Ẹnọ Ukpep Ndinam Uduak Jehovah
“Kpep mi ndinam uduak fo, koro afo edide Abasi mi.”—PSALM 143:10, NW.
1, 2. (a) Ini ewe ke ẹkpenọ nnyịn ukpep, ndien ye nso nnennen ekikere? (b) Ntak emi Jehovah ndinọ ukpep edide akpan n̄kpọ?
KPUKPRU usen oro owo odude uwem onyụn̄ anamde n̄kpọ, enye ekeme ndikpep eti n̄kpọ. Ntre ke edi ye afo, ntre ke onyụn̄ edi ye mbon en̄wen. Edi nso isitịbe ke n̄kpa? Owo ikemeke ndikpep owo n̄kpọ m̀mê ndibọ ukpep ndomokiet ke utọ idaha oro. Bible etịn̄ in̄wan̄în̄wan̄ ete ke mme akpan̄kpa “ifiọkke baba n̄kpọ kiet.” Ifiọk ndomokiet idụhe ke Sheol, ikpîkpu udi ubonowo. (Ecclesiastes 9:5, 10) Ndi emi ọwọrọ ete ke ndinọ nnyịn ukpep, edikọ ifiọk, edi ke ikpîkpu? Oro ọkọn̄ọ ke se ẹkpepde nnyịn ye nte nnyịn idade ifiọk oro inam n̄kpọ.
2 Edieke ẹkpepde nnyịn sụk mme n̄kpọ ererimbot, nnyịn inyeneke ini iso oro edibịghide. Nte ededi, ke inemesịt, ke ẹkpep ediwak miliọn owo ke kpukpru idụt uduak Abasi ye idotenyịn edinyene nsinsi uwem. Idotenyịn emi ọkọn̄ọ ke owo ndidi se Jehovah, Ntọn̄ọ ifiọk oro ọnọde uwem, ọnọde ukpep.—Psalm 94:9-12.
3. (a) Ntak emi ẹkemede ndidọhọ ke Jesus ekedi akpa eyen ukpepn̄kpọ Abasi? (b) Nso nsọn̄ọ ke nnyịn inyene nte ke Jehovah ọyọnọ mme owo ukpep, ndien ye nso utịp?
3 Ẹma ẹkpep Akpan Abasi, nte akpa eyen ukpepn̄kpọ Esie, ndinam uduak Ete esie. (Mme N̄ke 8:22-30; John 8:28) Ekem, Jesus ama etịn̄ ete ke Ete esie eyekpep ediwak owo n̄kpọ. Nso idotenyịn odu ọnọ nnyịn ẹmi ibọde ukpep ito Abasi? Jesus ọkọdọhọ ete: “Ẹma ẹwet ke mme prọphet ẹte, Abasi eyekpep mmọ kpukpru n̄kpọ; kpukpru owo eke ẹkopde uyo Ete ẹnyụn̄ ẹbọde ukpep-n̄kpọ ẹtiene Mi. . . . Ke akpanikọ ke ndọhọ mbufo, Owo eke enịmde ke akpanikọ enyene nsinsi uwem.”—John 6:45-47.
4. Didie ke ukpepn̄kpọ Abasi otụk ediwak miliọn owo, ndien nso idotenyịn ke mmọ ẹnyene?
4 Jesus okokot oto Isaiah 54:13, emi ẹkewetde ẹnọ ndamban̄a an̄wan Abasi, kpa Zion eke heaven. Prọfesi oro enen̄ede enyene ebuana ye nditọ esie, mme mbet Jesus Christ ẹdide owo 144,000 oro ẹbonde ke spirit. Nsụhọ nditọ eke spirit ẹmi ke anam utom ọkpọsọn̄ mfịn, adade usụn̄ ke ndutịm unọ ukpep ofụri ererimbot. Nte utịp, ediwak miliọn mbon efen ẹmi ẹnamde “akwa otu owo” n̄ko ẹbọ ufọn ẹto edidi se Jehovah ekpepde. Mmọ ẹnyene n̄wọrọnda ifet ndibọ ukpep ye unana n̄kpa nditịmede edinam emi. Didie ke edi ntre? Nte ededi, mmọ ẹdu ke idaha ndibọhọ “akwa ukụt” emi asan̄ade ekpere usọp usọp nnyụn̄ ndara nsinsi uwem ke paradise isọn̄.—Ediyarade 7:9, 10, 13-17.
