Ndisop Idem ye Mbon Oro Ẹbakde Abasi
“MME owo ke kpukpru ebiet ẹyom ndibọhọ ndịk—ndịk afai, ndịk unana utom, ye ndịk idiọk udọn̄ọ. Nnyịn imoyom oro n̄ko. . . . Ntak, ndien, emi nnyịn inemede nte ẹkemede ndikọri mbak-a?” Andinọ utịn̄ikọ ibuotikọ mbono ama obụp edemede-owo udọn̄ mbụme oro ke Mme Mbono District “Mbak Abasi” kiet kiet, oro ọkọtọn̄ọde ke June 1994.
Ediwak miliọn owo oro ẹkedụkde—akpa ke North America, ndien ekem ke Europe, Central ye South America, Africa, Asia, ye mme isuo inyan̄ibom—ẹma ẹnyene ọkpọsọn̄ udọn̄ ndikpep ndikọri utọ mbak oro. Ntak-a? Koro nnyịn ndibuana ke mme edidiọn̄ oro Jehovah Abasi onịmde ọnọ ikọt esie ọkọn̄ọ ke nnyịn ndinyene mbak Abasi. Ndikpep mban̄a mbak Abasi akanam mme andidụk mbono oro ẹsop idem ọtọkiet, ndien ke ndutịm usen ita oro, mmọ ẹma ẹkpep ekese ẹban̄a akpan edu Christian emi.
“Bak Abasi, Nyụn̄ Nịm Mbet Esie”
Oro ekedi ibuotikọ akpa usen mbono oro, ọkọn̄ọde ke Ecclesiastes 12:13. Nso ke ndibak Abasi ọwọrọ? Ke ata akpa ikpehe ke ndutịm oro, etieibuot okpokoro mbono oro ama anam an̄wan̄a ete ke mbak Abasi owụt uten̄e ye ntotụn̄ọ ukpono oro ẹnyenede ẹnọ Jehovah ọkọrọ ye eti ndịk ediyat enye esịt. Utọ mbak Abasi oro idịghe idiọk ndịk; enye edi eti ye se idotde.
Didie ke eti ndịk emi ọnọ nnyịn ufọn? Utịn̄ikọ oro eketienede, “Ẹkûkop Mmemidem Ẹnyụn̄ Ẹkpa Mba,” ama anam an̄wan̄a ete ke mbak Abasi eyenụk nnyịn ndinịm mme ewụhọ Abasi ye idatesịt. Adianade ye ima inyenede inọ Abasi ye mbọhọidụn̄, utọ mbak oro eyenọ nnyịn odudu ke n̄kan̄ eke spirit. Ih, mbak Abasi ekeme ndin̄wam nnyịn ifep ndikpọt ke edem ke itọk nsinsi uwem.
N̄kpọ efen ke ndutịm oro ekedi mme ndụn̄ọde oro ẹkenọde oduuwem uyarade nte ke mbak Abasi ekeme ndikpeme nnyịn. Mbon oro ẹkedade ẹnam ndụn̄ọde ẹma ẹtịn̄ nte ukpono oro asan̄ade ye mbak Abasi okonụkde mmọ ndikaiso ke utom ukwọrọikọ kpa ye unana udọn̄, emiom, m̀mê ukọbọ onyụn̄ an̄wamde mmọ ndiyọ idem ke ini ẹsobode ọkpọkpọ idomo.
Ntak, ndien, emi ndusụk owo ẹnyenede mbak Abasi ke adan̄aemi mbon eken mînyeneke? Ke utịn̄ikọ oro “Ndikọri Nnyụn̄ Mbọ Ufọn Nto Mbak Abasi,” andinọ utịn̄ikọ ibuotikọ mbono ama anam an̄wan̄a ete ke Jeremiah 32:37-39, Jehovah ama ọn̄wọn̄ọ ete ke Imọ iyọnọ ikọt Imọ esịt eke abakde Abasi. Jehovah emesịn mbak Abasi ke esịt nnyịn. Didie? Ebe ke edisana spirit esie ye Ikọ odudu spirit esie, kpa Bible. Nte an̄wan̄ade, nte ededi, ana nnyịn isịn ọkpọsọn̄ ukeme ndikpep Ikọ Abasi nnyụn̄ mbọ ọyọhọ ufọn nto akpakịp n̄kpọ eke spirit oro enye ọnọde. Ẹmi ẹsịne mme ikpọ mbono ye mme mbonoesop nnyịn, ẹmi ẹn̄wamde nnyịn ndikpep ndibak enye.
