Nte Afo Emekeme Ndinen̄ede Mma Abasi?
“OWO ndomo kiet [ikwe] mi iso idu uwem,” ntre ke Abasi ọdọhọ. (Exodus 33:20) Ke adianade do, toto ke ini Bible uyarade ndomokiet idụhe nte ke owo ekededi ama esinyene nneme nnennen ye enye. Nte itiehe nte edi ọkpọsọn̄ n̄kpọ—idem n̄kpọ oro mîkemeke nditịbe—afo ndinyene ntotụn̄ọ ima nnọ owo oro akananam mûkwe m̀mê ndikop ikọ nnennen nto enye? Nte ẹnen̄ede ẹkeme ndinyene ima ima itie ebuana ye Andibot ekondo?
Eyịghe ndomokiet ikpenyeneke ndidu nte ke ẹkeme ndikọri ọkpọkpọ ufiop ufiop itie ebuana ye Abasi. Ke Deuteronomy 6:5, nnyịn ikot ite ke ẹkenọ idụt Israel ewụhọ ẹte: “Ma ndien Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo.” Ekem Jesus Christ ama afiak ọsọn̄ọ ibet emi ọnọ mme anditiene enye onyụn̄ adian ete: “Emi edi akamba ye ebe-iso item.” (Matthew 22:37, 38) Nte Bible ekpesịn udọn̄ ọnọ nnyịn ndima Abasi edieke utọ itie ebuana oro ekpedide se owo mîkemeke ndinyene?
Edi nte Jehovah odori enyịn nnyịn ndima enye n̄kukụre koro enye owụkde ete ẹnam ntre? Baba. Abasi okobot akpa eren ye n̄wan ye ukeme ndima enye. Owo ikenyịkke-nyịk Adam ye Eve isịn ke ima ima itie ebuana ye Andibot mmọ. Utu ke oro, Abasi ama esịn mmọ ke n̄kann̄kụk oro ọfọnde ọnọ edikọri ntotụn̄ọ ima nnọ enye. Mmọ ẹkenyene ndinam edimek—ndisịk n̄kpere Abasi m̀mê ndidianade n̄kpọn̄ enye.
Adam ye Eve ẹma ẹmek ndisọn̄ ibuot. (Genesis 2:16, 17; 3:6, 7) Nte ededi, mme andito ubon mmọ ẹyenyene ukeme ndikọri ima ima itie ebuana ye Andibot.
Ndisan̄a ye Ata Abasi
Ke uwụtn̄kpọ, ke Bible, ẹtịn̄ ẹban̄a Abraham nte edide “ufan” Abasi. (James 2:23) Edi Abraham ikedịghe n̄kukụre owo oro ekenyenede n̄kpet n̄kpet itie ebuana ye Abasi. Bible etịn̄ aban̄a ediwak mme anana mfọnmma owo eken ẹmi ẹkewụtde ata ima ẹnọ Jehovah ẹnyụn̄ ‘ẹsan̄a ye Abasi.’—Genesis 5:24; 6:9; Job 29:4; Psalm 25:14; Mme N̄ke 3:32.
Mme asan̄autom Abasi eke eset ikadaha-da ima oro ẹnyenede ẹnọ Abasi imana. Mmọ ẹkenyene ndikọkọri enye. Didie? Ebe ke ndidi ndifiọk enye ke ọkpọkpọ enyịn̄ esie, Jehovah. (Exodus 3:13-15; 6:2, 3) Ebe ke ndifiọk mban̄a edidu esie ye idaha esie nte Abasi. (Mme Hebrew 11:6) Ebe ke nditie n̄kere mban̄a mme ima ima edinam esie kpukpru ini. (Psalm 63:6) Ebe ke nditịn̄ ntotụn̄ọ ekikere mmọ nnọ Abasi ke akam. (Psalm 39:12) Ebe ke ndikpep mban̄a nti ido esie. (Zechariah 9:17) Ebe ke ndikọri eti ndịk edinam se iyatde enye.—Mme N̄ke 16:6.
Nte afo emekeme ndikabade ndi ufan Abasi nnyụn̄ nsan̄a ye enye? Edi akpanikọ, afo ukemeke ndikụt Abasi m̀mê ndikop uyoikọ esie. Kpa ye oro, Jehovah omokot fi ‘edidụn̄ ke tent esie,’ edidi ufan esie. (Psalm 15:1-5) Ntem, afo emekeme ndima Abasi. Edi didie ke afo ekeme ndikọri n̄kpet n̄kpet ye ima ima itie ebuana ye enye?