Ntak Utuakibuot Akpanikọ Ọbọde Edidiọn̄ Abasi

“Hallelujah; Edinyan̄a, ye ubọn̄, ye ukeme enyene Abasi nnyịn: koro mme ikpe Esie ẹdi ata akpanikọ ẹnyụn̄ ẹnen.”—EDIYARADE 19:1, 2.

1. Akwa Babylon edisịm utịt esie didie?

“AKWA BABYLON” ọmọduọ ke enyịn Abasi ndien idahaemi asak iso ese nsobo. Prọfesi Bible owụt ke akpara ido ukpono ofụri ererimbot emi ke mîbịghike eyekụt nsobo ke ubọk mbon mbre ima esie ẹdide mbon ukaraidem; utịt esie edidi mbuari mbuari ye usọp usọp. Ediyarade Jesus ọkọnọde John ama esịne mme ikọ prọfesi ẹmi: “N̄kpọsọn̄ angel ẹmen itiat emi etiede nte akwa itiat n̄kọk-ibokpot, ọduọk ke inyan̄, onyụn̄ ọdọhọ ete, Ntem ke ẹdisio akwa obio Babylon ẹduọk ke ọkpọsọn̄ iduọ, ndien idikwe enye aba.”—Ediyarade 18:2, 21.

2. Didie ke mme asan̄autom Jehovah ẹdinam n̄kpọ ẹban̄a nsobo Babylon?

² Ndusụk otu ke ererimbot Satan ẹyeseme nsobo Akwa Babylon edi ke akpanikọ mme asan̄autom Abasi, eke heaven m̀mê eke isọn̄, idisemeke. Idara idara mfiori oro mmọ ẹdifioride ẹnọ Abasi edidi: “Hallelujah; Edinyan̄a, ye ubọn̄, ye ukeme enyene Abasi nnyịn: koro mme ikpe Esie ẹdi ata akpanikọ ẹnyụn̄ ẹnen; koro Enye ama ebiere ikpe akwa akpara, emi akadade use esie abiat isọn̄, Enye onyụn̄ ada usiene iyịp ikọt Esie odori enye ke ibuot.”—Ediyarade 18:9, 10; 19:1, 2.

Nso Mfri ke Ana Ido Ukpono Akpanikọ Osion̄o?

3. Mme mbụme ewe ẹyom ibọrọ?

³ Sia ẹdinamde isọn̄ asana ọbọhọ nsunsu ido ukpono, nso orụk utuakibuot idisụhọ? Didie ke nnyịn ikeme ndibiere mfịn m̀mê ewe otu ido ukpono edibọhọ nsobo ukara ererimbot Satan eke nsunsu ido ukpono? Nso idi nti mfri oro anade otu emi osion̄o? Ke nsụhọde n̄kaha n̄kpọ duop ẹdu ndida ndiọn̄ọ utuakibuot akpanikọ Jehovah.—Malachi 3:18; Matthew 13:43.

4. Nso idi akpa n̄kpọ oro ẹyomde ke utuakibuot akpanikọ, ndien didie ke Jesus okonịm uwụtn̄kpọ ke afan̄ emi?

⁴ Ke akande kpukpru, ana mme ata Christian ẹmụm itie edikara emi Jesus akakpade aban̄a ẹkama—kpa itie edikara Ete esie. Jesus ikọnọhọ uwem esie ke ntak ukaraidem, esien, ekpụk, m̀mê n̄kaowo ekededi. Enye okonịm Obio Ubọn̄ Ete esie ke ebeiso akan kpukpru udọn̄ ukaraidem m̀mê edinam ukpụhọde mme Jew. Ke Satan ọnọde enye odudu ererimbot enye ọkọbọrọ ete: “Daha Mi ke usụn̄, Satan: koro ẹma ẹwet ẹte, Tuak ibuot nọ Jehovah Abasi fo, nyụn̄ nam n̄kpọ nọ Enye ikpọn̄-ikpọn̄.” Enye ama ọdiọn̄ọ oto N̄wed Abasi Usem Hebrew ete ke Jehovah edi ata Andikara ofụri isọn̄. Ewe otu ido ukpono in̄wan̄în̄wan̄ ọnọ itie ukara Jehovah ibetedem utu ke mme ndutịm ukaraidem ererimbot emi?—Matthew 4:10; Psalm 83:18.

5. (a) Didie ke mme ata andituak ibuot ẹkpese enyịn̄ Abasi? (b) Nso iwụt ke Mme Ntiense Jehovah ẹkpono enyịn̄ oro?

