Ini Emi Mmọ Ẹkotde Enye ye Nte Mmọ Ẹbọde Ufọn
Tụhi-Tụhi Usenubọk:
Mme ọdọ ndọ, emi mmọ mbiba ẹnamde utom ke ebiet ọwọrọde ọkpọn̄ ufọkidụn̄ mmọ, ẹma ẹbiere ndisibak ke minit duop ndemede idap kpukpru usenubọk nnyụn̄ nda ini oro ndikot Bible ọtọkiet mbemiso ẹkpọn̄de ufọk. Se mmọ ẹsikotde esinọ isọn̄ kaban̄a eti nneme ke mmọ ẹma ẹkekpọn̄ ufọk.
Ebiowo kiet ke Nigeria esikama ndutịm oro ẹdiomide ẹnọ Ufọkn̄wed Utom Ukara Abasi nte isọn̄ kaban̄a edikot Bible ke ubon esie. Mmọ ẹsikot ikpehe kiet kpukpru usen ke ẹma ẹkekụre edineme itien̄wed eke usen, awakde ndidi ke usenubọk. Ẹsidọhọ nditọwọn̄ ẹtiene ẹkot ndusụk itie oro ẹkenọde ndikot. Ekem ẹyedọhọ mmọ ẹbụp mme mbụme ke mme ufan̄ikọ oro ẹkekotde.
N̄wanndọ kiet ke Japan esikot ofụri Bible okụre inikiet ke isua ọtọn̄ọde ke 1985. Ndutịm esie edi ndisikot ke minit 20 osịm 30 ọtọn̄ọde ke n̄kanika ition usenubọk kpukpru usen. Kaban̄a mme ufọn, enye ọdọhọ ete: “Emi ama anam mbuọtidem mi ọsọn̄ idem. Enye an̄wam mi ndifre mban̄a udọn̄ọ mi nnyụn̄ n̄wụk ntịn̄enyịn ke idotenyịn Paradise.”
Eyenete an̄wan emi edide asiakusụn̄ ke isua 30 edi emi ebe esie mîdịghe Ntiense esidaha ada ke n̄kanika ition kpukpru usenubọk ndikot Bible. Ndutịm esie oyom enye okot n̄kpọ nte page inan̄ ke N̄wed Abasi Usem Hebrew, ibuot kiet ke N̄wed Abasi Christian Usem Greek, ye ufan̄ikọ kiet ke Mme N̄ke. Enye esikot ofụri Bible okụre ọtọn̄ọde ke 1959. Enye ọdọhọ ete: “Nte utịp edikot oro n̄kotde, Jehovah ama mi . . . Mmọbọ nsịnudọn̄, ndọn̄esịt, ye nnen̄ede.” Enye adian ete: “Ndikot Bible etie nte Jehovah ndinọ mi nsọn̄idem kpukpru usen.”
Eyenete an̄wan kiet emi ọkọbọde akpanikọ ke idụt oro ẹkpande utom Mme Ntiense Jehovah n̄ko enyene ebe oro ọbiọn̄ọde se enye onịmde ke akpanikọ. Enye ekeme ndikot Bible ọtọn̄ọde ke Monday osịm Friday, ọtọn̄ọde ke n̄kanika itiokiet osịm n̄kanika itiaba usenubọk. Emi ọmọnọ enye odudu esịtidem. Ke etide nte edikot n̄wed esie otụkde enye, n̄wan emi ọdọhọ ete: “Nnyịn ikpep ndima Jehovah ye Jesus nnyụn̄ ndu uwem inemesịt, idem kpa ye mme mfịna ye nsọn̄ọn̄kpọ, ifiọkde ite ke mme un̄wọn̄ọ Jehovah isikpụhọ.”
Eyenete an̄wan emi okodụkde Ufọkn̄wed Utom Usiakusụn̄ ama ebiere ndinam item oro ẹkenọde kaban̄a ndinam edikot Bible edi edinam ofụri usen. Ke akpa, enye ama esikeme ndinam emi ọtọn̄ọde ke n̄kanika ition osịm n̄kanika itiokiet usenubọk. Ke ini edikpụhọ enye utom akatuahade ye oro, enye ama okpụhọde aka ọtọn̄ọde ke n̄kanika usụkkiet osịm n̄kanika duop mbubịteyo. Ke ini mme idaha efen ẹmi ẹnịmde n̄kpọ-ata ẹkedemerede, enye ọdọhọ ete, “Mma n̄kaiso ndikpụhọ ndutịm mi ekekem ye mme idaha.”
Nte Ini Akade ke Usen:
Nditọeka iba ẹmi ẹdide mbonufọk Bethel Brazil ẹnam ẹdi ido mmọ ndisikot Bible ọtọkiet ke n̄kpọ nte minit 20 kpukpru usen ke ẹkụrede udia uwemeyo. Mmọ ẹmekot ofụri Bible ẹkụre ke n̄kpọ nte utịm ike 25; edi mmọ ẹwet ẹte: “Nnyịn kpukpru ini imesikụt mbufa n̄kpọ, ntre edikot Bible akananam ifekke nnyịn.”
