Nte Ẹkemede Ndikụt Idatesịt Ke Ndinam Mbet
KIET ke otu akwa idatesịt oro owo ekemede ndinyene edi eke edidi nsan̄autom ye Abasi. Mfịn, utom Abasi esịne editan̄ mbon oro ẹmade edinen ido mbok ke esop Christian ye edinọ mmọ ukpep ndidu uwem nte mme Christian idahaemi ye n̄ko kaban̄a edibọhọ ndụk obufa ererimbot.—Micah 4:1-4; Matthew 28:19, 20; 2 Peter 3:13.
Edi n̄kpọ akwa idatesịt ọnọ Mme Ntiense Jehovah ke Latin America ndikụt owo miliọn kiet ẹkabarede ẹdi mme mbet Jesus Christ toto ke 1980. Ke efakutom oro on̄wụmde mfri mi, emi ediwak owo ẹwụtde ukpono ẹnọ ẹnyụn̄ ẹnịmde Bible ke akpanikọ, ndusụk mme asan̄autom uyọhọ ini ẹma ẹkeme ndin̄wam ediwak owo ndiyak uwem mmọ nnọ Jehovah. Ye utọ ekese ifiọkutom oro, eyedi mmọ ẹkeme ndisian nnyịn n̄kpọ aban̄ade idatesịt oro asan̄ade ye edinam mbet. Ndusụk ekikere oro mmọ ẹnọde ẹkeme ndin̄wam fi okụt idatesịt ke ndinam mbet ke ebiet emi afo odụn̄de.
Ndifiọk Mbon Oro Ẹkemede Ndidi “Erọn̄”
Jesus ke ini enye okosiode mme apostle esie ọdọn̄ ẹkekwọrọ ikọ ọkọdọhọ ete: “Obio ekededi [m̀mê] obio-in̄wan̄ ekededi eke mbufo ẹdidụkde, ẹyom owo eke odotde ke esịt.” (Matthew 10:11) Ke ini akade ebịne mme owo, didie ke afo ekeme ndifiọk mbon oro ẹkemede ndin̄wam ke n̄kan̄ eke spirit? Edward, asan̄autom uyọhọ ini ke se ibede isua 50, ọdọhọ ete: “Mmọ ẹwụt emi ebe ke mme mbụme esịt akpanikọ mmọ ye uyụhọ oro mmọ ẹkopde ke ini ẹnọde mme ibọrọ ẹtode N̄wed Abasi.” Carol adian ete: “Edieke owo etịn̄de ọkpọkpọ mfịna m̀mê editịmede esịt esie ọnọ mi, emi enen̄ede edi eben̄e ndiyom un̄wam. Mmesidomo ndiyom ntọt oro ọnọde un̄wam ke mme n̄wed Watch Tower Society. Utọ ọkpọkpọ udọn̄ oro esiwak ndida n̄kosịm ukpepn̄kpọ Bible.” Edi, isidịghe mmemmem n̄kpọ kpukpru ini ndidiọn̄ọ mbon oro ẹnyenede esịt akpanikọ. Luis obụk ete: “Ndusụk owo oro ẹketiede nte ẹnen̄ede ẹnyene udọn̄ ẹma ẹkabade ẹnana udọn̄ ofụri ofụri, edi mbon eken oro ẹketiede nte ẹbọbiọn̄ọ ke akpa ẹma ẹkpụhọde ke ini mmọ ẹkekopde se Bible enen̄erede etịn̄.” Sia ediwak mbon Latin America ẹwụtde ukpono ẹnọ Bible, enye adian ete, “Mmọfiọk mbon oro ẹkemede ndin̄wam ke n̄kan̄ eke spirit ke ini mmọ ẹsọpde-sọp ẹnyịme se Bible ekpepde ke mma n̄kowụt mmọ.” Ndin̄wam mme utọ owo oro “ẹdotde” do man ẹnam n̄kọri ke n̄kan̄ eke spirit esida ata idatesịt ye uyụhọ edi. Didie ke afo ekeme ndinam emi?
