Nte Afo Edi Asiakusụn̄ Oro Adade Ukem Ukem?
ENYỊN ete ayama nte enye atatde ubọk ada ebet eyen esie an̄wan ndinam akpa usio-ukot esie mmen̄e mmen̄e. Ke ini enye ke mbuari ofụn̄de ọduọ, ete esịn udọn̄ ọnọ enye ndifiak ndomo. Ete ọfiọk ete ke eyenan̄wan emi eyesọp enyene nsọn̄ọ ye ukeme.
Ke ukem usụn̄ oro, obufa asan̄autom asiakusụn̄ ekeme ndiyom ini ye nsịnudọn̄ mbemiso enye enyenede nsọn̄ọ oro ẹyomde man okụt unen nte anditan̄a Obio Ubọn̄ uyọhọ ini. Ediwak mme asiakusụn̄ ẹkaiso ndinam utom idara idara ke ediwak isua. Mme ukpụhọde idaha oro owo mîkodorike enyịn ẹsinam ndusụk owo ẹtre ndida ukem ukem. Ndusụk mmọ ẹkam ẹtaba idara mmọ. Ke idụt kiet, mbahade 20 eke ikie ke otu mbon oro ẹketọn̄ọde usiakusụn̄ ẹma ẹtre ke ufọt akpa isua iba eke utom uyọhọ ini mmọ. Nso ikeme ndinam asiakusụn̄ ọkpọn̄ utọ idara idara utom emi? Nte ẹkeme ndinam n̄kpọ ndomokiet ndibiọn̄ọ iduọ emi?
Okposụkedi unana nsọn̄idem, unana okụk, ye mme mbiomo ubon ẹkemede ndinam ndusụk owo ẹkpọn̄ utom ukwọrọikọ uyọhọ ini, n̄kpọ iduọ mmọ eken esidi edikpu ndida ukem ukem nte ọfọnde ke nsio nsio utom Christian. Edida ukem ukem abuana “idaha emi baba ikpehe kiet m̀mê odudu kiet mîsọn̄ke ikan eken m̀mê ndikpon n̄kan eken nte akpanade edi.”
Jesus Christ ama owụt mme mbet esie nte ẹnyenede ndinam utom edikwọrọ ikọ ye edinam mbet. Ke utom ukwọrọikọ esie, enye n̄ko ama owụt nte ẹkemede ndimụm edida ukem ukem n̄kama. Jesus ama owụt ete ke mme adaiso ido ukpono mme Jew ikadaha ukem ukem, asiande mmọ ete: “Mbufo [ẹsio] ubak ikọn̄ ye mfri ye n̄kpasịp kiet ke itie duop ẹnọ Abasi, ẹnyụn̄ [ẹtre] ndinam ikpọ n̄kpọ ibet, ikpe, ye mbọm, ye mbuọtidem. Edi mbufo ẹkpenam mme n̄kpọ ẹmi, ikponyụn̄ itreke ndinam mmọ eken.”—Matthew 23:23, 24a.
Edumbet emi abuana ukem ntre mfịn, akpan akpan ke utom usiakusụn̄. Ke nduaidem ye eti uduak onụkde, ndusụk owo ẹma ẹdụk usiakusụn̄ ye unana editịm idem ọfọn nnọ enye m̀mê nditie n̄kere kpukpru n̄kpọ oro ẹbuanade. (Luke 14:27, 28) Mbon eken ẹsịn idem etieti ke utom ukwọrọikọ tutu mmọ ẹfụmi mme akpan ikpehe Ido Ukpono Christ eken. Didie ke mmọ ẹkeme ndinyene nnyụn̄ mmụm edida ukem ukem n̄kama?
Sọn̄ Idem ke N̄kan̄ eke Spirit!