⁵ Ọyọhọ n̄kpọ iba oro ẹyomde edi nte ke ana utuakibuot akpanikọ otoro onyụn̄ anam enyịn̄ Abasi asana. Ata Ọkpọsọn̄ ama ayarade enyịn̄ esie, Jehovah (ẹwetde Yahweh ke ndusụk edikabade Bible), ọnọ ikọt esie Israel, ndien ẹwet enye ke ediwak tọsịn itie ke N̄wed Abasi Usem Hebrew. Idem mbemiso oro, Adam, Eve, ye mbon en̄wen ẹma ẹdiọn̄ọ enyịn̄ oro, kpa ye oro mmọ mîkokponoke enye kpukpru ini. (Genesis 4:1; 9:26; 22:14; Exodus 6:2) Ke adan̄aemi mme akabade n̄wed Christendom ye mme Jew ẹwakde nditre ndisịn enyịn̄ Abasi ke mme Bible mmọ, Mme Ntiense Jehovah ẹmenọ enyịn̄ oro nnennen itie ye ukpono oro odotde ke New World Translation of the Holy Scriptures. Mmọ ẹkpono enyịn̄ oro, idem kpa nte mme akpa Christian ẹkenamde. James ama ọnọ ikọ ntiense ete: ‘Symeon omobụk nte Abasi ekebemde iso edi edise mme Gentile, ndisio ikọt ke otu mmọ nnọ enyịn̄ Esie. Ndien ikọ mme prophet ẹsan̄a ẹkekem ye n̄kpọ emi; . . . Man mme owo eke ẹsụhọde ẹkpeyom Ọbọn̄, ye kpukpru mme Gentile, emi ẹsiode mmọ enyịn̄ Mi; ntem ke Jehovah, emi anamde owo ẹfiọk n̄kpọ emi toto ke editọn̄ọ ererimbot, ọdọhọ.’—Utom 15:14-17; Amos 9:11, 12.

6. (a) Nso idi ọyọhọ n̄kpọ ita oro ẹyomde ke utuakibuot akpanikọ? (b) Didie ke Jesus ye Daniel ẹkedori nsọn̄uyo ke itie ukara Obio Ubọn̄? (Luke 17:20, 21)

⁶ Ọyọhọ n̄kpọ ita oro ẹyomde ke utuakibuot akpanikọ edi nte ke enye ekpenyene ndimenede Obio Ubọn̄ Abasi ke enyọn̄ nte n̄kukụre edinen ye eti usọbọ ke mme mfịna itie ukara ubonowo. Jesus ama ekpep mme anditiene enye in̄wan̄în̄wan̄ ndibọn̄ akam mben̄e Obio Ubọn̄ oro ndidi, ndiben̄e ukara Abasi ndida ukara ke isọn̄. Ẹma ẹnọ Daniel ndausụn̄ odudu spirit nditịn̄ prọfesi mban̄a ukperedem ini nte: “Abasi enyọn̄ eyenam ubọn̄ eke mîdisoboke ke nsinsi, adaha ada . . . enye eyenuak onyụn̄ ama kpukpru mme idụt [ererimbot, ukaraidem] ẹmi, ndien enye eyeda ke nsinsi.” Mmanie ẹwụt ebe ke usụn̄ edinam mmọ ke ọyọhọ isua ikie 20 emi nte ke mmimọ imọnọ Obio Ubọn̄ oro ibetedem oro n̄kpọ mîbahakede—mme ido ukpono Akwa Babylon m̀mê Mme Ntiense Jehovah?—Daniel 2:44; Matthew 6:10; 24:14.

7. Didie ke mme ata andituak ibuot ẹse Bible?

⁷ Ọyọhọ n̄kpọ inan̄ oro ẹyomde man ẹnyene unyịme Abasi edi nte ke mme ata asan̄autom Abasi ẹkpenyene ndimụm Bible n̄kama nte Ikọ odudu spirit Abasi. Mmọ ke ntre ididịghe mbon unọmọ akwa nsụkuyo, emi odomode ndisụhọde Bible itie nte ikpîkpu utom ubọk owo ye ofụri ndudue oro ẹdikụtde ke ntak emi. Mme Ntiense Jehovah ẹnịm ke akpanikọ ẹte ke Bible edi Ikọ odudu spirit Abasi, kpa nte Paul ekewetde ọnọ ẹsọk Timothy ete: “Kpukpru n̄wed, eke ẹdade odudu Spirit Abasi ẹwet, ẹnyụn̄ ẹdi se ifọnde ndida n̄kpep owo n̄kpọ, nnyụn̄ nsua nnọ owo, nnyụn̄ nnam owo ẹsan̄a nte enende, nnyụn̄ nteme owo edinen ido; man owo Abasi enyene ọyọhọ ifiọk, onyụn̄ eben̄e idem ke kpukpru nde ndinam eti utom ekededi.”a Ke ntre, Mme Ntiense Jehovah ẹda Bible nte ndausụn̄ mmọ, nte n̄weditem kaban̄a uwem mmọ eke usen ke usen, ye nte idịm idotenyịn mmọ kaban̄a ini iso.—2 Timothy 3:16, 17.

