Nte Afo Edi Owo Unọmọ Asari?

NSO idi ọsọ n̄kpọ oro afai eke ekpụk, usua eke orụk, asari, ubahade, ye ediwot ofụri orụk ẹnyenede? Kpukpru mmọ ẹdi utịp ntụhọ eke owo oro atarade asuana—asari!

Nso idi asari? N̄wed ofụri orụk ifiọk kiet akabade enye nte “ekikere oro ẹnyenede ye unana edida ini m̀mê nditịn̄ enyịn ndụn̄ọde ọfọn.” Nte mme anana mfọnmma owo, nnyịn imenyene ndusụk ntụhọ edinam asari. Ndusụk afo emekeme nditi mme idaha oro afo akanamde ubiere ke ini mûnyeneke ifiọk uban̄a ofụri se ibuanade. Bible owụt nte mme utọ ekikere asari oro ẹkpụhọrede ye usụn̄ oro Jehovah Abasi esede n̄kpọ. Enye ọdọhọ ete: “[Nsehe] nte owo esede; koro owo esede enyịn, edi Jehovah ese esịt.”—1 Samuel 16:7.

Asari Ekeme Ndinọ Unan

Nte eyịghe mîdụhe ẹsinyene idiọk ekikere ẹban̄a owo kiet kiet ndusụk ini. (Men Ecclesiastes 7:21, 22 domo.) Ke ofụri ofụri, kpukpru nnyịn idi mbon unọmọ asari. Nte ededi, ke ini ẹsọpde-sọp ẹsio ẹfep, ekeme ndidi ekikere asari edinọ esisịt unan mîdịghe inọhọ-nọ unan ndomokiet. Edi ndiyak utọ ekikere oro ọkọri ekeme ndisụn̄ọ ke ndinọ unan. Enye ekeme ndinam nnyịn inịm nsu ke akpanikọ. Ke uwụtn̄kpọ, ke ntak asari, ndusụk owo ẹnen̄ede ẹnịm ẹte ke owo edi ibụk, ifu, ndisịme, m̀mê owo ntan̄idem n̄kukụre etiene akpan ido ukpono, ekpụk, m̀mê idụt emi enye otode.

Ke ediwak idaha utọ idiọk ekikere oro esida okosụn̄ọ ke utụk, isụn̄i, m̀mê idem edinam n̄kpọ ye mmọ en̄wen afai afai. Ediwak miliọn owo ẹduọk uwem mmọ ke akpakịp uwotowo, ediwot ofụri orụk, ediwot ekpụk, ye mme orụk ebeubọk asari eken.

Ke ofụri isọn̄, mme ukara ẹdomo ndibiat asari mfep ebe ke ndinọ ubiọn̄ oro ekemde ye ibet kaban̄a unen edinyene ubọhọ, ifụre, ye edidi ukem ukem. Edieke afo okotde ibet idụt mbufo, nte eyịghe mîdụhe afo eyekụt ikọ m̀mê edinen̄ede oro ẹnamde man ẹkpeme unen kpukpru nditọisọn̄, inamke n̄kpọ m̀mê ẹto ewe orụk, erenowo m̀mê n̄wan, m̀mê ẹbuana ke ewe ido ukpono. Edi, asari ye ubahade ẹyọyọhọ ke ofụri ererimbot.

Nte afo edi owo unọmọ asari? Nte esikot fi ibụk, ifu, ndisịme, m̀mê owo ntan̄idem n̄kukụre ke ntak orụk, isua emana, sia edide eren m̀mê n̄wan, ke ntak idụt, m̀mê se ido ukpono fo onịmde ke akpanikọ? Ndi ẹtre ndinọ fi mme ifet edika ufọkn̄wed, edinam utom, edinyene ufọkidụn̄, ye mme ufọn obio eken ke ntak asari? Edieke edide ntre, didie ke afo ekeme ndiyọ?

[Ndise ke page 3]

Ndisari asari edemede usua ekpụk

[Ebiet Ẹdade N̄kpọ Ẹto]

Nina Berman/Sipa Press