Ndiyak Ekese N̄kpọ Atak Kaban̄a Se Ikponde Ikan

NTE JULIUS OWO BELLO OBỤKDE

N̄kedi owo Aladuraa ke isua 32. Mma nnịm ke akpanikọ nte ke ukọk udọn̄ọ mbuọtidem ye akam ẹyekọk mme mfịna mi ẹnyụn̄ ẹkọk kpukpru udọn̄ọ. Akananam n̄kedepke ibọk ndomokiet, ndepke ukpọk ibọk ndisụhọde ubiak. Ke mme isua oro, owo ndomokiet ke ubon mi ikesikaha ufọkibọk. Ke ini eyen mi ekededi ọkọdọn̄ọde, mma nsibọn̄ akam nnọ mmọ uwemeyo ye okoneyo tutu idem ọsọn̄ mmọ. N̄kenịm ke akpanikọ nte ke Abasi ama esiyere akam mi onyụn̄ ọdiọn̄ mi.

N̄KEDI owo Egbe Jolly, ata ọwọrọiso n̄ka ke Akure, obio kiet ke edem usoputịn Nigeria. Mme ufan mi ẹkenyene n̄kpọ ẹkan ẹnyụn̄ ẹdi mbon oro ẹnyenede odudu ẹkan ke obio nnyịn. Deji, ọbọn̄ Akure, ama esiwak ndidi ndise mi ke ufọk mi.

Ami n̄kedi ọdọ uwak iban n̄ko, nnyenede iban itiokiet ye ediwak ibanesa. Mbubehe mi ama enyene uforo. Kpukpru n̄kpọ ẹma ẹsan̄a nte ọfọnde ye ami. Edi, ukem nte owo urua oro ke n̄ke Jesus aban̄ade pearl, mma n̄kụt n̄kpọ emi eketịmde ọsọn̄ urua emi akanamde mi n̄kpọn̄ ition ke otu iban mi, ibanesa mi, ufọkabasi, n̄ka, ye uwọrọiso ererimbot ke ndida n̄kpụhọ ye enye.—Matthew 13:45, 46.

Nte N̄kasan̄ade Ndi Owo Aladura

N̄kebemiso n̄kop n̄kpọ mban̄a mbon Aladura ke 1936, ke ini n̄kedide isua 13 ke emana. Ufan kiet ekekerede Gabriel ama asian mi ete: “Edieke afo akade Ufọkabasi Christ Apostolic, oyokop nte Abasi etịn̄de ikọ.”

Mma mbụp enye nte: “Didie ke Abasi esitịn̄ ikọ?”

Enye ama ọdọhọ ete: “Di, ndien oyokụt.”

Mma nnyene udọn̄ ndikpan̄ utọn̄ nnọ Abasi. Ntre okoneyo oro, mma nsan̄a ye Gabriel n̄ka ufọkabasi oro. Ekpri ufọk oro ama ọyọhọ ye mme andituak ibuot. Otu oro ẹma ẹtọn̄ọ ndikwọ ikwọ ẹte: “Mbufo ẹdi! Mi ke Jesus odu!”

Ke ini ikwọ emi, owo kiet ama ofiori ete: “Edisana spirit, sụhọde di!” Owo efen ama amia n̄kanika, ndien otu oro ẹdop uyo. Ekem, n̄wan kiet ama ọtọn̄ọ nditịn̄ ikọ usọp usọp ke esen usem. Ke mbuari enye ama ofiori ete: “O mbufo, ẹkpan̄ utọn̄ ẹkop etop Abasi! Ntem ke Abasi ọdọhọ ete: ‘Ẹbọn̄ akam ẹban̄a mme atautop man mmọ ẹdiwot mme owo!’” Idaha oro okodude ama aduai owo idem.

Mma nnịm ke akpanikọ nte ke Abasi akada enye etịn̄ ikọ, ntre ke isua oro eketienede mma nna baptism nte andibuana ke Ufọkabasi Christ Apostolic.