Ndutịm uwemeyo ekeberede ye item ndibuọt idem ke Jehovah ye Ikọ esie. Se iketienede emi ekedi nneme ke mme akpan usụn̄ oro Obio Ubọn̄ okpotụkde uwem nnyịn nte mme Christian.
Ekem akpa nneme ikpehe ita oro ẹkenọde ke mbono oro ama etiene. “Mbak Abasi Onụk Nnyịn Ndinam Se Abasi Oyomde” ekedi ibuotikọ nneme oro, emi okowụkde ntịn̄enyịn ke ubon. Se itienede mi edi uwụtn̄kpọ item N̄wed Abasi—emi onyụn̄ enyenede ufọn—oro ẹkenọde.
□ Eke mme ebe: Mbak Abasi ekpenyene ndinụk owo ndima n̄wan esie nte idemesie. (Ephesus 5:28, 29) Owo isikoho-koi inọ idemesie unan, esuenede idemesie ke iso mme ufan esie, m̀mê nditịn̄ ikọ edem mban̄a mme ndudue esie. Ntre, ndien, enye ekpenyene ndinam n̄kpọ ye n̄wan esie ke usụn̄ oro owụtde uku ye ukpono oro enye ọnọde idemesie.
□ Eke ibanndọ: Mbak Abasi oro Jesus ekenyenede ama onụk enye ‘ndinem Abasi esịt kpukpru ini.’ (John 8:29) Emi edi eti edu ọnọ ibanndọ ndikpebe ke ini ẹnamde n̄kpọ ye mme ebe mmọ.
□ Eke mme ete ye eka: Mme Christian ete ye eka ẹkeme ndiwụt mbak Abasi ebe ke ndida mbiomo ete ye eka mmọ ke akpan n̄kpọ, ẹdade nditọ mmọ nte udeme ẹtode Jehovah. (Psalm 127:3) Akpan utịtmbuba ete ye eka ekpedi ndibọk nditọ mmọ ẹkabade ẹdi mme ata Christian.
□ Eke nditọ: Jehovah eteme nditọ ete ẹkop uyo “mme ete ye mme eka mbufo ke Ọbọn̄.” (Ephesus 6:1) Ntem, ndikop uyo ete ye eka mmọ edi ndikop uyo Abasi.
Akpatre utịn̄ikọ usen oro ama otụk owo ke idem, koro enye ekeneme aban̄a ubiak ubiak ntụk oro nnyịn owo kiet kiet isikopde ke ini iduọkde owo ima ke n̄kpa. Nte ededi, ke ufọt ufọt utịn̄ikọ oro, n̄kpọ n̄kpaidem ama otịbe. Etịn̄ikọ ama anam otuowo ẹkop inemesịt ke nditọt edisio obufa ekpri ediye uduot n̄wed oro Ke Ini Owo Oro Afo Amade Akpade. Ọyọhọ uduot n̄wed emi enyenede page 32 mi, etịn̄ ekese n̄kpọ oro ẹkemede ndin̄wam mbon oro ẹfụhọde ndinyene ifiọk nnyụn̄ nnam n̄kpọ mban̄a mme ekikere ye mme ntụk oro ẹsidemerede ke ini owo ima akpade. Nte akanam omokụt idemfo ke idaha oro mûfiọkke se ekpetịn̄de ọnọ owo oro owo esie akpade? Ikpehe kiet ke ekpri ediye uduot n̄wed emi eneme nte nnyịn ikemede ndin̄wam mbon oro ẹfụhọde. Ke adan̄aemi ẹkekpan̄de utọn̄ ẹnọ etịn̄ikọ, ediwak owo ke otuowo ke ẹkekere ẹban̄a owo oro ekemede ndibọ ufọn nto ekpri ediye uduot n̄wed emi.
