Ntọt M’Ọkwọrọ Obio Ubọn̄
“Ẹn̄wana ye Satan, Ndien Enye Eyefehe Ọkpọn̄ Mbufo”
KE AKPA isua ikie, otu mbon ifiopesịt ke ‘ubreidiọn̄’ ke Ephesus ẹma ẹnam n̄kpọ ẹban̄a etop Christian ebe ke ndifọp mme n̄wed idiọn̄ mmọ an̄wan̄wa. (Utom 19:19) Ofụri ekọmurua n̄wed ẹmi ekedi mbak silver 50,000. Edieke mbụk Bible etịn̄de aban̄a denarius, okụk silver mbon Rome, enye okposịm ₦814,000 ke nsụhọde n̄kaha!
Ediwak owo ẹdu mfịn ẹmi ẹkenyenede mme n̄wed oro ẹnyenede n̄kpọ ndinam ye ibọk ke ini kiet ko ẹdi ẹmi ẹkewụtde ubiere oro ẹbietde eke mbon Ephesus eset. Kere ban̄a ifiọkutom etienede mi otode Canada.
Ke n̄kpọ nte isua ition ẹmi ẹkebede, kiet ke otu Mme Ntiense Jehovah ke ọkọkwọrọ ikọ ke ufọk ke ufọk ke ini n̄wan kiet oro ekerede Nora ke ataata usụn̄ okodụride enye esịn ke ufọk ke adan̄aemi akadade ke enyịnusụn̄ kiet. Ke ama akanam ndụn̄ọde ke n̄kpọ eke spirit ata ediwak isua, Nora ama enyene ediwak n̄wed ido ukpono ye n̄wed idiọn̄ ke mme itie ikie, edi enye ama oyom ndifiọk se Bible enyenede nditịn̄ mban̄a idotenyịn mme akpan̄kpa. Ntiense oro ama ọnọ enye tract oro Nso Idotenyịn Idu Inọ Mbonima Ẹmi Ẹkpade? Ẹma ẹbọrọ mme mbụme Nora, ndien enye ama ọbọ etịbe magazine Enyọn̄-Ukpeme ye Awake!
Ekem enye ama ọwọrọ do inyụn̄ isoboke aba ye Mme Ntiense Jehovah. Nte ededi, enye ama akaiso ndisibọ mme magazine ke obufa itieidụn̄ esie nto itie ubọn̄wed. Enye n̄ko ama otobo ndusụk n̄wed ẹkọn̄ọde ke Bible ẹmi ẹkesiakde ke mme magazine oro. Ke ndusụk ini ama ekebe, kiet ke otu Mme Ntiense Jehovah ama awaha enyịnusụn̄ esie. Ke amade nte Ntiense oro ekesikade nnennen ebịne Bible ke ini ọbọrọde mme mbụme, Nora ama adara enye onyụn̄ ọnọ enye ikot ndifiak ndi kaban̄a n̄kaiso nneme.
Nte ededi, Ntiense oro ama okụt nte edide ọkpọsọn̄ n̄kpọ ndifiak nsobo ye Nora. Enye ama esifiak aka ndien ndien ke nsio nsio ini ke usen ye ke nsio nsio ini ke urua ye unana edikụt unen. Nte ededi, nte ini akade, ifịk esie ama okụt unen, ndien enye ama enyene nti utịp. Enye ama ọtọn̄ọ ukpepn̄kpọ Bible ofụri ini, emi enye akawakde ndinịm ikata ke urua ke ntak Nora ekeyịrede enye. Mme n̄kpọ oro enye ekekpepde ama onụk enye ndinyene nneme ye mme ufan ye mbonubon esie, adade okosịm owo ita ke otu mmọ ndiyom ukpepn̄kpọ Bible ye Mme Ntiense Jehovah.
Ebede ke ukpepn̄kpọ esie Nora ama edifiọk nte ke ediwak nsunsu ido ukpono ye nsunsu prọfet ẹdu edi ke usụn̄ kiet kpọt ada osịm uwem. Ke ediwak isua enye ama esiyom mme ibọrọ ke mme mbụme esie ke mme nsunsu ido ukpono, edi ke ama ekekpep se Bible etịn̄de aban̄a mme demon, enye ama anam ukem nte mbon Ephesus eset oro ẹsiakde ke Utom Mme Apostle 19:19. Enye ama anam itie ubonn̄wed esie asana, ndien ke ufan̄ usen ifan̄, abiat se iwakde ikan n̄wed tọsịn kiet oro ẹnyenede n̄kpọ ndinam ye ibọk ye mme nsunsu ukpepn̄kpọ ido ukpono. Ke otu n̄wed oro enye akabiatde, ekọmurua otu kiet oro esịnede n̄wed inan̄ ama akan ₦17,600!
Nte an̄wan̄ade ke ẹkopde iyatesịt ẹban̄a edinam Nora, mme demon ẹma ẹfịna enye ke n̄kpọ nte urua iba. Nte ededi, ndiọi spirit ẹmi ikekemeke ndinam enye etre ndikaiso ke ukpepn̄kpọ Bible esie nnyụn̄ mbuana ye esop Jehovah eyomfịn.
Mme utọ ifiọkutom ẹmi ẹtịm ẹnam an̄wan̄a nte mme ikọ Bible ẹdide akpanikọ: “Ẹsụk idem ndien ẹnọ Abasi; ẹn̄wana ye Satan, ndien enye eyefehe ọkpọn̄ mbufo.”—James 4:7.