Nditọn̄ọ Mme Ukpepn̄kpọ Bible
Ndikama mme n̄wed un̄wam ukpep Bible oro “asan̄autom emi anamde akpanikọ, onyụn̄ enyenede ọniọn̄” osion̄ode edi esiwak ndidi mfọnn̄kan usụn̄ ndin̄wam mme owo ẹdiọn̄ọ akpanikọ Bible. (Matthew 24:45) Didie ke afo ekeme ndifori esịtekọm oro ẹnyenede ẹban̄a ufọn oro mme utọ n̄wed un̄wam ukpep Bible oro ẹnyenede? Edward ọdọhọ ete: “Sia mme idaha, edu, ye mme ekikere mme owo ẹdide ata nsio nsio, mmesin̄wana ndinam ukpụhọde ke nditọn̄ọ mme ukpepn̄kpọ Bible.” Ukemeke ndikama usụn̄ kiet ye kpukpru owo.
Ye ndusụk owo, ẹkeme ndiyom ẹte ẹda ido nneme ẹneme ekese nneme N̄wed Abasi mbemiso ẹwụtde n̄wed ukpepn̄kpọ Bible. Edi, ebe ye n̄wan ẹdide isụn̄utom ẹtọt ẹte: “Nnyịn isiwak nditọn̄ọ ukpepn̄kpọ ke akpa ediwaha.” Kpasụk ntre, Ntiense kiet emi an̄wamde owo 55 okosịm idaha ediyak idem nnọ ọdọhọ ete: “Akpa usụn̄ utọn̄ọ mme ukpepn̄kpọ Bible oro nsikamade esidi nditọn̄ọ nneme nnennen ke n̄wed Afo Emekeme Ndidu Uwem ke Nsinsi ke Paradise ke Isọn̄.” Okposụkedi ndusụk owo mîsimaha ekikere edikpep n̄kpọ ekededi, mbon en̄wen ẹsinyene udọn̄ ndikpep se ededi oro mmọ ẹnịmde ẹte ke eyen̄wam mmimọ ke uwem. Edinọ ukpepn̄kpọ Bible mfọn ke ufọk esiwak ndidemede mmọemi udọn̄. Ndusụk isụn̄utom ẹnam usụn̄ enyeemi an̄wan̄a ndien ekem ẹdọhọ ẹte: “N̄kpama ndiwụt fi nte nnyịn isinamde. Edieke amade, afo emekeme ndikaiso. Edieke mûmaha, oro edi ubiere fo.” Ke ini ẹwụtde ke usụn̄ oro, mme owo isikopke ndịk ndinyịme.
Ntiense efen, emi ama akan̄wam ediwak owo oro ẹnyenede esisịt n̄kpọ udu uwem ye ifiọkn̄wed, ọdọhọ ete: “Mmokụt nte mme tract ẹtịmde ẹnyene ufọn ke nditọn̄ọ mme ukpepn̄kpọ Bible.” Se ededi n̄wed oro mmọ ẹkamade, mme andikpep uyọhọ ini ẹsin̄wana ẹdori akpan nsọn̄uyo ke Bible. Carola ọdọhọ ete: “Ke akpa ukpepn̄kpọ, nsikama sụk mme ndise ye n̄kpọ nte itien̄wed Abasi ition, man mme akpan n̄kpọ ẹwọrọ ẹda ndien isitiehe nte Bible ọsọn̄.”