Eyenete an̄wan kiet emi mîdọhọ ndọ ke Japan ama okụt ete okposụkedi ẹkebọkde imọ nte Ntiense, imọ ikọfiọkke N̄wed Abasi ọfọn; ke ini enye akakabarede edi asiakusụn̄, enye ama ebiere ndikot Bible kpukpru ini. Enye idahaemi esikot itien̄wed Ufọkn̄wed Utom Ukara Abasi ke adan̄aemi anamde isan̄ aka ufọkibọk ndikọbọ usọbọ usen kiet ke urua kiet kiet. Ekem, ke ufọk, enye eyenam udiana ndụn̄ọde. Ke ekperede utịturua, enye esikaiso anam edikot Bible, asatde mme n̄wed ekekem ye nte ẹkewetde mmọ.
Eyen isua 13 oro idahaemi ama okokokot ofụri Bible okụre utịm ikata ke okot ibuot kiet kpukpru usen ke ini enye ọnyọn̄de ufọkn̄wed edi idahaemi. Emi, nte enye ọdọhọde, aman̄wam enye “ndima Jehovah n̄kan.”
Ntiense kiet emi mînyeneke ini ke ntak ndutịm esie nte anamutom, ebiowo, ebendọ, ye ete esikpan̄ utọn̄ okop mme kaset Bible ke adan̄aemi anamde isan̄ ke tren aka utom. Ekem ke ufọk enye eyekot kpa ukem itie oro ke idemesie.
Ke adianade ye ọkpọkpọ edikot, asiakusụn̄ kiet ke France esikpan̄ utọn̄ ọnọ kaset Bible ke ini etemde udia, ke ini awatde uwat, ke ini osobode n̄kpọsọn̄ ini, mîdịghe n̄kukụre ke inem.
Asiakusụn̄ emi edide isua 21 ke Japan eti nte eka esie akakpakde enye ete esidia n̄kpọ eke spirit kpukpru usen, ndien enye esikot Bible ke usen ke usen, okposụkedi mîsidịghe ke ukem ini kpukpru ini, tọn̄ọ ke ini enye ekedide isua ita ke emana. Ke enye ama okokụre ndikot itie oro enye ekemekde ọnọ usen oro, enye eyefiak okot mme akpan ufan̄ikọ, ndien ekem enye eyeda minit ifan̄ ndidụn̄ọde se enye okokotde ke ekikere.
Ntiense efen, asiakusụn̄, ama okot ofụri Bible okụre n̄kpọ nte utịm ikoduop ke isua 12 ẹmi ẹkebede. Ebe esie idịghe andinịm ke akpanikọ, ntre enye anam ndutịm ọnọ edikot esie ke uwemeyo.
Mbubịteyo:
Ebiowo kiet emi edide asiakusụn̄ ofụri ini ke Japan emi esikotde Bible esie kpukpru okoneyo mbemiso edede idap amanam emi ke isua itiaita emi ẹkebede. Enye ọdọhọ ete: “Ami nnen̄ede mma mme itien̄wed ẹmi ẹwụtde nte Jehovah ekerede n̄kpọ, nte enye ekerede aban̄a mme n̄kpọ, ye nte enye esede aban̄a mme idaha. Ebede ke nditie n̄kere mme itien̄wed ẹmi, ẹmen̄wam mi ndinam ekikere Jehovah edi okịm nnyụn̄ n̄n̄wam nditọete Christian mi iren ye iban ye mbonubon mi.”
Ebiowo kiet ke France esikot Bible ke hour kiet kpukpru mbubịteyo ọtọn̄ọde ke 1979. Enye esiwak ndikama mme edikabade ition m̀mê itiokiet man emen odomo. Enye ọdọhọ ete ke imọ nditịn̄ enyịn n̄kot an̄wam imọ ndifiọk “nte idade ifiọk Bible isịn ke edinam ke mme idaha oro ẹdemerede ke usen ke usen.” Emi n̄ko an̄wam enye nditịm n̄kụt unen ke ini ọnọde item oto N̄wed Abasi.
Ke isua 28 ẹmi ẹkebede, eyenete eren kiet ke Nigeria amanam edi ido ndisikot itien̄wed N̄wed Abasi emi odude ke Ẹdụn̄ọde N̄wed Abasi ke Usen ke Usen ke kpukpru mbubịteyo ndida nnyene nneme usenubọk. Ọkọrọ ye oro, enye esikot ofụri ibuotn̄wed oro ẹsiode itien̄wed oro ẹto ke Bible. Ke enye ama ọkọdọ ndọ, enye ama akaiso ke edinam emi, okotde onyụn̄ enemede mme n̄kpọ oro ye n̄wan esie.
Uyen oro ete ye eka mîdịghe Mme Ntiense amanam edi ido ndisikot ke minit ition osịm duop kpukpru mbubịteyo mbemiso edede idap. Oro edi ọsọn̄urua ini ọnọ enye, ndien enye esibọn̄ akam mbemiso ye ke okụrede edikot. Utịtmbuba esie edi ndifiọk etop oro Jehovah akadade mme andiwet Bible kiet kiet usụn̄ ndiwet.
Eyenete eren oro edide ọdọ ndọ, ke utom Bethel, ọdọhọ ete ke imọ imesikot Bible ikụre ini kiet ke isua ke isua itiaita ẹmi ẹkebede. Enye esikot ke minit 20 osịm 30 mbemiso odụkde idap. Idem ke ini enye okopde ọkpọsọn̄ mmemidem, enye esikụt ete ke edieke imọ idụkde ye unana edikot, imọ isikemeke ndide. Enye enyene ndidaha nda nnyụn̄ nse mban̄a udọn̄ eke spirit oro.