Ana Ẹbem Iso Ẹkwọrọ Eti Mbụk Emi
“Ẹnyene ndibem iso n̄kwọrọ gospel nnọ kpukpru mme idụt.”—MARK 13:10.
1, 2. Nso idi se ẹdade ẹdiọn̄ọ Mme Ntiense, ndien ntak-a?
NTAK emi Mme Ntiense Jehovah ẹkwọrọde ikọ ifịk ifịk ntre? Ke akpanikọ ẹdiọn̄ọ nnyịn ke ofụri ererimbot kaban̄a an̄wan̄wa utom ukwọrọikọ nnyịn, edide enye edi ke ufọk ke ufọk, ke mme efak, m̀mê ke ini isobode mme owo ke ido nneme. Ke kpukpru idaha oro ẹdotde, nnyịn imesinam ẹdiọn̄ọ nnyịn nte Mme Ntiense inyụn̄ idomo ye usọ ndineme eti mbụk oro nnyịn idade ke ọsọn̄urua. Ke akpanikọ, nnyịn imekeme ndidọhọ ke utom ukwọrọikọ emi edi se ẹdade ẹdiọn̄ọ nnyịn!—Colossae 4:6.
2 Kam kere ban̄a oro—ke ini ekededi emi mme owo ẹkụtde otu irenowo, iban, ye nditọwọn̄ ẹmi ẹsịnede ọfọn̄ ediye ediye ẹkamade ekpatubọk, nso isiwak ndidi akpa ekikere mmọ? Nte esidi, ‘Oh, mbon Catholic (m̀mê Orthodox) ẹfiak ẹdi-o!’ mîdịghe, ‘Mbon Pentecostal (m̀mê Baptist) ẹfiak ẹdi-o!’ Baba. Mme owo ẹfiọk ẹte ke mme utọ ido ukpono oro inyeneke mme ubon oro ofụri owo ẹnamde utom ukwọrọikọ eke ufọk ke ufọk. Eyedi ndusụk otu ido ukpono ẹsio ndusụk “isụn̄utom” ẹnọ ẹka ndusụk ikpehe ke se mîbehe isua iba, edi ikpîkpu mbon ido ukpono mmọ isibuanake ke ekededi utọ utom oro. Mme Ntiense Jehovah ikpọn̄ ke ẹdiọn̄ọ ke ofụri ererimbot kaban̄a ifịk oro mmọ ẹnyenede ke ndineme etop mmọ nnọ mbon en̄wen ke kpukpru idaha oro odotde. Ndien ẹdiọn̄ọ mmọ ke mme magazine mmọ, Enyọn̄-Ukpeme ye Awake!—Isaiah 43:10-12; Utom 1:8.
Ẹkpụhọde ye Mme Ọkwọrọ Ederi Christendom
3, 4. Didie ke ẹsiwak ndiwụt mme ọkwọrọ ederi Christendom ke ndutịm usuanetop?
3 Ke ẹdide ata isio, mbụk n̄kpọntịbe ayarade ediwak mme ọkwọrọ ederi ke ndusụk idụt ediwak ini nte ẹdide mme adan̄ n̄kpri nditọ, oburobụt mbon abian̄a, ye mbon n̄wo. Mme utom obụkidem mmọ ye ọkpọmiọk ọkpọmiọk usụn̄uwem mmọ ana in̄wan̄în̄wan̄ ke enyịn kpukpru owo. Ọwọrọetop ewet ikwọ kiet ama owụt nte enende ke ikwọ esie oro ẹkotde “Nte Jesus Ọkpọbọbọ Rolex [ata ọsọn̄urua n̄kanika ubọk oro ẹnamde ke gold] ke Edinam Television Esie?” Enye obụp mbụme emi: “Nte Jesus ekpedi owo ukara edieke Enye afiakde edi Isọn̄? Enyene udiana ufọkidụn̄ Esie ke Palm Springs [obio uforo kiet ke California] onyụn̄ odomo ndidịp se Enye enyenede?” Mme ikọ James ẹdot didie ntem: “Mbufo ẹdu uwem, ẹdia nti n̄kpọ ke isọn̄, ẹnyụn̄ ẹbịne mbre; ẹmebọk esịt mbufo ke usen afai.”—James 5:5; Galatia 5:19-21.
