Nte Afo Emeti?
Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:
▫ Ntak emi mme akpa Christian mîkenịmke usọrọ usen emana Jesus?
Nte ekemde ye The World Book Encyclopedia, “mme Akpa Christian ikenịmke usọrọ usen emana [Jesus] koro mmọ ẹkeda edinịm usọrọ usen emana owo ekededi nte ido edinam mme okpono ndem.”—12/15, page 4.
▫ Nte ẹkpenyene ndibọn̄ akam nnọ Jesus?
Baba, koro akam ẹdi orụk utuakibuot oro enyenede Ata Ọkpọsọn̄ Abasi san̄asan̄a. Ebede ke ndinam kpukpru akam nnyịn ẹka ẹbịne Jehovah Abasi, nnyịn iwụt ite ke imanam n̄kpọ iban̄a ndausụn̄ oro Jesus ọkọnọde ke nte ẹkpebọn̄de akam: “Ete nnyịn emi odude ke heaven.” (Matthew 6:9)—12/15, page 25.
▫ Ntak emi ẹkenọde isio isio ubiereikpe ke akwa idiọkn̄kpọ oro Edidem David akanamde ke ẹmende ẹdomo ye idiọkn̄kpọ Ananias ye Sapphira? (2 Samuel 11:2-24; 12:1-14; Utom 5:1-11)
Idiọkn̄kpọ Edidem David okoto ntak mmeme ikpọkidem. Ke ini ẹkekade ẹkesobo ye enye kaban̄a se enye akanamde, enye ama atua n̄kpọfiọk, Jehovah ama onyụn̄ efen enye—okposụkedi enye ekenyenede ndibọ utịp idiọkn̄kpọ esie. Ananias ye Sapphira ẹkenam idiọkn̄kpọ sia mmọ ke ido mbubịk ẹkesude nsu, ẹdomode ndibian̄a esop Christian ndien ke ntre ‘ẹsude nsu ẹnọ edisana spirit ye Abasi.’ (Utom 5:3, 4) Oro ama akabade edi uyarade obukpo esịt, ntre ẹma ẹbiere ikpe ọsọn̄ ẹnọ mmọ.—1/1, page 27, 28.
▫ Nso ikeme ndin̄wam nnyịn ndinam n̄kpọ Jehovah ke inemesịt?
Nnyịn ikpenyene ndikọri in̄wan̄în̄wan̄ ekikere ye esịtekọm iban̄a mme edidiọn̄ ye mme ifetutom oro Abasi ọnọde nnyịn, ndien nnyịn ikpedehede ifre ite ke ebede ke nditiene Ikọ Abasi, nnyịn ke inem enye esịt.—1/15, page 16, 17.
▫ Nso n̄kpọ iba ke ana nnyịn inyene ke ekikere edieke anade nnyịn inọ nsịnudọn̄ oro enyenede uforo?
Akpa, kere se oyomde nditịn̄ man nsịnudọn̄ oro enyene iwụk. Ọyọhọ iba, yom ifet ndika mbịne owo oro odotde itoro m̀mê oro oyomde ẹsọn̄ọ mmọ idem.—1/15, page 23.
▫ Ntak emi “akwa otuowo” ẹkamade “ndakeyop ke ubọk mmọ”? (Ediyarade 7:9)
Edifụn̄ ndakeyop owụt ete ke “akwa otuowo” ke idara ẹnyịme Obio Ubọn̄ Jehovah ye Edidem esie oro ẹyetde aran, Jesus Christ. (Se Leviticus 23:39, 40.)—2/1, page 17.
▫ Nso nti ukpepn̄kpọ ke ẹkụt ke n̄wed Job?
N̄wed Job owụt nnyịn nte ikpesede iban̄a mme mfịna. Enye ọnọ mme n̄wọrọnda uwụtn̄kpọ ke nte ẹkpenọde—ye nte owo mîkpọnọhọ—owo emi osobode mme idomo item. N̄ko-n̄ko, ọkpọkpọ ifiọk n̄kpọntịbe Job ekeme ndin̄wam nnyịn ndinam n̄kpọ ke usụn̄ adade ukem ukem ke ini isobode n̄kpọsọn̄ idaha.—2/15, page 27.
▫ Nso ke mme utịben̄kpọ Jesus ẹkpep nnyịn?
Mme utịben̄kpọ Jesus ẹnọ Abasi ubọn̄, ẹnịmde uwụtn̄kpọ ẹnọ mme Christian ndinọ Abasi ubọn̄. (Rome 15:6) Mmọ ẹsịn udọn̄ ẹnọ edinam nti n̄kpọ, ediwụt ntatubọk, ye ediwụt mbọm.—3/1, page 8.
▫ Mbiowo ndidụn̄ọde mme mbụme oro ẹma ẹketịm ye mbufa owo oro ẹyakde idem ẹnọ ọyọhọ nso uduak?
Emi ọsọn̄ọ nte ke owo kiet kiet oro ayakde idem ọnọ ọdiọn̄ọ ọyọhọ ọyọhọ mme akpan ukpepn̄kpọ Bible onyụn̄ ọfiọk se ibuanade ke ndidi Ntiense Jehovah.—3/1, page 13.
▫ Didie ke mme akam oro ẹdude ke Bible ẹkeme ndinyene ufọn nnọ nnyịn?
Ke ndidụn̄ọde mme akam oro ẹdude ke N̄wed Abasi, nnyịn imekeme ndidiọn̄ọ mbon oro ẹkebọn̄de ke mme idaha ẹbietde eke nnyịn. Ndidụn̄ọde, ndikot, ye nditie n̄kere mme utọ akam oro ẹkeme ndin̄wam ndifori nneme nnyịn ye Jehovah.—3/15, page 3, 4.
▫ Nso idi mbak Abasi?
Mbak Abasi edi uten̄e Jehovah, ntotụn̄ọ ukpono oro ẹnyenede ẹnọ enye, asan̄ade ye eti ndịk ediyat enye esịt. (Psalm 89:7)—3/15, page 10.
▫ Nso idi usụn̄ ita oro Bible owụtde ke nnyịn imọsọn̄ urua ke enyịn Abasi?
Bible ekpep ete ke nnyịn owo kiet kiet imodot ke enyịn Abasi (Luke 12:6, 7); enye anam an̄wan̄a se Jehovah abatde ke ọsọn̄urua n̄kpọ ke idem nnyịn (Malachi 3:16); ndien enye obụk se Jehovah akanamde ndiwụt ima oro enye amade nnyịn. (John 3:16)—4/1, page 11, 12, 14.
▫ Ntak emi Mme Hebrew 10:24, 25 akande ikpîkpu ewụhọ nte mme Christian ẹsop idem ọtọkiet-e?
Mme ikọ Paul ẹmi ẹwụt idaha eke odudu spirit Abasi kaban̄a kpukpru mbonoesop Christian—ke akpanikọ, kaban̄a idaha ekededi oro mme Christian ẹbuanade ọtọkiet.—4/1, page 16.