Ntọt M’ọkwọrọ Obio Ubọn̄
Ndikwọrọ Ikọ ke Ini Afanikọn̄
APOSTLE Paul ama ebemiso etịn̄ ete ke “ndiọkeyo eyedu ke ukperedem ini.” (2 Timothy 3:1) Mme ikọ oro ẹdi akpanikọ didie ntem! Mbon El Salvador ke Central America ke anyanini ẹmesobo ubiak ubiak ata idem n̄kpọ emi. Ke se iwakde ikan isua duop, idụt oro okodu ke ekọn̄ mbon obio oro akadade idiọk idaha ye n̄kpan̄a ọsọk ediwak tọsịn owo. Ekọn̄ oro okụre idahaemi, edi idiọk idaha oro osụk ododu. Ubiatibet ọmọdọk idiọk idiọk ke ekọn̄ oro ama okokụre. Etịn̄ikọ ke television n̄kann̄kụk kiet ọkọdọhọ ke ndondo emi ete: “Idahaemi afai ye n̄wo edidi edinam ofụri usen.”
Mme Ntiense Jehovah ibọhọke nnyen̄e ubiatibet emi. Mme inọ ẹmebụn̄ọ ẹdụk ediwak Ufọkmbono Obio Ubọn̄ ẹnyụn̄ ẹyịp ukwak ikwọ. Ke ediwak idaha udịm n̄kparawa ẹmi ẹkamade n̄kpọ en̄wan ẹsibụn̄ọ ẹdụk Mme Ufọkmbono Obio Ubọn̄ ke adan̄aemi mbonoesop Christian osụk akade iso, ẹyịp okụk, mme n̄kanika ubọk, ye mme ọsọn̄urua n̄kpọ eken ẹto mme andidụk. Mme inọ ẹmewot ediwak Mme Ntiense ke adan̄aemi mmọ ẹbuanade ke mbubehe mmọ eke usen ke usen.
Kpa ye mme n̄kpọ ubiọn̄ọ ẹmi, Mme Ntiense Jehovah ke El Salvador ẹkaiso ndinam utom ọkpọsọn̄ ke ndikwọrọ eti mbụk. Mmọ ẹnam emi ke ndikop uyo nnọ item N̄wed Abasi oro: “Ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Ediwak owo ẹmi ẹnyenede udọn̄ ẹban̄a idotenyịn Obio Ubọn̄ oro Bible ọnọde ẹsụk ẹdodu ke idụt emi, ndien Mme Ntiense ke ẹdomo ndisobo mmọ owo kiet kiet. Ikọ ntiense ido nneme amakabade edi usụn̄ ukwọrọikọ oro enyenede uforo.
Ke adan̄aemi ọbọde usọbọ ke ufọkibọk, Ntiense kiet ama ada kpukpru ifet oro enyenede nditịn̄ ikọ ye mbon udọn̄ọ eken mban̄a mme un̄wọn̄ọ Abasi kaban̄a ini iso, nte ẹkụtde ke Bible. Ke mfụhọ owo udọn̄ọ kiet emi ọkọdọn̄ọde n̄kpa n̄kpa ama eseme ete: “Ibịghike ami mmọn̄ n̄kpa!” Edi mfụhọ mfụhọ iso owo udọn̄ọ emi ikakpanke Ntiense emi ndibuana eti mbụk Obio Ubọn̄ Abasi. Utu ke oro, enye ama okot ke ọkpọsọn̄ uyo ọnọ ete oro oto n̄wed Afo Emekeme Ndidu Uwem ke Nsinsi ke Paradise ke Isọn̄, emi Mme Ntiense Jehovah ẹmịn̄de. Usen ifan̄ ke ukperedem, Ntiense oro ama ọkpọn̄ ufọkibọk oro, okopde mfụhọ nte ke ete oro ọmọn̄ akpa.
Isua inan̄ ke ukperedem Ntiense oro ekenyene ndibọ usọbọ ke ufọkibọk en̄wen. Ke adan̄aemi enye okodude do, owo udọn̄ọ kiet ama edi ebịne enye onyụn̄ ọdọhọ ete: “Ndi afo emeti mi?” Ekedi eren emi enye okosobode isua inan̄ ke edem, kpa owo emi ẹkekerede ke ọmọn̄ akpa! Nso akama-n̄kpaidem idatesịt ke ekedi ntem ke ini eren oro akan̄wan̄ade enye onyụn̄ adian do ete: “Ami n̄ko ndi kiet ke otu Mme Ntiense Jehovah idahaemi!” Eren oro ama edinyịme idotenyịn Bible kaban̄a ini iso, ekpep Bible ye Mme Ntiense Jehovah, onyụn̄ ayak uwem esie ọnọ Jehovah. Ikokụreke ke enye ndikedi Ntiense edi enye ke akabuana ke utom ukwọrọikọ uyọhọ ini ke n̄kpọ nte isua iba nte asiakusụn̄ ofụri ini.
Ke idaha enyeemi, n̄kpasịp akpanikọ emi ẹketọde ke ido ikọ ntiense ido nneme ama osịm eti esịt. Ifetutom eke edin̄wam mme owo ẹdi ẹdinyene ifiọk akpanikọ onụk mme ata Christian ndikaiso ke utom ukwọrọikọ kpa ye “ndiọkeyo” ẹmi.