Ntọn̄ọ Ntọn̄ọ Edisobo ye Mme Ntiense Jehovah

Ke 1951, mma mbọ idem magazine Enyọn̄-Ukpeme kiet nto Ntiense kiet emi ekekerede Adedeji Boboye. Se magazine oro eketịn̄de aban̄a ama edemede udọn̄, ntre mma ntobo enye nnyụn̄ nsikot enye kpukpru ini. Ke 1952, mma ndụk mbono district usen inan̄ eke Mme Ntiense Jehovah ke Ado Ekiti.

Se n̄kokụtde ke mbono oro ama otụk mi ke idem. Mma nnen̄ede n̄kere mban̄a edikabade ndi kiet ke otu Mme Ntiense Jehovah edi mma mbiat ekikere oro mfep. Mfịna mi ekedi nte ke n̄kenyene iban ita ye n̄wanesa kiet ke ini oro. Mma n̄kere ke ndikemeke ndidụn̄ ye n̄wan kiet kpọt.

Ke mfiakde nnyọn̄ Akure, mma ndọhọ Adedeji nte okûsudi edem mi aba, ndien ami n̄kafiakke ntobo Enyọn̄-Ukpeme mi aba. Mma nsịn idem etieti ke ufọkabasi mi. Mma n̄kere nte, kamse, Abasi ọmọdiọn̄ mi tọn̄ọ nte n̄kọtọn̄ọ ndika Ufọkabasi Christ Apostolic. Mmọdọ iban ita nnyụn̄ nnyene ediwak nditọ. Mmọbọp ufọk idemmi. Akananam n̄kaha ufọkibọk. Sia etiede nte ke Abasi esiyere akam mi, ntak ndikpụhọ ido ukpono mi-e?

Akwa Uwọrọiso Asan̄ade ye Edikpu

Mma ntọn̄ọ ndisitịp ediwak okụk nnọ ufọkabasi mi. Ikebịghike ẹma ẹmek mi adaidaha ufọkabasi, kpa ifetutom oro akan̄wamde mi ndikụt se ikade iso ke ufọkabasi. Se n̄kokụtde ama etịmede mi ekikere. Pastọ ye “mme prọfet” ẹma ẹma okụk; idiọkitọn̄ mmọ ama etek mi esịt.

Ke uwụtn̄kpọ, ke March 1967 nsio nsio iban ẹma ẹman nditọ ita ẹnọ mi. Ekedi ido ufọkabasi oro ndinam usọrọ usio eyen enyịn̄. Ntre mma nda mme enọ—iyak, mmịn osokoro ntantan, ye inịn̄înịn̄e mmịn—nsọk pastọ ke nditịm idem nnọ usọrọ oro.

Ke usen edinam oro ke ufọkabasi, pastọ ama ada ke iso ofụri esop etịn̄ ete: “Mbon inyene ke ufọkabasi emi ẹnam idem akpa mi. Mmọ ẹyom ẹnam usọrọ usio enyịn̄, edi ukụre se mmọ ẹdade ẹdi edi inịn̄înịn̄e mmịn ye iyak. Unam idụhe! Ebot idụhe! Ẹkam ẹkere! Cain akada ikpọ bia anam uwa ọnọ Abasi, kpa ye oro Abasi ikọbọhọ uwa oro sia iyịp mîkodụhe. Abasi oyom mme n̄kpọ ẹmi ẹnyenede iyịp. Abel akada unam edi, ndien ẹma ẹnyịme uwa esie.”

Ke n̄kopde oro, mma ndaha nda nnyụn̄ nsan̄a iyatesịt iyatesịt n̄wọrọ. Nte ededi, n̄kosụk n̄kaka ufọkabasi oro. Ediwak ini, mma nsibiat ekese ini ndidia usọrọ nnyụn̄ ndụk mme mbono n̄ka mi. Ndusụk ini mma nsidụk mme mbonoesop ke Ufọkmbono Obio Ubọn̄, ndien mma mfiak ntobo Enyọn̄-Ukpeme mi. Edi, n̄kosụk mben̄eke idem ndikabade ndi kiet ke otu Mme Ntiense Jehovah.

