Epaphras—‘Anamutom Christ Emi Anamde Akpanikọ’
ANIE ọkọtọn̄ọ mme esop Christian ke Corinth, Ephesus, ye Philippi? Eyedi afo ọyọsọsọp ọbọrọ: ‘Paul, kpa “apostle mme Gentile.”’ (Rome 11:13) Afo emenen.
Nte ededi, anie ọkọtọn̄ọ mme esop ke Colossae, Hierapolis, ye Laodicea? Okposụkedi nnyịn mîtịmke ifiọk, ekeme ndidi ekedi eren oro ẹkekotde Epaphras. Nte ededi, ekeme ndidi afo akpama ndidiọn̄ọ n̄kpọ efen efen mban̄a ọkwọrọikọ emi, sia ẹkotde enye ‘anamutom Christ emi anamde akpanikọ.’—Colossae 1:7.
Ọkwọrọikọ Itịghede Lycus
Enyịn̄ oro Epaphras edi ibio ibio ediwet Epaphroditus. Edi owo inyeneke ndikere ke Epaphras edi Epaphroditus emi okotode Philippi. Epaphras okoto Colossae, kiet ke otu iwụk ebiet mme esop Christian ke itịghede Akpa Lycus, ke Asia Minor. Colossae okoyom usụn̄ ke n̄kpasịp kilomita 18 ọkpọn̄ Laodicea onyụn̄ oyom usụn̄ ke kilomita 19 ọkpọn̄ Hierapolis, ke ikpehe Phrygia eset.
Bible itịn̄ke ọyọhọ ọyọhọ iban̄a nte eti mbụk Obio Ubọn̄ Abasi akasan̄ade esịm Phrygia. Nte ededi, mbon Phrygia ẹma ẹdu ke Jerusalem ke usen Pentecost ke 33 E.N., ekeme ndidi ndusụk mmọ ẹketo Colossae ẹdi. (Utom 2:1, 5, 10) Ke ini utom ukwọrọikọ Paul ke Ephesus (n̄kpọ nte 52-55 E.N.), ikọ ntiense oro ẹkenọde ke n̄kann̄kụk oro ama enen̄ede enyene odudu onyụn̄ enyene uforo tutu idịghe mbon Ephesus kpọt edi n̄ko “kpukpru mme andidụn̄ Asia, ẹmi ẹdide Jew ye ẹmi ẹdide Greek, ẹkop ikọ Ọbọn̄.” (Utom 19:10) Etie nte ke Paul ikọkwọrọke eti mbụk ke ofụri Itịghede Lycus, sia ediwak owo oro ẹkekabarede ẹdi mme Christian ke ikpehe oro mîkekwe enye akananam.—Colossae 2:1.
Nte ekemde ye Paul, Epaphras ekedi owo oro ekekpepde mbon Colossae aban̄a “mfọn Abasi ke akpanikọ.” Akpanikọ oro nte ke Paul okot nsan̄autom emi ‘anamutom Christ emi anamde akpanikọ ke ibuot nnyịn’ owụt ete ke Epaphras ekedi ifịk ifịk ọkwọrọikọ ke n̄kann̄kụk oro.—Colossae 1:6, 7.
Apostle Paul ye Epaphras ọkwọrọikọ ẹma ẹnyene ọkpọsọn̄ udọn̄ ẹban̄a mfọnọn̄kpọ eke spirit ekemmọ mme andinịm ke akpanikọ mmọ ke Itịghede Lycus. Nte “apostle mme Gentile,” anaedi Paul ama okop idatesịt ndibọ etop aban̄ade n̄kọri oro mmọ ẹkenamde. Edi Epaphras ikpọn̄ akanam Paul okop aban̄a idaha eke spirit mbon Colossae.—Colossae 1:4, 8.
Mbụk Epaphras
Mbon Colossae ẹma ẹsobo n̄kpọsọn̄ mfịna oro akanamde Epaphras anam anyan isan̄ aka Rome kaban̄a akpan ntak edineme n̄kpọ ẹmi ye Paul. Nte an̄wan̄ade, ekedi ọyọhọ mbụk oro Epaphras ọkọnọde okonụk Paul ndiwet leta iba nnọ ẹsọk nditọete oro enye akanam mîkọdiọn̄ọke do. Kiet ekedi leta ẹkenọde ẹsọk mbon Colossae. Ẹkenọ leta enyeken, emi etiede nte owo iketịmke inịm, ẹsọk mbon Laodicea. (Colossae 4:16) Owụt eti ibuot ndikere nte ke uduak mme n̄kpọ ẹmi ẹsịnede ke mme leta oro ẹkedi ibọrọ ẹnọde ke mme udọn̄ mme Christian nte Epaphras akanamde ẹdiọn̄ọ. Mme udọn̄ ewe ke enye okokụt? Ndien nso ke emi ayarade ọnọ nnyịn aban̄a edu esie?
