Mbonima Fo Oro Ẹkekpade—Nte Afo Eyefiak Okụt Mmọ?
JOHN ekedi isua usụkkiet kpọt ke ini eka esie akakpade. Ekem, enye ama eti se ikotịbede ke ufọk ubụkowo oro ete: “Ami mma n̄wet ndise nnọ enye nnyụn̄ n̄wet ekpri n̄kpọ ndian do ndọhọde enye ebet kpukpru nnyịn ke heaven. Ami mma nyak enye nnọ Papa nte esịn ke ekebe ọnọ enye, ndien idem okposụkedi enye ama akakpa, mma nsima ndikere nte ke enye ama ọbọ akpatre etop oro oto mi.”—How It Feels When a Parent Dies, emi Jill Krementz ewetde.
Eyịghe ikemeke ndidu nte ke John ama enen̄ede ama eka esie. Ke ama eketịn̄ aban̄a mme nti edu esie, enye ama ọdọhọ ete: “Ekeme ndidi n̄kukụre koro nyomke nditi ndiọi n̄kpọ, edi n̄kemeke nditi idiọkn̄kpọ ndomokiet oro enye akanamde. Enye ekedi nye-n̄kan an̄wan oro akanam n̄kụtde ke ofụri eyouwem mi.”
Ukem nte John, ediwak owo ẹsiti inem inem n̄kpọ ẹban̄a mbonima mmọ oro ẹkekpade ẹnyụn̄ ẹnyịme ke ẹsidọn̄ mmimọ ndikpafiak n̄kụt mmọ. Edith, emi eyeneren esie isua 26 akakpade ke udọn̄ọ cancer ọkọdọhọ ete: “Ọdọn̄ mi ndinịm nte ke enyene ebiet emi eyen mi odude edi mfiọkke m̀mê enye odu ke m̀mọ̀n̄. Nte nyefiak n̄kụt enye? Mfiọkke edi mmodori enyịn ke nyekụt.”
Ke akpanikọ, ima ima Andibot owo inanake mbọm iban̄a ndamban̄a udọn̄ owo emi. Ntak edi oro enye ọn̄wọn̄ọde ete ke ini ke edi emi ediwak miliọn owo ẹdifiakde ẹdiana ye mbonima mmọ oro ẹkekpade. Ikọ Abasi ọdọn̄ọ ediwak ntọt aban̄ade un̄wọn̄ọ ediset mme akpan̄kpa oro edidade itie.—Isaiah 26:19; Daniel 12:2, 13; Hosea 13:14; John 5:28, 29; Ediyarade 20:12, 13.
Mmanie ke Ẹnam Ẹset Ẹka Heaven?
Ẹyak ikere iban̄a idotenyịn John oro nte ke edima eka esie ke ebet enye ke heaven. Ediwak mme aka ufọkabasi ẹnyene idotenyịn m̀mê edinịm ke akpanikọ emi. Ke ukeme ndisọn̄ọ mme utọ ekikere ẹmi, mme ọkwọrọ ederi ye ndusụk mme anamutom ufọn eke n̄kaowo ẹmekabade mme itien̄wed Bible ke ukwan̄ usụn̄.
Ke uwụtn̄kpọ, ata andin̄wam mbon ẹmi owo mmọ akpade, Dr. Elisabeth Kübler-Ross, ọkọdọhọ ke n̄wed esie oro On Children and Death ete: “Ndikpa n̄kukụre ọwọrọ ete ke nnyịn imosio idem nnyịn iduọk ukem nte nnyịn ikemede ndisio akani n̄waha coat nduọk, m̀mê ndiwọrọ ke ubet kiet ndụk en̄wen. Ke Ecclesiastes 12:7, nnyịn ikot ite: ‘Ndien ntan eyefiak ke ntan, kpa nte ekedide; spirit eyefiak etiene Abasi emi ọkọnọde enye.’ Jesus ọkọdọhọ ete: ‘N̄ka ndikotịm itie nnọ mbufo man ke ebiet eke ami ndude mbufo ẹkpedu do n̄ko.’ Ndien ye inọ oro ọkọkọn̄ọde ke cross: ‘Mfịn emi afo eyedu ye ami ke paradise.’”