Ndinam Udọn̄ Akaiso
Esinem mme owo ndikụt ke imanam n̄kọri, ntre Jennifer otoro ete: “Nam ukpepn̄kpọ enyene uwem. Nam ukpepn̄kpọ enyene n̄kọri.” Ndinịm ukpepn̄kpọ kpukpru ini ye unana editre ke ediwak urua esin̄wam mmọ n̄ko ndikere ke mmimọ ke inam n̄kọri. Akpan asiakusụn̄ kiet emi ẹkebọkde ke obio-in̄wan̄ anam an̄wan̄a ufọn oro odude ke ndinam n̄kpọ ẹn̄wan̄a ke mmemmem usụn̄ nnyụn̄ n̄wụk ntịn̄enyịn ke mme akpan n̄kpọ, man idem mbon oro ẹnyenede esisịt ifiọkn̄wed ẹkeme ndinam n̄kọri. Enye ọdọhọ ete: “Ke obio nnyịn, nnyịn isinyene ndisịme mmọn̄ ke isọn̄ ke ima ikọtọ n̄kpọ ima. Edieke nnyịn in̄wan̄ade mmọ ifụk ke in̄wan̄, isọn̄ eyesọn̄ tutu n̄kpasịp oro ẹtịbede ikemeke nditịbe n̄wọrọ ndi, ndien mmọ ẹyekpan̄a. Kpasụk ntre, edieke an̄wan̄ade ediwak n̄kpọ ofụk mbon oro ẹnyenede udọn̄ obufa, ekeme nditie nte ọsọn̄ akaha ndien mmọ ẹyekpa mba.” Idem mbon oro ẹmade ndibụp mbụme ana ẹkpep ndiwụk ntịn̄enyịn ke ibuot nneme kiet ke ini kiet edieke anade mmọ ẹkọri ke ifiọk. Jesus ọkọdọhọ mme apostle esie ete: “Mmenyene ediwak n̄kpọ kan̄a ndineme ye mbufo, edi mbufo ikemeke ndiyọ mmọ ke emi.”—John 16:12.
Usụn̄ efen ndinam udọn̄ akaiso edi ndisịn udọn̄ nnọ mbon oro afo akade ekese ndikaiso n̄kere mban̄a Ikọ Abasi ke afo ama ọkọnyọn̄. Yolanda otoro ete: “Bụp mbụme nịm. Nọ mmọ utomufọk ẹnam, utọ nte edikot ikpehe kiet ke Bible m̀mê edidụn̄ọde ibuot nneme oro ebehede mmọ.”
Ndikọri Ima nnọ Jehovah
Idatesịt fo eyekọri ke ini afo an̄wamde nditọ ukpepn̄kpọ fo ẹkabade ẹdi “mme anam-ikọ, ẹkûdi mme andikokop ikpọn̄-ikpọn̄.” (James 1:22) Didie ke afo ekeme ndinam oro? Ima oro ẹnyenede ẹnọ Jehovah onụk mme ata Christian. Pedro, emi otode Mexico, anam an̄wan̄a ete: “Mme owo ikemeke ndima owo emi mmọ mîfiọkke, ntre toto ke ata ntọn̄ọ ukpepn̄kpọ, mmesikpep mmọ enyịn̄ Abasi ke Bible, nnyụn̄ nyom mme ifet ndisọn̄ọ ntịn̄ mban̄a mme edu Jehovah.” Ke nneme, afo emekeme ndinam esịtekọm oro ẹnyenede ẹnọ Jehovah ọkọri ebe ke nditịn̄ nte afo ekerede aban̄a enye. Elizabeth ọdọhọ ete: “Mmesidomo kpukpru ini ndisiak eti ido Jehovah. Ke ini ukpepn̄kpọ mi, edieke n̄kụtde ediye flawa, ediye inuen, m̀mê ediye eyen an̄wambana, mmesitịn̄ kpukpru ini nte ke oro edi utom Jehovah.” Jennifer ọnọ ekikere ete: “Tịn̄ ban̄a un̄wọn̄ọ Abasi kaban̄a obufa ererimbot nte ata idem n̄kpọ emi afo ọdiọn̄ọde. Bụp se mmọ ẹdimade ndinam ke obufa ererimbot oro.”
