Ke Ewe Okpokoro Ke Afo Adia N̄kpọ?
“Mbufo ikemeke nditiene ndia n̄kpọ ke okpokoro Ọbọn̄, nnyụn̄ ndia ke okpokoro mme demon.”—1 CORINTH 10:21.
1. Mme okpokoro ewe ke ẹbri nnyịn ke iso, ndien nso item ke apostle Paul ọkọnọ aban̄a mmọ?
MME ikọ apostle Paul eke odudu spirit ẹmi ẹwụt nte ke ẹbri ndamban̄a okpokoro iba ẹnọ ubonowo. Ẹdiọn̄ọ okpokoro kiet kiet ebe ke utọ ndamban̄a udia oro ẹdoride ke enye, ndien kpukpru nnyịn ke idia ke kiet m̀mê eken. Nte ededi, edieke nnyịn iyomde ndinem Abasi esịt, nnyịn ikemeke ndidia n̄kpọ ke okpokoro esie ndien ke ukem ini oro idia n̄kpọ ke okpokoro mme demon. Apostle Paul ama odụri owo utọn̄ ete: “Se mme Gentile ẹwade, ke ẹwa ẹnọ mme demon, iwaha inọ Abasi; ndien nyomke mbufo ẹdụk ebuana ye mme demon. Mbufo ikemeke ndin̄wọn̄ cup Ọbọn̄ ye cup mme demon. Mbufo ikemeke nditiene ndia n̄kpọ ke okpokoro Ọbọn̄, nnyụn̄ ndia ke okpokoro mme demon.”—1 Corinth 10:20, 21.
2. (a) Ewe okpokoro Jehovah okodu ke eyo Israel eset, ndien mmanie ẹketiene ẹbuana ke mme uwa emem? (b) Nso ke edidia n̄kpọ ke okpokoro Jehovah ọwọrọ mfịn?
2 Mme ikọ Paul ẹti nnyịn ẹban̄a uwa emem oro nditọ Israel eke eset ẹkesiwade ke idak Ibet Jehovah. Ẹkekot itieuwa Abasi okpokoro, ndien ẹkesidọhọ ke owo oro adade unam edi ndiwa enyene ebuana ye Jehovah ye mme oku. Didie? Akpa, Jehovah ekenyene ebuana ke uwa oro koro ẹma ẹsisịme iyịp ke itieuwa esie ndien edeme ikan̄ oro ekesidude ke idak ama esita ikpọn̄ unam oro. Ọyọhọ iba, oku ekenyene ebuana koro enye (ye ubon esie) ẹma ẹsita ikọn̄esịt ye ukot nnasia unam uwa oro ẹkesifọpde ke ikan̄. Ndien ọyọhọ ita, andinọ ekenyene ebuana ebe ke ndita nyọhọ nsụhọ eken. (Leviticus 7:11-36) Mfịn, ndidia n̄kpọ ke okpokoro Jehovah ọwọrọ ke ana nnyịn inọ enye orụk utuakibuot oro enye oyomde, emi Jesus ye mme apostle esie ẹkedide uwụtn̄kpọ. Man inam emi, ana nnyịn idia n̄kpọ eke spirit koro Jehovah ọnọde ebe ke Ikọ ye esop esie. Ẹma ẹkpan nditọ Israel, ẹmi ẹkedarade san̄asan̄a ebuana ye Jehovah ke okpokoro esie, ndiwa mme uwa nnọ mme demon ke mme okpokoro mmọ. Nditọ Israel eke spirit ye “mme erọn̄ en̄wen” ẹdide nsan̄a mmọ ẹdu ke idak ukem ukpan oro otode Abasi mi.—John 10:16.
3. Didie ke owo ekeme ndinyene ubiomikpe edidia n̄kpọ ke okpokoro mme demon ke eyo nnyịn?
3 Didie ke owo ekeme ndinyene ubiomikpe ke ndidia n̄kpọ ke okpokoro mme demon mfịn? Ebe ke ndinam n̄kpọ ke ufọn n̄kpọ ekededi oro ọbiọn̄ọde-biọn̄ọ Jehovah. Okpokoro mme demon esịne kpukpru edinam mme demon oro ẹnamde ndibian̄a nnyụn̄ n̄wọn̄ọde nnyịn n̄kpọn̄ Jehovah. Anie okpoyom ndibọk esịt ye ekikere esie ke utọ idiọk ibọk oro? Mme ata Christian ẹsisịn nditiene mbuana ke mme uwa oro ediwak owo mfịn ẹwade ẹnọ mme abasi ekọn̄ ye eke inyene.—Matthew 6:24.