Akananam Jesus ikofụmike nsọn̄idem eke spirit esie. Idem okposụkedi otuowo oro ekedide ndikop ikọ esie man enye onyụn̄ ọkọk mmọ udọn̄ọ ẹkediade ekese ini esie, enye ama osio ini onịm ọnọ editie n̄kere n̄kpọ ke akam. (Mark 1:35; Luke 6:12) Usiakusụn̄ oro adade ukem ukem mfịn oyom n̄ko ete owo ada kpukpru n̄kpọ oro ẹnọde anam n̄kpọ man ọsọn̄ idem ke n̄kan̄ eke spirit. Paul okobụp ete: “Afo emi ekpepde owo efen, nte ukpepke idem fo?” (Rome 2:21) Ekpenen̄ede edi ndudue ndida kpukpru ini oro owo enyenede n̄kwọrọ ikọ nnọ mbon en̄wen ke adan̄aemi ofụmide ndisio ini nnịm nnọ ukpepn̄kpọ idemowo oro ekemde nnyụn̄ mbọn̄ akam kpukpru ini.
Kumiko anam utom usiakusụn̄ ke isua 20. Okposụkedi enye enyenede nditọ ita ye ebe oro mînịmke ke akpanikọ, enye okụt oto ifiọk eyouwem nte ke ini oro ọfọnde akan ọnọ imọ ndikpep Bible edi ke esisịt ini mbemiso imọ idụkde idap. Nte enye ekpepde n̄kpọ, enye eyetịn̄ enyịn ewet mme akpan n̄kpọ oro enye ekemede ndikama ke an̄wautom man anam utom ukwọrọikọ esie eke usen ke usen edi obufa onyụn̄ enyene inem. Mme asiakusụn̄ eken oro ẹkụtde unen ẹsibak ẹdemede idap mbemiso mbon eken ke ubon man ẹfiak ẹsọn̄ọ odudu eke spirit mmọ ke mme ndobo ndobo hour eke usenubọk. Afo emekeme ndinyene mme ini efen oro ẹfọnde emi osiode onịm ọnọ editịm idem nnọ mme mbonoesop ye edikot mbufa n̄wed Christian. Edieke afo oyomde ndimụm idara n̄kama ke utom ukwọrọikọ, ukpepn̄kpọ idemowo idịghe n̄kpọ oro ekemede ndinam itọk itọk m̀mê ndifụmi.
Ndinam Mme Mbiomo Ubon Ẹda Ukem Ukem
Oyom mme ete ye eka oro ẹdide mme asiakusụn̄ n̄ko ẹnyene ke ekikere nte ke akamba ikpehe ‘uduak Jehovah’ kaban̄a mmọ esịne ndise mban̄a mme n̄kpọ obụkidem, eke ntụk, ye eke spirit ubon mmọ. (Ephesus 5:17; 6:1-4; 1 Timothy 5:8) Ndusụk ini idem nsan̄andọ oro onịmde ke akpanikọ ye mbonubon ẹsikop ndịk nte ke mmimọ idibọhọ ndọn̄esịt ye ibetedem ito n̄wanndọ ye eka ke ndondo oro enye ọtọn̄ọde utom usiakusụn̄. Mme utọ ntụk oro esisụn̄ọ ke edinyene ndebe ndebe edu mban̄a udọn̄ esie ndikabade ndi asiakusụn̄. Nte ededi, ke ndinam eti ndutịm ye edibem iso ntie n̄kere owo ekeme ndida ukem ukem.
