Mme Mbụme Ẹtode Mme Andikot
Ndusụk ini nnyịn imesikop nditọete ẹtịn̄de m̀mê ẹbọn̄de akam ẹban̄a Obio Ubọn̄ Abasi ẹte edi ke isọn̄. Ndi ikọ emi enen?
Ke nditịm ntịn̄, emi idịghe usụn̄ N̄wed Abasi nditịn̄ mme n̄kpọ. Obio Ubọn̄ Abasi edi eke heaven. Ntem, apostle Paul ama ekeme ndiwet ete: “Ọbọn̄ eyenyan̄a mi osio ke kpukpru idiọk ndunam owo, eyenyụn̄ ekpeme mi okosịm Obio Ubọn̄ Esie ke heaven. Ẹnọ enye ubọn̄ ke nsinsi-nsinsi. Amen.”—2 Timothy 4:18; Matthew 13:44; 1 Corinth 15:50.
Ẹma ẹwụk Obio Ubọn̄ ke heaven ke 1914, ndien tutu amama owo idimenke enye idiwụk ke Paradise isọn̄ oro ẹfiakde ẹwụk m̀mê ke ebiet en̄wen ekededi. Jesus Christ edi Edidem Obio Ubọn̄ oro. Nte Edidem, Jesus enyene odudu ke idem mme angel. Ntem, nnennen itie edikara esie edi ke ubọk nnasia Abasi ke mme heaven. Mme Christian oro ẹyetde aran ẹdidiana ye enye nte ndidem ye mme oku ke heaven.—Ephesus 1:19-21; Ediyarade 5:9, 10; 20:6.
Ndi emi ọwọrọ, ndien, nte ke nnyịn ikpenyeneke aba nditịn̄ nnọ Abasi mban̄a mme eben̄e oro ẹdude ke ikpehe Akam Ọbọn̄ oro ọdọhọde ete: “Yak Ubọn̄ Fo edi. Yak inam uduak Fo; nte ẹnamde ke heaven, yak inam ke isọn̄ kpasụk ntre”? (Matthew 6:10) Ke edide isio, akam oro odot onyụn̄ osụk enyenyene ekese se ọwọrọde.
Obio Ubọn̄ Abasi ke ini iso eyenam n̄kpọ ke akpatre aban̄a isọn̄ emi, ndien emi edi se nnyịn inyenede ke ekikere ke ini ibọn̄de akam inyụn̄ idade mme ikọ ẹmi ẹbietde mme ikọ Akam Ọbọn̄ oro. Ke uwụtn̄kpọ, Daniel 2:44 ebemiso etịn̄ ete ke Obio Ubọn̄ oro ‘eyedi’ man edisobo kpukpru mme idụt eyenyụn̄ ọbọ ukara isọn̄ emi ada. Ediyarade 21:2 etịn̄ aban̄a Obufa Jerusalem emi otode ke heaven osụhọrede edi. Mme Christian 144,000 oro ẹyetde aran ẹmi ẹdidide n̄wanndọ Christ ẹnam Obufa Jerusalem. Mmọ n̄ko ẹdi nsan̄a mme ada udeme ye Jesus ke Obio Ubọn̄ oro. Ntre Ediyarade 21:2 etịn̄ aban̄a mmọ ndiwọn̄ọde ntịn̄enyịn nnọ isọn̄, osụn̄ọde ke ikpọ edidiọn̄ ọnọ anam-akpanikọ ubonowo.—Ediyarade 21:3, 4.
Tutu mmọemi ye mme utịbe utịbe prọfesi eken ẹsu, eyedot ndika iso mbọn̄ akam nnọ Jehovah Abasi ke n̄kemuyo ye mme ikọ Jesus ẹmi, “Yak Ubọn̄ Fo edi.” Edi nnyịn ikpenyene ndinyene ke ekikere nte ke Obio Ubọn̄ ididịghe ke ekondo Isọn̄ ke ataata usụn̄ifiọk. Ukara Obio Ubọn̄ odu ke heaven, idịghe ke isọn̄.
[Ebiet Ẹdade Ndise Ẹto ke page 31]
Isọn̄: Ọkọn̄ọde ke NASA photo