Ndifep “Okpokoro Mme Demon”
4. Nso mbụme ke kpukpru nnyịn isak iso ise, ndien ntak emi nnyịn mîkpoyomke ndikokoi ndia n̄kpọ ke okpokoro mme demon?
4 Mbụme oro kpukpru nnyịn isakde iso ise edi, Ke ewe okpokoro ke ami ndia n̄kpọ? Nnyịn ikemeke ndifep akpanikọ oro nte ke nnyịn ikemeke nditre ndidia n̄kpọ ke okpokoro kiet m̀mê eken. (Men Matthew 12:30 domo.) Nnyịn ikpoyomke ndikokoi ndia n̄kpọ ke okpokoro mme demon. Ndinam oro akpanam nnyịn itaba mfọn n̄kukụre oduuwem Abasi kierakiet, Jehovah. Ke n̄kan̄ eken, ndidia n̄kpọ ke okpokoro Jehovah ikpọn̄ ada okosịm nnyịn ndinyene nsinsi uwem ke inemesịt! (John 17:3) Ẹsidọhọ ete ke owo edi se enye adiade. Do, owo ekededi, emi oyomde ndinyene eti nsọn̄idem ikpọkidem ye eke ekikere enyene ndikpeme se enye adiade. Kpa nte mbiara udia oro awakde isek, okposụkedi ẹtemde enem ye mme n̄kpọ oro anamde isek oro osụhọde, mîtịpke isịn ke n̄kaiso nsọn̄idem ikpọkidem nnyịn, ntre ke ekikere ererimbot emi ọyọhọde ye mme ekikere demon edi idiọk ndamban̄a mbiara udia oro edibiatde ekikere nnyịn.
5. Didie ke nnyịn ikeme ndifep mme ukpepn̄kpọ demon mfịn?
5 Apostle Paul ama ebemiso etịn̄ ete ke mme ukperedem usen, ẹyeda mme owo ẹtụn usụn̄ ebe ke “ukpepn̄kpọ mme demon.” (1 Timothy 4:1) Idịghe ke mme edinịm ke akpanikọ nsunsu ido ukpono ikpọn̄ ke ẹkụt mme utọ ukpepn̄kpọ demon oro, edi ẹsuan mmọ n̄ko ntatara ntatara ke ediwak usụn̄. Ke uwụtn̄kpọ, oyom nnyịn idụn̄ọde inyụn̄ ifiọk mme utọ n̄wed ye mme magazine oro nnyịn ye nditọ nnyịn ikotde, mme utọ edinam television oro nnyịn isede, ye utọ mbre ye ndise oro nnyịn isede. (Mme N̄ke 14:15) Edieke nnyịn ikotde mbụk oro ẹkerede-kere ẹwet kaban̄a unọidem inemesịt, nte enye owụt ibak ibak afai, oburobụt ido idan̄, m̀mê mme edinam odudu mme demon? Edieke nnyịn ikotde mme n̄kpọ oro owo mîkereke-kere iwet man inyene ifiọk, nte enye etịn̄ in̄wan̄în̄wan̄ aban̄a akwaifiọk owo m̀mê usụn̄uwem oro ‘mîsan̄ake ikekem ye Christ’? (Colossae 2:8) Nte ikpîkpu ekikere ke ẹwet, mîdịghe ndi ẹtịn̄ ẹban̄a edisịn idem ke mme edinam n̄ka ererimbot? Ndi enye esịn udọn̄ ọnọ ubiere ndinen̄ede nnyene n̄kpọ? (1 Timothy 6:9) Nte enye edi n̄wed oro ke n̄kari owụtde mme ukpepn̄kpọ oro mîdaha edidianakiet idi oro mîdịghe eke Christ? Edieke ibọrọ edide ih ndien nnyịn isụk ikaiso ndikot nnyụn̄ nse mme utọ ndise oro, nnyịn isịn idem nnyịn ke itiendịk edidia n̄kpọ ke okpokoro mme demon. Mfịn, ediwak tọsịn n̄wed ke mme itie ikie ẹdu ẹmi ẹtorode akwaifiọk ererimbot oro ẹtiede nte se inen̄erede itat owo enyịn inyụn̄ idide mbufa. (Ecclesiastes 12:12) Edi ekikere emi ndomokiet inen̄ekede idi obufa; m̀mê enye ndida ufọn ye uforo nsọk owo, nte se Satan ke n̄kari ọkọdọhọde Eve mîkadaha ufọn isọk enye.—2 Corinth 11:3.