‘Nam Edisana Utom ke Mbak ye Uten̄e Abasi’
Oro ekedi ibuotikọ eke ọyọhọ usen iba, ọkọn̄ọde ke Mme Hebrew 12:28. (NW) Ẹma ẹdisịm udiana nneme oro ọkọdọhọde, “Mme Esop Oro Ẹnamde N̄kpọ ke Mbak Jehovah” ke ndutịm usenubọk. Akpa ikpehe akaban̄a edidụk mme mbonoesop. Nnyịn ndidu ke mme mbonoesop owụt ukpono oro inyenede inọ Abasi ye mme ndutịm eke spirit oro enye anamde. Ebede ke ndibuana, nnyịn iwụt ite ke nnyịn imabak enyịn̄ esie inyụn̄ inyene udọn̄ ndinam n̄kpọ nte ekemde ye uduak esie. (Mme Hebrew 10:24, 25) Ọyọhọ etịn̄ikọ iba ama anam an̄wan̄a ete ke man ofụri esop asan̄a ke mbak Jehovah, ke ana owo kiet kiet anam udeme esie ndimụm eti eduuwem n̄kama. Akpatre etịn̄ikọ ama etịn̄ aban̄a ifetutom ye utom oro kpukpru Christian ẹnyenede—kpa editan̄a eti mbụk ye unana edikpa mba. Nnyịn idikaiso ndikwọrọ ikọ ebịghi adan̄a didie? Tutu Jehovah ọdọhọ ete ke ekem.—Isaiah 6:11.
“Idatesịt Jehovah Edi Odudu Mbufo,” emi odude idahaemi ke ibuotikọ ukpepn̄kpọ magazine emi, ekedi ibuotikọ utịn̄ikọ efen oro eketienede. (Nehemiah 8:10) Ntak emi ikọt Jehovah ẹdatde esịt-e? Etịn̄ikọ ama abat ediwak ntak. Kiet emi edide ata n̄wọrọnda edi nte ke n̄kpet n̄kpet itie ebuana ye Abasi anam nnyịn idi mme owo oro ẹkopde idatesịt ẹkan ke isọn̄. Etịn̄ikọ ama eti mme andidụk mbono oro ete, ẹkam ẹkere ise, nnyịn imenyene ifet ndidu ke otu mme owo oro Jehovah odụride ọnọ Jesus Christ. (John 6:44) Nso okopodudu ntak idatesịt!
Akpan n̄kpọ ke kpukpru ikpọ mbono esidi baptism, ndien Mme Mbono “Mbak Abasi” ikedịghe isio. Ke utịn̄ikọ oro “Uyakidem Nnọ ye Baptism ke Mbak Jehovah,” etịn̄ikọ ama anam an̄wan̄a ete ke ọkpọkpọ mbiomo kpukpru mbon oro ẹnade baptism ẹdi adiana-inan̄: (1) Ana nnyịn ikpep Ikọ Abasi ye un̄wam mme n̄wed oro ẹn̄wamde ndinam an̄wan̄a nnyịn nnyụn̄ nda nsịn ke edinam; (2) ana nnyịn ibọn̄ akam; (3) ana nnyịn ibuana ye ekemmọ mme andinịm ke akpanikọ ke mme mbonoesop; n̄ko (4) ana nnyịn itie ntiense iban̄a enyịn̄ ye Obio Ubọn̄ Jehovah.