Nte mme itien̄wed eke enyọn̄ emi ẹnen̄ede ẹwọrọ ke mbonima nnyịn oro ẹkekpade ke ẹdu uwem kemi ke ẹnyụn̄ ẹbet nnyịn ke heaven? Ẹyak nnyịn itịm ikere iban̄a mme itien̄wed ẹmi ye ntịn̄enyịn, itọn̄ọde ye Ecclesiastes 12:7. Nte an̄wan̄ade, owo ọniọn̄ oro ekewetde mme ikọ oro ikoyomke ndinam se enye ama ekewewet ke ukem n̄wed Bible oro atuaha ye eken: ‘Mme oduuwem ẹfiọk ẹte ke mmimọ inyene ndikpa: edi amaedi mme akpan̄kpa, mmọ ifiọkke baba n̄kpọ kiet.’ (Ecclesiastes 9:5) Enye ekeneme aban̄a n̄kpa ubonowo ke ofụri ofụri. Nte owụt ifiọk ndinịm ke akpanikọ nte ke kpukpru mme ọsọn̄esịt mbon oro mînịmke edidu Abasi ke akpanikọ ye mme ata abiatibet ẹfiak ẹtiene Abasi ke mmọ ẹkpade? Iwụtke. Ke akpanikọ, owo ikemeke nditịn̄ oro mban̄a owo nnyịn ekededi, inamke n̄kpọ m̀mê nnyịn ibat idem nnyịn ke eti m̀mê idiọk. Sia owo nnyịn ndomokiet akanam mîdụhe ye Abasi ke heaven, didie ke ẹkeme ndidọhọ ke nnyịn ifiak itiene enye?
Nso, ndien, ke ikọ andiwet Bible oro ọwọrọ ke ndidọhọ ke owo akpade, ‘spirit afiak etiene Abasi akpanikọ’? Ke ndida ikọ Hebrew oro ẹkabarede “spirit,” enye iketịn̄ke iban̄a n̄kpọ oro edide san̄asan̄a oro anamde owo kiet okpụhọde ye eken. Utu ke oro, ke Ecclesiastes 3:19, ukem andiwet Bible eke odudu spirit oro anam an̄wan̄a ete ke owo ye mme unam “kpukpru mmọ ẹnyene kpasụk ibifịk [“spirit,” NW] kiet.” Nte an̄wan̄ade ikọ esie ọkọwọrọ ke “spirit” edi odudu uwem ke mme nsen oro ẹnamde obụkidem mme owo ye eke unam. Nnyịn ikọbọhọ spirit emi nnennen ito Abasi. Enye ekebe ke ete ye eka nnyịn eke owo osịm nnyịn ke ini ẹkeyomode ndien ekem ẹman nnyịn. N̄ko-n̄ko, spirit emi ke ataata usụn̄ifiọk isan̄ake ibe edem ikpaenyọn̄ inyụn̄ ifiak itiene Abasi ke owo akpade. Ikọ oro, ‘spirit afiak etiene Abasi akpanikọ,’ edi ebetọ ikọ emi ọwọrọde nte ke idotenyịn uwem ini iso akpan̄kpa oro ọkọn̄ọ idahaemi ke Abasi. Enye enyene ndibiere owo emi enye editide, ekem onyụn̄ anam enye eset ke n̄kpa. Tịmfiọk ke idemfo nte Bible owụtde emi in̄wan̄în̄wan̄ ke Psalm 104:29, 30.