6. Ke ini Satan ọnọde nnyịn ikot nditabi mbiara udia demon esie, didie ke nnyịn ke ntre ikpanam n̄kpọ?
6 Ntre, ke ini Satan okotde nnyịn ete iditabi mbiara udia demon esie, didie ke nnyịn ikpanam n̄kpọ? Nte Jesus akanamde ke ini Satan okodomode enye ete anam itiat akabade uyo. Jesus ama ọbọrọ ete: “Ẹma ẹwet ẹte, Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” Ndien ke ini Devil ọkọnọde Jesus “kpukpru mme obio ererimbot ye ubọn̄ mmọ” edieke enye ediduọde ke isọn̄ onyụn̄ atuak ibuot ọnọ Satan, Jesus ama ọbọrọ ete: “Daha Mi ke usụn̄, Satan: koro ẹma ẹwet ẹte, Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄îkpọn̄.”—Matthew 4:3, 4, 8-10.
7. Ntak emi nnyịn ibian̄ade idem nnyịn edieke ikerede ke imekeme ndidia n̄kpọ uforo uforo ke okpokoro Jehovah ye ke okpokoro mme demon?
7 Okpokoro Jehovah ye okpokoro oro mme asua esie kpa mme demon ẹbride ikemeke-keme ndidi ukem ukem! Oh, ih, ẹma ẹkam ẹnanam ndomonse. Ti nditọ Israel eset ke eyo prọfet Elijah. Mme owo ẹmi ẹkedọhọ ke ituak ibuot inọ Jehovah, edi mmọ ẹma ẹnịm ke akpanikọ ẹte ke mme abasi eken, utọ nte Baal, ama ọn̄wọn̄ọ ndida uforo ndi. Elijah ama osobo ye mme owo ẹmi onyụn̄ ọdọhọ ete: “Adan̄a didie ke mbufo ẹsọk ukot ke edem mbiba? Edieke Jehovah edide Abasi akpanikọ, ẹtiene enye; edi edieke edide Baal, ẹtiene enye.” Ye unana mfan̄a, nditọ Israel “ẹkesọk ukot ke edem mbiba.” (1 Ndidem 18:21; The Jerusalem Bible) Elijah ama ọdọhọ mme oku Baal ẹwụt itie abasi mmọ. Abasi oro edikemede ndinam ikan̄ oto ke enyọn̄ edita uwa edidi Abasi akpanikọ. Kpa ye oro mme oku Baal ẹkesịnde ọkpọsọn̄ ukeme, mmọ ẹma ẹkpu. Ekem Elijah n̄kukụre ama ọbọn̄ akam ete: “O Jehovah, yere mi, man mbio ẹmi ẹfiọk ẹte ke afo edi Jehovah Abasi.” Ke ndondo oro ikan̄ otode Jehovah ama osụhọde oto enyọn̄ onyụn̄ edita unam uwa oro okodude ke ukpe mmọn̄. Ke ẹkopde nduaidem ke ediwụt oro Jehovah okowụtde itie Abasi nte owo mîkemeke ndifan̄a, mme owo ẹma ẹkop uyo Elijah ẹnyụn̄ ẹwot kpukpru prọfet Baal 450. (1 Ndidem 18:24-40) Ntre mfịn, ana nnyịn idiọn̄ọ Jehovah nte Abasi akpanikọ inyụn̄ iwọn̄ọde ye iwụk ika ikadia n̄kpọ ke okpokoro esie kpọt edieke nnyịn mînamke oro kan̄a.
“Asan̄autom Emi Anamde Akpanikọ” Ọnọ Udia ke Okpokoro Jehovah
8. Ewe asan̄autom ke Jesus ekebemiso etịn̄ nte edidade ke ndinọ mme mbet esie udia eke spirit ke ini edidu esie, ndien ẹdiọn̄ọ ofụn emi nte nso?
