Nte Afo Emenịm Edifiak Mmana ke Akpanikọ?
“NDI emeti eyenan̄wan emi okodụn̄de ekpere ufọk mbufo emi afo akanamde ufan ye enye ke ini okosụk ọkọride mi ke India?” ntre ke Mukundbhai ekewet ọnọ ẹsọk eyen esie eren, emi ekedide eyen ufọkn̄wed ntaifiọk ke United States. “Ẹmọn̄ ẹdọ enye ke urua ifan̄ ẹmi ẹdide. N̄kere ke akpana ọdiọn̄ọ.”
Ntak emi ete abuanade mbụk emi ye eyen esie eren? Kamse, Mukundbhai ama etre ufan ntụk ini uyen oro ofụri ofụri ke ediwak isua ẹmi ẹkebede. Akan oro, eyen emi okodu ke United States aka akamba ufọkn̄wed ke isua itiokiet. Enye ikokopke n̄kpọ iban̄a eyenan̄wan oro ke ufan̄ ini emi, ndien Mukundbhai ama ọdiọn̄ọ aban̄a oro.
Ntak, ndien, udọn̄ odude? Ẹkewụt udọn̄ koro Mukundbhai ama enịm edifiak mmana m̀mê editọn̄ọ ntak mmana ke akpanikọ.a Edieke ke mbuari ima ntụk ini uyen oro ke ufọt mmọ mbiba okotode ntak mmọ ndikedi nsan̄andọ ke ini ẹkebemde iso ẹdu uwem, ekpedi ibak ndidianade mmọ kemi mmọ ẹma ẹkesịm isua udọ ndọ mi. Mukundbhai akakam oyom ndinam eyeneren esie ọdiọn̄ọ aban̄a se ikade iso mbemiso eyenan̄wan emi akabade edi n̄wan owo efen ke uwem enyeemi.
Kere ban̄a idaha efen. Eyenan̄wan isua inan̄ ama odu ediwak ini ke ufọkibọk ke Mumbai, India, ke ntak ọkpọsọn̄ ubiak. Mfịna esie ekedi mmemmem okukịp ke ekwa usụn̄ iyịp esịt esie. Ete ye eka esie ẹmi ẹkenyenede n̄kpọ ẹma ẹkop mfụhọ ndikụt eyen mmọ odude ke ndutụhọ. Edi mmọ ẹma ẹkere ẹte: “Nnyịn inyene ndinyịme emi. Anaedi odu se enye akanamde ke akpa uwem esie anamde emi esịm enye.”
Edinịm edifiak mmana ke akpanikọ enen̄ede akara uwem ediwak miliọn mbon ido ukpono Hindu, Buddha, Jain, Sikh, ye mme ido ukpono eken oro ẹtọn̄ọde ẹto India. Ẹda mme ifiọk n̄kpọntịbe ke uwem—ọtọn̄ọde ke owo ndiduọ ke ima esịm ọkpọsọn̄ ndutụhọ—nte mme utịp n̄kpọ oro owo akanamde ke ini m̀mê mme ini ekebemde iso odu uwem.
Ediwak owo ke mme idụt Edem Usoputịn ẹnyene udọn̄ ke ukpepn̄kpọ aban̄ade edifiak mmana. Anam-kọnsat owo America oro Shirley MacLaine ọdọhọ ke imenịm enye ke akpanikọ. Ewet n̄wed oro Laurel Phelan eke Vancouver, British Colombia, Canada, ọdọhọ ke imeti ikebemde iso idu uwem utịm ike 50. Ke ndụn̄ọde edifiọk ekikere mme owo oro ẹkenamde ẹnọ CNN/USA Today ke 1994, se ibede owo 270 ke otu ikpọ owo 1,016 ẹkedọhọ ke imenịm edifiak mmana ke akpanikọ. Edinịm edifiak mmana ke akpanikọ edi n̄ko ubak n̄ka Obufa Emana. Edi nso uyarade isọn̄ọ edinịm ke akpanikọ emi?
“Nditi mme n̄kpọ ke uwem oro owo ekebemde iso odu!” ntre ke mme andinịm edifiak mmana ke akpanikọ ẹdọhọ. Mmọdo, ke ini Ratana, eyen isua ita ke Bangkok ọkọtọn̄ọde “nditi mme n̄kpọ ke uwem oro enye ekebemde iso odu nte n̄wan ido ukpono oro akakpade ke iduọk isua 60 esie,” ediwak mbon oro ẹkekụtde ẹma ẹnyịme idaha esie nte edide uyarade akpanikọ aban̄ade edifiak mmana.
Nte ededi, eyịghe ọyọyọhọ. Ndien mme n̄kpọ oro ẹsitide ẹmi ẹsimende ẹkebuan ye uwem oro ẹkedude mbemiso ẹnyene mme usụn̄ edinam an̄wan̄a efen.b Ke n̄wed esie oro Hinduism: Its Meaning for the Liberation of the Spirit, owo akwaifiọk Hindu oro Nikhilananda ọdọhọ ete ke ‘owo ikemeke ndida ukeme ukere n̄kpọ n̄wụt mme ifiọk n̄kpọntịbe oro ẹnyenede ke ẹma ẹkekpa.’ Kpa ye oro enye ọsọn̄ọ ete ke “ukpepn̄kpọ editọn̄ọ ntak mmana etie nte ekeme nditịbe akan se mîkemeke nditịbe.”
Edi nte Bible ọsọn̄ọ ukpepn̄kpọ emi? Ndien nso idotenyịn kaban̄a mme akpan̄kpa ke Ikọ Abasi eke odudu spirit ọnọ?
[Mme Ikọ idakisọn̄]
a “Edifiak mmana,” nte The New Encyclopædia Britannica ọdọhọde, ọwọrọ “ukpọn̄ nditọn̄ọ ntak mmana ini kiet m̀mê ediwak ini efen efen, emi ekemede ndidi owo, unam, m̀mê, ke ndusụk idaha, eto.” Ẹda ikọ oro “editọn̄ọ ntak mmana” n̄ko ẹtịn̄ ẹban̄a n̄kpọntịbe emi, edi ikọ oro “edifiak mmana” edi se ediwak owo ẹnyịmede. Ediwak n̄wed ukabadeikọ ke mme usem ẹsemde ke India ẹsida mme ikọ ẹmi ke ukpụhọ ye kiet eken.
b Se page 5-7 ke nsiondi Awake! eke June 8, 1994.
[Ndise ke page 4]
Nte ẹnọ enye ufen kaban̄a mme idiọkn̄kpọ oro enye akanamde ke ini enye ekebemde iso odu uwem?