Mmọ Ẹma Ẹnam Uduak Jehovah

Ẹnamde Mme Ikọ Unyọn̄ Jesus

KE OKONEYO Nisan 14, 33 E.N., Jesus Christ ye mme anam-akpanikọ apostle esie 11 ẹma ẹsụhọde ẹtetie ẹkanade okpokoro udia ke ubet enyọn̄ ke Jerusalem. Ke ọfiọkde ete ke n̄kpa imọ ke asan̄a ekpere, enye ama asian mmọ ete: “Nnyene ndidu ye mbufo kan̄a ke ekpri ini.” (John 13:33) Ke akpanikọ, Judas Iscariot ama ọtọtọn̄ọ ndidụk odu ye mme idiọkowo ẹmi ẹkeyomde ndiwot Jesus.

Ikodụhe owo ndomokiet ke ubet enyọn̄ oro emi ọkọfiọkde nte idaha oro ekedide usọp usọp akan nte Jesus ọkọfiọkde. Enye ama otịm ọfiọk ete ke imọ imọn̄ ikụt ukụt. Jesus n̄ko ama ọfiọk ete ke mme apostle imọ ẹyekpọn̄ imọ ke okoneyo oro. (Matthew 26:31; Zechariah 13:7) Sia emi ekedide akpatre ifet Jesus ndinyene nneme ye mme apostle esie mbemiso n̄kpa esie, nnyịn imekeme ndinịm ke akpanikọ nte ke mme ikọ unyọn̄ esie ẹkekọn̄ọ ke mme n̄kpọ ẹmi ẹkedide akpan n̄kpọ ẹkan.

“Ẹnam Emi Nditi Mi”

Ye mme anam-akpanikọ apostle esie, Jesus ama ọtọn̄ọ obufa usọrọ oro edidade itie Passover mme Jew. Apostle Paul okokot enye “udia mbubịteyo Ọbọn̄.” (1 Corinth 11:20, NW) Ke emende uyo eke leaven mîdụhe, Jesus ama ọbọn̄ akam. Ekem enye ama obụn̄ uyo oro onyụn̄ ayak ọnọ mme apostle esie. Enye ama ọdọhọ ete: “Ẹbọ, ẹta; emi edi ikpọkidem Mi.” Ekem enye ama emen cup wine, ọbọn̄ akam onyụn̄ ọnọ mme apostle, ọdọhọde ete: “Mbufo kpukpru ẹda ẹn̄wọn̄; koro emi edi iyịp Mi, eke ediomi, emi ẹduọkde ẹban̄a ediwak owo, man ẹfen mme idiọk-n̄kpọ mmọ.”—Matthew 26:26-28.

Nso ikedi akpan n̄kpọ iban̄a edinam emi? Nte Jesus okowụtde, uyo akada aban̄a anana-idiọkn̄kpọ ikpọkidem esie. (Mme Hebrew 7:26; 1 Peter 2:22, 24) Wine akada aban̄a iyịp Jesus oro ẹkeduọkde, emi edinamde ẹkeme ndifen mme idiọkn̄kpọ. Iyịp uwa esie n̄ko eyesọn̄ọ obufa ediomi ke ufọt Jehovah Abasi ye owo 144,000, ẹmi ke akpatre edikarade ye Jesus ke heaven. (Mme Hebrew 9:14; 12:22-24; Ediyarade 14:1) Ke ndinọ mme apostle esie ikot ndidia udia emi, Jesus okowụt nte ke mmọ ẹyetiene ẹbuana ye imọ ke Obio Ubọn̄ heaven.

Kaban̄a udia editi emi, Jesus ama ọnọ ewụhọ ete: “Ẹnam emi nditi Mi.” (Luke 22:19) Ih, Udia Mbubịteyo Ọbọn̄ edidi edinam eke isua ke isua, kpa nte Passover ekedide. Ke adan̄aemi Passover ekedide ndida nti edinyan̄a oro ẹkenyan̄ade nditọ Israel ẹsio ke ufụn ke Egypt, Udia Mbubịteyo Ọbọn̄ okowụhọ ke edinyan̄a oro otịmde okpon akan—eke ubonowo oro odotde ẹnyan̄a ẹsio ke itie ufụn idiọkn̄kpọ ye n̄kpa. (1 Corinth 5:7; Ephesus 1:7) N̄ko-n̄ko, emi eyeti mbon oro ẹdiade ẹnyụn̄ ẹn̄wọn̄de n̄kpọ idiọn̄ọ emi ẹdide uyo ye wine aban̄a mme ifet oro mmọ ẹnyenede ke ini iso nte ndidem ye mme oku ke Obio Ubọn̄ Abasi eke heaven.—Ediyarade 20:6.

