Ntak Enyenede Udọn̄ ke Ido Ukpono?

KE KPUKPRU idụt ke iso isọn̄, ẹnyene udọn̄ ke ido ukpono. Ke n̄kan̄ eken, odu n̄ko ediwak owo oro etịn̄de in̄wan̄în̄wan̄ nte ke mmimọ inyeneke udọn̄ ke ido ukpono. Edi ndi mmọ ẹsitịn̄ ntre kpukpru ini?

Obot owo edi ke utọ usụn̄ oro owo mînen̄ekede ikop uyụhọ ke mme n̄kpọ obụkidem ikpọn̄îkpọn̄. Mme owo ẹyom mme n̄kpọ eke spirit. Uwem eke usen ke usen oro ọkọn̄ọde ke edinyene sụk mme n̄kpọ obụkidem, ye edinyene mme ini nduọkodudu ke ini ke ini, iyụhọke mme udọn̄ esịtidem owo ọyọhọ ọyọhọ. Ke mîbietke mme unam, mme owo ẹyom ndifiọk, ‘Nso idi uduak uwem?’ ‘Ndi ibio ibio uwem emi, esịnede ekese ndiye n̄kpọ ye ekese ndiọi n̄kpọ n̄ko, edi ukụre se idude?’ Nte akanam afo ubụpke mme utọ mbụme nte mmọemi?

Edi, ediwak miliọn owo ẹmi ẹdude uwem mfịn ẹkekpon ke mme n̄kann̄kụk oro ẹbiọn̄ọde-⁠biọn̄ọ eti udọn̄ ekededi oro ẹnyenede ke ido ukpono. Idaha ekikere oro ekeme ndikoto mme ete ye eka mmọ, mme andikpep mmọ, ubọkn̄ka, m̀mê idem otode ukara.

Skalabrino, akparawa emi otode Albania, ama anam an̄wan̄a ete ke ẹma ẹkpep mme owo ke idak ukara Communist nte ke Abasi idụhe. N̄ko-n̄ko, ekedi n̄kpọndịk ọnọ mmọ ndineme mban̄a ido ukpono; ndinam ntre ekeme ndisụn̄o ke n̄kpọkọbi. Edi, ke 1991, ke ini okodude ke Switzerland nte owo itọk ekọn̄, ẹma ẹnọ enye ifet ndikpep Bible. Enye ama onyịme. Ntak-⁠a?

Ọfọn, ke Albania enye ama okop nte ke odu utọ n̄wed emi edide Bible, edi enye iketịmke ifiọk n̄kpọ ndomokiet iban̄a enye. Ntem, ke ntọn̄ọ ntọn̄ọ ekeme ndidi ikedịghe udọn̄ edinyene ifiọk Bible okonụk enye akpan akpan. Ke adan̄aemi ẹkedọhọde enye ete ke enye eyekpep aban̄a uduak Abasi kaban̄a ubonowo ye isọn̄, enye n̄ko ama ada emi nte ifet ndinam n̄kọri ke nte enye etịn̄de usem n̄kann̄kụk oro. Nte ededi, ikebịghike enye ama okụt nte ke se imọ ikekpepde ama oyụhọ ọkpọsọn̄ udọn̄ oro imọ ikenyenede iban̄a mme n̄kpọ eke spirit. Enye ama okop inemesịt ke un̄wọn̄ọ Abasi aban̄ade obufa ererimbot emi emem edidude, kpa ererimbot emi mme owo ẹdikemede ndidụn̄ ke nsinsi nnyụn̄ ndara ediwak n̄kpọ oro uwem oyomde. Udọn̄ esie ama ọkọri ke ini enye ekekpepde nte ke enye ye ubon esie ẹkeme ndidi ubak obufa ererimbot emi. Sia mîkekemeke ndimụm eti mbụk emi n̄kama ke idemesie ikpọn̄, enye ama okot ubon esie ke Albania ke urụk ukopikọ onyụn̄ abuana enye ye mmọ.

