Edisio Mfep—Ima Ima Ndutịm?
“EDISANA, edisana, edisana, Jehovah Abasi, Andikara kpukpru n̄kpọ.” (Ediyarade 4:8) Nte ekemde ye edinam an̄wan̄a oro, Jehovah edi Ntọn̄ọ ndisana idaha. Ẹwet mmọemi ke “Edisana N̄wed Abasi,” ndien obiomo mme Christian nditiene mme ndausụn̄ ẹmi. Ana mmọ, ke akpanikọ, ẹfep n̄kpọ ekededi emi edehede ke enyịn Jehovah.—2 Timothy 3:15; Isaiah 52:11.
Bible ọnọ item in̄wan̄în̄wan̄ ete: “Kpa nte Andikot mbufo edide Edisana, mbufo nde ẹkabade ẹsana ke ofụri eduuwem mbufo; koro ẹwet ntem ẹte, Mbufo ẹdisana, koro Ami ndide edisana.” (1 Peter 1:15, 16) Tọn̄ọ nte esop Christian ekedidu ke isua ikie 19 ẹmi ẹkebede, mme ata Christian ẹmen̄wana ọkpọsọn̄ en̄wan man ẹkpeme enye ẹsio ke mbubiam ido eke spirit ye eke ido uwem.—Jude 3.
Ntak Emi Ukpeme Edide Akpan N̄kpọ
Kpukpru mme asan̄autom Abasi ẹsobo n̄kpọata edinịm idem asana ke n̄kan̄ ido uwem ye eke spirit. Ke ntak oro, ana ẹbiọn̄ọ mme okopodudu asua ita—Satan, ererimbot esie, ye mme ntụhọ unamidiọk ikpọkidem nnyịn. (Rome 5:12; 2 Corinth 2:11; 1 John 5:19) Ererimbot Satan eyedomo fi idomo ndidu oburobụt ido uwem, eyedomo fi ndinam mme n̄kpọ ke usụn̄ esie, eyenyụn̄ ọnọ fi inyene obụkidem, enyịn̄, itie, uwọrọetop, ye odudu. Edi mbon ẹmi ẹbierede ndibịne utuakibuot akpanikọ ẹbiọn̄ọ se Satan ọnọde ẹnyụn̄ ‘ẹkpeme idem ke idiọkn̄kpọ emi odude ke ererimbot.’ Ntak-a? Koro mmọ ẹyomde ndidu ke idak ukpeme ye ima ima ntịn̄enyịn edisana esop Jehovah.—James 1:27; 1 John 2:15-17.
Jehovah amanam un̄wam odu ọnọ andibuana ekededi ke esop Christian emi ọduọde odụk idomo Satan ke ntak mmeme eke owo. Ẹmek mbiowo ẹmi ẹdotde ke n̄kan̄ eke spirit ndikpeme esop nnyụn̄ n̄n̄wam mme anamidiọk ke ima ima usụn̄ ndikabade esịt n̄kpọn̄ idiọkn̄kpọ mmọ nnyụn̄ nnam mme edinen̄ede oro ẹyomde man ẹkop nsọn̄idem. Ẹkpenyene ndida ime n̄n̄wam Christian ekededi emi esịnde idem ke idiọk edinam man akabade esịt onyụn̄ okpụhọde mme usụn̄ esie.—Galatia 6:1, 2; James 5:13-16.
Nte Edisio Mfep Edide Ediwụt Ima
Ana ẹse mme asan̄autom Jehovah ẹmi ẹma ẹkena baptism ẹmi ẹkoide-koi ẹtiene idiọk usụn̄ ẹnyụn̄ ẹsịnde ndikpụhọde nte mbon oro mîkabakede esịt ndien ke ntre idotke ndinyene ebuana Christian. (Men 1 John 2:19 domo.) Owo ikemeke ndiyak mme utọ owo ẹmi ẹdu ke edisana esop Christian ẹnyụn̄ ẹsabade enye. Ẹnyene ndisio mmọ mfep.
