“Mma Nsọn̄ọ Mmụm Mbuọtidem N̄kama”

NTE MME UFAN BRUNELLA INCONDITI ẸBỤKDE

“SATURDAY ekedi ata ndobo ndobo usen. Ami n̄kodu ikpọn̄ ke ubet, n̄kenyeneke idotenyịn. Eketie mi ke idem nte nsan̄a ke usụn̄otop. Kpukpru n̄kpọ ẹma ẹsan̄a mfọn mfọn, ndien ke mbuari, owo ama ọtọ usụn̄ eberi ke iso mi, ndien usụn̄ ndomokiet ikodụhe, inamke n̄kpọ m̀mê n̄kan̄wana adan̄a didie.”

Ọkpọsọn̄ edikpu ama anam Brunella Inconditi emi ekedide isua 15 okop ọkpọsọn̄ mfụhọ. Ata akpan usen ke uwem esie ke ekebe. Ke ntọn̄ọ ntọn̄ọ isua oro ima oro enye ekenyenede ọnọ Jehovah ye Bible emi okosụk ọkọride-kọri ama onụk enye ndiyak uwem esie nnọ. Ke July 1990 akana enye ana baptism ke Mbon District “Edisana Usem” eke Mme Ntiense Jehovah ke Montreal, Canada. Edi utu ke oro, Brunella ekenyene ndisobo udomo mbuọtidem esie oro edibịghide ke ofụri eyouwem esie.

Usen iba mbemiso usen emi enye okodoride enyịn ndiyarade uyakidem esie ke mmọn̄ baptism, Brunella ama edifiọk nte ke imọ imenyene udọn̄ọ ke nsen iyịp. Mme dọkta ufọkibọk nditọwọn̄ n̄kann̄kụk ẹma eyom nditọn̄ọ ndinọ usọbọ usọp usọp, ntre Brunella ama osụhọ ke ufọkibọk.

Mme Ikọ Esie Ẹtụk Mme Dọkta

Brunella ama ọfiọk ete ke iyịp edi edisana n̄kpọ ọnọ Jehovah Abasi. (Leviticus 17:11) Ete ye eka esie, Edmondo ye Nicoletta, ẹma ẹsọn̄ọ ẹtịn̄ nte ke owo inyeneke ndikịm iyịp nsịn eyen mmimọ ke idem ke ini ẹnọde usọbọ. Ete esie ọdọhọ ete, “Brunella ama oyom mme dọkta ẹkop ikọ ẹto enye n̄ko.” Ndien enye akaiso ete, “Enye ama ọsọn̄ọ etịn̄ ọnọ mmọ nte ke imọ iyomke usọbọ oro edibiatde ewụhọ Bible ‘ndibet iyịp.’”​—⁠Utom 15:20.

Ke July 10, 1990, dọkta ita ye anamutom ufọn kiet ẹma ẹsobo ye ete ye eka Brunella ye asan̄autom iba ẹtode esop n̄kann̄kụk eke Mme Ntiense Jehovah. Ndụn̄ọde oro ẹkenamde ama owụt nte ke Brunella ama enyene ata idiọk udọn̄ọ ke nsen iyịp. Mme dọkta ẹma ẹnam an̄wan̄a se idide uduak mmọ ndisọbọ udọn̄ọ oro. Mmọ ke usọ ẹma ẹtịn̄ nte ke edi ata ọkpọsọn̄ n̄kpọ ndisọbọ. Kiet ke otu mbiowo esop eti ete, “Edu ye ubiere Brunella ndikop uyo Abasi ama otụk mme dọkta ye anamutom ufọn oro. Ima oro ete ye eka esie ẹkewụtde ye un̄wam oro mme ufan ẹtode esop Christian ẹkenọde ama otụk mmọ. Mmọ n̄ko ẹma ẹwụt esịtekọm ke usụn̄ nte idiọn̄ọde inyụn̄ ikponode idaha mmọ.”

