Mme Mbụme Ẹtode Mme Andikot
Nte ẹkeme ndidọhọ ke obufa ifiọk eke ndondo emi oro ẹnyenede ẹban̄a ikọ oro “emana” ke Matthew 24:34 ọnọ ekikere nte ke utịt editịm n̄kpọ emi ekeme ndisụk mbịghi ke ini iso?
Ke akpanikọ idịghe ntre. Ke edide isio ye oro, obufa ifiọk eke ndondo emi oro aban̄ade n̄kpọ emi ekpenyene ndin̄wam nnyịn ika iso idori enyịn kpukpru ini iban̄a utịt. Didie ke edi ntre?
Ọfọn, nte Enyọn̄-Ukpeme eke November 1, 1995, akanamde an̄wan̄a, Jesus akada ubak udịmikọ oro “emana emi” etịn̄ aban̄a ndiọi mbon iduọk ini oro. (Matthew 11:7, 16-19; 12:39, 45; 17:14-17; Utom 2:5, 6, 14, 40) Enye ikenen̄ekede idi editịn̄ mban̄a akpan uniọn̄ ini oro ọkọtọn̄ọde ye akpan usenọfiọn̄.
Ke akpanikọ, “Mme Mbụme Ẹtode Mme Andikot” kpa ke nsiondi Enyọn̄-Ukpeme oro okowụk ntịn̄enyịn ke akpan n̄kpọ iba: “Owo ikemeke ndise emana mme owo nte ikpehe ini emi enyenede akpan ibat isua” ndien, “Mbon emana kiet ẹdu uwem ke ibio ini ke ẹmende ẹdomo.”
Nnyịn imesiwak ndida “emana” ntịn̄ ikọ ke usụn̄ emi. Ke uwụtn̄kpọ, nnyịn imekeme ndidọhọ, ‘Mbonekọn̄ emana Napoléon ikọfiọkke n̄kpọ ndomokiet iban̄a mme ubomofụm ye mme bọmb atọm.’ Nte nnyịn itịn̄ iban̄a mbonekọn̄ oro ẹkemanade ke ata ukem isua oro Napoléon akamanade? Nte nnyịn itịn̄ iban̄a mbonekọn̄ France oro ẹkekpan̄ade mbemiso Napoléon akakpade? Nte ededi idịghe; m̀mê nnyịn ndidomo ndisiak akpan ibat isua ke ndida “emana” ntịn̄ ikọ ke utọ usụn̄ oro. Nte ededi, nnyịn ikpetịn̄ iban̄a ata ekpri ibio ini, idịghe ediwak isua ikie ọtọn̄ọde ke ini Napoléon be dụk ini iso.
Ntre ke edi ye ifiọk oro nnyịn inyenede iban̄a se Jesus eketịn̄de ke prọfesi oro enye ọkọnọde ke Obot Olive. Edisu eke nsio nsio ikpehe prọfesi oro owụt ete ke utịt editịm n̄kpọ emi ekpere. (Matthew 24:32, 33) Ti ete ke nte ekemde ye Ediyarade 12:9, 10, ye ediwụk Obio Ubọn̄ Abasi ke heaven ke 1914, ẹma ẹsio Satan ẹduọk ke n̄kan̄ ikpehe isọn̄. Ediyarade adian ete ke Satan asan̄a ye akwa ifụtesịt idahaemi. Ntak-a? Sia enye ọdiọn̄ọde ete ‘ini imọ edi ibio.’—Ediyarade 12:12.
Ntem Enyọn̄-Ukpeme eke November 1 nte odotde ama enyene ekpri ibuotikọ oro “Ẹkpeme!” Ikpehe ekikere oro eketienede ama etịn̄ nte odotde ete: “Iyomke nnyịn ifiọk nnennen ini eke mme n̄kpọntịbe ẹmi. Utu ke oro, ana nnyịn inọ ntịn̄enyịn ke ndidu ke ukpeme, ndikọri ọkpọsọn̄ mbuọtidem, nnyụn̄ nsịn idem ke utom Jehovah—idịghe ke ndibat usenọfiọn̄.” Ekem enye ama okot oto mme ikọ Jesus ete: “Ẹtịn̄ enyịn ẹse, ẹkpeme . . . koro mbufo mîfiọkke edikem ini. . . . Se ndọhọde mbufo, mmonyụn̄ ndọhọ kpukpru owo nte, Ẹkpeme.”—Mark 13:33, 37.