Ndutịm uwemeyo Saturday ọkọtọn̄ọ ye ọnọ-ndọn̄esịt ibuotikọ oro “Ikọt Oro Jehovah Mîkpọn̄ke.” Ke isua ikie 35 ẹmi ẹkebede, ke ini nditọ Israel ẹkesobode nsọn̄ọn̄kpọ, Jehovah ama ọnọ ubiọn̄ ebe ke Moses, ọdọhọde ete: “Jehovah Abasi fo . . . idikpọn̄ke fi, idinyụn̄ iduọkke fi.” (Deuteronomy 31:6) Jehovah ama anam n̄kpọ ekekem ye ubiọn̄ oro ebe ke ndikpeme nditọ Israel ke ini mmọ ẹkedụkde Isọn̄ Un̄wọn̄ọ ẹkenyụn̄ ẹdade enye ẹnyene. Mfịn, ke ini isobode n̄kpọsọn̄ idomo, nnyịn n̄ko imekeme ndinyene ọyọhọ mbuọtidem nte ke Jehovah idikpọn̄ke nnyịn, ama akam edi nnyịn imọsọn̄ọ ida ye enye inyụn̄ inam mme item oro ẹdude ke Ikọ esie.
Didie ke afo ekeme ndikụt idatesịt ke ndikot Bible? Ke utịn̄ikọ oro “Kot Ikọ Abasi, kpa Edisana Bible, ke Usen ke Usen,” etịn̄ikọ ama ọnọ ekikere aban̄a edikot ye ekikere ndụn̄ọde nnyụn̄ mbụp mme utọ mbụme nte: Nso ke mbụk emi ekpep mi aban̄a mme edu ye mme usụn̄ Jehovah? Didie ke ami n̄keme ndinen̄ede mbiet Jehovah ke mme afan̄ ẹmi? Ndikot Bible ke usụn̄ emi edi n̄kpọ oro ọnọde idatesịt ye utịp.
Ekem ẹma ẹnọ ntịn̄enyịn ke ọyọhọ nneme ita ke ndutịm, “Mme Ndutịm Ndin̄wam Mmọ Oro Ẹbakde Jehovah.” Okposụkedi ekemede ndidi Jehovah idinamke mme utịben̄kpọ inọ mme asan̄autom esie mfịn, enye ke akpanikọ esin̄wam mbon oro ẹbakde enye. (2 Peter 2:9) Nneme emi ama owụt n̄kpọ inan̄ oro Jehovah ọnọde man an̄wam nnyịn ke ndiọkeyo emi: (1) Ebede ke spirit esie, Jehovah ọnọ nnyịn odudu ndinam mme utom oro ẹnen̄erede ẹkpon ẹkan ukeme idem nnyịn. (2) Ebede ke Ikọ esie, enye ọnọ nnyịn item ye ndausụn̄. (3) Ebede ke ufak, enye ọnọ nnyịn edisana esịt. (4) Ebede ke esop esie, esịnede mbiowo, enye ọnọ nnyịn ndausụn̄ ye ukpeme. (Luke 11:13; Ephesus 1:7; 2 Timothy 3:16; Mme Hebrew 13:17) Ebede ke ndida mme enọ ẹmi nnam n̄kpọ ọyọhọ ọyọhọ, nnyịn iyekeme ndiyọ ndien ke ntre inyene unyịme Jehovah.
Ibuotikọ akpatre utịn̄ikọ ke uwemeyo Saturday ekedi “Usen Jehovah Oro Enyenede Ndịk Emekpere,” ọkọn̄ọde ke prọfesi Malachi. Mme enyene-ndịk usen ẹma ẹdu ke mbụk eset, nte ke ini ẹkesobode Jerusalem ke 70 E.N. Edi akakan enyene-ndịk usen ke ofụri mbụk ubonowo edidi ke usen Jehovah emi edide ke ini ‘edisiode usiene ọnọ mmọemi mîbakke Abasi, mînyụn̄ isụkke ibuot inọ gospel Ọbọn̄ nnyịn Jesus.’ (2 Thessalonica 1:6-8) Oro edisọp ndida itie adan̄a didie? Etịn̄ikọ oro ama etịn̄ ete: “Utịt emekpere! Jehovah ọfiọk usen ye hour oro. Enye idikpụhọkede ini esie. Ẹdọhọ nnyịn ẹte ibet ke ime.”