N̄kpa Jesus Christ ekenen̄ede edi ata akpan n̄kpọntịbe ke mbụk owo. Mbon oro ẹwụtde esịtekọm ke se Jesus akanamde ẹnam ewụhọ esie oro aban̄ade Udia Mbubịteyo Ọbọn̄: “Ẹnam emi nditi Mi.” Mme Ntiense Jehovah ẹsiti n̄kpa Jesus kpukpru isua ke usenọfiọn̄ emi asan̄ade ekekem ye Nisan 14. Ke 1996 usenọfiọn̄ emi edi ke April 2, ke utịn ama okosụhọde. Ẹnọ fi ufiop ufiop ikot ndidụk ke Ufọkmbono Obio Ubọn̄ ke n̄kann̄kụk fo.

“Mmọnọ Mbufo Obufa Ibet”

Ke ẹsiode editọn̄ọ Udia Mbubịteyo Ọbọn̄ ẹfep, Jesus ama enyene ndusụk item unyọn̄ ọnọ mme apostle esie. Kpa ye eti ukpep oro mmọ ẹkebọde, irenowo ẹmi ẹma ẹnyene ekese ndikpep. Mmọ ikotịmke ifiọk uduak Abasi kaban̄a Jesus, kaban̄a mmọ, m̀mê kaban̄a ini iso. Edi Jesus ikodomoke ndinam kpukpru n̄kpọ ẹmi ẹn̄wan̄a ke ini emi. (John 14:26; 16:12, 13) Utu ke oro, enye ama etịn̄ aban̄a n̄kpọ oro ekedide akpan n̄kpọ akan. Enye ọkọdọhọ ete: “Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo.” Ekem Jesus ama adian do ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”—John 13:34, 35.

Ke ewe usụn̄ ke emi ekedi “obufa ibet”? Ọfọn, Ibet Moses ama owụk ete: “Ma mbọhọidụn̄ fo nte idem fo.” (Leviticus 19:18) Nte ededi, Jesus ama ọdọhọ mme anditiene enye ete ẹwụt ima n̄waidem emi edikade anyan okosịm udomo oro owo ọnọde uwem esie ke ibuot ekemmọ mme Christian. Nte ededi, ‘ibet ima’ enyene n̄kpọ ndinam n̄ko ke mme idaha oro mînen̄ekede idiọk. Ke kpukpru idaha anditiene Jesus Christ eyenam usio-ukot ndiwụt ima ebe ke ndin̄wam mbon en̄wen ke n̄kan̄ eke spirit ye ke usụn̄ efen.—Galatia 6:10.

Ke akpatre okoneyo emi ke uwem Jesus eke isọn̄, ima ama onụk Jesus ndibọn̄ akam nnọ Jehovah Abasi ke ibuot mme mbet esie. Ke ubak ubak, enye ọkọbọn̄ akam ete: “Mmọ ẹdu ke ererimbot, ndien Ami ke nnyọn̄ ntiene Fi. Edisana Ete, da enyịn̄ fo kama mmọ ẹmi ọkọnọde Mi, man mmọ ẹdi kiet, kpa nte nnyịn idide kiet.” (John 17:11) Odot ẹtịm ẹfiọk nte ke eben̄e oro enye ekeben̄ede Ete esie mi, Jesus ọkọbọn̄ akam aban̄a ima ima edidianakiet eke mme anditiene enye. (John 17:20-23) Ama oyom mmọ ‘ẹma kiet eken kpa nte Jesus akamade mmọ.’—John 15:12.

Mme anam-akpanikọ apostle ẹma ẹnam mme ikọ unyọn̄ Jesus oro. Nnyịn n̄ko ikpenyene ndinam mme ewụhọ esie. Ke idiọk “ukperedem ini” emi, ima ye edidianakiet ke otu mme ata andituak ibuot ototịm edi akpan n̄kpọ akan nte akanam edide. (2 Timothy 3:1) Ke akpanikọ, mme ata Christian ẹnam ewụhọ Jesus ẹnyụn̄ ẹwụt ima nditọete. Emi esịne edinam ewụhọ esie oro nte ẹnịm Udia Mbubịteyo Ọbọn̄.