Mme dọkta ẹma ẹyom nditre ndinọ edikịm iyịp. Brunella eyebọ ntatara usọbọ mmọn̄ibọk, edi emi idinen̄ekede isọn̄ odudu nte ekpedide. Emi eyesụhọde udomo oro usọbọ edibiatde mme nsen iyịp esie. Nicoletta anam an̄wan̄a ete, “Mme dọkta ẹma ẹkere ẹban̄a idaha eke ikpọkidem, eke ntụk, ye eke spirit Brunella.” Ndien enye akaiso ete, “Ke ini ikọdọhọde mmọ ẹkesobo ye owo oro enyenede ifiọk ke usọbọ udọn̄ọ nsen iyịp nditọwọn̄ ye unana edinọ iyịp, mmọ ẹma ẹyịme.” Brunella ye mbonutom ufọkibọk ẹma ẹnyene n̄kpet n̄kpet itie ebuana.

Mme Utịtmbuba eke Spirit

Okposụkedi usọbọ oro ẹkenọde ke ntọn̄ọ ntọn̄ọ ekenyenede nti utịp, afanikọn̄ Brunella akakam ọtọtọn̄ọ. Ke November 1990 udọn̄ọ esie ama osụhọde ubọk, ntre enye ama ana baptism ye unana ubiat ini. Ke ekerede aban̄a ọfiọn̄ ifan̄ oro ẹkebede, Brunella ama onyịme ete: “Ikememke utom ndomo esisịt. Oyom afo enyene ọkpọsọn̄ ukeme, onyụn̄ oyom afo ekere n̄kpọ ke in̄wan̄în̄wan̄ usụn̄. . . . Ẹma ẹdomo mbuọtidem mi ẹse, edi mma nsọn̄ọ nda, ndien ke nsụk nduak ndidi asiakusụn̄ ofụri ini [asan̄autom uyọhọ-ini] nte ubọkọkọ.”

Ke ntọn̄ọ ntọn̄ọ 1991, Brunella ama afiak ọduọ udọn̄ọ. Enye ama ekpere ndikpa ke adan̄aemi ọbọde usọbọ, edi ke n̄kpaidem ye inemesịt kpukpru owo, enye ama okop nsọn̄idem. Ke August enye ama okop nsọn̄idem ekem ndinam an̄wan̄wa utom ukwọrọikọ ke ọfiọn̄ oro nte asiakusụn̄ unọ un̄wam. Udọn̄ọ esie ama afiak ọdiọk akan, ndien ke November 1991 kansa ama anam enye ke ediwak itie ke idem. Otu mme dọkta efen ke isio isio ufọkibọk ẹma ẹtọn̄ọ ndinọ enye usọbọ ẹkamade un̄wana ikan̄ ilektrik.

Idem ke idak n̄kpọsọn̄ idaha oro, Brunella ama akaiso ndisọn̄ọ nda nnyụn̄ nnịm mme utịtmbuba eke spirit nnọ idemesie. Ke ini enye ọkọfiọkde aban̄a udọn̄ọ nsen iyịp emi ke akpa ini, ẹkesian enye ẹte ke ekeme ndidi enye edidu uwem ke ọfiọn̄ itiokiet kpọt. Idahaemi, n̄kpọ nte isua kiet ye ubak ke ukperedem, Brunella ke okosụk ananam ndutịm ọnọ ini iso. Ebiowo kiet ke esop ama ọdọhọ ete, “Enye ikabiatke ini ndinam n̄kpọ mban̄a mme utịtmbuba esie.” Ndien enye akaiso ete, “Mbuọtidem oro Brunella ekenyenede ke Paradise oro Abasi ọn̄wọn̄ọde ama omụm enye akama ke ofụri ini afanikọn̄ oro. Enye ama ọkọri osịm ọyọhọ idaha Christian okposụkedi ekekpride ke isua emana. Edu ye edinam esie ama esịn udọn̄ ọnọ esop onyụn̄ anam mbon oro ẹkediọn̄ọde enye ẹma enye, ọkọrọ ye mbonutom ufọkibọk.” Eka esie eti ete: “Akananam enye isemeke. Ke ini owo obụpde enye nte n̄kpọ etiede, enye ama esibọrọ ete, ‘Ọfọn’ mîdịghe, ‘Idiọkke, okuo?’”

