afo emesitiene udọn̄ oro ẹkewụtde onyụn̄ onyịme ndinịm mme ukpepn̄kpọ Bible? Nte afo amanam utom fo mfọn mfọn ama?—Men Utom 20:21; 2 Timothy 4:5 domo.
23. Nte Jehovah esede se nnyịn inamde ke utom esie, nso ikpana in̄wan̄în̄wan̄ ke n̄kan̄ nnyịn?
23 Akpakam kpukpru nnyịn inam utom ke usụn̄ oro owụtde Jehovah in̄wan̄în̄wan̄ nte ke nnyịn imenen̄ede iwụt esịtekọm inọ akwa ifet ndidi Mme Ntiense esie ke n̄kpọsọn̄ ini ẹmi. Nnyịn ikpakam inyene ifet ndikụt nte Jehovah ebierede ikpe ọnọ oburobụt akani editịm n̄kpọ emi onyụn̄ owụkde ubọn̄ ubọn̄ Ukara eke Tọsịn Isua Jesus Christ!
[Mme Ikọ idakisọn̄]
a Ẹbat etiene nte ẹkebahade isọn̄ ke ntọn̄ọ iduọk isua 1990.
Ke Ndidụn̄ọde
◻ Ntak emi edikwọrọ etop Obio Ubọn̄ edide akpan n̄kpọ ntre?
◻ Ke nso udomo ke ẹkekwọrọ eti mbụk tutu osịm 1914?
◻ Ẹsịn ifịk ndinọ ikọ ntiense adan̄a didie tọn̄ọ nte ẹkewụk Obio Ubọn̄?
◻ Nso ikeme ndinam udeme nnyịn ke utom ukwọrọikọ enyene uforo akan?
[Ekebe ke page 16, 17]
MME NTIENSE JEHOVAH Mme Anditan̄a Obio Ubọn̄ Abasi
Ke ediwak mbono ke mme itie ikie oro ẹkenịmde ke ofụri ererimbot ke 1993-1994, ẹma ẹtọt ẹban̄a edisio obufa n̄wed oro ẹkotde Jehovah’s Witnesses—Proclaimers of God’s Kingdom. Emi edi ata mbụk Mme Ntiense Jehovah oro esịnede ifiọk onyụn̄ ọyọhọde ekem. Enye edi n̄wed oro enyenede page 752, enyene ediye uduot ye mme ndise ẹwakde ẹkan tọsịn kiet ẹmi ẹdade ẹto nsio nsio idụt 96. Etisịm utịt 1993 ẹma ẹsosio enye ke usem 25 ndien ke ẹkabade enye ẹsịn ke mme usem efen efen.
Nso inam utọ n̄wed oro edi ekemini? Ke mme isua ndondo emi ediwak miliọn owo ke ofụri ererimbot ẹmekabade ẹdi Mme Ntiense Jehovah. Kpukpru mmọ ẹkpenyene nditịm nnyene ifiọk mban̄a mbụk esop oro mmọ ẹbuanade. N̄ko-n̄ko, ukwọrọikọ ye usụn̄ utuakibuot mmọ ẹmebe ẹsịm mme owo eke idụt ye orụk ke ofụri ererimbot onyụn̄ edi se n̄kparawa ye ikpọ owo ẹnyịmede, ke kpukpru idaha ndutịm uforo ye eke ifiọkn̄wed. Nte utịp, ediwak mbon oro ẹkụtde se idade itie ẹmebụp ediwak mbụme ẹban̄a Mme Ntiense—idịghe n̄kukụre kaban̄a se mmọ ẹnịmde ke akpanikọ edi n̄ko kaban̄a ntọn̄ọ mmọ, mbụk mmọ, ndutịm mmọ, mme uduak mmọ. Mmọ eken ẹmewet n̄kpọ ẹban̄a mmọ, okposụkedi mîsidịghe ye unana asari kpukpru ini. Nte ededi, idụhe owo ndomokiet oro ọfiọkde mbụk Mme Ntiense Jehovah eyomfịn akan Mme Ntiense ke idemmọ. Mme ewetn̄wed emi ẹmedomo ndiwet mbụk oro ke usụn̄ oro enyenede uduak onyụn̄ edide in̄wan̄în̄wan̄. Ke ndinam ntre, mmọ n̄ko ẹmewet edisu eke ata akpan ikpehe idiọn̄ọ edidu Christ oro ẹwetde ke Matthew 24:14 ẹnịm n̄kem n̄kem, ndien mmọ ẹnam enye ye ọyọhọ ntọt oro n̄kukụre mbon oro ẹbuanade ntotụn̄ọ ntotụn̄ọ ke utom oro ẹkebemde iso ẹtịn̄ ẹban̄a ẹkemede ndinọ.
Ẹbahade n̄wed emi ẹsịn ke akpan ikpehe itiaba:
Ikpehe 1: Ikpehe enyeemi odụn̄ọde akpasarade mbụk aban̄ade Mme Ntiense Jehovah. Enye esịne ibio ibio ntọt ndụn̄ọde aban̄ade mbụk mmọ eke eyomfịn oro esịnede ifiọk ọtọn̄ọde ke 1870 osịm 1992.
Ikpehe 2: In̄wan̄în̄wan̄ edifiak nse n̄kaiso n̄kọri oro odude ke se ẹnịmde ke akpanikọ oro adianarede Mme Ntiense Jehovah ọkpọn̄ mme otu ido ukpono eken odu mi.