Ubiere Ndinam N̄kpọ Jehovah

Ini ama edi ọnọ mi ndinam akwa ukpụhọde ke 1968. Usen kiet mma ntọn̄ọ ndikot ibuotikọ kiet ke Enyọn̄-Ukpeme oro eketịn̄de aban̄a ibak ibak ukọbọ Mme Ntiense Jehovah ke Malawi. Enye ama etịn̄ aban̄a eyenan̄wan isua 15 emi ẹkebọpde ẹdian ke eto ẹnyụn̄ ẹdan̄ ke n̄kanubọk utịm ikotiokiet ke ntak emi enye mîkenyịmeke ndikan̄ mbuọtidem esie. Ke ntak ọkpọsọn̄ ndịk, mma nyak magazine oro nnịm, edi mma n̄ka iso ndikere n̄kpọ emi. Mma mfiọk nte ke idụhe eyenan̄wan ndomokiet ke ufọkabasi mi emi okpowụtde utọ mbuọtidem oro. Ekem ke mbubịteyo oro, mma mmen magazine oro nnyụn̄ mfiak n̄kot page oro.

Mma ntọn̄ọ ndikpep Bible ifịk ifịk. Nte n̄kọkọride ke ifiọk, mma ntọn̄ọ ndikụt adan̄a nte ufọkabasi okotụnde nnyịn usụn̄. Nte ekedide ke eset, mme oku nnyịn ‘ẹkenam oburobụt ido.’ (Hosea 6:9) Mme utọ owo oro ẹma ẹdu ke otu mme prọfet emi Jesus okodụride owo utọn̄ aban̄a! (Matthew 24:24) N̄kọbuọtke idem aba ke mme n̄kukụt ye ke mme utom odudu mmọ. Mma mbiere ndikịbe mbọhọ nsunsu ido ukpono nnyụn̄ n̄n̄wam mbon en̄wen ẹnam ukem oro.

Mme Ukeme Ndinam Mi N̄kûkpọn̄ Ufọkabasi

Ke ini mme adaidaha ufọkabasi ẹkefiọkde ẹte ke mmebiere ndikpọn̄ ufọkabasi, mmọ ẹma ẹdọn̄ isụn̄utom ẹdikpe mi ubọk. Mmọ ikoyomke nditaba akpan owo emi esitịpde okụk. Mmọ ẹma ẹdọhọ ke iyanam mi ndi Baba Egbe, kpa etubom ke kiet ke otu mme ufọkabasi Christ Apostolic ke Akure.

Mma nsịn ndinyịme nnọ mmọ nnyụn̄ nsian mmọ ntak. Mma ndọhọ nte: “Ufọkabasi esisu nsu ọnọ nnyịn. Mmọ ẹdọhọ ke kpukpru nti owo ẹdika heaven. Edi mmokot Bible, mmonyụn̄ nnịm ke akpanikọ nte ke owo 144,000 kpọt ẹdika heaven. Nti owo eken ẹdidụn̄ ke paradise isọn̄.”—Matthew 5:5; Ediyarade 14:1, 3.

Pastọ ufọkabasi oro ama odomo ndinam iban mi ẹwọn̄ọde ẹn̄wana ye ami. Enye ama ọdọhọ mmọ ete ẹkpan Mme Ntiense Jehovah ndidụk ufọk nnyịn. Kiet ke otu iban mi ama esịn ibọk n̄kpa ke udia ọnọ mi. Iba ke otu mmọ ẹma ẹtọt mi ẹban̄a n̄kukụt oro mmọ ẹkekụtde ke ufọkabasi. N̄kukụt oro okowụt ete ke nyakpa edieke n̄kpọn̄de ufọkabasi. Kpa ye oro, mma n̄ka iso ndinọ iban mi ikọ ntiense, nnọde mmọ ikot ndisan̄a ye ami n̄ka mme mbonoesop. Mma ndọhọ nte: “Mbufo ẹyekụt mme ebe efen do.” Nte ededi, owo mmọ ndomokiet ikowụtke udọn̄, ndien mmọ ẹma ẹka iso ẹdomo ndibiọn̄ọ mi.