Jehovah Abasi amaduak ndinam ibat ibat mme anam-akpanikọ anditiene Christ, ẹdide 144,000 kpọt, ẹset ẹka uwem eke heaven nte nditọ Abasi eke spirit. (Ediyarade 14:1, 3) Mmọemi ẹyenam ukara eke heaven ye Christ kaban̄a edidiọn̄ ubonowo ke isọn̄.
Akpa mbon oro ẹkediọn̄ọde emi ẹkedi mme anam-akpanikọ apostle Jesus, ẹmi enye ọkọdọhọde ete: “Ediwak ufọk ẹdu ke ebiet Ete Mi; edieke mîkpedịghe ntre, n̄kpọdọhọ mbufo; koro mmọn̄ n̄ka n̄kotịm itie nnịm nnọ mbufo. Ndien edieke n̄kade n̄kotịm itie ntre nnọ mbufo, nyefiak ndi ndida mbufo nnọ Idemmi; man mbufo ẹnyụn̄ ẹdu ke ebiet eke Ami ndude.” (John 14:2, 3) Mme apostle oro ye mme akpa Christian eken ẹma ẹkpan̄a ẹkenyụn̄ ẹnyene ndibet ye unana ifiọk tutu Jesus edi ndinọ mmọ utịp ediset ke n̄kpa n̄ka heaven. Ntak edi oro nnyịn ikotde nte ke Stephen, akpa Christian oro akakpade n̄kpa usụn̄ Abasi ‘ekedede.’—Utom 7:60; 1 Thessalonica 4:13.
Ediset Ndụk Uwem ke Isọn̄
Edi nso kaban̄a un̄wọn̄ọ oro Jesus ọkọwọn̄ọde ọnọ owo inọ oro akakpade ye enye? Ukem nte ediwak mme Jew eke ini oro, owo emi ama onịm ke akpanikọ ete ke Abasi eyedọn̄ Messiah oro ediwụkde obio ubọn̄ edinyụn̄ adade emem ye ifụre ọsọk idụt Israel ke isọn̄. (Men 1 Ndidem 4:20-25 domo ye Luke 19:11; 24:21 ye Utom 1:6.) Akande oro, anamidiọk oro ama owụt mbuọtidem nte ke Jesus ekedi ata Enyeoro Abasi ekemekde ndidi Edidem. Edi, ke ukem ini oro, n̄kpa Jesus nte owo oro ẹbiomde ikpe ama anam emi etie nte se mîkemeke nditịbe. Ntak edi oro Jesus ọkọsọn̄ọde etịn̄ ọnọ owo inọ oro ke ndiwụt un̄wọn̄ọ esie ye mme ikọ ẹmi: “Ke akpanikọ ke ndọhọ fi mfịn emi, Afo eyedu ye ami ke Paradise.”—Luke 23:42, 43, NW.
Mme edikabade Bible oro ẹsịnde kọma mbemiso ikọ oro “mfịn” ẹnam edi ọkpọsọn̄ n̄kpọ mme ikọ Jesus oro ndin̄wan̄a mme owo. Jesus ikakaha paradise ndomokiet kpa ke usen oro. Utu ke oro, enye ama akpa ye unana edidiọn̄ọ n̄kpọ ke usen ita tutu Abasi anam enye eset. Idem ke Jesus ama ekeset onyụn̄ ọdọk ke heaven, enye ekenyene ndibet ke ubọk nnasia Ete esie tutu ini edikem ọnọ enye ndikara ubonowo nte Edidem. (Mme Hebrew 10:12, 13) Ibịghike, ukara Obio Ubọn̄ Jesus eyeda ubọhọ ọsọk ubonowo onyụn̄ okpụhọde ofụri isọn̄ esịn ke paradise. (Luke 21:10, 11, 25-31) Do enye eyenam un̄wọn̄ọ esie oro enye ọkọn̄wọn̄ọde ọnọ owo inọ oro osu ke ndinam enye eset odụk uwem ke isọn̄. Ndien Jesus eyedu ye owo oro ke usụn̄ifiọk nte ke Enye eyen̄wam owo oro enyene kpukpru se enye oyomde, esịnede udọn̄ esie ndidu uwem ekekem ye ndinen ibet Abasi.