Etie nte ke leta oro ẹkenọde ẹsọk mbon Colossae owụt ke Epaphras ama enyene editịmede esịt nte ke mme Christian ke Colossae ẹkedu ke itiendịk ke ntak mme ukpepn̄kpọ akwaifiọk eke mme okpono ndem oro abuanade edisua inem uwem, ubụpekpo, ye nsunsu ekikere ukpono ndem. Akan oro, ekeme ndidi ukpepn̄kpọ mme Jew oro aban̄ade editre ndidia udia ye editi mme akpan usen ẹma ẹnyene odudu ke idem ndusụk mme andibuana ke esop.—Colossae 2:4, 8, 16, 20-23.
Akpanikọ oro nte ke Paul ewet aban̄a ibuot nneme ẹmi owụt nnyịn nte Epaphras okodude ke edidemede okonyụn̄ ọsọpde ọdiọn̄ọ mme udọn̄ ekemmọ mme Christian esie. Enye ama owụt ima ima udọn̄ kaban̄a mfọnọn̄kpọ eke spirit mmọ, ọdiọn̄ọde aban̄a mme n̄kpọndịk ẹkedude ke n̄kann̄kụk oro mmọ ẹkedụn̄de. Epaphras ama oyom item oto Paul, ndien emi owụt ke enye ama osụhọde idem. Ekeme ndidi enye ekekere ke oyom imọ ibọ item ito owo oro enyenede ifiọk akan. Ke usụn̄ ekededi, Epaphras ama anam n̄kpọ ọniọn̄ ọniọn̄.—Mme N̄ke 15:22.
Eren Oro Akadade Akam ke Ọsọn̄urua N̄kpọ
Ke utịt utịt leta oro enye ọkọnọde ẹsọk mme Christian ke Colossae, Paul ọdọhọ ete: “Epaphras, owo mbufo kiet, emi edide owo Christ Jesus, ete ẹkọm mbufo; enye edi owo emi an̄wanade kpukpru ini ke akam esie oyom ufọn mbufo: man mbufo ẹfọn ẹma, ẹnyụn̄ ẹtịm ẹfiọk ofụri uduak Abasi. Koro ndi ntiense nte enye akpa utom etieti ke ibuot mbufo ye ke ibuot mmọemi ẹdude ke Laodicea, ye mmọ ẹmi ẹdude ke Hierapolis.”—Colossae 4:12, 13.
Ih, idem ke adan̄aemi enye ekedide “nsan̄a n̄kpọkọbi” Paul ke Rome, Epaphras ke ekekere aban̄a ndima nditọete esie ke Colossae, Laodicea, ye Hierapolis ke okonyụn̄ ọbọn̄ akam aban̄a mmọ. (Philemon 23) Ke ataata usụn̄, ‘enye ama an̄wana’ ọnọ mmọ ke akam. Nte eyen ukpepn̄kpọ oro D. Edmond Hiebert etịn̄de, ikọ Greek oro ẹdade mi owụt “ọkpọsọn̄ utom ye n̄waidem,” n̄kpọ oro ebietde “ọkpọsọn̄ ubiak” eke ekikere oro Jesus Christ okosobode nte enye ọkọbọn̄de akam ke in̄wan̄ Gethsemane. (Luke 22:44) Ama enen̄ede ọdọn̄ Epaphras nditọete esie eke spirit iren ye iban ndinyene nsọn̄ọnda nnyụn̄ n̄kọri nsịm ọyọhọ idaha Christian. Nso edidiọn̄ ke utọ eyenete oro ekekerede n̄kpọ eke spirit do ekedi ntem ọnọ mme esop!
Sia ẹkekotde Epaphras “edima nsan̄autom,” eyịghe ikemeke ndidu nte ke ekemmọ mme Christian ẹma ẹma enye. (Colossae 1:7) Ke ini mme idaha ẹyakde, kpukpru mme andibuana ke esop ẹkpenyene ndiyak idemmọ ifụre ifụre nnọ ye ufiop ye ima. Ke uwụtn̄kpọ, ẹkeme ndinọ ntịn̄enyịn ke ndin̄wam mbon udọn̄ọ, mbon usọn̄, m̀mê mbon en̄wen ẹmi ẹyomde san̄asan̄a un̄wam. Nsio nsio mbiomo ẹkeme ndidu ndise mban̄a ke esop, mîdịghe ẹkeme nditịp n̄kpọ nsịn ke mme utom ubọp n̄kpọ ukara Abasi.
Ndibọn̄ akam mban̄a mbon en̄wen, nte Epaphras ọkọbọn̄de, edi orụk edisana utom oro kpukpru owo ẹkemede ndinam. Mme utọ akam oro ẹkeme ndisịne mme ikọ edikere mban̄a ẹnyenede ẹnọ mme andituak ibuot nnọ Jehovah ẹmi ẹsobode nsio nsio n̄kpọndịk m̀mê mme mfịna ke n̄kan̄ eke spirit m̀mê ke n̄kan̄ eke obụk. Ebede ke ndisịn̄ede idem nnyịn ọkpọsọn̄ ọkpọsọn̄ ke usụn̄ emi, nnyịn imekeme nditie nte Epaphras. Nnyịn owo kiet kiet imekeme ndinyene ifet ye idatesịt ndiwụt nte idide “edima nsan̄autom” ke ubon mme anam-akpanikọ asan̄autom Jehovah.