8 Ọbọn̄ Jesus Christ ama ebemiso etịn̄ nte ke ini edidu esie “asan̄autom emi anamde akpanikọ, onyụn̄ enyenede ọniọn̄” eyenọ mme mbet esie udia: “Ọfọfọn ọnọ asan̄autom oro eteufọk esie edidide okụt enye anamde ntre. Ke akpanikọ ke ndọhọ mbufo nte, Eteufọk esie eyenam enye edi andikara kpukpru se enye enyenede.” (Matthew 24:45-47) Asan̄autom emi iwụtke idem nte idide owo kiet, edi nte otu mme Christian oro ẹyetde aran, ẹmi ẹma ẹkeyak idem ẹnọ. Otu emi odori mfọnn̄kan udia eke spirit ke okpokoro Jehovah ọnọ nsụhọ oro ẹyetde aran ye “akwa otuowo.” Idahaemi se ibede owo miliọn inan̄ ke ibat, kpa akwa otuowo ẹmeda idaha mmọ ye nsụhọ oro ẹyetde aran kaban̄a itie edikara ofụri ekondo Jehovah Abasi ye Obio Ubọn̄ esie emi enye edinamde edisana enyịn̄ esie asana.—Ediyarade 7:9-17.
9. Ewe n̄kpọutom ke otu ofụn emi akama ke ndinọ Mme Ntiense Jehovah udia eke spirit, ndien didie ke ẹketịn̄ ẹban̄a usọrọ udia eke spirit mmọ ke prọfesi?
9 Otu asan̄autom emi anamde akpanikọ mi amada Watch Tower Bible and Tract Society anam n̄kpọ ke ndinọ kpukpru Mme Ntiense Jehovah udia eke spirit. Ke adan̄aemi Christendom ye mbon eken ke editịm n̄kpọ emi ẹkpade biọn̄ ke ntak unana udia eke spirit oro ọnọde uwem, ikọt Jehovah ke ẹdia ẹyụhọ. (Amos 8:11) Emi edi ke edisu prọfesi ke Isaiah 25:6: “Ndien ke obot emi ke Jehovah mme udịm edinam akamba udia ọnọ kpukpru mme idụt, n̄kpọ eke enyenede isek, ndia ke wine eke anade ke ntak, ke n̄kpọ eke enyenede isek, ẹnyụn̄ ẹwakde ndia, wine ke ntak eke ẹtịmde ẹdụk.” Nte Isa 25 ufan̄ikọ 7 ye 8 ẹwụtde, udia emi eyekaiso ke nsinsi. Nso edidiọn̄ ke emi edi ntem ọnọ kpukpru owo ke esop Jehovah oro ẹkụtde ke enyịn idahaemi, ndien nso edidiọn̄ ke emi edikaiso edi ntem ke ini iso!
Kpeme Idem ke Akama-N̄kpa Udia Oro Odorode ke Okpokoro mme Demon
10. (a) Nso utọ udia ke otu idiọk asan̄autom ọnọ, ndien nso idi uduak mmọ? (b) Didie ke otu idiọk asan̄autom anam n̄kpọ ye akani ekemmọ asan̄autom?
10 Udia oro odorode ke okpokoro mme demon edi ibọk n̄kpa. Ke uwụtn̄kpọ, kam kere ban̄a udia oro idiọk otu asan̄autom ye mbon nsọn̄ibuot ẹnọde. Enye inọhọ nsọn̄idem inyụn̄ inamke owo ọkọri; enye ifọnke. Enye ikemeke ndifọn, koro mbon nsọn̄ibuot ẹma ẹtre ndidia n̄kpọ ke okpokoro Jehovah. Nte utịp, se ededi obufa ẹdu oro mmọ ẹkekọride idụhe aba. Se inụkde mmọ edi ndot ndot ibọk n̄kpa, idịghe edisana spirit. Mmọ ẹnyene ekikere kiet kpọt—ndimia akani ekemmọ asan̄autom, nte Jesus ekebemde iso etịn̄.—Matthew 24:48, 49.
11. Nso ke C. T. Russell ekewet aban̄a udia eke spirit oro owo emekde, ndien didie ke enye eketịn̄ aban̄a mbon oro ẹsịnde okpokoro Jehovah?