Aleksei, emi odụn̄de ke Russia, ama odu n̄ko ke n̄kpaidem aban̄a odudu oro nnennen ifiọk Bible ekemede ndinyene ke uwem owo. Ke ntak n̄kpọsọn̄ mfịna ye unana edinam uduak uwem an̄wan̄a ke usụn̄ oro ọnọde uyụhọ, enye ama odiomi ndiwot idem. Nte ededi, enye ama ebem kan̄a iso aka Finland ndikese ufan esie kiet. Ke usụn̄isan̄ ke tren, enye ama eneme mfịna esie ọnọ ndusụk ekemmọ mbonisan̄. Kiet ke otu Mme Ntiense Jehovah ama odu ke otu mmọ, emi ekesịnde udọn̄ ọnọ enye ndikpep Bible koro enye ọnọde usọbọ ke mme utọ mfịna ntre. Enye ama eyịk aban̄a oro. Ke afiakde ọnyọn̄, enye ama enyene ukem ifiọk n̄kpọntịbe oro. Isan̄ enyeemi ekedi Ntiense efen ekenyene nneme ye enye onyụn̄ ọdọhọ enye ke imọ ima isinyene mme utọ mfịna ntre edi nte ke Bible akan̄wam imọ ndikan emi. N̄wan emi n̄ko ama esịn udọn̄ ọnọ enye ndikpep Bible. Ke ini enye okosịmde ufọk, n̄kanika urụk ukopikọ ama amia. Ekedi ufan esie emi okosụk ekpepde n̄kpọ ye Mme Ntiense onyụn̄ okopde inemesịt etieti. Eren oro ama ọtọn̄ọ ndikụt nte ke iso-ọfọn Bible ekeme ke akpanikọ ndinọ se imọ ikoyomde, edi enye ama ọfiọk nte ke imọ idikemeke ndifiọk enye ye unana un̄wam. Enye ama onyịme ndinyene ukpepn̄kpọ Bible ofụri ini ye Mme Ntiense Jehovah, ndien enye ama ọtọn̄ọ ndidụk mme mbonoesop mmọ. Ikadaha enye anyanini ndifiọk ntak emi mbon oro ẹdade se Bible ekpepde ẹdu uwem ẹkopde inemesịt ntre, kpa ye oro mmọ n̄ko ẹsobode mme mfịna oro ubonowo ẹsobode.

Ye ifiọk oro enyenede aban̄a obot owo, Jesus Christ ama ọdọhọ ete: “Owo ikemeke ndidu uwem ke uyo ikpọn̄.” (Matthew 4:4, The New English Bible) Enye n̄ko ama ọdọhọ ete: “Ọfọfọn ọnọ mbon oro ẹnyenede udọn̄ ke n̄kpọ eke spirit mmọ.” (Matthew 5:3, NW) Mmọ ẹnyene inemesịt koro mmọ ẹtịmde ẹfiọk udọn̄ mmọ, ẹnam nnennen usio-ukot ndiyụhọ enye, ẹnyụn̄ ẹnyene edidiọn̄ Abasi. Nte ededi, nnyịn iyụhọke udọn̄ n̄kpọ eke spirit nnyịn n̄kukụre ke ndibuana ke ufọkabasi m̀mê ke ndidụk ndusụk edinam ido ukpono. Ido ukpono emi ke akamba udomo ọyọhọde ye ido edinam ekeme ndidemede owo ntụk, edi nte enye ọnọ mme ata usọbọ ke mme mfịna uwem? Idem okposụkedi ido ukpono esinọde ndusụk akpan item oro ẹfọnde, edieke enye okpude ndiwụt se idide ata uduak eke uwem, nte enye eyeyụhọ udọn̄ eke spirit fo? Idem ke edide akpan n̄kpọ udọn̄ akan oro, nte ndibuana ke utọ ido ukpono oro eyeda okosịm eti itie ebuana ye Abasi? Ke ẹsiode oro ẹfep, ata uyụhọ eyenana.

Kaban̄a emi ediwak owo ke ẹyom n̄kpọ oro mmọ mîkwe kan̄a.

[Ndise ke page 3]

Nte edibuana ke ufọkabasi eyenen̄ede oyụhọ mme udọn̄ eke spirit fo?

[Ndise ke page 4]

Ediwak owo ẹmekụt nte ke ini Bible an̄wan̄ade mmọ, uwem esinyene inem ke usụn̄ efen