Ikpehe 3: Ikpehe n̄wed enyeemi odụn̄ọde n̄kọri oro odude ke ndutịm esop mmọ. Enye eneme mme inem inem n̄kpọ aban̄a mme mbonoesop ye ikpọ mbono mmọ, ọkọrọ ye usụn̄ oro mmọ ẹbọpde mme Ufọkmbono Obio Ubọn̄ mmọ, ye ikpọ Ufọk Mbono, ye mme itieutom emi ẹdade emịn̄ mme n̄wed ukpep Bible. Enye owụt ifịk oro Mme Ntiense Jehovah ẹtan̄ade Obio Ubọn̄ Abasi ye ima oro ẹwụtde idem ke nte mmọ ẹsede ẹban̄a kiet eken ke mme ini afanikọn̄.
Ikpehe 4: Mi afo eyekụt inem inem ọyọhọ mbụk aban̄ade nte ukwọrọikọ Obio Ubọn̄ Abasi okosịmde mme akpan idụt ye mme isuo ẹmi ẹdude nsannsan ke n̄kanade ererimbot. Kam kere—ndikwọrọ ikọ ke idụt 43 ke isua 1914, edi etisịm 1992 idụt 229! Mme ifiọkutom mbon oro ẹkebuanade ke editat utom ofụri ererimbot emi ke akpanikọ ẹkama inemesịt.
Ikpehe 5: Ndiyọhọ kpukpru utom editan̄a Obio Ubọn̄ emi oyom ẹtat mme itieutom ofụri ererimbot emi ẹdade ẹmịn̄ mme Bible ọkọrọ ye mme n̄wed ukpep Bible ke se iwakde ikan usem ikie iba. Mi afo eyekpep aban̄a ikpehe utom mmọ enyeoro.
Ikpehe 6: Mme Ntiense n̄ko ẹmesobo mme idomo—ndusụk ke ntak unana mfọnmma owo, mmọ eken ke ntak nditọete abian̄a, ye idem ata ekese ke ntak in̄wan̄în̄wan̄ ukọbọ. Ikọ Abasi ama ọtọt ete ke emi edidi ntre. (Luke 17:1; 2 Timothy 3:12; 1 Peter 4:12; 2 Peter 2:1, 2) Ikpehe n̄wed enyeemi ke usụn̄ oro an̄wan̄ade eneme se ikenen̄erede ida itie ye nte mbuọtidem Mme Ntiense Jehovah akan̄wamde ndinyene edikan.
Ikpehe 7: Ke ndiberi, n̄wed oro eneme aban̄a ntak emi Mme Ntiense Jehovah ẹtịmde ẹnịm ke akpanikọ nte ke edi Abasi ada esop oro mmọ ẹbuanade ke esịt usụn̄. Enye n̄ko eneme aban̄a ntak emi mmọ ẹkụtde ufọn, nte esop ye nte owo kiet kiet, ndidu ke ukpeme.
Ke adianade ye mme n̄kpọ eke enyọn̄ emi, eboho n̄wed emi ẹnamde omụm owo udọn̄ mi esịne ediye ye akama-ntọt ikpehe edide page 50 emi enyenede ndiye ndise, ẹwụtde ibuot itieutom ofụri ererimbot ọkọrọ ye mme n̄kọk itieutom oro Mme Ntiense Jehovah ẹdade ẹnam n̄kpọ ke ofụri ererimbot.
Edieke afo mûnamke oro kan̄a, afo ke akpanikọ eyebọ ufọn oto edibọ nnyụn̄ n̄kot akama nduaidem n̄wed emi kiet.
Ikọ Ẹtode Ndusụk Owo Emi Ẹma Ẹkekokot Enye
Nso ke ndusụk owo oro ẹma ẹkekokot n̄wed emi ẹtịn̄? Ibat ibat ẹdu mi:
“Ami nsụk n̄kụre ndikot aduai-owo idem okopidem uwetn̄kpọ oro, Jehovah’s Witnesses—Proclaimers of God’s Kingdom. Edi n̄kukụre esop oro ayakde idem ọnọ akpanikọ ke edinam akpanikọ ye nsụhọdeidem ekeme ndiwet n̄kpọ ntem in̄wan̄în̄wan̄, uko uko, ye ke usụn̄ oro otụkde owo.”
“Enye etie nte n̄wed Utom Mme Apostle, edi nnennen onyụn̄ etie in̄wan̄în̄wan̄.”
“Nso inem inem obufa n̄wed ke emi edi ntem! . . . Enye edi onịm-mbụk utom usọ.”
Ke ama okokot n̄wed oro osịm n̄kpọ nte mbahade iba, eren kiet ama ewet ete: “Uten̄e ama ofụk mi, uyo ama akak mi, mmọn̄eyet onyụn̄ ekpere ndisiaha mi. . . . Ke kpukpru mme isua mi, idụhe n̄wed en̄wen oro akamade mbọribọ ntem.”
“Ami mmesikop idatesịt kpukpru ini oro n̄kerede nte n̄wed emi edisọn̄ọde mbuọtidem n̄kparawa owo ọkọrọ ye mbon owo oro ẹdụkde ẹdi esop idahaemi.”
“Ami mmesiwụt esịtekọm nnọ akpanikọ kpukpru ini, edi ndikot n̄wed emi amatat mi enyịn onyụn̄ an̄wam mi ndifiọk n̄kan nte akanam mfiọkde nte ke edisana spirit Jehovah ọnọ ndausụn̄ ke kpukpru n̄kpọ.”
[Mme ndise ke page 18]
Ẹma ẹsịm ediwak owo ye etop Obio Ubọn̄ idem ke ini Mme Ntiense ẹkedide esisịt ke ibat