Akwa Nsọn̄uyo ke Edinam Uduak Abasi
5. (a) Nso idi ibuotikọ isua 1997? (b) Didie ke nnyịn ikpada edidụk mme mbonoesop Christian?
5 Ke 1997, ke se iwakde ibe esop 80,000 ke ofụri ererimbot, Mme Ntiense Jehovah ẹyesọn̄ọ ẹnyene mme ntọn̄ọikọ Psalm 143:10, NW ke ekikere: “Kpep mi ndinam uduak fo.” Oro edidi ibuotikọ isua 1997. Mme ikọ oro, ẹmi ẹdiwetde in̄wan̄în̄wan̄ ke mme Ufọkmbono Obio Ubọn̄, ẹditie nte n̄kpọ editi nte ke n̄wọrọnda itie ndibọ ukpepn̄kpọ Abasi edi ke mme mbonoesop, emi nnyịn ikemede ndibuana ke ndutịm unọ item oro akade-ka iso. Ke ini isobode ye nditọete nnyịn ke mme mbonoesop ndibọ ukpep nto Akwa Anditeme nnyịn, ekeme nditie nnyịn ke idem nte eketiede andiwet psalm, emi ekewetde ete: “Mmọ eke ẹdọhọde mi, ẹte, ‘Nnyịn iyeka ke ufọk Jehovah,’ ẹdat mi esịt.”—Psalm 122:1; Isaiah 30:20.
6. Ke mme ikọ David, nso ke nnyịn inyịme?
6 Ih, nnyịn imoyom ẹkpep nnyịn ndinam uduak Abasi utu ke ndinam uduak asua nnyịn kpa Devil m̀mê uduak mme anana mfọnmma owo. Ntre, ukem nte David, nnyịn imenyịme Abasi emi nnyịn ituakde ibuot inọ inyụn̄ inamde n̄kpọ inọ: “Koro afo edide Abasi mi: spirit fo ọmọfọn, yak enye ada mi aka ke isọn̄ edinen ido.” (Psalm 143:10) Utu ke ndiyom ndibuaha ye mbon oro mînamke akpanikọ, David ama emek ndidu ke itie oro ẹtuakde ibuot ẹnọ Jehovah. (Psalm 26:4-6) Ye spirit Abasi ndida enye usụn̄, David ama ekeme ndisan̄a ke usụn̄ edinen ido.—Psalm 17:5; 23:3.
7. Didie ke spirit Abasi anam utom ke esop Christian?
7 N̄kponn̄kan David, Jesus Christ, ama ọnọ mme apostle esie nsọn̄ọ nte ke edisana spirit eyekpep mmọ kpukpru n̄kpọ onyụn̄ afiak eti mmọ kpukpru n̄kpọ oro enye eketịn̄de ọnọ mmọ. (John 14:26) Ọtọn̄ọde ke Pentecost ka iso, Jehovah ke ayarade mme “nditụn̄ọ n̄kpọ Abasi” ẹmi ẹdude ke ediwewet Ikọ esie sụn̄sụn̄ ọnọ nnyịn. (1 Corinth 2:10-13) Enye anam emi ebe ke usụn̄ oro ẹkụtde ke enyịn oro Jesus okokotde “asan̄autom emi anamde akpanikọ, onyụn̄ enyenede ọniọn̄.” Enye ọnọ udia eke spirit oro ẹsinọde ke ndutịm ukpepn̄kpọ ke mme esop ikọt Abasi ke ofụri ererimbot.—Matthew 24:45-47.