Ọkọsọsọn̄ ndinịm ke usen iba ẹbebe. Akpatre usen edida nso idi?
“Ẹbak Abasi Ẹnyụn̄ Ẹnọ Enye Ubọn̄”
Ibuotikọ eke ọyọhọ usen ita ọkọkọn̄ọ ke Ediyarade 14:7. (NW) Ke ndutịm usenubọk oro, udịm udịm utịn̄ikọ ẹma ẹsio ẹwụt ndusụk ke otu mme akpan ukpepn̄kpọ oro ẹnamde Mme Ntiense Jehovah ẹkpụhọde ye mme esop ido ukpono eken.
Ke utịn̄ikọ oro “Nti Owo Ẹyeset ke N̄kpa,” etịn̄ikọ ama obụp mbụme oro edemerede udọn̄: “Ke Usen Ikpe eke tọsịn isua oro, ini ewe ke ẹdinam mbon oro ẹkekpade ke edinam akpanikọ ke mme akpatre isua eke editịm n̄kpọ Satan emi ẹset?” Nso ikedi ibọrọ? “Bible itịn̄ke,” nte etịn̄ikọ akanamde an̄wan̄a. “Nte ededi, nte iwụtke ifiọk nte ke ẹyenam mbon oro ẹkpade ke eyo nnyịn ẹsọp ẹset man ẹbuana ye akwa otuowo oro ẹbọhọde Armageddon ke akwa utom unọ ukpep oro edidade itie ke ofụri Usen Ikpe oro? Ih, edi akpanikọ!” Nte mme andibọhọ ẹyedu? Ke akpanikọ ẹyedu. Ẹma ẹnam mme ukpepn̄kpọ ye mme uwụtn̄kpọ Bible oro ẹnọde nnyịn nsọn̄ọ ẹban̄a emi ẹn̄wan̄a ke utịn̄ikọ oro eketienede, “Ẹnyan̄a ye Uwem Ẹbe Akwa Ukụt.”
Mme Ntiense Jehovah ẹma ẹfọfiọk ke anyanini nte ke Bible anyan ubọk owụt utịp iba—nsinsi uwem ke paradise isọn̄ oro enyenede anana-ibat miliọn owo ye uwem unana n̄kpa ke heaven oro enyenede esisịt ibat oro ẹdikarade ye Christ ke Obio Ubọn̄ esie. Ẹma ẹneme ẹban̄a idotenyịn eke heaven ke utịn̄ikọ oro “Ẹkûfehe Ndịk, Ekpri Otuerọn̄.” (Luke 12:32) Ke ikerede iban̄a nte idaha ererimbot emi etiede, ana ekpri otuerọn̄ ẹkûfehe ndịk; ana owo mmọ kiet kiet ọyọ tutu osịm utịt. (Luke 21:19) “Unana ndịk mmọ,” nte etịn̄ikọ ọkọdọhọde, “esịn udọn̄ ọnọ mbon akwa otuowo. Mmọ n̄ko ẹkpenyene ndikọri edu unana ndịk nte mmọ ẹsakde iso ẹse edinyan̄a ke n̄kponn̄kan ini afanikọn̄ oro isọn̄ akanam ọfiọkde aban̄a.”
Ke utịt ndutịm usenubọk oro, otuowo ye inemesịt ẹma ẹse drama Bible oro Mme Edimek Oro Afo Asakde Iso Ese. Ke eyo Joshua, n̄ko ye eke prọfet Elijah, nditọ Israel ẹma ẹnyene ubiere ndinam. Akana ẹnam edimek. Elijah ama ọdọhọ ete: “Adan̄a didie ke mbufo ẹsọk ukot ke edem mbiba? Edieke Jehovah edide Abasi, mbufo ẹtiene enye: edi ama edi Baal, ẹtiene enye.” (1 Ndidem 18:21) Mfịn, n̄ko, ubonowo enyene ubiere ndinam. Idịghe ini ndisọk ukot ke edem mbiba edi emi. Nso idi nnennen edimek? Kpa ukem oro Joshua eset akanamde. Enye ọkọdọhọ ete: “Ama edi ami ye ufọk mi, nnyịn iyenam n̄kpọ Jehovah.”—Joshua 24:15.