Ke ini owo etiede ekere se enye ekpepde aban̄a Jehovah ye esịtekọm, emi eyesụhọde odụk esịt esie onyụn̄ onụk enye ndinam n̄kpọ. Edi enye ikemeke nditie n̄kere ibọhọke enye eti n̄kpọ. Ibio ibio edidụn̄ọde akpan n̄kpọ ita m̀mê inan̄ ke ukpepn̄kpọ usen kiet kiet okụrede edi un̄wam nditi. Ediwak mme andikpep Bible ẹsinam mbufa owo ẹwet mme akpan itien̄wed Abasi ọkọrọ ye ibio ibio n̄kpọ ke edem Bible mmọ. Isụn̄utom kiet otode England anam an̄wan̄a ufọn efen oro odude ke edinam mme ndụn̄ọde ete: “Mmesibụp nte mmọ ẹbọde ufọn ẹto mme ntọt oro. Emi esinam mmọ ẹtie ẹkere mme usụn̄ ye mme ibet Jehovah ye esịtekọm.”
Anam-akpanikọ Ntiense emi okokụrede ukpep ke ọyọhọ otu ukpepn̄kpọ ita eke Gilead ọdọhọ ete: “Ana nnyịn inam n̄kpọ isịn ufiop. Ana nditọ ukpepn̄kpọ nnyịn ẹfiọk ẹte ke nnyịn imonịm se nnyịn ikpepde ke akpanikọ.” Mbuọtidem oro anamde fi edi “andinanam” oro okopde inemesịt ekeme ndibe owo edieke afo owụtde enye.—James 1:25.
Ntiense kiet emi an̄wamde ediwak owo ndituak ibuot nnọ Jehovah ọdọhọ ete: “Ami mmokụt nte ke mme owo ẹsisịk ẹkpere Abasi ẹkan edieke n̄n̄wamde mmọ ẹfiọk mme ibọrọ akam mmọ. Mmesida ifiọk n̄kpọntịbe idemmi nnọ mmọ uwụtn̄kpọ, utọ nte kiet emi: Ke ini ami ye nsan̄a mi ikesịmde obufa efakutom nte mme asiakusụn̄, nnyịn ikenyene sụk ekpri ikọn̄, efọk bọta kiet, inyụn̄ inyeneke okụk ndomokiet. Nnyịn ima ikụre udia oro ikenyenede ke udia mbubịteyo inyụn̄ idọhọ ite, ‘Idahaemi nnyịn inyeneke n̄kpọ ndomokiet ndidia n̄kpọn̄.’ Nnyịn ima ibọn̄ akam iban̄a oro, inyụn̄ idụk idap. Tụhi-tụhi usenubọk Ntiense kiet ke n̄kann̄kụk ama edi onyụn̄ editịn̄ owo emi enye edide, ọdọhọde ete, ‘Ami n̄kọbọn̄ akam nte yak Jehovah ọnọ mme asiakusụn̄ ẹdi. Idahaemi mmekeme ndisan̄a ye mbufo ke ediwak usen, edi sia ndụn̄de oyom usụn̄ ọkpọn̄ mi, nyadia udia uwemeyo ye mbufo, ntre mmada udia ndi man kpukpru nnyịn idia.’ Ekedi akamba unam ye ediwak ikọn̄. Mmesitịn̄ nnọ nditọ ukpepn̄kpọ mi kpukpru ini nte ke Jehovah idikpọn̄ke nnyịn tutu amama edieke nnyịn ibemde iso iyom Obio Ubọn̄ esie.”—Matthew 6:33.