Ediwak mme asiakusụn̄ ẹsidomo ndinam ofụri utom ukwọrọikọ mmọ ke ini mbonubon mîdụhe ke ufọk. Kumiko, emi ẹkesiakde ke ntọn̄ọ ntọn̄ọ, esidu ye ubon esie ke ini mmọ ẹdiade udia usenubọk, otịm ebe ye nditọ esie idem ndika n̄kpọ ke usenubọk, ndien esifiak ọnyọn̄ ufọk mbemiso mmọ ẹnyọn̄de ẹdi. Enye esitem nsio nsio udia ke Monday onịm man enye ọkpọduọk odudu onyụn̄ adia udia ye ubon esie utu ke ndinam utom ke itie utemudia. Ndinam awak akan utom kiet ke ini kiet, utọ nte mme utom ufọk eken ke adan̄aemi etemde udia, esin̄wam n̄ko. Ke usụn̄ oro, Kumiko esikam edep ifet okot mme ufan nditọ esie edi onyụn̄ ọnọ mmọ san̄asan̄a n̄kpọ n̄kpaidem.
Nte nditọ ẹkọride ẹdụk isua akwa owo mmọ, mmọ ẹsiwak ndiyom ekese ntịn̄enyịn nto ete ye eka mmọ ke ndise mban̄a mbufa ntụk, udọn̄, mme eyịghe, ye mme n̄kpọndịk oro ẹkande mmọ ẹkụk. Emi esiyom edidu ke edidemede ye edinam ukpụhọde ke ndutịm oto ete m̀mê eka oro edide asiakusụn̄. Da Hisako ke uwụtn̄kpọ, asiakusụn̄ emi edide eka nditọ ita. Nso ke enye akanam ke ini adiaha esie ọkọtọn̄ọde ndiwụt unana idatesịt ye ifiopesịt kaban̄a mme mbonoesop Christian ye an̄wautom ke ntak mfịghe otode mme ufan ufọkn̄wed ẹdide mbon ererimbot? Se ẹkenen̄erede ẹyom ekedi adiaha esie ndinam akpanikọ edi eke esie nnyụn̄ nnen̄ede nnịm ke akpanikọ nte ke edida san̄asan̄a n̄kpọn̄ ererimbot edi mfọnn̄kan usụn̄uwem.—James 4:4.
Hisako etịn̄ ete: “Mma mbiere ndifiak n̄kpep mme akpan ukpepn̄kpọ ke n̄wed Ndidu Uwem ke Nsinsi ye enye ke usen ke usen. Ke akpa nnyịn ikesikeme ndikpep n̄kpọ ke minit ifan̄ kpọt, sia adiaha mi ekesisemede ediwak ini aban̄a ọkpọsọn̄ ubiak idịbi ye n̄kọn̄ibuot ke ini ukpepn̄kpọ ekemde. Edi mma nsinịm ukpepn̄kpọ oro kpukpru ini. Ke ọfiọn̄ ifan̄ ẹma ẹkebe, edu esie ama okpụhọde akamba akamba, adade okosịm enye ndiyak idem nnọ nnyụn̄ nna baptism ke ekpri ini kpọt.” Idahaemi Hisako ke okop inem utom ukwọrọikọ uyọhọ ini ye adiaha esie.
Oyom mme ete oro ẹnamde utom usiakusụn̄ n̄ko ẹnọ ntịn̄enyịn mbak mmọ ẹdisịn idem ẹkaha ke ndise mban̄a mbon oro ẹnyenede udọn̄ ke an̄wautom ye ke mme utom mmọ ke esop tutu mmọ ẹkpu ndinọ nditọ mmọ oro ẹsụk ẹkọride-kọri ọkpọsọn̄ ibetedem eke ntụk ye ndausụn̄ oro mmọ ẹdotde ndibọ. Emi idịghe n̄kpọ emi ebe okponụkde ọnọ n̄wan esie. Ebiowo Christian emi anamde utom ọkpọsọn̄ oro ama ekedi asiakusụn̄ ke anyanini emi onyụn̄ enyenede ekpri mbubehe esisio ini onịm ndikpep n̄kpọ ye kiet kiet ke otu nditọ esie mbinan̄ san̄asan̄a. (Ephesus 6:4) Ke adianade do, enye esitịm idem ọnọ mme mbonoesop eke urua ke urua ye ubon esie. Mme asiakusụn̄ oro ẹdade ukem ukem isifụmike mme ubon mmọ ke n̄kan̄ n̄kpọ obụkidem ye eke spirit.