Eketie nte ikebịghike-bịghi uwemeyo Sunday ye ini utịn̄ikọ an̄wa oro ẹkekotde “Ntak Abakde Ata Abasi Idahaemi” ama edisịm. Ke Ediyarade 14:6, 7 (NW), ẹkpak ofụri ubonowo ẹte: “Ẹbak Abasi ẹnyụn̄ ẹnọ enye ubọn̄.” Ntak edide usọp usọp n̄kpọ nte ẹbak Abasi idahaemi? Koro, nte itien̄wed Abasi oro akade iso nditịn̄, “ekem ini ikpe esie.” Ebede ke Eyen esie, emi idahaemi ẹma ẹkedori ke ebekpo nte Edidem Obio Ubọn̄ Abasi ke heaven, Jehovah eyeda ndedehe, ọsọn̄ibuot editịm n̄kpọ oro odude kemi edisịm utịt. Etịn̄ikọ ama anam an̄wan̄a nte ke emi edi n̄kukụre usụn̄ oro ẹdidade ubọhọ ẹsọk mbon oro ẹbakde Abasi ẹnyụn̄ ẹnyan̄a ẹnyụn̄ ẹkpeme itieidụn̄ nnyịn eke isọn̄ emi. Sia ẹmi ẹdide mme akpatre usen eke editịm n̄kpọ emi, edi usọp usọp n̄kpọ nte nnyịn ibak ata Abasi idahaemi!
Ke etienede utịn̄ikọ ukpepn̄kpọ Enyọn̄-Ukpeme eke urua oro, akpatre etịn̄ikọ ama ọdọk ada. Enye ama anam an̄wan̄a ete ke, nte utịp ndutịm mbono oro, mbak Abasi ama enyene se ọwọrọde akamba akamba ọnọ mme odụk mbono oro. Enye ama ọsọn̄ọ etịn̄ ediwak ufọn oro ẹtienede mbon oro ẹbakde Abasi. Etịn̄ikọ oro ama ọtọt obufa video oro ẹsiode—United by Divine Teaching. Enye owụt mme akpan ikpehe eke Mme Mbono “Ukpepn̄kpọ Abasi” eke Ofụri Ererimbot oro ẹkenịmde ke 1993-1994. Nte utịn̄ikọ oro okosịmde utịt, ediwak owo ẹma ẹkere, ‘Nso ke nnyịn idori enyịn iban̄a isua efen?’ Mbono district usen ita ke ediwak ebiet.
Ke ndiberi, etịn̄ikọ ama etịn̄ otụk Malachi 3:16, emi ọdọhọde ete: “Ndien mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, mmọ ẹnyụn̄ ẹwet n̄wed editi ke iso esie ẹnọ mme abak Jehovah ye mme ẹkere enyịn̄ esie.” Mme andidụk mbono oro ẹma ẹnyọn̄ọ ye in̄wan̄în̄wan̄ ubiere ndikere mban̄a enyịn̄ Jehovah nnyụn̄ nnam n̄kpọ esie ye mbak Abasi.
[Ndise ke page 24]
Oyom mbon baptism ẹkaiso ndiwụt mbak Abasi
[Ndise ke page 25]
Drama oro “Mme Edimek Oro Afo Asakde Iso Ese” ama owụt mme andikpan̄ utọn̄ nte oyomde mmọ ẹnam n̄kpọ Jehovah ye iwụk
[Ndise ke page 26]
Mme andidụk mbono ẹma ẹdara ndibọ obufa ekpri ediye uduot n̄wed oro “Ke Ini Owo Oro Afo Amade Akpade”