Ẹkpep Uduak Jehovah ke Mme Mbonoesop Nnyịn
8. Ntak emi edibuana ke Ukpepn̄kpọ Enyọn̄-Ukpeme edide akpan n̄kpọ ntre?
8 Mme n̄kpọ ẹdude ke Ukpepn̄kpọ Enyọn̄-Ukpeme eke urua ke urua ke esop ẹsiwak nditịn̄ mban̄a edida mme edumbet Bible nsịn ke edinam. Emi ke akpanikọ an̄wam nnyịn ndiyọ mme editịmede esịt eke uwem. Ke mme ukpepn̄kpọ eken ẹsineme mme ntotụn̄ọ akpanikọ eke spirit m̀mê mme prọfesi Bible. Ẹkpep nnyịn ekese n̄kpọ didie ntem ke mme utọ ukpepn̄kpọ oro! Ke ediwak idụt mme Ufọkmbono Obio Ubọn̄ ẹsiyọhọ kpak ke mme mbonoesop ẹmi. Edi ke ediwak idụt, ibat mme andidụk mbonoesop omosụhọde. Afo ekere ke nso idi ntak? Nte ekeme ndidi nte ke ndusụk owo ẹyak utom idịbi udia ọbiọn̄ọ mmọ ndisop idem ọtọkiet kpukpru ini ‘man ẹdemede kiet eken ẹnọ ima ye nti utom’? Mîdịghe nte ekeme ndidi ẹsibiat ediwak hour ke mme edinam ebuana otuowo m̀mê ke ndise ekebe ndise, anamde ndutịm afaha akaha ndidụk kpukpru mbonoesop? Ti item odudu spirit ẹnọde ke Mme Hebrew 10:23-25. Nte edisop idem ọtọkiet man ibọ item otode Abasi ikam inen̄ekede idi akpan n̄kpọ idahaemi nte nnyịn ‘ikụtde nte usen oro asan̄ade ekpere’?
9. (a) Didie ke Esoputom ekeme nditịm nnyịn idem nnọ utom ukwọrọikọ? (b) Nso ikpedi edu nnyịn kaban̄a edinọ ikọ ntiense?
9 Kiet ke otu ata akpa utom nnyịn edi ndinam utom nte mme asan̄autom Abasi. Ẹtịm Esoputom man ekpep nnyịn nte nnyịn ikemede ndinam emi uforo uforo. Nnyịn imekpep nte ikemede ndisobo ye mme owo, se ikpetịn̄de, usụn̄ emi ikpanamde n̄kpọ ke ini ẹnọde n̄kpan̄utọn̄, ye se ikpanamde idem ke ini mme owo ẹsịnde etop nnyịn. (Luke 10:1-11) Nte ẹnemede ẹnyụn̄ ẹnamde-nam ẹwụt mme usụn̄ oro ẹnyenede uforo ke mbonoesop eke urua ke urua emi, ẹtịm nnyịn idem mfọn mfọn ndisobo ye mme owo idịghe n̄kukụre ke ini isan̄ade ke ufọk ke ufọk edi n̄ko ke ini ikwọrọde ikọ ke mme efak, ke mme itie ubon moto, ke n̄kpọisan̄ ofụri owo, ke mme an̄wambehe ubomofụm, ke mme itie mbubehe, m̀mê ke mme ufọkn̄wed. Ke n̄kemuyo ye eben̄e nnyịn oro, “Kpep mi ndinam uduak fo,” nnyịn iyada kpukpru ifet ndinam nte Eteufọk nnyịn eketemede ete: “Yak un̄wana mbufo ayama ke iso owo, man mmọ . . . ẹtoro Ete mbufo emi odude ke heaven.”—Matthew 5:16.