Ini Iso Oro Enyenede Ifụre

Brunella ama anam ndutịm ndidụk Mbono District “Mme Ọnọ Un̄wana” eke Mme Ntiense Jehovah ke July 1992. Etisịm ini mbono oro, nte ededi, ẹma ẹsịn Brunella ke ufọkibọk, ndien uwem esie ke ekebe efep. Edi kpa ye oro, ẹma ẹsịn enye ke n̄kpọitie mbon n̄kpọnnam ẹka mbono oro, ye uduak ndikụt drama oro, Ndinam Se Inende ke Enyịn Jehovah.

Enye ama afiak ọnyọn̄ ebịne ubon esie ke akpatre usen ifan̄ eke uwem esie. Nicoletta ọdọhọ ete, “Tutu osịm utịt, enye ama enyene udọn̄ ke idem mbon en̄wen akan nte enyenede ke idem esie.” Ndien enye akaiso ete, “Enye ama esisịn udọn̄ ọnọ mmọ ndikpep Bible, asiande mmọ ete, ‘Nnyịn iyedu ọtọkiet ke Paradise.’”

Brunella ama akpa ke July 27, 1992, ye ọkpọsọn̄ idotenyịn esie kaban̄a ediset ke n̄kpa ndụk uwem ke Paradise ke isọn̄. Enye akakam ọtọtọn̄ọ ndibịne mme utịtmbuba esie, edi enye aduak ndikaiso ke ifịk ifịk usụn̄uwem esie ke ama ekeset ke n̄kpa. Usen ifan̄ kpọt mbemiso enye akpade, Brunella ama ewet leta etienede mi, emi ẹkekotde ke ini edinam n̄kpa esie.

“Ndima Ufan:

“Ẹsọsọn̄ọ ke mbufo ndidi. Edidu mbufo mi ọwọrọ ekese n̄kpọ ọnọ ubon mi.

“Ye mbon oro ẹkekperede mi idem​—⁠nnyịn ima isobo ekese n̄kpọ. Nnyịn ima isobo ekese n̄kpọsọn̄ ini, edi mme ini ndyọ ẹma ẹdu n̄ko. Ekedi anyan ọkpọsọn̄ en̄wan, edi n̄kereke ke mma n̄kpu. Nte ẹdọhọde ke N̄wed Abasi, ‘Mma n̄n̄wana eti en̄wan, mma mfehe mbuba mi mma, mma nsọn̄ọ mmụm mbuọtidem n̄kama.’​—⁠2 Timothy 4:7.

“Ami mma n̄kpep ekese n̄kpọ n̄ko, mma n̄kọri akamba akamba, ndien mme ufan mi ye mbon oro ẹkedude ye ami ẹma ẹkụt ukpụhọde oro. Nyom ndikọm kpukpru mbon oro ẹken̄wamde mi.

“Mbufo oro ẹnịmde obufa editịm n̄kpọ ye Jehovah ke akpanikọ ẹmefiọk ẹte ke ediset ke n̄kpa eyedu, kpa nte John 5:​28, 29 ọdọhọde. Ntre ẹkaiso ẹsọn̄ idem ke akpanikọ, ndien nnyịn iyekeme ndifiak n̄kụt kiet eken.

“Nyom ndikọm mbon oro ẹdiọn̄ọde se ami n̄kosobode. Mmafat kpukpru mbufo nnyụn̄ ntịm mbufo inua. Mmama kpukpru mbufo.”

Brunella ikayakke uyen m̀mê udọn̄ọ esie esịk uyakidem esie nnọ Abasi enịm. Uwụtn̄kpọ mbuọtidem ye ubiere esie esịn udọn̄ ọnọ n̄kpri ye ikpọ owo ukem ukem ndikpọnọde kpukpru n̄kpọ oro ẹkemede ndibiọn̄ọ mmọ ndifehe mbuba uwem nnịm.​—⁠Mme Hebrew 12:1.