Ido Ukpono Fo Ubom Oro Mînaha Ọwọrọ Ọkpọn̄?
UBOM odu ke ufọt oyobio. Mbon uwat, ẹmi ke mbrenyịn ẹdomode ndinyan̄a ubom mmọ, ẹnyene usọp usọp ubiere ndinam: edide ndisọn̄ọ ndu m̀mê ndikpọn̄ ubom nnyụn̄ nnyan̄a idemmọ. Ndi afo ama ọfiọk ke ẹda enyene-ndịk n̄kpọntịbe emi ndinam ukpepn̄kpọ ido ukpono an̄wan̄a?
Mme ekpep ukpepn̄kpọ ido ukpono, akpan akpan nditọ ukpepn̄kpọ Catholic, ẹsiwak ndida ufọkabasi mmọ ndomo ye ubom oro an̄wanade ye oyobio. Mmọ ẹdọhọ ke ubom emi, oro Jesus m̀mê Peter etiede ubọi, edi n̄kukụre usụn̄ edinyan̄a. Idaha mme ọkwọrọ ederi edi, ‘Kûdede uwọrọ ukpọn̄ ubom emi. Ufọkabasi emi ama osobo ikpọ mfịna mbemiso, edi enye edi ubom oro ọbọhọde oyobio ke ofụri mbụk.’ Ndusụk owo ẹdọhọ ẹte, ‘Ntak ọwọrọde ọkpọn̄ enye? Mme ukpụhọde ewe ẹdu? Ntak mûsọn̄ọke udu unyụn̄ un̄wam ẹwat enye ẹkedụk mmọn̄ oro enyenede ifụre?’
Ke n̄kemuyo ye ndamban̄a usem emi, ediwak owo, ẹmi ẹdude ke kpukpru orụk ido ukpono, ẹkere ẹte, ‘Mmọfiọk ke ido ukpono mi akwan̄a ke ediwak n̄kpọ, edi mmonịm nte ke enye eyekpụhọde. Nyomke ndiwọrọ n̄kpọn̄ enye. N̄kpama ndinyene udeme ke ndin̄wam enye akan n̄kpọsọn̄ idaha esie.’ Orụk ekikere emi ekeme ndito ọkpọsọn̄ ima emi owo enyenede ọnọ ido ukpono eteete esie m̀mê idem ndịk “edikpọn̄” enye.
Akpan uwụtn̄kpọ kiet edi eke Hans Küng, ekpep ukpepn̄kpọ ido ukpono owo Catholic emi ẹtịmde ẹfiọk oro mîsinyịmeke ye ekikere owo, emi ekekerede ete: “Nte ndikpọn̄ ubom ke ini oyobio, n̄kpọn̄de mbon oro ikawatde kiet tutu edisịm emi ndin̄wana ye ofụm, ndifop mmọn̄, ndien iso-ọfọn ndin̄wana man ẹbọhọ?” Enye ama ọbọrọ ete: “Ndikpọn̄ke uforo oro nnyenede ke esịt ufọkabasi.” Ukpụhọde efen ekpedi “ndidianade n̄kpọn̄ ufọkabasi emi, ke ntak enye awahade ọkpọn̄ usụn̄, kaban̄a ima n̄kokon̄ ido uwem, ndien iso-ọfọn, man ẹtịm ẹdi nti Christian.”—Die Hoffnung bewahren.
Edi nte owo ekeme ndisọn̄ọ ndu ke esịt ubom ufọkabasi esie ye idotenyịn nte ke Abasi, ke mbọm esie, eyenọ kpukpru ido ukpono ini oro mînyeneke adan̄a ndinam ukpụhọde? Oro edi akpan mbụme. Nte uwụtn̄kpọ oro owụtde, ndibụmede n̄wọrọ n̄kpọn̄ ubom oro odude ke itiendịk ndụk ubom uwem oro mîdaha ọfọn ekpedi n̄kpọndịk ukem nte edisọn̄ọ ndu ke ubom oro osịpde. Nte owụt eti ibuot ndisọn̄ọ ndu ke ufọkabasi inamke n̄kpọ m̀mê nso iditịbe, se ededi oro edide idaha esie? Nso idotenyịn edinam ukpụhọde ke mme ido ukpono mfịn ẹnọ? Adan̄a didie ke Abasi ediyak mmọ ẹnam n̄kpọ oro edide isio ye uduak esie?
[Ebiet Ẹdade Ndise Ẹto ke page 3]
Chesnot/Sipa Press