10. Didie ke nnyịn ikeme ndinen̄ede n̄n̄wam ‘mbon oro ẹdotde’?
10 Ke mme utọ mbonoesop oro, ẹkpep nnyịn n̄ko ndinam mbon en̄wen ẹdi mme mbet. Ndondo oro ikụtde owo enyenede udọn̄ m̀mê inịmde n̄wed, uduak nnyịn ke ini inamde mfiakn̄ka edi nditọn̄ọ ukpepn̄kpọ Bible. Ke usụn̄ifiọk kiet, emi ebiet mme mbet ‘ndidan̄ ye mbon oro ẹdotde’ man ẹkpep mmọ mme n̄kpọ oro Jesus eketemede. (Matthew 10:11; 28:19, 20) Sia inyenede ata nti un̄wam, utọ nte n̄wed Ifiọk Oro Adade Osịm Nsinsi Uwem, ẹnen̄ede ẹtịm nnyịn idem ndinam utom nnyịn ọyọhọ ọyọhọ. (2 Timothy 4:5) Ke urua kiet kiet nte afo odụkde Esoputom ye Ufọkn̄wed Utom Ukara Abasi, domo ndimụm n̄kpọ ndien ekem ada mme akpan n̄kpọ un̄wam oro ẹdiwụtde ke afo edi kiet ke otu mme asan̄autom Abasi ẹmi ẹtịmde ẹdot, ẹmi ẹnamde uduak esie, anam n̄kpọ.—2 Corinth 3:3, 5; 4:1, 2.
11. Didie ke ndusụk owo ẹwụt mbuọtidem ke mme ikọ ẹdude ke Matthew 6:33?
11 Edi uduak Abasi nte nnyịn ‘ika iso iyom Obio Ubọn̄ esie ye edinen ido esie.’ (Matthew 6:33) Bụp idemfo, ‘Didie ke ami ndida edumbet emi nnam n̄kpọ edieke mme n̄kpọ oro utom mi [m̀mê eke nsan̄andọ mi] oyomde atuahade ye edidụk mme mbonoesop?’ Ediwak mbon oro ẹkọride ẹsịm ọyọhọ idaha ke n̄kan̄ eke spirit ẹyenam usio-ukot ndinyene nneme ye mme eteutom mmọ mban̄a n̄kpọ emi. Asan̄autom uyọhọ ini kiet ama anam eteutom esie ọfiọk ete ke imọ imoyom ini ke urua ke urua man idụk mme mbonoesop. Enye ama enyịme eben̄e oro. Edi ke enyenede udọn̄ ndifiọk se ẹsikpepde ke mme mbonoesop, enye ama eben̄e ndidụk. Do enye ama okop ẹnọde ntọt ẹban̄a mbono district. Nte utịp, eteutom oro ama anam ndutịm ndibiat ofụri usen oro ke itie mbono. Nso ke afo ekpep oto uwụtn̄kpọ emi?
Mme Ete ye Eka Ẹdide Mme Abak Abasi Ẹkpep Mmọ Uduak Jehovah
12. Man ẹkpep nditọwọn̄ uduak Jehovah, nso ke mme Christian ete ye eka ẹkpenam ke ime ye iwụk?
12 Edi mme mbonoesop ye ikpọ mbono idịghe n̄kukụre ndutịm ẹnamde man ẹnọ ukpep ndinam uduak Abasi. Ẹwụk mme ete ye eka oro ẹbakde Abasi ndinọ ukpep, ntụnọ, nnyụn̄ mbọk nditọ mmọ nditoro Jehovah nnyụn̄ nnam uduak esie. (Psalm 148:12, 13; Mme N̄ke 22:6, 15) Ndinam ntre oyom ete nnyịn ida “nditọwọn̄” nnyịn ika mme mbonoesop ke ebiet mmọ ẹkemede ‘ndikpan̄ utọn̄ nnyụn̄ n̄kpep n̄kpọ,’ edi nso kaban̄a ndida ndisana uwetn̄kpọ nnọ mmọ ukpep ke ufọk? (Deuteronomy 31:12; 2 Timothy 3:15) Ediwak ubon ẹsịn ifịk ẹtọn̄ọ ndutịm ukpepn̄kpọ Bible ubon ofụri ini, edi ibịghike ke oro ebede mmọ inamke enye ofụri ini mîdịghe ẹtre enye ofụri ofụri. Nte afo emenyene utọ ifiọk n̄kpọntịbe oro? Nte afo emekere ke ndidọhọ ẹnyene utọ ukpepn̄kpọ ofụri ini oro idotke mîdịghe nte ke ubon fo okpụhọde akamba akamba anamde enye idikam inyeneke ufọn inọ fi? Se ededi oro idaha edide, mbufo mme ete ye eka mbọk ẹfiak ẹdụn̄ọde nti ibuotikọ oro “Ọsọn̄urua Akpa Nnyịn eke Spirit” ye “Mme Utịp Edisọn̄ọ Nyịre” ke Enyọn̄-Ukpeme eke August 1, 1995.