4 Mme ọkwọrọ ederi ndidụk nsan̄a ye mbon mbre ukara ndinyụn̄ mbuana ke mme edinam umek owo nte andiyom itie ukara owụt mmọ nte ẹdide mme scribe ye mme Pharisee eyomfịn. Ke ukem ini oro, ke mme utọ idụt nte United States ye Canada, mme ekebe okụk ido ukpono ẹsat oto ikpọ ekọmurua ke ukotikpe ye ubiereikpe ke idem mme ọkwọrọ ederi, emi osụn̄ọde oto esuene esuene eduuwem mmọ ye nditọwọn̄ ye ikpọ owo.—Matthew 23:1-3.
5. Ntak emi mme ọkwọrọ ederi Christendom mîdịghe “asan̄autom emi anamde akpanikọ, onyụn̄ enyenede ọniọn̄”?
5 Nte enende, Jesus ama ekeme ndidọhọ mme ọkwọrọ ederi eyo esie ete: “Eyedọdiọk ọnọ mbufo, mme scribe ye mme Pharisee, mbon mbubịk! koro mbufo ẹbietde udi eke ẹyetde ndom, eke eyede ndise edem-edem, edi ke esịt-esịt ẹyọhọde ye mme okpo mme akpan̄kpa ye kpukpru ndek. Kpa ntre ke mbufo ẹwụt idem edem-edem nte ndinen owo, edi ke esịt-esịt mbufo ẹyọhọ ye mbubịk ye ukwan̄ido.” Ntem, Abasi inọhọ mme ọkwọrọ ederi Christendom ewụhọ ndikwọrọ eti mbụk, edide edi Catholic, Protestant, Orthodox, m̀mê otu oro mînyeneke ebuana ye n̄ka ido ukpono ekededi. Mmọ iwụtke idem nte idide “asan̄autom emi anamde akpanikọ, onyụn̄ enyenede ọniọn̄” oro ẹkebemde iso ẹtịn̄ ẹban̄a.—Matthew 23:27, 28; 24:45-47.
Ntak Ẹbemde Iso Ẹkwọrọ Eti Mbụk?
6. Mme n̄kpọntịbe ewe ẹdisọp ndida itie?
6 Ke ibio ibio mbụk esie aban̄ade ewụhọ Jesus ndikwọrọ eti mbụk ke kpukpru mme idụt, Mark ikpọn̄ ada ikọ oro “ndibem iso.” (Mark 13:10; men Matthew 24:14 domo.) Edikabade eke J. B. Phillips okot ete: “Koro mbemiso utịt edide ana ẹkwọrọ gospel ẹnọ kpukpru mme idụt.” Edida ikọ oro “ndibem iso” nte ikọnsan̄a ikọedinam ọwọrọ ete ke mme n̄kpọntịbe en̄wen ẹyetiene utom ukwọrọikọ ofụri ererimbot. Mme n̄kpọntịbe oro ẹyesịne akwa ukụt ye edinen itie edikara Christ oro edikarade obufa ererimbot oro ẹken̄wọn̄ọde.—Matthew 24:21-31; Ediyarade 16:14-16; 21:1-4.
7. Ntak emi Abasi oyomde ẹbem iso ẹkwọrọ eti mbụk?
7 Mmọdo ntak emi Abasi oyomde ẹbem iso ẹkwọrọ eti mbụk? Ntak kiet edi koro enye edide Abasi ima, unenikpe, ọniọn̄, ye odudu. Ke edisu mme ikọ Jesus oro ẹwetde ke Matthew 24:14 ye Mark 13:10, nnyịn imekeme ndikụt nte mme edu Jehovah ẹmi ẹwụtde idem ediye ediye. Ẹyak nnyịn ke ibio ibio idụn̄ọde mmọ kiet kiet inyụn̄ ikụt nte mmọ ẹnyenede ebuana ye edikwọrọ eti mbụk.
