Nte Afo Edi Ufan Abasi? Se Mme Akam Fo Ẹyararede
NTE akanam afo ke mbuari omokop owo iba ẹnemede nneme? Eyịghe idụhe nte ke ikadaha fi anyanini ndifiọk orụk itie ebuana emi mmọ ẹnyenede—m̀mê mmọ ẹtịm ẹmehe m̀mê ẹdi isenowo, mme ọdiọn̄ọ kpọt m̀mê mme n̄kpet n̄kpet ufan oro ẹkemede ndiberi edem. Ke ukem usụn̄ oro, mme akam nnyịn ẹkeme ndiyarade itie ebuana nnyịn ye Abasi.
Bible ọnọ nnyịn nsọn̄ọ ete ke Abasi ‘iyomke usụn̄ ye baba nnyịn owo kiet.’ (Utom 17:27) Ke akpanikọ, enye okot nnyịn ete idi idifiọk imọ. Nnyịn imakam ikeme ndidi mme ufan esie. (Psalm 34:8; James 2:23) Nnyịn imekeme ndinyene ata n̄kpet n̄kpet itie ebuana ye enye! (Psalm 25:14) Nte an̄wan̄ade, itie ebuana nnyịn ye Abasi edi ata ọsọn̄urua n̄kpọ oro nnyịn mme anana mfọnmma owo ikemede ndinyene. Ndien Jehovah abat itie ufan nnyịn ke n̄kpọuto. Emi ana in̄wan̄în̄wan̄ koro itie ufan nnyịn ye enye ọkọn̄ọ ke mbuọtidem nnyịn ke ikpọn̄îkpọn̄ edibon Eyen esie, emi ọkọnọde uwem esie ke ibuot nnyịn.—Colossae 1:19, 20.
Ke ntre mme akam nnyịn ẹkpenyene ndiwụt ntotụn̄ọ ima ye esịtekọm oro inyenede inọ Jehovah. Nte ededi, nte akanam etie fi ke idem nte ke mme akam fo, ke adan̄aemi ẹwụtde uten̄e Abasi, ẹtie nte inen̄ekede idi eke ofụri esịt? Emi idịghe esen n̄kpọ. Nso idi ukpọhọde edinam n̄kọri? Ndikọri itie ufan fo ye Jehovah Abasi.
Ndiyom Ini Mbọn̄ Akam
Akpa kan̄a, esida ini ndikọri nnyụn̄ mfori itie ufan. Ke usen ke usen afo emekeme ndikọm m̀mê ndinyene nneme ye ata ediwak owo—mme mbọhọidụn̄, mme nsan̄autom, mme awat ọ-bọs, ye mme anyam ufọkurua. Kpa ye oro, emi iwọrọke ite ke afo enen̄ede edi ufan ye utọ mbon oro. Itie ufan ọkọri nte afo enyenede nneme ke anyanini ye owo, akade anyan ọkpọn̄ enyọn̄ enyọn̄ nneme esịm ntotụn̄ọ ntụk ye mme ekikere.
Ke ukem usụn̄ oro, akam an̄wam nnyịn ndisan̄a n̄kpere Jehovah. Edi ana ẹsio ini oro ekemde ẹnịm ẹnọ enye; oyom ekese akan ibio ibio akam ekọm ke mme ini udia. Adan̄a nte afo enemede nneme ye Jehovah, ntre ke afo ekeme ndidụn̄ọde mme ntụk, mme uduak, ye mme edinam fo. Mme usọbọ ke n̄kpọsọn̄ mfịna ẹtọn̄ọ ndiwọrọ ndi nte spirit Abasi anamde afo eti mme edumbet ẹdude ke Ikọ esie. (Psalm 143:10; John 14:26) N̄ko-n̄ko, nte afo ọbọn̄de akam, Jehovah akabade edi ata owo ọnọ fi, ndien afo etịm ọfiọk ima ima udọn̄ ye edikere mban̄a emi enye enyenede ọnọ fi.
Emi edi ntre akpan akpan ke ini afo okụtde ibọrọ akam fo. Kamse, Jehovah ekeme “ndinam n̄kpọ n̄wak n̄kan se nnyịn iben̄ede inyụn̄ ikerede”! (Ephesus 3:20) Emi iwọrọke ite ke Abasi anam utịben̄kpọ ọnọ fi. Nte ededi, ebede ke ediwewet Ikọ esie, mme n̄wed ẹmi ofụn anam-akpanikọ emịn̄de, m̀mê ebede ke ima ima nditọete iren ye iban, enye ekeme ndinọ fi item ye ndausụn̄ oro oyomde. Mîdịghe enye ekeme ndinọ fi ukeme oro oyomde ndiyọ m̀mê ndibiọn̄ọ idomo. (Matthew 24:45; 2 Timothy 4:17) Mme utọ ifiọk n̄kpọntịbe oro ẹnam esịt nnyịn ọyọhọ ye ekọm ọnọ Ufan nnyịn eke heaven!
