Mmọ Ẹma Ẹkụt Emem ke Ererimbot Oro Odude ke Ndutịme

EDEM magazine emi owụt ikan̄îkan̄ ekọn̄ oro ẹn̄wanade ke Bosnia ye Herzegovina. Nte emem ekeme ndidu ke utọ obio oro? Ke n̄kpaidem, ibọrọ edi ih. Ke adan̄aemi mme obio Roman Catholic, Eastern Orthodox, ye eke Muslim ke idụt n̄kpọ mmọn̄eyet oro ẹn̄wanade ẹban̄a isọn̄, ediwak owo ẹyom emem, ndien ndusụk mmọ ẹmekụt enye.

Mme Djorem ẹkedụn̄ ke Sarajevo, ndien mmọ ẹkedi Mme Ntiense Jehovah. Ke ufọt ofụri ndutịme ke akwa obio oro, ekedi ido mmọ ndika mbịne mme mbọhọidụn̄ mmọ man ẹkebuana eti mbụk Obio Ubọn̄ Abasi ye mmọ. (Matthew 24:14) Ntak-a? Koro ubon Djorem ẹma ẹfiọk ẹte ke Obio Ubọn̄ emi edi ata idem n̄kpọ, nte ke ẹma ẹwowụk enye ke heaven, ye nte ke enye edi mfọnn̄kan ye n̄kukụre idotenyịn ubonowo kaban̄a emem. Mme Ntiense Jehovah ẹnyene ọyọhọ mbuọtidem ke se apostle Paul okokotde ‘ukwọrọikọ emem.’ (Ephesus 2:17) Ke ntak mme utọ owo nte Bozo ye Hena Djorem, ediwak owo ẹmekụt emem ke Bosnia ye Herzegovina.

Ata Emem Oro Edidide

Ekese efen efen odu nditịn̄ mban̄a mme Djorem. Akpa kan̄a, nte ededi, ẹyak nnyịn ineme iban̄a n̄wan ye ebe efen oro ẹkenyenede mbuọtidem ke Obio Ubọn̄ Abasi. Enyịn̄ mmọ ẹdi Artur ye Arina. Mmọ ye n̄kpri nditọiren mmọ ẹkedụn̄ ke idụt kiet ke n̄kann̄kụk akani Soviet Union. Ke ini ekọn̄ mbio obio akasiahade, Artur ama an̄wana ọnọ n̄kan̄ kiet. Nte ededi, ikebịghike enye ama obụp idemesie ete, ‘Ntak n̄wanade ye mme owo ẹmi ẹkesidide mbọhọidụn̄ mi?’ Enye ama ọkpọn̄ idụt oro, ndien ke ama ọkọbọhọ ediwak afanikọn̄, ama ebehe ke Estonia ye obufa obufa ubon esie.

Ke akade St. Petersburg, Artur ama osobo ye Mme Ntiense Jehovah ndien ama ama se enye ekekpepde aban̄a Obio Ubọn̄ Abasi. Uduak Jehovah edi nte ke ibịghike Obio Ubọn̄ Abasi edidi n̄kukụre ukara ubonowo. (Daniel 2:44) Adan̄aoro isọn̄ edidi emem emem ebiet, emi mme ekọn̄ mbio obio ye mme en̄wan idụt ye idụt mîdidụhe aba. Isaiah ama etịn̄ prọfesi aban̄a ini oro ete: “Mmọ idinamke idiọk, idinyụn̄ ibiatke n̄kpọ ke ofụri edisana obot mi: koro ifiọk Jehovah eyeyọhọ ke ererimbot, kpa nte mmọn̄ ofụkde inyan̄.”—Isaiah 11:9.

Ke okụtde ndise emem emem isọn̄ ini iso oro ke n̄wed un̄wam ukpep Bible oro Ntiense kiet okowụtde enye, Artur ama ọdọhọ ete ke imọ ikesidụn̄ ke ebiet eketiede ntre. Idahaemi, nte ededi, ekọn̄ mbio obio ama abiat enye. Ko ke Estonia, Artur ye ubon esie ke ẹkpep n̄kpọ efen efen ẹban̄a Obio Ubọn̄ Abasi ebe ke ukpepn̄kpọ Bible ye Mme Ntiense Jehovah.