Eti Mbụk ye Ima Jehovah
8. Didie ke edikwọrọ eti mbụk edi uyarade ima Abasi? (1 John 4:7-16)
8 Didie ke edikwọrọ eti mbụk owụt ima Abasi? Akpa kan̄a, koro enye mîdịghe etop oro enyenede orụk m̀mê ekpụk kiet kpọt. Enye edi eti mbụk enyenede “kpukpru mme idụt.” Abasi ama ubonowo etieti tutu enye ọnọ ikpọn̄îkpọn̄ edibon Eyen esie edi isọn̄ nte uwa ufak ọnọ idiọkn̄kpọ ofụri ubonowo, idịghe sụk eke orụk kiet. Apostle John ekewet ete: “Abasi akamama ererimbot ntem, tutu Enye osio ikpọn̄îkpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem. Koro Abasi ikọdọn̄ke Eyen Esie ete ekpe ikpe ererimbot, edi ọkọdọn̄, man ẹnyan̄a ererimbot oto ke Enye.” (John 3:16, 17) Ke akpanikọ eti mbụk oro, etop ọnọde un̄wọn̄ọ obufa ererimbot emem, n̄kemuyo, ye unenikpe, edi uyarade ima Abasi.—2 Peter 3:13.
Eti Mbụk ye Odudu Jehovah
9. Ntak emi Abasi mîdaha mme okopodudu ido ukpono Christendom ndikwọrọ eti mbụk?
9 Didie ke edikwọrọ eti mbụk owụt odudu Jehovah? Kere ise, mmanie ke enye ada anam utom emi? Nte edi mme esop ido ukpono Christendom oro ẹkopde odudu ẹkan, utọ nte Ufọkabasi Roman Catholic m̀mê mme ọwọrọetop ido ukpono Protestant? Baba, ebuana mmọ ke mbre ukara anam mmọ idotke ndinam utom oro. (John 15:19; 17:14; James 4:4) Ukeuke uforo mmọ ye mme ebuana ye odudu oro mmọ ẹnyenede ye otu mme ọwọrọiso owo ẹmi ẹkamade ukara m̀mê ukpepn̄kpọ ido ukpono mmọ oro ẹkọn̄ọde ke ido eset inemke Jehovah Abasi esịt. Owo ikoyomke odudu owo man ẹnam uduak Abasi.—Zechariah 4:6.
10. Mmanie ke Abasi emek ete ẹkwọrọ ikọ?
10 Edi ukem nte apostle Paul ọkọdọhọde ke leta oro enye ọkọnọde ẹsọk esop ke Corinth ete: “Nditọete, ẹse edikot eke Abasi okokotde mbufo; ẹte, ikotke ediwak mmọemi owo ẹbatde ke mbon eti ibuot, ikotke ediwak mme ẹnyene-odudu, inyụn̄ ikotke ediwak mbọn̄: edi Abasi ekemek n̄kpọ oro edide ndisịme ke ererimbot man Enye esuene mbon eti ibuot; Abasi okonyụn̄ emek n̄kpọ eke ẹdide mmeme ke ererimbot man Enye esuene n̄kpọsọn̄ n̄kpọ: Abasi onyụn̄ emek n̄kpọ eke ẹdude ke usụhọde itie ye n̄kpọ eke owo ẹsede ke ndek, ye n̄kpọ eke mîdụhe, man Enye anam mme n̄kpọ eke ẹdude ẹwọrọ ikpîkpu; mbak owo baba kiet edibụre mbụre ke iso Abasi.”—1 Corinth 1:26-29.
11. Mme akpanikọ ewe ẹban̄ade Mme Ntiense ẹnam mmọ ẹnana mbiet?
11 Mme Ntiense Jehovah ẹnyene ata ibat ibat mbon inyene ke esop mmọ ndien ke akpanikọ mme okopodudu mbon ukaraidem idụhe. Mmọ ndida ata san̄asan̄a ke mme mbubehe ukaraidem owụt ke mmọ ikemeke ndinyene odudu ke ukaraidem. Ke edide isio ye oro, mmọ ẹsiwak ndidi mbon oro ẹsobode n̄kpọsọn̄ ukọbọ ẹmi mme adaiso ido ukpono ye ukaraidem ẹsịnde nsọk ẹnọ ke isua ikie 20 emi. Edi, kpa ye ikan̄îkan̄ ukọbọ emi mme mbet Nazi, Fascist, Communist, ufreidụt, ye nsunsu ido ukpono ẹdade ẹtiene mmọ, Mme Ntiense ikwọrọke eti mbụk kpọt ke ofụri ererimbot edi mmọ n̄ko ẹmetọt ke ibat ke ndyọ ndyọ usụn̄.—Isaiah 60:22.