Nọ Un̄wam Oro Enyenede Ufọn
Ekese abuana ke ndinam mme mbet Christ akan edinịm ukpepn̄kpọ Bible. Isụn̄utom oro akanamde utom ke ediwak isua nte esenyịn oro asan̄ade-san̄a ọdọhọ ete: “Nọ mmọ ini. Kûsọsọp ufehe unyọn̄ ke ukpepn̄kpọ okụrede. Ke odotde, sọn̄ọ da nyụn̄ neme nneme ke esisịt ini.” Elizabeth ọdọhọ ete: “Mmenyene udọn̄ ke idem mmọ koro uwem abuana. Ediwak ini mmesikere mban̄a mmọ nte n̄kpọ eke mmọ ẹdide nditọ mi.” Mme Ntiense efen ẹnọ mme ekikere ẹmi: “Ka kese mmọ ke ini mmọ ẹdọn̄ọde.” “Ke ini asan̄ade ekpere ufọk mmọ, ke uwụtn̄kpọ ke utom ukwọrọikọ, da esisịt ini waha kese mmọ man anam mmọ ẹdiọn̄ọ Mme Ntiense efen.” Eva ọdọhọ ete: “Tịm kpan̄ utọn̄ man ọdiọn̄ọ idaha owo oro ke uwem. Emi esitụk usụn̄ nte mme owo ẹnamde n̄kpọ ẹban̄a akpanikọ onyụn̄ ekeme ndibiọn̄ọ n̄kọri mmọ. Di ufan mmọ, man mmọ ẹnyene mbuọtidem nditịn̄ mban̄a mme mfịna mmọ.” Carol adian ete: “Ndinyene ata udọn̄ ke idem owo edi akpan n̄kpọ nte mme ukpụhọde oro akpanikọ edidade edi ke uwem esie ndusụk ini ediwọrọde editaba ubon ye mme ufan. Ke ofụri ofụri, ọfọn edieke nditọ ukpepn̄kpọ ẹfiọkde ebiet emi nnyịn idụn̄de nnyụn̄ nnyene mbuọtidem ndidi mbịne nnyịn ke ini ekededi.” N̄wam enye ese esop nte obufa ubon esie.—Matthew 10:35; Mark 10:29, 30.
Yolanda ọdọhọ ete: “Du ke edidemede ndinọ un̄wam oro enyenede ufọn. Tie ye mmọ ke mme mbonoesop, nyụn̄ n̄wam mmọ ye nditọ mmọ.” Ndiwụt mbufa owo nte ẹkpenọde nditọ mmọ ukpep, ẹfori idaha usanaidem mmọ, ẹtịm mme ibọrọ ẹnọ mme mbonoesop, ẹnyụn̄ ẹnọ mme utịn̄ikọ ke Ufọkn̄wed Utom Ukara Abasi kpukpru ẹdi ubak utom unam mbet. Eyenete an̄wan efen adian ete: “Edi akpan n̄kpọ ndinọ mbufa owo ukpep ke utom ukwọrọikọ. Ke ini ẹfụmide ikpehe unọ ukpep enyeemi, ndusụk owo ẹsikop ndịk ẹban̄a utom ukwọrọikọ, ẹtaba idatesịt mmọ ke ndinam n̄kpọ Jehovah, ẹnyụn̄ ẹkpu ndiyọ.” Ntre nọ ukpep ye ntịn̄enyịn ke utom eke ufọk ke ufọk, ke edinam mme mfiakn̄ka, ye ke nditọn̄ọ mme ukpepn̄kpọ Bible. Idara fo eyekpon ke ini afo okụtde eyen ukpepn̄kpọ fo anamde n̄kọri ke un̄wam ye ndausụn̄ oro afo ọnọde.
Sọn̄ọ Mmọ Idem Ndiyọ
Anam-mbet kiet emi enyenede mbufiọk ọdọhọ ete: “Ntụhọ ndifụmi edikpep n̄kpọ ke eyen ukpepn̄kpọ ama akana baptism odu.” Ana andikpep ye eyen ukpepn̄kpọ ẹti ẹte ke Christian oro anade baptism obufa ikọrike isịm ọyọhọ idaha ke n̄kan̄ eke spirit. Enye enyene ekese n̄kọri ndinam ke mbuọtidem esie, ke esịtekọm oro enye enyenede aban̄a ibet Abasi, ye ke ima oro enye enyenede ọnọ Jehovah. Edi akpan n̄kpọ ndisịn udọn̄ nnọ enye ọkọri nti edu ukpepn̄kpọ idemowo man enye akaiso ndinam n̄kọri.—1 Timothy 4:15.