Ido Ukpono Ima, Idịghe eke Usua

8. Nso idi ọyọhọ n̄kpọ ition oro ẹyomde ke utuakibuot akpanikọ?

⁸ Didie ke Jesus akanam ẹdiọn̄ọ mme ata anditiene enye? Ibọrọ esie ada nnyịn edisịm ọyọhọ akpan n̄kpọ ition oro edide idiọn̄ọ utuakibuot akpanikọ. Jesus ọkọdọhọ ete: ‘Mmọnọ mbufo obufa ibet nte, Mbufo ẹma kiet eken; nte, mbufo nde ẹma kiet eken kpa nte n̄kamade mbufo. Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.’ (John 13:34, 35) Didie ke Jesus okowụt ima esie? Ebe ke ndinọ uwem esie nte uwa ufak. (Matthew 20:28; John 3:16) Ntak emi ata ima edide akpan edu mme ata Christian? John ama anam an̄wan̄a ete: “Ndima, ẹyak nnyịn ima kiet eken; koro ima oto Abasi . . . Owo eke mîman̄a-ma ifiọkke Abasi, koro Abasi edi ima.”—1 John 4:7, 8.

9. Mmanie ẹwụt ata ima, ndien didie?

⁹ Mmanie ke eyo nnyịn ẹwụt orụk ima emi, idem kpa ye usua eke orụk, idụt, m̀mê ekpụk? Mmanie ẹbe akakan udomo oro, idem tutu osịm n̄kpa, man ima mmọ akpaka iso? Nte nnyịn imekeme ndidọhọ ke edi mme oku Catholic ye mme nun oro nte ẹnyịmede ẹtienede ẹnyene ndusụk nduduọhọ ke uwot ofụri ekpụk oro akadade itie ke Rwanda ke 1994? Nte edi mbon Orthodox eke Serbia m̀mê mbon Catholic eke Croatia oro ẹkebuanade ke “edinam ekpụk asana” ye mme edinam eken oro mîdịghe eke mme Christian ke ekọn̄ mbio obio oro ke mme idụt Balkan? Mîdịghe nte edi mme ọkwọrọ ederi Catholic m̀mê Protestant ẹmi ẹsịnde nsọk ẹnọ asari ye usua ke Northern Ireland ke mme iduọk isua ifan̄ ẹmi ẹbede? Ke akpanikọ owo ikemeke ndidọhọ ke Mme Ntiense Jehovah ẹma ẹtiene ẹbuana ke mme utọ en̄wan oro ndomokiet. Mmọ ẹmebọ ufen ke mme ufọk-n̄kpọkọbi ye ke mme itienna ekikere, idem tutu osịm n̄kpa, utu ke ndibiat ima Christian mmọ.—John 15:17.

10. Ntak emi mme ata Christian ẹdade san̄asan̄a?

¹⁰ Ọyọhọ n̄kpọ itiokiet oro ẹyomde ke utuakibuot oro Abasi onyịmede edi edida san̄asan̄a kaban̄a mme mbubehe ukaraidem ererimbot emi. Ntak emi mme Christian ẹkpedade san̄asan̄a ke mbre ukara? Paul, James, ye John ẹnọ nnyịn ọkpọsọn̄ ntak kaban̄a idaha emi. Apostle Paul ekewet ete ke Satan edi “abasi eyo emi,” oro adade kpukpru usụn̄ oro ekemede, esịnede mbre ukara oro ọtọde ubahade, anam ikike mmọ eke mînịmke ke akpanikọ okịm. Mbet oro James ọkọdọhọ ke “edidi ufan ye ererimbot edi edidi usua ye Abasi,” ndien apostle John ọkọdọhọ ke “ofụri ererimbot onyụn̄ esịne ke ubọk andidiọk.” Ata Christian, ke ntre, ikemeke ndibiat utuakibuot esie nnọ Abasi ebe ke ndibuana ke mbiara mbre ukara ye odudu ererimbot Satan.—2 Corinth 4:4; James 4:4; 1 John 5:19.