12. Ntak emi Mme Ntiense ẹkụtde unen?
12 Mme Ntiense ẹbuan unen oro mmọ ẹkụtde ye nso? Jesus ama ọn̄wọn̄ọ ọnọ mme mbet esie ete: “Mbufo ẹyebọ odudu, ke Edisana Spirit ama edi edidoro mbufo ke idem: mbufo ẹyenyụn̄ ẹdi mme ntiense Mi ke Jerusalem, ye ofụri Judea ye Samaria, tutu osịm utịt ererimbot.” Ntre, m̀mọ̀n̄ ke unen mmọ edinen̄ede oto? Jesus ọkọdọhọ ete: “Mbufo ẹyebọ odudu, ke Edisana Spirit ama edi edidoro mbufo ke idem.” Kpa ntre n̄ko mfịn, odudu otode Abasi, idịghe ukeme owo, edi akpan n̄kpọ oro anamde Mme Ntiense ẹkụt unen ke utom ukwọrọikọ mmọ ke ofụri ererimbot. Ke adade mme owo oro ẹtiede nte ẹmem ẹkan, Abasi ke anam n̄kponn̄kan utom unọ ukpep ke mbụk.—Utom 1:8; Isaiah 54:13.
Eti Mbụk ye Ọniọn̄ Jehovah
13. (a) Ntak emi Mme Ntiense ẹnamde utom ke unyịmesịt ye unana ukpeokụk? (b) Didie ke Jehovah ọbọrọ isụn̄i Satan?
13 Mme anamutom unyịmesịt ke ẹkwọrọ eti mbụk. Jesus ọkọdọhọ ete: “Mbufo ẹkebọ ke ikpîkpu, ẹnọ n̄ko ke ikpîkpu.” (Matthew 10:8) Ke ntre, idụhe owo ndomokiet ke otu Mme Ntiense Jehovah emi ọbọde okụk utịtọfiọn̄ ke ndinam n̄kpọ Abasi, mmọ inyụn̄ iyomke. Ke akpanikọ, mmọ ikam itan̄ke etịbe ke mme mbonoesop mmọ. Mmọ ẹkop inemesịt, ẹto utom unana ibụk oro mmọ ẹyakde idem ẹnọ, ndinọ Abasi se edibọrọde owo emi osụn̄ide enye, Satan kpa Devil. Andibiọn̄ọ Abasi edide spirit mi ke nditịm ntịn̄ ọkọdọhọ ke mme owo idinamke n̄kpọ Abasi ye udọn̄ unana ibụk. Ke ọniọn̄ esie Jehovah ọmọnọ akakan ibọrọ ke isụn̄i Satan—ediwak miliọn mme anam-akpanikọ Christian Ntiense oro ẹkwọrọde eti mbụk ke ufọk ke ufọk, ke mme efak, ye ke ido nneme.—Job 1:8-11; 2:3-5; Mme N̄ke 27:11.
14. Nso idi “ifiọk eke okodịbede” oro Paul eketịn̄de aban̄a?
14 Uyarade en̄wen aban̄ade ọniọn̄ Abasi ke ndinam ẹkwọrọ eti mbụk edi nte ke un̄wọn̄ọ Obio Ubọn̄ ke idemesie edi ediwụt ọniọn̄ Abasi. Apostle Paul ekewet ete: “Edi nnyịn itịn̄ n̄kpọ ifiọk ye mmọemi ẹma ẹkekponi; edi idịghe ifiọk eyo emi, inyụn̄ idịghe eke mme andikara eyo emi, ẹmi ke ẹkabade ẹdi ikpîkpu. Edi nnyịn itịn̄ ifiọk Abasi ke ndịben̄kpọ, kpa ifiọk eke okodịbede, eke Abasi okonịmde ndien edibot mme eyo, ete edi ubọn̄ ọnọ nnyịn.” “Ifiọk eke okodịbede” oro enyene n̄kpọ ndinam ye ọniọn̄ ọniọn̄ usụn̄ oro Abasi adade nditre nsọn̄ibuot oro ọkọtọn̄ọde ke Eden. Ẹkeyadarede ndịben̄kpọ oro ke idem Jesus Christ, emi edide iwụk ebiet eti mbụk Obio Ubọn̄ Abasi.a—1 Corinth 2:6, 7; Colossae 1:26-28.