Emem ke Ufọt Ndutịme

Psalm 37:37 ọdọhọ ete: “Tịn̄ enyịn ke owo eke ọfọnde ama, nyụn̄ se edinen owo: koro eti utịt anade ọnọ owo emem.” Ke akpanikọ, emem owo eke ọfọnde ama onyụn̄ enende ke enyịn Abasi iban̄ake ini iso esie kpọt. Enye enyene enye idem idahaemi. Didie ke oro ekeme nditịbe? Kere ban̄a ifiọk n̄kpọntịbe owo oro ekerede Paul.

Paul odụn̄ ke nsannsan itienna mbon itọkekọn̄ ke ufọt edem usụk ye edem usoputịn Ethiopia, okposụkedi oro enye otode mbọhọ idụt. Ke obio emana esie, enye ama osobo ye kiet ke otu Mme Ntiense Jehovah oro akanamde utom ke usiakifia oro esisiode aranisọn̄, ndien eren emi ama ọnọ enye n̄wed un̄wam ukpep Bible oro Akpanikö oro Adade osịm Nsinsi Uwem.a Paul ikosoboke ye Ntiense oro aba, edi enye ama ekpep n̄wed oro ye ntịn̄enyịn. Ekọn̄ mbio obio ama emen enye ekesịn ke itienna mbon itọkekọn̄ ke Ethiopia, ndien do enye ama etịn̄ ọnọ mbon efen aban̄a se enye ekekpepde. Ekpri otu ama onyịme emi nte akpanikọ. Ọkọn̄ọde ke se mmọ ẹkekpepde, ikebịghike mmọ ẹma ẹtọn̄ọ ndikwọrọ ikọ nnọ mbon efen ke itienna oro.

Paul ama ewet n̄wed ọnọ ẹsọk ibuot itieutom Watch Tower Society oyom un̄wam. Asan̄autom oro ẹkenọde oto Addis Ababa aka ama okop n̄kpaidem ndikụt owo 35 ẹtiede ẹbet enye, ẹdude ke mben̄eidem ndikpep n̄kpọ efen efen mban̄a Obio Ubọn̄ Abasi. Ẹma ẹnam mme ndutịm man ẹsinọ un̄wam kpukpru ini.

Didie ke ẹkeme ndidọhọ ke mme utọ owo nte Paul ẹnyene emem? Uwem imemke ye mmọ, edi mmọ ẹnyene mbuọtidem ke Abasi. Ke ini ndutịme ererimbot emi otụkde, mmọ ẹsida item Bible emi ẹsịn ke edinam: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde.” Nte utịp, mmọ ẹnyene uyụhọ oro owo mîwakke ndinyene mfịn. Mme ikọ oro apostle Paul ekewetde ọnọ ẹsọk esop Philippi enyene n̄kpọ ndinam ye mmọ: “Emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” Ke akpanikọ, mmọ ẹnyene n̄kpet n̄kpet itie ebuana ye Jehovah, kpa “Abasi emem.”—Philippi 4:6, 7, 9.

Emem Oro Odude Kemi

Edidem Obio Ubọn̄ Abasi oro etiede ke ebekpo edi Jesus Christ, ẹkotde ke Bible “Ọbọn̄ Emem.” (Isaiah 9:6) Prọfet eset kiet eketịn̄ aban̄a enye ete: “Enye eyetan̄a emem ọnọ mme idụt, onyụn̄ ada ubọn̄ ọtọn̄ọde ke inyan̄ kiet tutu osịm inyan̄ eken, onyụn̄ ọtọn̄ọde ke akpa tutu osịm ke mme utịt ererimbot.” (Zechariah 9:10) Mme utọ ikọ eke odudu spirit nte mmọemi ẹma ẹnen̄ede ẹnyene odudu ke uwem eren kiet ekerede José.

José ama odu ke ufọk-n̄kpọkọbi ini kiet. Enye ekedi owo edinam oyomonsia ndien ẹma ẹmụm enye ke adan̄aemi akanamde ntịmidem ndibọm ufọkidụn̄ mme bodisi. Enye ekekere ke afai ikpọn̄ edinyịk ukara ndinam mme idaha ẹfọn ẹkan ke idụt mmọ. Ke adan̄aemi okodude ke ufọk-n̄kpọkọbi, Mme Ntiense Jehovah ẹma ẹtọn̄ọ ndikpep Bible ye n̄wan esie.