11 Ke uwụtn̄kpọ, ko-o ke 1909, C. T. Russell, etieibuot Watch Tower Society ini oro, ama ewet aban̄a mbon oro ẹkekpọn̄de okpokoro Jehovah ndien ekem ẹtọn̄ọ ndimia akani ekemmọ mme asan̄autom. Enyọn̄-Ukpeme (Ikọmbakara) eke October 1, 1909, ọkọdọhọ ete: “Kpukpru mbon oro ẹdianarede idem ẹkpọn̄ N̄ka ye utom esie, utu ke ndiforo m̀mê ndibọp mbon en̄wen ke mbuọtidem ye ke mfọn spirit, nte an̄wan̄ade ẹnam se idide isio ye oro—ẹduak ibak ẹban̄a Usụn̄ oro mmọ ini kiet ko ẹkenamde n̄kpọ, ndien, ye unana ẹdidụri ọkpọsọn̄ ntịn̄enyịn, ẹsụhọde sụn̄sụn̄ ẹka nsobo, ẹnọde sụk idemmọ ye mbon efen oro ẹnyenede ukem edu ndomoidem oro unan. . . . Edieke ndusụk mmọ ẹkerede ke mmimọ imekeme ndinyene udia oro ọfọnde mîdịghe ọfọnde akan ke okpokoro efen, m̀mê nte ke mmimọ imekeme ndinọ udia oro ọfọnde mîdịghe ọfọnde akan ke idem mmimọ—yak mmọemi ẹkaiso ke usụn̄ mmọ. . . . Edi ke adan̄aemi nnyịn iyakde mbon en̄wen ẹka ebiet ekededi ye ke kpukpru ebiet ndikoyom udia ye un̄wana oro oyụhọde mmọ, edi n̄kpọ n̄kpaidem ndidọhọ, nte ke mbon oro ẹkabarede ẹdi mme asua nnyịn ẹnam se idide isio ye oro. Utu ke ndidọhọ ke uko uko edu ererimbot, ‘Mmokụt n̄kpọ oro mmade n̄kan; ẹtie sụn̄!’ mmọemi ẹwụt iyatesịt, udu, usua, utọk, kpa ‘ubọkutom obụkidem ye eke devil’ ke udomo oro akananam nnyịn mîkwe mbon ererimbot ẹnyenede. Etie nte idat anam mmọ, ndịk [ebua idat] Satan. Ndusụk mmọ ẹyịbi nnyịn ndien ekem ẹte ke edi nnyịn iyịbi idem nnyịn. Mmọ ẹdu ke mben̄eidem nditịn̄ nnyụn̄ n̄wet mme nsunsu ikọ esuene ẹnyụn̄ ẹsụhọde idaha mmọ man ẹnam owo n̄kpọ esuene.”
12. (a) Didie ke mbon nsọn̄ibuot ẹmia ekemmọ asan̄autom? (b) Ntak edide n̄kpọndịk ndidia n̄kpọ nto mme uwetn̄kpọ mbon nsọn̄ibuot ke ntak ọkpọsọn̄ udọn̄?
12 Ih, mbon nsọn̄ibuot ẹmịn̄ mme n̄wed oro uduak edide ndiyụrọde, ndikpep ubak ubak akpanikọ, ye ata in̄wan̄în̄wan̄ nsu. Mmọ ẹsikam ẹdi ndibiọn̄ọ mme mbono Ntiense, ẹdomode ndikọk afia nnọ mbon oro mîdụhe ke ukpeme. Ntem, ekpedi n̄kpọ ndịk ndiyak ọkpọsọn̄ udọn̄ nnyịn onụk nnyịn iyom ndibọk idem ke mme utọ uwetn̄kpọ oro m̀mê ndikpan̄ utọn̄ nnọ ikọ isụn̄i mmọ! Ke adan̄aemi nnyịn ikemede ndikere ke enye idịghe n̄kpọndịk inọ nnyịn ke idem nnyịn, n̄kpọndịk osụk odudu. Ntak-a? N̄kpọ kiet edi, ndusụk n̄wed mbon nsọn̄ibuot ẹkpep nsu ebe ke “nneminua” ye “ikọ abian̄a.” (Rome 16:17, 18; 2 Peter 2:3) Nso ke afo okpodori enyịn ndikụt ke okpokoro mme demon? Ndien ke adan̄aemi mbon nsọn̄ibuot n̄ko ẹkemede nditịn̄ ndusụk akpanikọ, ẹsiwak ndida mmọemi n̄wọrọ n̄kpọn̄ nnennen usụn̄ ye uduak ndiwọn̄ọde mbon en̄wen n̄kpọn̄ okpokoro Jehovah. Kpukpru uwetn̄kpọ mmọ ẹdi sụk nsụkuyo onyụn̄ anam idem emem owo! Idụhe n̄kpọ ndomokiet oro ọbọpde-bọp.