Eti Mbụk ye Unenikpe Abasi
15. Nnyịn isan̄a didie ifiọk ke Jehovah edi Abasi unenikpe? (Deuteronomy 32:4; Psalm 33:5)
15 Nnyịn imokụt nte ikọ oro “ndibem iso” ke Mark 13:10 edide akpan n̄kpọ akpan akpan ke ebuana ye unenikpe. Jehovah edi Abasi unenikpe emi asan̄ade ye ima mfọnido. Enye etịn̄ ebe ke prọfet esie Jeremiah ete: “Yak owo eke obụrede, obụre ke n̄kpọ emi, ke editịm mfiọk mi, koro ami Jehovah nnamde mfọnido, ye ikpe, ye edinen ido ke ererimbot: koro n̄kpọ emi enemde mi esịt: uyo Jehovah edi emi.”—Jeremiah 9:24.
16. Didie ke ẹkeme ndinam an̄wan̄a nte ke unenikpe oyom ẹbem iso ẹnọ ntọt?
16 Didie ke ẹwụt unenikpe Jehovah ke se iban̄ade edikwọrọ eti mbụk? Ẹyak nnyịn ida eka oro etemde inem inem akara oro ẹditade ke ini isenowo ẹdidide ke usen oro nte ini akade, inam an̄wan̄a. Edieke enye ọkpọn̄de enye ke okpokoro otụn̄ikan̄ ye unana editịn̄ nnọ nditọ esie mban̄a ini emi ẹditade enye, nso ididi ndammana udọn̄ nditọ oro? Kpukpru nnyịn ima idi nditọwọn̄ ini kiet! Nnuenubọk eyenọwọn̄ oyoyom nditụk akara oro nse! Mi edieke eka okokpude ndinọ ntọt oro odotde, enye idinyeneke eti ntak ndinọ ntụnọ. Ke n̄kan̄ eken, edieke enye ọdọhọde in̄wan̄în̄wan̄ ete ke ẹdita akara emi nte ini akade ke isenowo ẹma ẹdi ndien nte ke owo inyeneke nditụk ubọk, do enye ọnọ ntọt in̄wan̄în̄wan̄. Edieke ẹtụtde utọn̄, enye enyene unen ndinam n̄kpọ ke usụn̄ oro enyenede iwụk onyụn̄ enende.—Mme N̄ke 29:15.
17. Didie ke Jehovah owụt unenikpe ke san̄asan̄a usụn̄ toto ke 1919?
17 Jehovah, ke unenikpe esie, ididaha ubiomikpe isọk idiọk editịm n̄kpọ emi ye unana edibem iso nnọ ntọt oro odotde. Ke ntre, ọtọn̄ọde ke 1919 akpan akpan, ke akpa ekọn̄ ererimbot ama akada “ntọn̄ọ ubiak-uman” edi, Jehovah amanam Mme Ntiense esie ẹka ẹketan̄a eti mbụk ifịk ifịk ke ofụri isọn̄. (Matthew 24:7, 8, 14) Mme idụt ikemeke ndidọhọ nte enende ke imanana ifiọk iban̄a n̄wọrọnda ntọt emi.
Ẹkwọrọ Atara Adan̄a Didie ke Ererimbot?
18. (a) Nso uyarade odu kaban̄a utom oro Mme Ntiense ẹnamde ke mme nsannsan ebiet? (b) Mme ewe uwụtn̄kpọ en̄wen ke afo ọdiọn̄ọ aban̄a?