Ke ntre ana owo afak ifet ọnọ edibọn̄ akam. Edi akpanikọ, ini anana etieti ke eyo emi ọyọhọde ye mfịghe mi. Edi ke ini afo enen̄ede ama owo, afo nte ido edide emesiyom ini ndidu ye owo oro. Tịm fiọk usụn̄ nte andiwet psalm eketịn̄de aban̄a idemesie: “Kpa nte ebet en̄wekde oyom idịm mmọn̄, kpa ntre ke ukpọn̄ mi en̄wek oyom fi, O Abasi. Itọn̄ Abasi, kpa eke Abasi uwem, amasat mi ukpọn̄; ke ini ewe ke ndikeme ndika n̄kowụt Abasi idemmi?” (Psalm 42:1, 2) Ndi afo emenyene ukem ọkpọsọn̄ udọn̄ oro ndineme nneme ye Abasi? Do dep ifet ndinam ntre!—Men Ephesus 5:16 domo.
Ke uwụtn̄kpọ, afo emekeme ndidomo ndibak ndemede ke usenubọk man enyene ini ndibọn̄ akam ikpọn̄. (Psalm 119:147) Ndi idap esitre ndiyet fi ndusụk ini ke okoneyo? Do, ukem nte andiwet psalm, afo emekeme ndida mme utọ ini editịmede esịt oro nte ifet nditịn̄ ekikere fo nnọ Abasi. (Psalm 63:6) Mîdịghe ekeme ndidi n̄kukụre se oyomde edi ndibọn̄ mbio mbio akam ke uwemeyo. Andiwet psalm ọkọdọhọ Abasi ete: “Nyeseme nnọ fi ke ofụri usen.”—Psalm 86:3.
Ndifori Mme Uduot Akam Nnyịn
Ndusụk ini afo emekeme ndikụt nte edinam akam fo ọniọn̄ edide n̄kpọ un̄wam. Ke ini ibio ibio akam, afo emekeme ndinyene ntụhọ editịn̄ mban̄a n̄kpọ oro mîdịghe mme ata ntotụn̄ọ n̄kpọ. Edi ke ini afo ọbọn̄de nnyan ye ntotụn̄ọ akam, afo emekeme ndinen̄ede ntịn̄ mme ekikere ye ntotụn̄ọ ntụk fo. Jesus ama abiat ofụri okoneyo ndibọn̄ akam ke nsụhọde n̄kaha ini kiet. (Luke 6:12) Eyịghe idụhe nte ke afo oyokụt nte mme akam fo ẹdide ntotụn̄ọ ntotụn̄ọ ẹnyụn̄ ẹnyenede udop edieke afo efepde ndibọn̄ mmọ itọk itọk.
Emi iwọrọke nditịn̄ ikpîkpu ikọ ke ini mûnyeneke se etịn̄de; m̀mê ndiwọrọ nditịn̄ n̄kpọ kiet mfiak ntịn̄ ke usụn̄ oro mînyeneke ufọn. Jesus okodụri owo utọn̄ ete: “Ke ini ẹbọn̄de akam, ẹkûyịre nditetịn̄ ikpîkpu ikọ, nte mme Gentile ẹnamde: koro etie mmọ nte edikop akam oto ke uwak ikọ eke ẹtịn̄de. Mmọdo ẹkûbiet mmọ: koro Ete mbufo ọmọfiọk n̄kpọ eke ẹnanade mbufo, ndien mbufo ẹdiben̄e Enye.”—Matthew 6:7, 8.
Akam etịm enyene udop ke ini afo ebemde iso ekere mme n̄kpọ oro afo oyomde ndineme. Ata ediwak n̄kpọ ẹdu—idatesịt nnyịn ke utom ukwọrọikọ, mme mmeme ye mme ndudue nnyịn, mme edikpu nnyịn, mme idaha ndutịm uforo nnyịn, mme mfịghe ke itieutom m̀mê ke ufọkn̄wed, mfọnọn̄kpọ ubon nnyịn, ye idaha eke spirit esop n̄kann̄kụk nnyịn, ke ndisiak ibat ibat kpọt.
Ndi ekikere fo ndusụk ini esinyene ntụhọ ediyo ke ini afo ọbọn̄de akam? Sịn ndien ọkpọsọn̄ ukeme ndiwụk ekikere fo itie kiet. Kamse, Jehovah enyene udọn̄ ‘ndikpan̄ utọn̄ ke eseme nnyịn.’ (Psalm 17:1) Nte nnyịn ikpeben̄eke idem ndisịn ukeme ofụri esịt ndinọ ntịn̄enyịn ke mme akam idem nnyịn? Ih, wụk ‘ekikere fo ke n̄kpọ spirit,’ nyụn̄ fep ndiyak enye oyo.—Rome 8:5.