13, 14. Nso idi mme mfri oro mbon nsọn̄ibuot ye ekikere mmọ ẹsion̄ode?
13 Jesus ọkọdọhọ ete: “Mbufo ẹyeda mfri mmọ ẹfiọk mmọ.” (Matthew 7:16) Idahaemi, nso idi mfri oro mbon nsọn̄ibuot ye mme n̄wed mmọ ẹsion̄ode? N̄kpọ inan̄ onịm nsunsu ekikere mmọ idiọn̄ọ. (1) Enyọn̄ enyọn̄ ifiọk. N̄wed Mbon Ephesus 4:14 ọdọhọ ete ke mmọ ẹnyene “n̄kari owo eke ẹfiọkde nditịbi usụn̄ abian̄a.” (2) Ifiọk ntan̄idem. (3) Unana ima. (4) Unana edinam akpanikọ ke nsio nsio usụn̄. Mmọemi ẹdi mme n̄kpatan̄a n̄kpọ oro ẹdọn̄ọde ke udia ẹmi ẹdorode ke okpokoro mme demon, ẹnam kpukpru emi ndibiat mbuọtidem ikọt Jehovah.
14 N̄kpọ efen odu n̄ko. Mbon nsọn̄ibuot ẹfiak ẹbịne nso? Ke ediwak idaha, mmọ ẹfiak ẹbịne ekịm eke Christendom ye mme ukpepn̄kpọ esie, utọ nte edinịm ke akpanikọ nte ke kpukpru mme Christian ẹdika heaven. Akan oro, ata ediwak inyeneke aba ọkpọsọn̄ ubiere inọ idaha N̄wed Abasi kaban̄a iyịp, edida san̄asan̄a, ye ufọn edinọ ikọ ntiense mban̄a Obio Ubọn̄ Abasi. Nnyịn, nte ededi, ima iwọrọ ke ekịm eke Akwa Babylon, ndien nnyịn iyomke ndifiak mbịne enye tutu amama. (Ediyarade 18:2, 4) Nte mme anam akpanikọ asan̄autom Jehovah, ntak emi ikpoyomde idem ndidedịbe ntop enyịn nse mme nsunsu ekikere emi mbon oro ẹsịnde okpokoro Jehovah ẹmi ẹdade ikọ inua ẹmia mbon oro ẹn̄wamde nnyịn ndibọ “nti ikọ” ẹsion̄ode ẹdi idahaemi?—2 Timothy 1:13.
15. Ewe edumbet Bible an̄wam nnyịn ndinam n̄kpọ ọniọn̄ ọniọn̄ ke ini ikopde mme edori ikọ oro mbon nsọn̄ibuot ẹtịn̄de?
15 Ndusụk owo ẹkeme ndinyene ọkpọsọn̄ udọn̄ mban̄a mme edori ikọ oro mbon nsọn̄ibuot ẹtịn̄de. Edi nnyịn ikpenyene ndida edumbet emi odude ke Deuteronomy 12:30, 31 nsịn ke edinam. Mi Jehovah ebede ke Moses ama odụri nditọ Israel utọn̄ aban̄a se mmọ ẹkenyenede ndifep ke ndo ndo oro mmọ ẹma ẹkebịn mme okpono ndem ẹmi ẹkedụn̄de ke Isọn̄ Un̄wọn̄ọ ẹfep. “Kpeme idemfo, mbak afia edimụm fi esịn fi aka eketiene mmọ, ke ẹma ẹsobo mmọ ẹma ke iso fo ẹfep; mbak afo edinyụn̄ obụp aban̄a mme abasi mmọ, ete, Ewe usụn̄ ke mme idụt ẹmi ẹkenam n̄kpọ mme abasi mmọ? ami nyenam kpa ntre n̄ko ke idemmi. Kûnam ntre ye Jehovah Abasi fo.” Ih, Jehovah Abasi ọdiọn̄ọ adan̄a nte udọn̄ owo anamde n̄kpọ. Ti Eve, ye n̄wan Lot! (Luke 17:32; 1 Timothy 2:14) Ẹyak nnyịn ikûdede ikpan̄ utọn̄ ke se mbon nsọn̄ibuot ẹtịn̄de m̀mê ẹnamde. Utu ke oro, ẹyak nnyịn isịn idem ndinam mme owo ẹkọri ẹnyụn̄ ẹdia n̄kpọ ke edinam akpanikọ ke okpokoro Jehovah!
