Mme Mbụme Ẹtode Mme Andikot

Nte Abasi akanam asari ke ndikemek iren akpa otu ukara nto ukem orụk ye idụt—kpukpru mmọ ẹdide mme Jew?

Baba, ke akpanikọ enye ikanamke. Kpukpru mbon oro Jesus ekebemde iso okot nte mme mbet esie ẹkedi mme Jew. Ekem, ke Pentecost 33 E.N., mme Jew ye mme okpono Abasi ke ido mme Jew ẹkedi mme akpa mbon oro ẹkeyetde aran ke edisana spirit ndien ke ntre ẹdotde ndikara ye Christ ke heaven. Ekedi ke ukperedem ke ẹkeda mbon Samaria ye mme Gentile oro mîkanaha mbobi ẹmi ẹkekabarede esịt ẹdisịn. Ntem, an̄wan̄a nte ke mme Jew ẹkenam otu ukara ke ini oro, ‘mme apostle ye mbiowo ke Jerusalem,’ nte ẹtịn̄de ke Utom Mme Apostle 15:2. Mmọemi ẹkedi irenowo ẹmi ẹkenyenede ntotụn̄ọ ifiọk N̄wed Abasi ye ediwak isua ifiọk eyouwem ke utuakibuot akpanikọ, ndien mmọ ẹma ẹnyene ekese ini ndikọri nsịm mbiowo Christian oro ẹkọride ẹsịm ọyọhọ idaha.—Men N̄wed Mbon Rome 3:1, 2 domo.

Etisịm ini mbono otu ukara oro ẹbụkde ke Utom Mme Apostle ibuot 15, ediwak mme Gentile ẹma ẹkabade ẹdi mme Christian. Mmọemi ẹma ẹsịne mbon Africa, Europe, ye mme owo ẹtode mme ikpehe efen. Edi, n̄wetnnịm n̄kpọ ndomokiet idụhe ndiwụt nte ke ẹma ẹdian owo ekededi ke otu mme utọ Gentile oro ke otu ukara man anam Ido Ukpono Christ enem mbon oro mîkedịghe mme Jew. Ke adan̄aemi mme Christian ẹmi ẹkedide mme Gentile oro ẹkekabarede esịt obufa obufa mi ẹkenyenede ukem idaha nte mme andibuana ke “Israel Abasi,” mmọ ẹkenyene ndiwụt ukpono nnọ ọyọhọ idaha ye uwak ifiọk eyouwem eke mme Christian ẹkedide mme Jew, utọ nte mme apostle, ẹmi ẹkedide ubak otu ukara ko ke ini oro. (Galatia 6:16) Tịmfiọk nte ẹkebatde utọ ifiọk eyouwem oro nte edide ata ọsọn̄urua n̄kpọ ke Utom Mme Apostle 1:21, 22.—Mme Hebrew 2:3; 2 Peter 1:18; 1 John 1:1-3.

Ke ediwak isua ikie Abasi ama anam n̄kpọ ke san̄asan̄a usụn̄ ye idụt Israel, emi Jesus ekemekde mme apostle esie oto. Ikedịghe ndudue m̀mê utụk nte ke apostle ndomokiet ikotoho se ẹdiọn̄ọde idahaemi nte South America m̀mê Africa mîdịghe Nsannsan Edem Usiahautịn. Nte ini akade iren ye iban ẹtode mme ebiet ẹmi ẹyenyene ifet ndinyene ifetutom oro otịmde okpon akan edidi apostle ke isọn̄, edidi andibuana ke otu ukara eke akpa isua ikie, m̀mê edidi se ẹmekde ẹnọ ifetutom efen ekededi ke otu ikọt Abasi mfịn.—Galatia 3:27-29.

Ama onụk apostle kiet ndidọhọ ete “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35) Ih, mme ufọn ufak Christ ẹdu ẹnọ kpukpru owo, ye unana asari. Ndien mme owo ẹtode kpukpru esien ye usem ye idụt ẹyetiene ẹbuana ke Obio Ubọn̄ eke heaven ye ke otu akwa otuowo oro ẹdidude uwem ke nsinsi ke isọn̄.

Ediwak owo ẹsiyak mme idaha eke orụk, usem, m̀mê idụt ẹfịna mmọ. Ẹnam emi an̄wan̄a ke se nnyịn ikotde ke Utom Mme Apostle 6:1 iban̄a eneni oro akadade nsụkuyo edi ke ufọt mme Christian oro ẹkesemde usem Greek ye mbon oro ẹkesemde usem Hebrew. Ekeme ndidi nnyịn ikokpon ye mîdịghe idi idinyene mme utọ edu ntụk oro iban̄a idaha usem, orụk, ekpụk, m̀mê uduot. Ke ikerede iban̄a ata n̄kpọ oro ekemede nditịbe, nnyịn iyenam ọfọn ndisịn ukeme ndiyak ekikere Abasi obot mme ntụk ye edinam nnyịn, emi edide nte ke kpukpru owo ẹdi ukem ke iso esie, inamke n̄kpọ m̀mê nso ke nnyịn idi ke enyọn̄ idem. Ke ini Abasi akanamde ẹwet mme n̄kpọ oro ẹnamde ẹdot ndidi mbiowo ye mme asan̄autom unamutom, enye iketịn̄ke n̄kpọ ndomokiet iban̄a idaha eke orụk ye idụt. Baba, enye okowụk ntịn̄enyịn ke mme n̄kpọ eke spirit ẹmi anamde mbon oro ẹdidude ndinam utom ẹdot. Oro edi ntre ye mbiowo, mme esenyịn oro ẹsan̄ade-san̄a, ye mbonutom n̄kọk itieutom mfịn, nte ekedide ye otu ukara ke akpa isua ikie.