13. Didie ke mme ubon ẹkeme ndibọ ufọn nto edineme itien̄wed eke usen ke usen?
13 Ẹsịn udọn̄ ẹnọ mme ubon ndinam edi ido ndida Ẹdụn̄ọde N̄wed Abasi ke Usen ke Usen nneme itien̄wed eke usen ke usen. Edikam n̄kot itien̄wed ye mme utịn̄ikọ edi eti n̄kpọ, edi edineme itien̄wed oro nnyụn̄ nda enye mbuan enyene ufọn akan. Ke uwụtn̄kpọ, edieke ẹnemede Ephesus 5:15-17, mbonubon ẹkeme ndikọk ibuot ke nte ‘ẹkpedepde ifet’ ẹnọ ukpepn̄kpọ idemowo, ndibuana ke ndusụk orụk utom uyọhọ ini, ẹnyụn̄ ẹse ẹban̄a mme utom ukara Abasi eken. Ih, ubon ndineme itien̄wed eke usen ke usen ekeme ndinam owo kiet m̀mê ediwak owo “ẹtịm ẹfiọk se Ọbọn̄ amade.”
14. Deuteronomy 6:6, 7 owụt ke mme ete ye eka ẹkpenyene ndidi nso utọ mme andikpep, oyomde nso?
14 Mme ete ye eka ẹnyene ndidi ifịk ifịk mme andikpep nditọ mmọ. (Deuteronomy 6:6, 7) Edi emi idịghe sụk mbubehe edinọ nditọ mmọ utịn̄ikọ m̀mê ndiduari mmọ. Oyom ete ye eka n̄ko ẹkpan̄ utọn̄, ke usụn̄ emi mmọ ẹyekeme nditịm mfiọk mme n̄kpọ oro oyomde ẹnam ẹn̄wan̄a, ẹnam ẹfiọk, ẹnọ uwụtn̄kpọ, m̀mê ẹfiak ẹtịn̄. Ke ubon Christian kiet, ete ye eka ẹsidemede nneme ebe ke ndisịn udọn̄ nnọ nditọ mmọ ndibụp mme mbụme mban̄a mme n̄kpọ oro mîn̄wan̄ake mmọ m̀mê oro ẹtịmerede mmọ esịt. Ntem ke mmọ ẹkedifiọk ẹte ke eyeneren kiet ama enyene mfịna ndifiọk nte ke Jehovah inyeneke ntọn̄ọ. Ete ye eka oro ẹma ẹkeme ndida mme ntọt ẹtode mme n̄wed Watch Tower Society n̄wụt nte ke ẹnyịme ẹte ke ini ye ikpaenyọn̄ inyeneke utịt. Oro ama anam n̄kpọ oro an̄wan̄a, ndien eyen mmọ ama okop uyụhọ. Ntre ẹda ini ndibọrọ mme mbụme nditọ mbufo in̄wan̄în̄wan̄ ẹnyụn̄ ẹbọrọ ẹto N̄wed Abasi, ẹn̄wamde mmọ ndikụt nte ke ndikpep ndinam uduak Abasi ekeme ndinen̄ede nnọ uyụhọ. Nso efen ke ẹkpep ikọt Abasi—n̄kpri ye ikpọ—mfịn?