11. (a) Didie ke mme Christian ẹse ekọn̄? (b) Nso isọn̄ idu ke N̄wed Abasi kaban̄a idaha emi? (2 Corinth 10:3-5)

¹¹ Ye akpatre n̄kpọ iba oro ẹyomde mi ke ekikere, ọyọhọ n̄kpọ itiaba akabade ana in̄wan̄în̄wan̄, oro edi, nte ke mme ata Christian andituak ibuot ikpenyeneke ndibuana ke ekọn̄. Sia ido ukpono akpanikọ edide otu nditọete ofụri ererimbot oro ọkọn̄ọde ke ima, do n̄kpọ ndomokiet ikemeke ndibahade m̀mê ndibiat “otu nditọete” oro “emi ẹdude ke ererimbot.” Jesus ekekpep ima, idịghe usua; emem, idịghe ekọn̄. (1 Peter 5:9; Matthew 26:51, 52) Ukem “andidiọk” oro, Satan, emi ekesịnde Cain owot Abel ke aka iso ndisuan n̄kpasịp usua ke otu ubonowo ndinyụn̄ nsịn nsọk nnọ en̄wan ye uduọkiyịp ke ntak ubahade eke ukaraidem, ido ukpono, ye ekpụk. Mme ata Christian ‘ikpepke aba ekọn̄,’ inamke n̄kpọ m̀mê nso utịp ke ana ẹkpe. Ke ndamban̄a usụn̄, mmọ ẹma ẹdada “ofụt mmọ ẹdom n̄kpọ ufụn̄ isọn̄, ẹda eduat mmọ ẹdom ikwa udiọn̄ vine.” Mmọ ẹsion̄o emem emem mbun̄wụm spirit Abasi.—1 John 3:10-12; Isaiah 2:2-4; Galatia 5:22, 23.

Abasi Ọdiọn̄ Edisana Eduuwem ye Mme Ukpepn̄kpọ

12. (a) Nso idi ọyọhọ n̄kpọ itiaita oro ẹyomde, edi mme ubahade ido ukpono ewe ke afo ekeme ndisiak? (b) Didie ke Paul okosio ọyọhọ n̄kpọ itiaita oro ẹyomde mi owụt?

¹² Edidianakiet Christian edi ọyọhọ n̄kpọ itiaita oro ẹyomde ke utuakibuot akpanikọ. Nte ededi, mme ido ukpono Christendom ẹmi ẹtọde ubahade in̄wamke ke afan̄ emi. Ediwak inua-okot mme ọwọrọiso n̄ka ido ukpono ẹmebahade ẹnyene nsio nsio otu, ndien emi osụn̄ọ ke ndutịme. Da, ke uwụtn̄kpọ, ido ukpono Baptist ke United States, emi ẹbaharede ke ufọt mbon Baptist Edere Edere (Mme Ufọkabasi Baptist Mbon America ke U.S.A.) ye mbon Baptist Usụk Usụk (Ediomi Baptist Usụk Usụk), ọkọrọ ye ediwak otu Baptist eken oro ẹkewọrọde ẹto mme ubahade ẹmi. (World Christian Encyclopedia, page 714) Ẹnam ediwak ubahade ke ntak mme nsio nsio ukpepn̄kpọ m̀mê ukara ufọkabasi (ke uwụtn̄kpọ, Presbyterian, Episcopal, Congregational). Mme ubahade ke Christendom ẹbiet mbon oro ẹdade itie ke mme ido ukpono oro ẹwọrọde ẹkpọn̄ Christendom—edide edi Ido Ukpono Buddha, Islam, m̀mê Ido Ukpono Hindu. Nso ke apostle Paul eketeme mme akpa Christian? “Edi mmada enyịn̄ Ọbọn̄ nnyịn Jesus Christ n̄kpe mbufo ubọk, nditọ-ete, nte mbufo kpukpru ẹnyene ikọ-inua kiet, ubahade okûnyụn̄ odu ke otu mbufo; edi mbufo ẹtọn̄ọ ntak ẹkabade ẹfọn ẹma ke edinyene esịt kiet ye ekikere kiet.”—1 Corinth 1:10; 2 Corinth 13:11.