Ediset ke N̄kpa Ediwak Owo
Ukem nte akabade esịt inọ oro, ẹyenam ekese owo ẹset ke n̄kpa mi ke isọn̄. Emi odu ke n̄kemuyo ye uduak Abasi ndikobot owo. Ẹkenịm akpa eren ye n̄wan oro ke in̄wan̄ paradise ẹnyụn̄ ẹdọhọ ẹkara isọn̄. Edieke mmọ ẹkpekekopde uyo ẹnọ Abasi, mmọ ikpekekọrike isọn̄ inyụn̄ ikpa. Ke edikem ini Abasi, ẹkpekekara ofụri isọn̄, emi Adam ye mfọnmma nditọ esie ẹkpekenamde akabade edi paradise ofụri ererimbot.—Genesis 1:28; 2:8, 9.
Nte ededi, sia Adam ye Eve ẹkekoide-koi ẹnam idiọkn̄kpọ, mmọ ẹma ẹda n̄kpa ẹsọk idemmọ ye nditọ mmọ eke ini iso. (Genesis 2:16, 17; 3:17-19) Ntak edi oro Bible ọdọhọde ete: “Nte idiọkn̄kpọ okotode owo kiet odụk ke ereimbot, n̄kpa onyụn̄ otode ke idiọkn̄kpọ oro odụk; n̄kpa onyụn̄ ebe osịm kpukpru owo, koro kpukpru owo ẹma ẹnam idiọkn̄kpọ.”—Rome 5:12.
Owo kiet kpọt odu oro mîkamanake ye ndammana idiọkn̄kpọ. Oro ekedi mfọnmma Eyen Abasi, Jesus Christ, emi ẹkemende uwem esie ke heaven ẹdisịn ke idịbi Mary, eyenan̄wan Jew oro mîkọfiọkke erenowo. Jesus ikenyeneke idiọkn̄kpọ ikonyụn̄ idotke se ẹkpewotde. Ntem, n̄kpa esie ama enyene ufọn uwa ufak ọnọ “idiọkn̄kpọ ererimbot.” (John 1:29; Matthew 20:28) Oro edi ntak emi Jesus ọkọdọhọde ete: “Ami ndi ediset ye uwem: owo eke ọbuọtde idem ye Ami, okposụkedi nte enye ama akpa, enye eyedu uwem.”—John 11:25.
Ntre, ih, afo emekeme ndinyene idotenyịn ndifiak ndiana ye mbonima fo oro ẹkekpade, edi emi oyom ete afo enyene mbuọtidem ke Jesus nte Andifak fi onyụn̄ okop uyo esie nte Edidem oro Abasi emekde. Ibịghike, Obio Ubọn̄ Abasi eyesio kpukpru idiọkn̄kpọ efep ke ererimbot emi. Ẹyesobo kpukpru owo oro ẹsịnde ndisụk ibuot nnọ ukara emi ẹfep. Nte ededi, mme andidu ke idak Obio Ubọn̄ Abasi ẹyebọhọ ẹnyụn̄ ẹsịn idem ke utom edinam isọn̄ akabade edi paradise.—Psalm 37:10, 11; Ediyarade 21:3-5.
Ekem inem inem ini oro eyedisịm ọnọ ediset ke n̄kpa nditọn̄ọ. Nte afo eyedu do ndidara mme akpan̄kpa oro ẹdisetde? Kpukpru ọkọn̄ọ ke se afo anamde idahaemi. Mme utịbe edidiọn̄ ke ẹbet kpukpru owo oro ẹsụkde idem ẹnọ ukara Obio Ubọn̄ Jehovah ke ubọk Eyen esie, Jesus Christ, idahaemi.