Ke ẹma ẹkesio José, enye ama ekpep Bible n̄ko, ndien ikebịghike mme ikọ Psalm 85:8 ẹma ẹtọn̄ọ ndinyene n̄kpọ ndinam ye enye: “Nyekop se Abasi Jehovah edidọhọde: koro enye eyedọhọ emem emem ye ikọt esie, ye mbonima esie.” Nte ededi, ufan̄ikọ oro eberi ye item emi: “Kûyak mmọ ẹfiak edem ke ndisịme.” Ntem, owo oro oyomde emem Jehovah idiyomke ndida ke idem m̀mê ndibiọn̄ọ uduak Esie.

Mfịn, José ye n̄wan esie ẹdi mme asan̄autom Christian. Mmọ ẹda mmọ efen ẹwụt Obio Ubọn̄ Jehovah nte usọbọ ke mme mfịna oro José ke akpa okodomode ndida mme bọm oro ẹtiede ke ufọk ẹnam n̄kọk. Mmọ ẹnyịme ndiberi edem ke Bible, emi ọdọhọde ete: “Jehovah eyenyụn̄ ọnọ se ifọnde.” (Psalm 85:12) Ke akpanikọ, José ke ndondo emi ama aka ufọkidụn̄ oro enye okodiomide ndisobo. Ntak-a? Man eketịn̄ ọnọ mme ubon do aban̄a Obio Ubọn̄ Abasi.

Mbon Emem

Ke Psalm 37:10, 11, Bible ọdọhọ ete: “Osụk esisịt idiọkowo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem eyenyụn̄ enem mmọ esịt.” Nso ubọn̄ ubọn̄ idotenyịn!

Nte ededi, tịmfiọk ete ke emem Jehovah enyene “mbon nsụkidem” kpọt. Mbon oro ẹyomde emem ẹkeme ndikpep nditie emem emem. Emi ekedi ntre ye Keith, emi odụn̄de ke New Zealand. Ẹketịn̄ ẹban̄a Keith nte “owo emi okopde odudu ke idem ye edu, ọsọpde iyatesịt, onyụn̄ amade eneni.” Enye ekedi owo n̄ka kiet onyụn̄ odụn̄ ke ufọk emi ekedide ataata ọkpọsọn̄ ebiet, enyenede in̄wan̄esa oro ebua ukpeme ita ẹkesisan̄ade ẹkanade man ẹbịne mme andinọhọ. N̄wan esie, eka nditọ esie mbitiokiet, ama osio enye ndọ.

Ke ini Keith okosobode ye Mme Ntiense Jehovah, eti mbụk ama otụk enye ntotụn̄ọ ntotụn̄ọ. Ikebịghike enye ye nditọ esie ẹma ẹtọn̄ọ ndidụk mme mbonoesop ye Mme Ntiense. Enye ama afat idet esie emi ọkọniọn̄de osịm isịn onyụn̄ ọtọn̄ọ nditịn̄ nnọ n̄kani nsan̄a esie mban̄a Obio Ubọn̄ Abasi. Ndusụk ke otu mmọemi n̄ko ẹma ẹtọn̄ọ ndikpep Bible.

Ukem nte ediwak miliọn mbon eti esịt ke ofụri ererimbot, Keith ama ọtọn̄ọ ndida mme ikọ apostle Peter nsịn ke edinam: “Owo emi edimade uwem, edinyụn̄ oyomde ndikụt edifọn ini, . . . yak enye ọwọn̄ọde ọkpọn̄ idiọk, onyụn̄ anam eti; yak enye oyom emem, onyụn̄ ebịne enye.” (1 Peter 3:10, 11) Akani n̄wan Keith ama onyịme ndifiak ndọ enye, ndien enye idahaemi ke ekpep ‘ndiyom emem nnyụn̄ mbịne enye.’