13, 14. (a) Nso ke ‘ndidi edisana’ ọwọrọ? (b) Didie ke ẹnịm utuakibuot akpanikọ ke edisana?

¹³ Nso idi ọyọhọ n̄kpọ usụkkiet oro ẹyomde ke ido ukpono oro Abasi onyịmede? Ẹwụt edumbet Bible kiet ke Leviticus 11:45: “Mbufo ẹdi edisana ndien: koro ami nsanade.” Apostle Peter ama afiak etịn̄ se ẹyomde emi ke ini enye ekewetde ete: ‘Kpa nte Andikot mbufo edide Edisana, mbufo nde ẹkabade ẹsana ke ofụri edu uwem mbufo.’—1 Peter 1:15.

¹⁴ Nso isịne ke ediyom oro oyomde isana mi? Nte ke mme andituak ibuot nnọ Jehovah ẹkpenyene ndisana ke n̄kan̄ eke spirit ye eke ido uwem. (2 Peter 3:14) Ufan̄ idụhe inọ mme andikokoi nnam idiọk oro mîkabakede esịt, oro ebede ke eduuwem mmọ ẹsịnde uwa ufak Christ ke ndek. (Mme Hebrew 6:4-6) Jehovah oyom ete ẹnịm esop Christian anana ndek onyụn̄ asana. Didie ke ẹnam oro? Ke ubak ubak ebe ke ndutịm ikpe eke edisio mbon oro ẹdibiatde esop mfep.—1 Corinth 5:9-13.

15, 16. Nso ukpụhọde ke ediwak Christian ẹnam ke uwem mmọ?

¹⁵ Mbemiso ẹfiọkde akpanikọ Christian, ediwak owo ẹkedu uwem unana ukpan, edida unọ idem inemesịt nte akakan n̄kpọ ke uwem, ye uma idem. Edi ikọ aban̄ade Christ ama okpụhọde mmọ, ndien mmọ ẹmebọ edifen nnọ ke mme idiọkn̄kpọ mmọ. Paul ama etịn̄ aban̄a emi ke okopodudu usụn̄ ke ini enye ekewetde ete: ‘M̀mê nte mbufo ifiọkke ite, mme anam-ukwan̄ido ididaha Obio Ubọn̄ Abasi inyene? Ẹkûbian̄a idem mbufo. Mbon-use, ye mme okpono-ndem, ye mme esịn-efịbe, ye mmọ eke ẹbietde iban, ye mmọ eke ẹsabarede idem, ye mme inọ, ye mme esịn esịt ke n̄kpọ owo, ye mme oyụhọ mmịn, ye mbon idiọk inua, ye mme akan owo ubọk ididaha Obio Ubọn̄ Abasi inyene. Ndien ndusụk mbufo ẹketie ntem; edi ẹma ẹyet mbufo, ẹma ẹnam mbufo ẹsana.’—1 Corinth 6:9-11.

¹⁶ Ana in̄wan̄în̄wan̄ nte ke Jehovah onyịme mbon oro ẹkabarede esịt ẹkpọn̄ eduuwem mmọ oro mîkemke ye N̄wed Abasi, ẹfiakde edem, ẹnyụn̄ ẹkabarede ẹdi mme ata anditiene Christ ye mme ukpepn̄kpọ esie. Mmọ ẹnen̄erede ẹma mme mbọhọidụn̄ mmọ nte idemmọ ẹnyụn̄ ẹwụt emi ke ediwak usụn̄, utọ nte ke edisọn̄ọ nyịre ke utom oro ọnọde kpukpru mbon oro ẹkpan̄de utọn̄ etop uwem.—2 Timothy 4:5.

‘Akpanikọ Eyenam Mbufo Ẹwọrọ Ufụn’