Ẹkeme ndikụt edisio mbon oro ẹsịnde idem ke idiọk edinam mfep nte edide se idotde oto idaha etienede mi: Ke ntak n̄kọri ke en̄wan ye afai afai ubiatibet ẹdade ẹtiene nditọ ufọkn̄wed, ndusụk ufọkn̄wed ẹmenam edi ido “ndibịn nditọ ufọkn̄wed ẹmi ẹkamade m̀mê ẹdịghede ndikama mme n̄kpọ en̄wan ofụri ofụri,” ntre ke The Globe and Mail, n̄wedmbụk n̄kpọntịbe ke Toronto, Canada, ọtọt. Ẹnam edibịn emi man ẹkpeme nditọ ufọkn̄wed ẹmi ẹyomde ndibọ ufọn nto ndutịm unọ ukpep ye unana edisịn idem ke mme afai afai edinam.
Ntak emi edide ima ima n̄kpọ ndibịn anamidiọk emi mîkabakede esịt nsio ke esop? Ndinam ntre edi ndiwụt ima nnọ Jehovah ye mme usụn̄ esie. (Psalm 97:10) Edinam emi owụt ima ọnọ mbon ẹmi ẹbịnede edinen usụn̄ koro enye osiode owo emi ekemede ndinyene idiọk odudu efep ke otu mmọ. Enye n̄ko ekpeme edisana idaha eke esop. (1 Corinth 5:1-13) Edieke ẹyakde akwa oburobụt ido m̀mê mbubiam ido eke spirit odu ke esop, ẹyesabade enye ndien ididotke se ẹnamde edisana utom ẹnọ Jehovah, emi edide edisana. N̄ko-n̄ko, edisio anamidiọk mfep ekeme ndin̄wam enye ndikụt nte usụn̄uwem nsọn̄ibuot esie ọdiọkde, akabade esịt, onyụn̄ anam mme ukpụhọde ẹyomde ndien ke ntem ẹfiakde ẹda ẹsịn ke esop.
Utịp ke Idem Mmọ En̄wen
Ke ini andibuana ke esop anamde akwa idiọkn̄kpọ, utọ nte efịbe, enye inamke esịt Jehovah adat. (Mme N̄ke 27:11) Ke akpanikọ, Christian ekededi emi ayakde idem ọnọ oburobụt ido idan̄ ikereke n̄kpọ nte Joseph ekekerede ke ini n̄wan Potiphar okodomode ndinam enye enyene ebuana idan̄ ye imọ. Joseph ọkọdọhọ ete: “Ndinam didie ndien nnam akwa idiọkn̄kpọ emi nnyụn̄ ndue Abasi?” (Genesis 39:6-12) Joseph ama owụt ukpono ọnọ ndisana idaha Jehovah onyụn̄ ọkpọn̄ ebiet oro. Ke n̄kan̄ eken, etie nte esịn efịbe inyeneke ima oro ekemde inọ Abasi ndifep idem ke ndiyụhọ udọn̄ obụkidem esie.—Galatia 5:19-21.
Owo emi ama akana baptism emi abiatde ibet Abasi ikereke iban̄a unan ye ubiak oro enye edinọde mme iman esie oro ẹnịmde ke akpanikọ. Utịp eke ntụk akan se ndusụk owo ẹkemede ndiyọ. Christian an̄wan kiet, ke ama ekedifiọk ete ke eyeneren esie odu oburobụt uwem, ama eseme ete: “Etie nte ata ibat ibat nditọete iren ye iban, ke edide ododu, ẹfiọk adan̄a unan ye mfụhọ oro nnyịn inyenede. . . . Nnyịn imesinyene iduọesịt.” Ẹkeme ndinyene eyịghe mban̄a eti enyịn̄ ofụri ubon. Mfụhọ ye ndusụk udomo ubiomikpe ekeme ndinọmọ mbonubon oro ẹnamde akpanikọ. Ntem idiọk usụn̄ anamidiọk oro ada ubiakesịt ọsọk ubon.