Ẹkpep Ndima Nnyụn̄ N̄n̄wana
15. Ini ewe ke ẹkeme ndisịn ata ima oro inyenede inọ nditọete nnyịn ke udomo?
15 Ke n̄kemuyo ye obufa ewụhọ Jesus, ‘Abasi ekpep nnyịn ndima kiet eken.’ (1 Thessalonica 4:9) Ke ini ifụre odude mme n̄kpọ ẹnyụn̄ ẹkade iso nte ọfọnde, nnyịn imekeme ndikere ke nnyịn imama kpukpru nditọete nnyịn. Edi nso isitịbe ke ini ndutan̄uyo odude m̀mê ke ini se Christian etịn̄de m̀mê anamde ayatde nnyịn esịt? Ke utọ idaha emi ẹkeme ndisịn nte ima nnyịn edide ataata ima ke udomo. (Men 2 Corinth 8:8 domo.) Nso ke Bible ekpep nnyịn ndinam ke mme utọ idaha oro? N̄kpọ kiet edi ndidomo ndiwụt ima ke ọyọhọ udomo. (1 Peter 4:8) Utu ke ndiyom mme ufọn idem nnyịn, iyatde esịt iban̄a n̄kpri ndudue, mîdịghe idade owo udu, nnyịn ikpenyene ndinam utom ndinam ima ofụk ekese ndudue. (1 Corinth 13:5) Nnyịn imọfiọk ite ke emi edi uduak Abasi, koro emi edi se Ikọ esie ekpepde.
16. (a) Nso orụk ekọn̄ ke ẹkpep mme Christian ndin̄wana? (b) Didie ke ẹtịm nnyịn idem?
16 Ke adan̄aemi ediwak owo mîkpabuanke ima ye ekọn̄, eke ukperedem emi edi n̄kpọ efen oro ẹkpepde nnyịn, edi edi san̄asan̄a orụk ekọn̄. David ama ọfiọk nte oyomde enye eberi edem ke Jehovah man ekpep enye nte akpan̄wanade ekọn̄, okposụkedi ke eyo esie oro ama abuana ata edin̄wana ye mme asua Israel. (1 Samuel 17:45-51; 19:8; 1 Ndidem 5:3; Psalm 144:1) Nso kaban̄a en̄wan nnyịn mfịn? N̄kpọekọn̄ nnyịn idịghe eke obụkidem. (2 Corinth 10:4) Eke nnyịn edi en̄wan eke spirit, emi oyomde ẹtịm nnyịn idem ye n̄kpọekọn̄ eke spirit. (Ephesus 6:10-13) Ebede ke Ikọ esie ye ikọt esie oro enye atan̄de obok ọtọkiet, Jehovah ekpep nnyịn ndin̄wana ekọn̄ eke spirit oro okụtde unen.
17. (a) Mme usụn̄ ewe ke Devil ada ndiwọn̄ọde nnyịn n̄kpọn̄ usụn̄? (b) Nso ke nnyịn ke ọniọn̄ ikpenyene ndifep?
17 Ke mme abian̄a abian̄a, n̄kari n̄kari usụn̄, Devil esiwak ndida mme n̄kpọ oro mîdịghe akpan n̄kpọ ererimbot emi, mbon nsọn̄ibuot, ye mbon eken oro ẹbiọn̄ọde akpanikọ nnam n̄kpọ ke ukeme ndinam nnyịn iwọn̄ọde ibịne mme n̄kpọ oro mîdịghe akpan n̄kpọ. (1 Timothy 6:3-5, 11; Titus 3:9-11) Etie nte n̄kpọ eke enye okụtde ete ke imọ ikemeke ndikan nnyịn ke ndida nnennen usụn̄ ndi iso ye iso, ntre enye an̄wana ndinam nnyịn ituak ukot iduọ ebe ke ndinam nnyịn isụk uyo iban̄a mme n̄kpọ inyụn̄ ibụp mme mbụme oro mîsịneke ifiọk, ẹmi mînyeneke ufọn ke n̄kan̄ eke spirit. Nte mme an̄wanaekọn̄ oro ẹdude ke ukpeme, nnyịn ikpenyene ndikam ndu ke ukpeme mban̄a mme utọ n̄kpọndịk oro ukem nte nnyịn idude kaban̄a ibụmede en̄wan.—1 Timothy 1:3, 4.