Okpokoro Jehovah Ikpọn̄îkpọn̄ Edisụhọ
16. (a) Ke mîbịghike, nso iditịbe inọ Satan, mme demon esie, ye ndamban̄a okpokoro emi mme idụt ererimbot ẹsidiade n̄kpọ? (b) Nso iditịbe inọ kpukpru mme owo oro ẹkade iso ndidia n̄kpọ ke okpokoro mme demon?
16 Ibịghike, akwa ukụt eyetịbe ke mbuari, asan̄ade usọp usọp osịm utịt ke “ekọn̄ akwa usen Abasi, Andikara kpukpru n̄kpọ.” (Ediyarade 16:14, 16) Enye eyesịm utịt nte Jehovah osobode editịm n̄kpọ emi ye ndamban̄a okpokoro emi mme idụt ererimbot ẹdiade n̄kpọ efep. Jehovah eyesobo n̄ko ofụri esop Satan kpa Devil oro ẹkụtde ke enyịn ye udịm mme demon esie. Ẹyenyịk mbon oro ẹkade iso ndidia n̄kpọ ke okpokoro eke spirit Satan, kpa okpokoro mme demon, ndika udia, edi, idịghe nte mme andidia, edi nte mme andidụk—ẹka nsobo mmọ!—Se Ezekiel 39:4; Ediyarade 19:17, 18.
17. Mme edidiọn̄ ewe ke mbon oro ẹdiade n̄kpọ ke okpokoro Jehovah ikpọn̄îkpọn̄ ẹdinyene?
17 Okpokoro Jehovah ikpọn̄îkpọn̄ edisụhọ. Ẹyenịm mbon oro ye esịtekọm ẹdiade n̄kpọ ke enye uwem mmọ ẹyenyụn̄ ẹnyene ifet ndidia n̄kpọ do kpukpru ini ke nsinsi. Tutu amama orụk unana udia ekededi idifiakke idịghe mmọ uwem aba. (Psalm 67:6; 72:16) Mmọ ẹyenam n̄kpọ Jehovah Abasi ke mfọnmma nsọn̄idem ke Paradise! Ke akpatre mme aduai-owo idem ikọ eke Ediyarade 21:4 ẹyesu ke akamba udomo: “Enye eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.” Ke ntak edide ubiọn̄ọ ididụhe aba, itie edikara ofụri ekondo Jehovah Abasi eyedu ke kpukpru ebiet ke nsinsi nsinsi nte anana-utịt mfọn Abasi ofụkde ubonowo oro ẹnyan̄ade ẹmi ẹdude ke Paradise isọn̄. Man ibọ utịp emi, ẹyak kpukpru nnyịn ibiere ndidia n̄kpọ ke okpokoro Jehovah ikpọn̄îkpọn̄, emi ọyọhọde ye mfọnn̄kan udia eke spirit!
Didie ke Afo Ọkpọbọrọ?
◻ Didie ke nnyịn ikeme ndifep ndidi se mme ukpepn̄kpọ demon ẹtụnde usụn̄?
◻ Ntak emi nnyịn mîkemeke ndikụt unen ke ndidia n̄kpọ ke okpokoro Jehovah ye ke okpokoro mme demon?
◻ Nso utọ udia ke mbon nsọn̄ibuot ẹnọ?
◻ Ntak edide n̄kpọndịk ndinyene udọn̄ mban̄a mme edori ikọ eke mbon nsọn̄ibuot?
◻ Nso idi mfri oro mbon nsọn̄ibuot ẹsion̄ode?
[Ndise ke page 10]
Okpokoro Jehovah ọyọhọ ye mfọnn̄kan udia eke spirit