Ima Ima Un̄wam Ẹnọde Mbonubon
Mme anam-akpanikọ Christian ẹmi ẹdude ke ubon oro ẹbịnde owo ẹsio ẹnyene nditi nte ke edisio mfep owụt ima onyụn̄ ọnọ ukpeme. Ẹsisịn kpukpru ukeme oro ẹkemede ndin̄wam anamidiọk oro. Edi edieke enye otụtde utọn̄ ye Abasi ndien ke nsọn̄ibuot etrede ndikabade esịt, oyom ẹkpeme esop ndien usụn̄ edinam efen idụhe ikan ndinam se Ikọ Abasi ọdọhọde: “Ẹsio oburobụt owo oro ke otu mbufo ẹfep.” (1 Corinth 5:13) Nte Ntiense kiet ọkọdọhọde, “edisio mfep edi edinam akpanikọ nnọ Jehovah.”
Ke ini ẹsiode andibuana ke ubon ẹfep, mme iman ẹdide Christian ẹsikop ubiak. Mbiowo oro ẹmekde ke ntre ẹkpenyene ndisịn ofụri ukeme mmọ ndinọ mmọ nsịnudọn̄ ke n̄kan̄ eke spirit. (1 Thessalonica 5:14) Mbiowo ẹkeme ndibọn̄ akam nnọ mmọ nnyụn̄ mbọn̄ akam ye mmọ. Ediwak ini ẹsikeme ndika n̄kese mme anam-akpanikọ Christian ẹmi man ẹneme mme ekikere N̄wed Abasi ẹmi ọbọpde-bọp. Mme ekpemerọn̄ ẹkpenyene ndida kpukpru ifet ndisọn̄ọ ndima ẹmi idem ke n̄kan̄ eke spirit mbemiso ye ke mme mbonoesop Christian ẹsuanade. Ẹkeme ndinọ udiana nsịnudọn̄ ebe ke ndisan̄a ye mmọ ke utom ukwọrọikọ. (Rome 1:11, 12) Oyom mme ekpemerọn̄ eke spirit ẹwụt mme anam-akpanikọ asan̄autom Jehovah ẹmi ima ye ntịn̄enyịn oro mmọ ẹdotde.—1 Thessalonica 2:7, 8.
Idiọk usụn̄uwem owo kiet idịghe ntak ndomokiet ndifụmi owo ekededi ke ubon esie emi osụk anamde akpanikọ ọnọ Jehovah. Abasi ama esịn idiọk Edidem Saul eke Israel, edi David ikayakke emi ọbiọn̄ọ ima oro enye ekenyenede ọnọ Jonathan eyen Saul. Ke akpanikọ, mbọbọ oro okodude ke ufọt David ye Jonathan ama akabade ọsọn̄ odudu akan. (1 Samuel 15:22, 23; 18:1-3; 20:41) Ntre kpukpru owo ke esop ẹkpenyene ndinọ un̄wam nnyụn̄ n̄wụt ima nnọ mme Christian ẹmi iman mmọ ẹduede Jehovah.
Ekpedi unana ediwụt ima didie ntem ndifụmi m̀mê nditre ndifọn ido ye mme utọ anam-akpanikọ ẹmi! Mbonubon ẹmi ẹnamde akpanikọ ẹnyene akpan udọn̄ kaban̄a nsịnudọn̄. Mmọ ẹkeme ndikop ndobo ẹnyụn̄ ẹkeme ndikụt idaha mmọ nte otịmde ọsọn̄. Ndusụk afo emekeme ndibuana inem inem n̄kpọ eke spirit m̀mê ifiọkutom emi ọbọpde-bọp ye mmọ ebe ke urụk ukopikọ. Edieke owo emi ẹkebịnde ẹsio emende urụk ukopikọ, dọhọ ibio ibio ke iyom nditịn̄ ikọ ye iman edide Christian. Afo emekeme ndinọ mme andibuana oro ẹnamde akpanikọ ke utọ ufọk oro ikot ndidi mboho otuowo m̀mê udia ke ufọk fo. Edieke osobode mmọ ke adan̄aemi edepde n̄kpọ, afo emekeme ndida ini oro nnyene ndusụk ebuana oro ọbọpde-bọp. Ti ete, mme anam-akpanikọ Christian ẹmi ẹnyenede mme iman oro ẹkesiode ẹfep ẹsụk ẹdi ubak edisana esop Jehovah. Mmọ ẹkeme ndikabade ntie nsannsan mmemmem mmemmem nnyụn̄ n̄kop mmemidem. Ke ntre, du ke edidemede ndiwụt mmọ mfọnido ye ima. Kaiso ndifọn ido “ye mmọemi ẹtode ke ufọk mme andinịm ke akpanikọ.”—Galatia 6:10.