Obufa owo ekeme ndiyom un̄wam man ọkọri onyụn̄ akabade edi atat-ubọk andibuana ke otu nditọete. Enye ekeme ndiyom ndausụn̄ ke ndinam n̄kpọ ye mme unana mfọnmma nditọete nte enye esịkde ekpere mmọ akan. (Matthew 18:15-35) Enye ekeme ndiyom un̄wam man akabade edi andikpep oro enyenede usọ, ekemede ndinam ndụn̄ọde esie ikpọn̄. Isụn̄utom kiet obụk ete: “Eyen ukpepn̄kpọ kiet ke ama akana baptism ama oyom ndifori ukeme esie nte andikpep, ntre enye ama ọdọhọ mi ete, ‘Nnyene ndinịm obufa ukpepn̄kpọ urua efen, edi oyom mi mfiak nti mme n̄kpọ ke mme ibuot oro n̄kebemde iso n̄kpep. Mbọk nte emekeme ndifiak nneme mme ibuot ẹmi ye ami, kiet ke ini kiet, man n̄keme ndifiọk nte anamde mme itien̄wed Abasi ye mme ndise ẹn̄wan̄a, ndien ama ekem n̄kpakama mmọ ke ini n̄kade ndinịm ukpepn̄kpọ mi?’ Enye ama akabade ata eti andikpep, inan̄ ke otu nditọ ukpepn̄kpọ esie ẹma ẹna baptism ke mbono kiet.”
Ntak Edinam Mbet Odotde ye Ukeme Oro Ẹsịnde
Pamela ọdọhọ ete: “Edinam mme mbet ọwọrọ edinyene mme anditoro Jehovah efen efen. Enye ọwọrọ uwem ọnọ mbon oro ẹnyịmede akpanikọ. N̄kam mmama ndikpep mbon en̄wen akpanikọ—enye edi ata eti n̄kpọ! Owo okụt nditọ ukpepn̄kpọ ẹnamde n̄kọri sụn̄sụn̄, ẹnamde mme ukpụhọde ke uwem mmọ ẹnyụn̄ ẹkande mme ubiọn̄ọ oro ẹtiede nte owo ikpekemeke ndikan ke mîkpedịghe spirit Jehovah. Ediwak owo oro ẹdide ẹdima Jehovah ẹmekabade ẹdi mme ata ufan mi.”
Isụn̄utom kiet otode Germany obụk ete: “Ke ini ntiede n̄kere mbon oro n̄kan̄wamde ẹkabade ẹdi mme mbet, mmokụt ndusụk owo oro ẹkekopde bụt etieti ẹmi ẹma ẹkenam ekese n̄kọri nte mme asan̄autom Abasi tutu ọsọn̄ mi ndinịm ke akpanikọ. Mmokụt mbon oro ẹkande enyene-ndịk ubiọn̄ọ, nte an̄wan̄ade ye un̄wam Jehovah. Mmokụt mme ubon oro inikiet ko ẹma ẹkebahade edi ẹdianade kiet idahaemi—nditọwọn̄ oro ẹkopde inemesịt ye nti ete ye eka. Mmokụt mme owo ẹdarade uwem oro enyenede se ọwọrọde, ẹtorode Jehovah. Emi edi idatesịt oro odude ke ndinam mme mbet.”
Ih, ndidi nsan̄autom ye Jehovah Abasi ke utom unam mbet edi n̄kpọ akwa idatesịt. Mme ifiọkutom oro mme isụn̄utom ye mme asiakusụn̄ ẹnyenede ẹwụt nte emi edide akpanikọ. Afo emekeme ndikụt ukem idatesịt ye uyụhọ oro edieke adade mme ekikere oro ẹnọde esịn ke edinam onyụn̄ anamde enye ke ofụri ukpọn̄. Ye edidiọn̄ Jehovah, idatesịt fo eyeyọhọ.—Mme N̄ke 10:22; 1 Corinth 15:58.