Emem Jehovah anyan̄a uwem ediwak owo, esịnede owo oro ini kiet ekedide ebre mbre mbuba emi akamanade ke akani U.S.S.R. Eren emi ama ọbọ ediwak itoro ke mbuba Olympic, edi enye ama anana inemesịt onyụn̄ ọwọn̄ọde ebịne n̄kpọsọn̄ ibọk ye n̄kpọsọn̄ mmịn. Ke isua 19 ẹmi ẹkeyọhọde ye ekese n̄kpọntịbe ẹma ẹkebe oro ekesịnede n̄kpọkọbi isua ita ke itienna ọkpọsọn̄ utom ke Siberia, ndedịbe isan̄ oro akasan̄ade ke nsụn̄ikan̄ aka Canada, ye edikpere oro enye ekekperede ndikpa utịm ikaba ke ntak edu uda n̄kpọsọn̄ ibọk esie, enye ama ọbọn̄ akam ọnọ Abasi oyom un̄wam man okụt ata uduak ke uwem. Ukpepn̄kpọ Bible ye Mme Ntiense Jehovah oro ẹkesemde usem Russian ama an̄wam enye ndikụt ibọrọ nnọ mme mbụme esie. Mfịn eren emi, ukem nte ediwak miliọn mmọ efen, omokụt emem ye Abasi ye idemesie.

Idotenyịn Ediset ke N̄kpa

Ke akpatre, ẹyak nnyịn ifiak ika ibịne Bozo ye Hena Djorem ke Sarajevo. N̄wan ye ebe emi ẹma ẹnyene eyenan̄wan oro ọkọsọn̄de isua ition, Magdalena. Ke July isua oko, mmọ mbita ẹma ẹkpọn̄ ufọk man ẹfiak ẹkebuana inikiet efen ke utom ukwọrọikọ mmọ ke ini ọtọmbe oro okobomode okowotde mmọ mbita. Nso kaban̄a emem oro mmọ ẹkekwọrọde ẹnọ mbon efen? Nte ọtọmbe oro okowotde mmọ okowụt ke emi ikedịghe ata emem?

Ke baba usụn̄ kiet! Ke editịm n̄kpọ emi, mme n̄kpọ mmọn̄eyet ẹsitịbe. Mme bọm m̀mê mme ọtọmbe ẹsiwot mme owo. Mbon efen ẹsikpan̄a ke ntak udọn̄ọ m̀mê mme mbabuat n̄kpọntịbe. Ediwak owo ẹkpan̄a ke ntak usọn̄. Owo isioho mbon oro ẹnyenede emem Abasi ifep, edi mme utọ n̄kpọ oro nditịbe ikpọn̄ke mmọ ye unana idotenyịn.

Jesus ama ọn̄wọn̄ọ ọnọ Martha ufan esie ete: “Ami ndi ediset ye uwem: owo eke ọbuọtde idem ye Ami, okposụk edi nte enye ama akpa, enye eyedu uwem.” (John 11:25) Mme Djorem ẹma ẹnịm emi ke akpanikọ, kpa nte kpukpru Ntiense Jehovah ẹnịmde. Ndien mme Djorem ẹma ẹnyene mbuọtidem nte ke edieke mmimọ ikpan̄ade, mmimọ iyeset ididụk isọn̄ oro adan̄aoro edinen̄erede etie emem emem. Jehovah Abasi “eyekwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebeiso n̄kpọ ẹma ẹbe ẹfep.”—Ediyarade 21:4.

Esisịt ini mbemiso enye akakpade, Jesus ama ọdọhọ mme anditiene enye ete: “N̄kpọn̄ emem ye mbufo . . . Ẹkûyak esịt etịmede mbufo.” (John 14:27) Nnyịn imadat esịt ye mme Djorem ẹmi ẹkenyenede emem oro ẹdinyụn̄ ẹnen̄erede ẹdara enye ọyọhọ ọyọhọ ke ediset ke n̄kpa. Nnyịn imokop inemesịt iban̄a kpukpru mbon oro ẹtuakde ibuot ẹnọ Jehovah, kpa Abasi emem. Mme utọ owo oro ẹnyene ifụre ekikere. Mmọ ẹnyene emem ye Abasi. Mmọ ẹnyene emem ye mbon efen. Mmọ ẹnyụn̄ ẹnyene mbuọtidem ke emem emem ini iso. Ih, mmọ ẹmekụt emem, okposụkedi mmọ ẹdude uwem ke ererimbot oro odude ke ndutịme. Ke akpanikọ, kpukpru owo oro ẹtuakde ibuot ẹnọ Abasi ke spirit ye ke akpanikọ ẹnyene emem. Akpakam afo okụt utọ emem oro n̄ko.

[Ikọ idakisọn̄]

[Mme ndise ke page 7]

Mmọ ẹmekụt emem kpa ye ẹdude uwem ke ererimbot oro odude ke ndutịme