Wụt Esịtekọm ke Ndutịm Jehovah
Didie ke nnyịn ikeme ndikop idatesịt ntem nte ke Jehovah Abasi owụt mbọm mbọm edikere mban̄a ọnọ owo kiet kiet ke ubon mme andituak nnọ enye eke ofụri ererimbot. Ebede ke esop esie enye amanam ima ima ndutịm ndin̄wam nnyịn ndisan̄a ke iso esie ke edinen usụn̄. Idem edieke andibuana ke ubon okoide-koi anam idiọkn̄kpọ ndien ana ẹbịn enye ẹsio ke esop, usụn̄ edifiak ndi odu edieke enye owụtde ata edikabade esịt. Ẹwụt emi ebe ke uwụtn̄kpọ etienede mi:
Mbiowo ẹma ẹdomo ndin̄wam owo emi nnyịn idikotde Anna, edi enye ama ọwọn̄ọde ebịne un̄wọn̄ sika, un̄wọn̄ mmịn, ye n̄kpọsọn̄ ibọk. Enye ikakabakede esịt ndien etre ndikaiso ndu ke esop. Ikebịghike, nte ededi, Anna ama ọtọn̄ọ ndiseme nte ke imataba ima ima itie ebuana eke edisana esop Jehovah onyụn̄ ọbọn̄ akam ọnọ enye oyom un̄wam. Enye ama onyịme nte ke imọ ikotịmke ifiọk adan̄a nte mbiowo ẹkerede ẹban̄a mbon oro ẹsopde usụn̄. Anna ama ọtọn̄ọ ndifiak ndụk mme mbonoesop, ndien emi ama ada osịm editua n̄kpọfiọk. Ke oro ebede, ẹma ẹfiak ẹda enye esịn ke ima ima esop emi ọnọde ukpeme. Inikiet en̄wen, Anna ke omụm n̄kokon̄ idaha ido uwem Jehovah akama. Enye okop idatesịt ke ima oro mbiowo ẹkewụtde onyụn̄ ọdọhọ n̄ko ete: “Afo ukemeke ndifiọk adan̄a un̄wam oro mme n̄wed Christian ẹnọde mi. Jehovah ke akpanikọ esitịm ese aban̄a mme n̄kpọ oro iyomde.”
Ih, Abasi amanam usụn̄ edifiak ndi odu ọnọ mbon ẹmi ẹma ẹkebịn ẹsio ke esop edi ẹmi ẹtuade n̄kpọfiọk ke ukperedem. Nnyịn imokụt nte ke idem edisio mfep ke idemesie edi ima ima ndutịm. Edi otịm ọfọn adan̄a didie ntem ndifep akama-mfụhọ ifiọk n̄kpọntịbe emi ebe ke ndisọn̄ọ nyịre ye ndinen usụn̄ edisana Abasi nnyịn! Nnyịn ikpakam ikaiso ikop idatesịt ke ifet oro inyenede nditoro Jehovah nte ubak edisana, ima ima esop esie emi ọnọde ukpeme.
[Ndise ke page 26]
Nte afo ke owụt ima ọnọ mme anam-akpanikọ iman mbon ẹmi ẹma ẹkebịn ẹsio ke esop?