18 Ẹkeme ndikụt n̄kpọ oro owụtde uforo ẹnyenede ke utom unọ ukpep eke ofụri ererimbot emi ke n̄wed oro Last Places—A Journey in the North. Ewetn̄wed oro ọdọhọ ke ini imọ ikesede mme chart inyan̄ibom ndiyom isuo Foula oro odude nsannsan, kiet ke otu Mme Isuo Shetland ke n̄kan̄ edem edere Scotland, chart oro okowụt ke “N̄WE (n̄wụre), ITT (itiat), EBE (ebeden̄), MN̄U (mme n̄kpọ ubiọn̄ọ) ẹkeyọhọ ofụri isuo oro.” Mmọemi “ẹtọt owo oro oyomde ndiwat inyan̄ ete odu nsannsan. Mmọn̄ Foula ekedi ata enyene-ndịk ebiet n̄kpọ unọmọ, emi akanamde isuo oro ọdiọk ye mme awat nsụn̄ikan̄, mme aka isan̄ usen kiet, ye idem otu mbonutom Ọbọn̄ An̄wan, edi mma ndifiọk—ke usen ifan̄ ebede—nte ke mme n̄kpọ ubiọn̄ọ ẹmi ikakpanke Mme Ntiense Jehovah.” Enye ama akaiso ete: “Ke ata ukem usụn̄ oro mmọ ẹsidụn̄ọde ikpọ obio ye Obio oro Ọtọn̄ọde Ntatenyịn Obufa ẹyom mme mbet, ke mmọ ẹnam mme owo ẹdikpono Abasi ke ido mmọ ke Foula emi odude nsannsan.” Enye ama ọdọhọ ete ke Andrew, emi odụn̄de ke n̄kann̄kụk oro, ama enyene idem Enyọn̄-Ukpeme kiet emi ẹkenịmde ke enyịnusụn̄ esie ke n̄kpọ nte ọfiọn̄ ifan̄ ke mbemiso. Ekem enye ama adian do ete: “Urua kiet ke ukperedem nyekụt [Awake! ke usem Denmark] ke Faeroe [mme isuo Inyan̄ibom Edem Edere] ndien ọfiọn̄ iba ke ukperedem [Enyọn̄-Ukpeme ke usem Denmark] ke Nuuq, Greenland.” Nso okopodudu ikọ ntiense kaban̄a ifịk ifịk utom Mme Ntiense Jehovah ke ikpehe n̄kan̄ edem edere oro!
Nso Inụk Mme Ntiense Ndikaiso?
19, 20. (a) Nso inụk Mme Ntiense Jehovah ndikaiso n̄kwọrọ ikọ? (b) Mme mbụme ewe ke ẹdinọ ibọrọ ini en̄wen?
19 Nte ededi, ndikwọrọ ikọ ke ufọk ke ufọk nnọ isenowo idịghe mmemmem n̄kpọ, inamke n̄kpọ m̀mê edi isua ifan̄ owo ekedi Ntiense. Ndien nso inụk mme Christian ẹmi ndikaiso? Uyakidem Christian mmọ ye edu edibiom mbiomo. Paul ekewet ete: “Koro edieke n̄kwọrọde gospel, nnyeneke ntak mbụre; utom oro obiomo mi ke idem nte n̄kpọ eke nnyenede ndinam; koro idifọnke-fọn inọ mi edieke mmen̄kwọrọke gospel.” Mme Christian akpanikọ ẹnyene etop oro ọnọde uwem, ntre didie ke mmọ ẹkpekeme ndinịm enye nnyene ke idemmọ? Edumbet edinyene ubiomikpe iyịp ke ntak edikpu ndinọ ntọt ke ini afanikọn̄ edi okopodudu ntak ndikwọrọ eti mbụk.—1 Corinth 9:16; Ezekiel 3:17-21.
20 Didie, ndien, ke ẹkwọrọ eti mbụk? Nso idi ukpọhọde edikụt unen Mme Ntiense? Ewe ikpehe utom ukwọrọikọ mmọ ye esop ẹn̄wam ndinam ẹdiọn̄ọ mmọ nte ido ukpono akpanikọ? Ibuotikọ nnyịn emi etienede mi eyebọrọ mme mbụme oro.
[Mme Ikọ idakisọn̄]
a Kaban̄a n̄kaiso edinam ọniọn̄ Abasi ye “ndịben̄kpọ” an̄wan̄a, se Insight on the Scriptures, Eboho II, page 1190, emi Watchtower Bible and Tract Society of New York, Inc., emịn̄de.
Nte Afo Emeti?
◻ Nso inam Mme Ntiense Jehovah ẹkpụhọde ye mme ọkwọrọ ederi?
◻ Didie ke edikwọrọ ikọ owụt ima, odudu, ye ọniọn̄ Abasi?
◻ Didie ke edikwọrọ eti mbụk owụt unenikpe Abasi?
◻ Nso inụk Mme Ntiense Jehovah ndikaiso ke utom ukwọrọikọ mmọ?
[Mme ndise ke page 15]
Inamke n̄kpọ m̀mê mme owo ẹdu nsannsan adan̄a didie, Mme Ntiense Jehovah ẹyom ndisịm mmọ