17. Nso idi ọyọhọ n̄kpọ duop oro ẹyomde ke utuakibuot akpanikọ? Nọ mme uwụtn̄kpọ.

¹⁷ Ọyọhọ n̄kpọ duop oro ẹyomde odu oro Jehovah enyenede ọnọ mbon oro ẹtuakde ibuot ẹnọ enye ke spirit ye ke akpanikọ—edisana ukpepn̄kpọ. (John 4:23, 24) Jesus ọkọdọhọ mme anditiene enye ete: “Mbufo ẹyefiọk akpanikọ, akpanikọ eyenyụn̄ anam mbufo ẹwọrọ ufụn.” (John 8:32) Akpanikọ Bible anam nnyịn iwọrọ ufụn mme ukpepn̄kpọ oro mînọhọ Abasi ukpono, utọ nte ukpọn̄ eke mîkemeke ndikpa, hell ikan̄, ye purgatory. (Ecclesiastes 9:5, 6, 10; Ezekiel 18:4, 20) Enye anam nnyịn iwọrọ ufụn ndịben̄kpọ Babylon eke “Ata Edisana Abasi-Ita-ke-Kiet” Christendom. (Deuteronomy 4:35; 6:4; 1 Corinth 15:27, 28) N̄kopitem nnọ akpanikọ Bible osụn̄ọ ke mme owo oro ẹtiede ima ima, ẹkerede ẹban̄a, ẹfọnde ido, ẹkopde mbọm. Ata Ido Ukpono Christ akananam isịnke udọn̄ inọ mme osio-usiene, ọsọn̄ido mbon ukara ufịk ido ukpono, utọ nte Tomás de Torquemada, m̀mê usua-usua mme andisịn nsọk nnọ ekọn̄, utọ nte ukara pope oro ekesịnde udọn̄ ọnọ mme Ekọn̄ Ido Ukpono. Edi, Akwa Babylon omosion̄o orụk mfri emi ke ofụri mbụk, ke nsụhọde n̄kaha ọtọn̄ọde ke eyo Nimrod tutu osịm emi.—Genesis 10:8, 9.

Enyịn̄ Oro Edide San̄asan̄a

18. (a) Mmanie ẹdu uwem ekekem ye mme n̄kpọ duop oro ẹyomde ke utuakibuot akpanikọ ndien didie? (b) Nso ke ana nnyịn owo kiet kiet inam man inyene edidiọn̄ oro anade nnyịn ke iso?

¹⁸ Mmanie mfịn ẹnen̄ede ẹnam mme n̄kpọ duop oro ẹyomde mi ke utuakibuot akpanikọ? Mmanie ke mbon efen ẹdiọn̄ọ ẹnyụn̄ ẹfiọk mbụk mmọ nte mbon nsọn̄ọnda ye mbon emem? Ke ofụri ererimbot ẹtịm ẹfiọk Mme Ntiense Jehovah ke editre oro mmọ ẹtrede ndidi “mbon ererimbot.” (John 15:19; 17:14, 16; 18:36) Ikọt Jehovah ẹnyene ukpono ke ndikere enyịn̄ esie nnyụn̄ ndi Mme Ntiense esie, idem kpa nte Jesus Christ ẹkedide ntiense akpanikọ ọnọ Ete esie. Nnyịn ikere edisana enyịn̄ oro, idu ke edidemede iban̄a mbiomo nnyịn ndidu uwem ekekem ye se enye adade ọnọ. Ndien, nte Mme Ntiense esie, nso ubọn̄ ubọn̄ idotenyịn ina nnyịn ke iso ntem! Oro edi ndidi ubak okopitem ekpụk ubonowo oro adianade kiet, ẹtuakde ibuot ẹnọ Andikara Ekondo ke paradise oro ẹfiakde ẹwụk mi ke isọn̄. Man ibọ utọ edidiọn̄ oro, ẹyak nnyịn ika iso idian idem nnyịn an̄wan̄wa ye utuakibuot akpanikọ inyụn̄ ikere enyịn̄ oro Mme Ntiense Jehovah uko uko “koro mme ikpe Esie ẹdi ata akpanikọ ẹnyụn̄ ẹnen”!—Ediyarade 19:2; Isaiah 43:10-12; Ezekiel 3:11.

[Ikọ idakisọn̄]

Didie ke Afo Ọkpọbọrọ?

◻ Didie ke mme asan̄autom Jehovah ẹse nsobo Akwa Babylon?

◻ Nso idi mme akpan n̄kpọ ẹmi ẹyomde ke utuakibuot akpanikọ?

◻ Didie ke akpanikọ anam fi ọwọrọ ufụn?

◻ Nso idi san̄asan̄a ukpono oro nnyịn inyenede nte Mme Ntiense Jehovah?

[Mme ndise ke page 17]

Mme Ntiense Jehovah ke ẹkwọrọ ẹnyụn̄ ẹkpep eti mbụk Obio Ubọn̄ Abasi

[Ndise ke page 18]

Mme ata Christian ẹsida san̄asan̄a kpukpru ini ke mbre ukara ye mme ekọn̄ ererimbot

[Ebiet Ẹdade N̄kpọ Ẹto]

Ubomofụm: Ẹbọ ẹto Ministry of Defense, London