Ntọt M’ọkwọrọ Obio Ubọn̄
Jehovah Okop Odudu Akan Mme Asua Esie
DEVIL ye mme demon esie ẹdomo ke anyanini ndibiọn̄ọ edikwọrọ eti mbụk ebe ke nsunsu ido ukpono ye ubụpekpo. Bible etịn̄ aban̄a idiọk uduak Satan ke 2 Corinth 4:4 ke ebiet emi enye ọdọhọde ete ke “abasi eyo emi [akanam] ikike mmọ eke mînịmke ke akpanikọ okịm, mbak un̄wana gospel ubọn̄ Christ, emi edide mbiet Abasi, edisem ọnọ mmọ.”
Edi Jehovah Abasi okop odudu akan Satan. Idụhe n̄kpọ ndomokiet oro mme asua Jehovah ẹkemede ndinam nditre ediyọhọ uduak esie nte Abasi, emi edide nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:4) Ntọt ẹtienede mi oro ẹtode mme ọkwọrọ Obio Ubọn̄ ke Australia ẹwụt emi.
◻ Ke ama ekesịbe ebuana ye ido ukpono ke isua 20, n̄wan kiet ama ọtọn̄ọ ndifiak n̄kot Bible. Obufa udọn̄ enyenede mi ke Bible ama anam enye enyene ediwak mbụme, ntre enye ama ọbọn̄ akam ọnọ Abasi oyom un̄wam man okụt mme ibọrọ. Enye ama oyom ndidụn̄ọde nyom akpanikọ, edi enye ama ọfiọk ete ke ndifiak mbịne akani ido ukpono imọ idikọkke mfịna imọ. Utu ke oro, enye ama ọtọn̄ọ ndụn̄ọde esie ke ndika ufọkurua oro esinyamde n̄kani n̄wed nnyụn̄ mbụp m̀mê mmọ ẹnyene n̄wed ekededi ẹban̄ade ido ukpono.
Enyene ufọkurua oro ama eti ete ke imọ imenyene n̄wed ido ukpono, idịghe ke ufọkurua oro, edi ke ufọk. Enyịn̄ n̄wed oro ekedi Afo Emekeme Ndidu Uwem ke Nsinsi ke Paradise ke Isọn̄, emi Mme Ntiense Jehovah ẹmịn̄de. N̄wan oro ama okot n̄wed emi ye ọkpọsọn̄ udọn̄ onyụn̄ okụt mme ibọrọ ọnọ ediwak mbụme Bible esie. Ke ama okodụn̄ọde oyom Mme Ntiense Jehovah ke n̄wed urụk ukopikọ, enye ke akpatre ama osobo ye mmọ onyụn̄ ọtọn̄ọ ukpepn̄kpọ Bible ofụri ini.
◻ N̄kaiferi kiet ama ekpe n̄wedmbụk n̄kpọntịbe n̄kann̄kụk okụk ete ọtọt ke n̄kpọ n̄kpemeidem odu ndinyam. Ntọt unyamurua oro eketịn̄ aban̄a emi nte ‘n̄kpọ n̄kpemeidem ini eset oro okopde odudu etieti.’ Kiet ke otu Mme Ntiense Jehovah ama okụt ntọt unyamurua oro. Enye ama ebiere ndida nọmba urụk ukopikọ oro ẹkewụtde nnọ ikot nnyụn̄ nnyene nneme ye n̄wan oro mban̄a ebiet emi odudu oro ẹkedọhọde nte n̄kpọ n̄kpemeidem oro enyenede otode. Nneme ọkọn̄ọde ke ekikere Bible aban̄ade utom mme demon ama ada itie. N̄kaiferi oro ekenyenede n̄kpọ n̄kpemeidem oro ama ayarade ete ke n̄kpasịp usen kiet emi ekebede, imọ ima ibọn̄ akam inọ Abasi ite an̄wam imọ ye mfịna oro inyenede ye mme demon. Ntiense oro ama anam ndutịm ndinyene nneme en̄wen ke urụk ukopikọ.
Ke ini enye ọkọnọde ikot, n̄kaiferi oro ikodụhe ke ufọk. Eka ama ọbọrọ ikot urụk ukopikọ oro onyụn̄ ọdọhọ ete: “Mfiọkke se afo eketịn̄de ọnọ eyen mi, edi se itịbede edi utịben̄kpọ!” Enye ama obụk ete ke ama ọkọnọ akpa ikot oro ke urụk ukopikọ, eyen imọ ama otop kpukpru ndise ye n̄wed ẹnyenede ebuana ye Satan ọduọn̄ọ onyụn̄ ọtọn̄ọ ndikot Bible.
Ibịghike ke oro ebede, ẹma ẹnam ndutịm ndikosobo iso ye iso ye n̄kaiferi oro. Enye ye unana ubiatini ama onyịme ukpepn̄kpọ Bible ofụri ini ye Mme Ntiense Jehovah. Enye n̄ko ama ọtọn̄ọ ndibuana ye Mme Ntiense ebe ke ndidụk mme mbonoesop Christian mmọ. Inikiet efen, Jehovah ama akan mme demon ebe ke ndinam nnennen ifiọk akpanikọ Bible ayama.