Nnyịn Imoyom Mme Ufan Akpanikọ
JENNY ye Sue ẹnyene ufiop ufiop nneme. Ẹtuak inua imam, enyịn ayama—kpukpru n̄kpọ ke edu mmọ ẹwụt ọkpọsọn̄ udọn̄ ke se owo enye eken enyenede nditịn̄. Okposụkedi ẹnyenede nsio nsio idaha ke uwem, nte an̄wan̄ade mmọ ẹnyene ekese n̄kpọ oro ẹdide ukem ẹnyụn̄ ẹnyene akamba ukpono ẹnọ kiet eken.
Ke ebiet en̄wen, Eric ye Dennis ke ẹnam utom ọtọkiet, kpa kiet ke otu ediwak utom ẹmi mmọ ẹnamde ke ediwak isua. Mmọ ẹdu ke ifụre, enyụn̄ ẹsak imam ifụre ifụre. Nte nneme ebede odụk mme akpan n̄kpọ, mmọ ke esịt akpanikọ ẹtịn̄ mme ekikere mmọ. Mmọ ẹwụt ukpono ẹnọ kiet eken. Ukem nte Jenny ye Sue, Eric ye Dennis ẹdi mme ufan akpanikọ.
Se ẹtịn̄de mi ẹkeme ndinam fi okop inemesịt, anamde fi ekere aban̄a mme ufan fo. Ke n̄kan̄ eken, mmọ ẹkeme ndinam fi oyom utọ mme itie ufan oro. Afo n̄ko emekeme ndinyene mmọ!
Ntak Emi Nnyịn Iyomde Mme Ufan Akpanikọ
Nti itie ufan ẹdi akpan n̄kpọ ẹnọ nsọn̄idem eke ekikere ye eke ikpọkidem nnyịn. Ke ini nnyịn ikopde ndobo, nte ededi, emi iwọrọke ite ke odu n̄kpọ emi afịnade nnyịn. Ndusụk mbon ndụn̄ọde ẹdọhọ ke ndobo edi biọn̄, oto-obot idiọn̄ọ owụtde ete ke imoyom nsan̄a. Nte ededi, ukem nte udia esisụkde m̀mê esimende biọn̄ efep, eti itie ufan ekeme ndisụhọde ndobo m̀mê ndikam nnam enye okûdu. N̄ko-n̄ko, ndinyene nti ufan ẹmi ẹmade nnyịn idịghe se owo mîkemeke ndinyene.
Ẹkebot mme owo ye udọn̄ ndinyene nsan̄a. (Genesis 2:18) Bible ọdọhọ ete ke ufan akpanikọ, m̀mê nsan̄a, “amana ọnọ ini nnan-enyịn.” (Mme N̄ke 17:17) Ntem, mme ufan akpanikọ ẹkpenyene ndikeme ndiyom un̄wam nto kiet eken ke ini edide se ẹyomde. Edi itie ufan esịne n̄kpọ akan sụk edinyene owo emi ẹyomde un̄wam ẹto m̀mê edidi nsan̄a ke utom m̀mê mbre. Nti ufan ẹsinam kiet eken ọkọri nti edu. Mme N̄ke 27:17 ọdọhọ ete: “Ukwak aban ukwak ọsọp: owo onyụn̄ anam iso ufan esie ọsọn̄.” Nte ẹkemede ndida ukwak mban n̄kpọ emi ẹdade ukem ukwak oro ẹnam, ufan kiet ekeme ndikụt unen ke ndinam idaha ifiọk ye eke spirit enye eken ọsọp. Edieke mme edikpu ẹnamde nnyịn ikop mfụhọ, ufan ndise ke enyịn mbọm ye nsịnudọn̄ N̄wed Abasi ẹkeme ndinen̄ede nnọ ndọn̄esịt.
Ke Bible, ẹbuan itie ufan ye ima, edimehe, editịn̄ ikọ idịbi, ye nsan̄a. Itie ufan ẹkeme ndisịne mme mbọhọidụn̄, mme nsan̄autom, ye ntre ntre. Ndusụk owo n̄ko ẹkeme ndida ndusụk iman nte ndusụk ke otu mme n̄kpere-n̄kan ufan mmọ. Nte ededi, ye ediwak owo mfịn, edi ọkpọsọn̄ n̄kpọ ndikụt nnyụn̄ mmụm mme ufan akpanikọ n̄kama. Ntak emi edide ntre? Nte afo emekeme ndidara itie ufan oro ẹdide eke akpanikọ ẹnyụn̄ ẹbịghide?