Ke akpatre, ke February 2, 1970, ke ini n̄kọnyọn̄de isan̄ oro n̄kanamde n̄ka mbọhọ obio ndi, mma n̄kụt ufọk mi anade ukpọk. Kpukpru iban mi ye nditọ ẹma ẹfen̄e ẹnyọn̄ọ.

Ndisọn̄ọ Nyịre ye N̄wan Kiet

Mma n̄kere nte: ‘Idahaemi mmekeme ndinen̄ede idaha ndọ mi.’ Mma n̄kot akpa n̄wan mi, Janet, nte afiak ọnyọn̄ edi ufọk. Enye ama enyịme. Nte ededi, ubon esie ẹma ẹbiọn̄ọ ekikere oro idiọk idiọk. Ke ini iban mi eken ẹkekopde ẹte ke mma ndọhọ Janet ọnyọn̄ edi, mmọ ẹma ẹka ufọk ete esie ẹyom ndikamia enye. Do ubon esie ẹma ẹkot mi ndụk ndi.

N̄kpọ nte owo 80 ẹkedu ke mbono oro. Eyeneka ete Janet, emi ekedide ibuot ufọk, ama ọdọhọ ete: “Edieke afo oyomde ndifiak ndọ eyen nnyịn, do ana afo afiak ada iban eken. Edi edieke oyomde ndisụk n̄ka obufa ido ukpono fo oro nnyụn̄ ndọ n̄wan kiet, do ana afo oyom n̄wan efen. Edieke afo afiakde ada Janet, iban fo eken ẹyewot enye, ndien nnyịn iyomke eyen nnyịn akpa.”

Ke ẹma ẹketịn̄ ekese ikọ, ubon oro ama edifiọk ete ke mma mbiere ndidọ n̄wan kiet kpọt. Ke akpatre mmọ ẹma ẹsion̄o idem ẹfep. Eyeneka ete ama ọdọhọ ete: “Nnyịn idibọhọ fi n̄wan fo. Afo emekeme ndida enye.”

Ke May 21, 1970, ami ye Janet ima idọ ndọ nte ekemde ye ibet. Usen usụkkiet ke oro ebede mma nna baptism nte kiet ke otu Mme Ntiense Jehovah. Ke December isua oro, Janet n̄ko ama ana baptism.

Ndidara Edidiọn̄ Jehovah

Mbon akani ufọkabasi nnyịn ẹketịn̄ prọfesi ẹte ke edieke nnyịn ikabarede idi Mme Ntiense, nnyịn iyakpa. Oro ekedi ke n̄kpọ nte isua 30 ẹmi ẹkebede. Idem edieke n̄kpade idahaemi, nte edidi ke ntak oro n̄kakabarede ndi kiet ke otu Mme Ntiense Jehovah? Edieke n̄wan mi akpade idahaemi, ndi owo ndomokiet ekeme ndidọhọ ke edi koro enye akakabarede edi kiet ke otu Mme Ntiense Jehovah?

Mmesịn ukeme ndiwụt nditọ mi 17 usụn̄ akpanikọ. Okposụkedi ediwak mmọ ẹma ẹkekponi ke ini n̄kakabarede ndi Ntiense, mma nsisịn udọn̄ nnọ mmọ ndikpep Bible nnyụn̄ nda mmọ n̄ka mme mbonoesop ye mme mbono. Edi n̄kpọ idatesịt ọnọ mi ndinam ition ke otu mmọ ẹnam n̄kpọ Jehovah ye ami. Kiet anam utom ye ami nte ebiowo ke esop. Efen edi asan̄autom unamutom ke n̄kpet n̄kpet esop. Iba ke otu nditọ mi ẹnam utom nte mme asiakusụn̄ ofụri ini.

Ke mfiakde nse edem, idem esikpa mi aban̄a mfọnido Jehovah oro owo mîdotke ke ndin̄wam mi n̄kabade ndi asan̄autom esie. Mme ikọ Jesus ẹmi ẹdi akpanikọ didie ntem: “Baba owo kiet ikemeke nditiene Mi, ibọhọke Ete emi ọkọdọn̄de Mi odudi enye edi”!—John 6:44.

[Ikọ idakisọn̄]