Ndida Ukem Ukem ke N̄kpọ Uduuwem
Nnennen ekikere kaban̄a mme n̄kpọ ẹyomde ke usen ke usen edi ikpehe efen emi mme asiakusụn̄ ẹkpenyenede ndidomo ndimụm edida ukem ukem n̄kama nte ọfọnde. Mi n̄ko, nnyịn imekeme ndikpep ekese nto eti uwụtn̄kpọ ye item Jesus. Enye ama odụri owo utọn̄ aban̄a editịmede esịt n̄kaha mban̄a mme n̄kpọ obụkidem. Utu ke oro, enye ekesịn udọn̄ ọnọ mme mbet esie ndinịm Obio Ubọn̄ akpa, ọn̄wọn̄ọde ete ke Abasi eyese aban̄a mmọ nte enye anamde ye mme edibotn̄kpọ esie eken. (Matthew 6:25-34) Ke nditiene eti item emi, ediwak mme asiakusụn̄ ẹkeme ndidu ke utom uyọhọ ini ke ediwak isua, ndien Jehovah ọmọdiọn̄ ukeme mmọ ndinyene ‘udia eke usen ke usen.’—Matthew 6:11.
Apostle Paul ọkọnọ ekemmọ mme Christian item ‘ndiyak kpukpru owo ẹkụt ẹte ke mmọ ẹnyene eti ibuot.’ (Philippi 4:5) Ke akpanikọ, eti ibuot oyom ete nnyịn itịm ise iban̄a nsọn̄idem nnyịn. Mme asiakusụn̄ oro ẹdade ukem ukem ẹsisịn ofụri ukeme ndiwụt eti ibuot mmọ ke usụn̄uwem mmọ ye ke eduuwem mmọ kaban̄a mme n̄kpọ obụkidem, ẹfiọkde ẹte ke mmọ en̄wen ke ẹse eduuwem mmimọ.—Men 1 Corinth 4:9 domo.
Mme uyen oro ẹdụkde utom usiakusụn̄ ẹkpenyene ndifep ndida ntatubọk ete ye eka mmọ nnam n̄kpọ ke idiọk usụn̄. Edieke mmọ ẹdụn̄de ke ufọk ete ye eka mmọ, eyewụt edida ukem ukem oro ọfọnde ye esịtekọm ndibuana ke mme utom ufọk nnyụn̄ nnyene utom ibio ini oro edin̄wamde mmọ nditịp n̄kpọ nsịn ke okụk oro ẹbiatde ndida n̄kama ufọk.—2 Thessalonica 3:10.
Mme Asiakusụn̄ Oro Ẹdade Ukem Ukem Ẹdi Ata Edidiọn̄
Afo emekeme ndidi asiakusụn̄ oro anamde utom ọkpọsọn̄ ndida ukem ukem nte ọfọnde. Nyene mbuọtidem. Kpa nte ekpri eyen oyomde ini man ekpep ndimụm idem esie n̄kama nnyụn̄ nsan̄a, ediwak mme asiakusụn̄ ẹtịn̄ ẹte ke ama ada ini mmimọ ndida ukem ukem ke ndise mban̄a kpukpru utom mmimọ.
Ndinam ukpepn̄kpọ idemowo, ndise mban̄a mbonubon, ye edise mban̄a mme n̄kpọ obụkidem eke idemmọ ẹsịne ke otu mme ikpehe oro mme asiakusụn̄ ẹdomode ndida ukem ukem. Ntọt owụt ete ke ediwak mme asiakusụn̄ ẹyọhọ mme utom mmọ ke ata n̄wọrọnda usụn̄. Mmọ ẹnen̄ede ẹdi edidiọn̄ ke n̄kann̄kụk ye n̄kpọ itoro ẹnọ Jehovah ye esop esie.