18. Nso ke nditre ndidu uwem nnọ idem nnyịn enen̄ede abuana?
18 Nnyịn isịnke udọn̄ inọ mme udọn̄ owo m̀mê ndinam uduak mme idụt. Jehovah ekpep nnyịn ebe ke uwụtn̄kpọ Jesus nte ke inaha nnyịn idu uwem aba inọ idem nnyịn; utu ke oro, nnyịn ikpenyene ndinyene ukem ekikere oro Christ Jesus ekenyenede inyụn̄ idu uwem ndinam uduak Abasi. (2 Corinth 5:14, 15) Ke ini edem, ekeme ndidi nnyịn ikodu oburobụt uwem unana ukpan, itaharede ọsọn̄urua ini. Mme uyom uyom usọrọ, mbuba un̄wọn̄ mmịn, ye oburobụt ido ẹdi edu idiọk ererimbot emi. Kemi ẹkpepde nnyịn mi ndinam uduak Abasi, nte nnyịn ikopke inemesịt ndidi se ẹbaharede ẹkpọn̄ mbiara ererimbot emi? Ntre ẹyak nnyịn in̄wana ọkpọsọn̄ en̄wan eke spirit man ifep ndibuana ke mme ndedehe edinam ererimbot ẹmi.—1 Peter 4:1-3.
Ẹkpep Nnyịn Man Ibọ Ufọn
19. Ndibọ ukpep kaban̄a uduak Jehovah ndien ekem inam enye edida okosụn̄ọ ke mme ufọn ewe?
19 Oyom ifiọk nte ke edikpep oro ẹkpepde nnyịn ndinam uduak Jehovah ọyọnọ nnyịn akamba ufọn. Nte an̄wan̄ade, ana nnyịn inam udeme nnyịn ke nditịm nnọ ntịn̄enyịn man otodo ikpep n̄kpọ ndien ekem inam mme item oro ibọde ito Eyen esie ọkọrọ ye Ikọ esie ye ikọt esie oro ẹbohode ọtọkiet. (Isaiah 48:17, 18; Mme Hebrew 2:1) Ebede ke nnyịn ndinam ntre, nnyịn iyenyene nsọn̄idem ndisọn̄ọ nda ke mme ini afanikọn̄ ẹmi nnyụn̄ nyọ mfịna ẹmi ẹdide ke iso. (Matthew 7:24-27) Idem idahaemi, nnyịn iyenem Abasi esịt ebe ke ndinam uduak esie iyenyụn̄ inyene mbuọtidem nte ke enye eyeyere mme akam nnyịn. (John 9:31; 1 John 3:22) Ndien nnyịn iyenyene ata inemesịt.—John 13:17.
20. Edifọn nditie n̄kere nso nte afo okụtde ibuotikọ isua ke ofụri 1997?
20 Ke isua 1997, nnyịn inyenyene ifet ndien ndien ndikot nnyụn̄ nneme ibuotikọ isua, Psalm 143:10, NW: “Kpep mi ndinam uduak fo.” Nte nnyịn inamde emi, ẹyak nnyịn ida ndusụk ifet nditie n̄kere mme ndutịm oro Abasi anamde man ẹkpep nnyịn, nte ẹwụtde ke enyọn̄ emi. Ndien ẹyak nnyịn ida utọ editie n̄kere mme ikọ oro nte se idemerede nnyịn ndinam n̄kpọ ke n̄kemuyo ye eben̄e oro, ifiọkde ite ke “owo eke anamde se Abasi amade ododu ke nsinsi.”—1 John 2:17.
Didie ke Afo Ọkpọbọrọ?
◻ Mmanie ke ẹkpep mfịn ndinam uduak Jehovah?
◻ Didie ke Psalm 143:10 ekpenyene nditụk nnyịn ke 1997?
◻ Didie ke ẹkpep nnyịn ndinam uduak Jehovah?
◻ Nso ke ẹyom ẹto mme Christian ete ye eka ke ndikpep nditọ mmọ?