Ndịk Ẹnyenede Ẹban̄a Mme Akpan̄kpa Odu Ntatara Ntatara
Utịn ama osop ke ata anyanini. Afo emebịghi esịt ndinyọn̄ ufọk akan nte okpoyomde. Nte afo asan̄ade ebe itie ubụkowo n̄kann̄kụk, oti ọtọn̄ọ ndiduọ fi ọsọp akan. Ndobo ekịm okoneyo oro anam fi okop ata esisịt uyom. Inikiet inikiet afo okop ndiari ndiari, uyom oro anamde ndịk ke anyan ebiet. Afo osio ikpat isan̄—n̄ko osịp ọduọ fi ọsọp akan nte ekedide—nte afo ọnyọn̄de ufọk man akadak ibuot.
NTE akanam idem enyek fi ke ini okodude ke m̀mê ekperede itie ubụkowo? Ke edide ntre, ekeme ndidi ekikere ido ukpono oro edide ọsọ ke ofụri ererimbot omotụk fi—nte ke spirit mme akpan̄kpa ẹkeme ndinọ mme oduuwem un̄wam m̀mê ndinọ unan.
Ediwak nsunsu ido edinam ẹma ẹwọrọ ẹdi ke ntak oro ẹnịmde ke akpanikọ nte ke mme akpan̄kpa ẹyom un̄wam ẹto mme oduuwem mîdịghe ke mmọ ẹkeme ndinọ mme oduuwem unan edieke owo mîsụkke mmọ esịt. Ke uwụtn̄kpọ, ke ndusụk idụt Latin America, ediwak owo ẹnyene ido edibọp ekpri ufọk oro enyenede cross ke ebiet emi owo akakpade ke mbabuat n̄kpọntịbe. Mme owo ẹdomo mme tiande ẹnyụn̄ ẹnịm mme frawa do ke ukeme ndiwụt udọn̄ ẹnyenede ke m̀mê ndin̄wam ukpọn̄ m̀mê spirit owo oro akakpade. Ke ndusụk idaha, ẹsisuan mbụk ẹban̄ade mme “utịbe utịbe” ibọrọ ẹbọrọde mme akam, tutu mme owo ẹtọn̄ọ ndika ebiet animita, kpa ekpri ufọk oro enyenede ukpọn̄ m̀mê spirit owo oro akakpade, ndien ndien. Do mmọ ẹnam mandas, m̀mê mme un̄wọn̄ọ, ẹte edieke akpan̄kpa edin̄wamde mmimọ ikụt unen m̀mê ndibọ n̄kpọ—iso-ọfọn utịbe utịbe usọbọ—mmimọ iyewụt esịtekọm ke san̄asan̄a usụn̄. Ke n̄kan̄ eken, ẹkeme nditọt nte ke ẹsikụt ukpọn̄ owo ke ekịm okoneyo, ẹsịnde mbon oro ẹdude ndịk ke idem. Ẹsiwak ndidọhọ ke mme utọ ukpọn̄ oro ẹdi penando, ẹyatde mme oduuwem esịt ke ntak mme n̄kpọntịbe ini edem.
Ke ediwak idụt mme owo ẹsịn ekese ukeme ndisụk “spirit” mme akpan̄kpa esịt. Ẹsinịm ikpọ usọrọ, ẹwa mme uwa, ẹtịn̄ mme ikọ ndọn̄esịt—kpukpru ẹmi ke ndidomo ndikpan spirit akpan̄kpa ndisio usiene. Ẹkere ẹte ke edisụk mme akpan̄kpa esịt eyesụn̄ọ ke mme utịp ye mme edidiọn̄ ọnọ mbon oro ẹsụhọde.
“Ediwak owo ẹnịm ke akpanikọ ẹte ke n̄kpọntịbe ndomokiet idaha itie ‘ke idemesie m̀mê ke ndammana usụn̄,’” ntre ke ntọt kiet otode Africa ọdọhọ. “Ẹkere ke n̄kpọntịbe ekededi—edide udọn̄ọ, afanikọn̄, ada, nsọn̄ọn̄kpọ ndutịm uforo, ọkpọsọn̄ edịm m̀mê eyo, mme mbabuat n̄kpọntịbe, unana edidianakiet ke ubon, n̄kpa—oto mme spirit oro enyịn mîkwe ẹmi ẹnyenede odudu oro akande eke owo.” Ntọt en̄wen ọdọhọ ete: “Mme owo ẹnịm ke akpanikọ ẹte ke spirit mme eteete mmọ ẹdụn̄ ke heaven ndien ke ẹkpeme mme oduuwem kpukpru ini ke isọn̄. Ẹnịm ke akpanikọ ẹte ke mme eteete ẹnyene odudu oro akande eke owo, emi mmọ ẹkemede ndida ndiọn̄ nnyụn̄ n̄kpeme mme iman mmọ ke isọn̄ mîdịghe ndinọ mmọ ufen, ọkọn̄ọde ke ukpono oro mme iman ẹkponode m̀mê ẹfụmide mme akpan̄kpa oro.”
Edi nte utọ oro odu ke n̄kemuyo ye Ikọ Abasi? Nso idi ekikere fo?
[Ndise ke page 4]
“Animita” ke Chile