Usụn̄ emi nnyịn itịn̄de ikọ ye Jehovah edi n̄ko akpan n̄kpọ. Okposụkedi enye oyomde nnyịn ida imọ nte ufan, nnyịn ikpedehedei ifre ite ke nnyịn ineme nneme ye Andikara ekondo. Kot nyụn̄ tie kere enyene-uten̄e idaha oro ẹwụtde ke Ediyarade ibuot 4 ye 5. Do John ama okụt ubọn̄ Owo emi nnyịn isan̄ade ikpere ke akam. Nso ifet ke nnyịn inyene ntem ndikeme ndisan̄a n̄kpere nnyụn̄ ntịn̄ ikọ ye “Anditie ke ebekpo”! Ikọ nnyịn ikpedehedei iwụt edu usọn̄enyịn m̀mê unana ukpono. Utu ke oro, nnyịn ikpenyene ndisịn ọkpọsọn̄ ukeme ndinam ‘ikọ inua nnyịn ye ekikere nnyịn enem Jehovah esịt.’—Psalm 19:14.
Nte ededi, nnyịn ikpenyene ndifiọk nte ke nnyịn idaha udọnikọ inam esịt enem Jehovah. Enye ama mme ikọ oro itịn̄de ukpono ukpono, ito ofụri esịt, inamke n̄kpọ m̀mê itịn̄ mmọ mfefere mfefere adan̄a didie.—Psalm 62:8.
Ndọn̄esịt ye Ifiọk ke Mme Ini Unana
Ke ini nnyịn iyomde un̄wam ye ndọn̄esịt, nnyịn isiwak ndiwọn̄ọde mbịne n̄kpet n̄kpet ufan n̄kọbọ ibetedem ye ikọ nsọn̄idem. Nte ededi, idụhe ufan oro ikemede ndisịm mmemmem mmemmem n̄kan Jehovah. Enye edi “andinyan̄a eke ekperede nnyịn etieti ke nnanenyịn.” (Psalm 46:1) Nte “Abasi kpukpru ndọn̄esịt,” enye ọfiọk se ifịnade nnyịn ọfọn akan owo efen ekededi. (2 Corinth 1:3, 4; Psalm 5:1; 31:7) Ndien enye enyene ata mbọm ye edikere mban̄a ọnọ mbon oro ẹdude ke nnanenyịn. (Isaiah 63:9; Luke 1:77, 78) Ke ifiọkde ke Jehovah edi utọ ufan oro ekerede aban̄a ntre, nnyịn imenyene ifụre ndineme nneme ye enye ke ofụri esịt, ntotụn̄ọ ntotụn̄ọ. Edemede nnyịn nditịn̄ mme ndịk ye editịmede esịt ẹtode isọn̄ esịt nnyịn. Ntem ke nnyịn ikụt ke idem nnyịn nte ‘ndọn̄esịt Jehovah enemde nnyịn esịt.’—Psalm 94:18, 19.
Ndusụk ini ekeme nditie nnyịn ke idem nte ke nnyịn idotke ndisan̄a n̄kpere Abasi ke ntak ndudue nnyịn. Edi nso edieke n̄kpet n̄kpet ufan ekpeduede fi onyụn̄ ekpede ubọk ete efen ọnọ imọ? Nte ikponụkke fi ndidọn̄ enye esịt nnyụn̄ nnọ enye nsọn̄ọ? Ntak, ndien, emi afo okpodoride enyịn Jehovah ndinam se isụhọrede ikan oro? Enye ke ntatubọk esifen mme ufan esie ẹmi ẹnamde idiọkn̄kpọ ke ntak unana mfọnmma eke owo. (Psalm 86:5; 103:3, 8-11) Ke ifiọkde emi, nnyịn imen̄eke ndiyarade mme ndudue nnyịn in̄wan̄în̄wan̄ nnọ enye; nnyịn imekeme ndinyene mbuọtidem ke ima ye mbọm esie. (Psalm 51:17) Edieke nnyịn ikopde mfụhọ ke ntak ndudue nnyịn, nnyịn imekeme ndibọ ndọn̄esịt nto mme ikọ eke 1 John 3:19, 20: “Nnyịn iyada emi ifiọk ite ida ye akpanikọ, inyụn̄ isọn̄ esịt ke iso Esie ke n̄kpọ eke esịt obiomde nnyịn: koro Abasi okponde akan esịt nnyịn, onyụn̄ ọfiọkde kpukpru n̄kpọ.”
Nte ededi, iyomke nnyịn idu ke ọkpọsọn̄ mfụhọ mbemiso ibọde ima ima edikere mban̄a emi otode Abasi. Jehovah enyene udọn̄ ke n̄kpọ ekededi oro ekemede ndifịna mfọnọn̄kpọ eke spirit ye eke ntụk nnyịn. Ih, iyomke nnyịn idedei ikere ke mme ntụk, ekikere, ye mme mfịna nnyịn ẹkpri ẹkaha ndisiak ke akam. (Philippi 4:6) Ke ini afo odude ye n̄kpet n̄kpet ufan, ndi afo esineme sụk ikpọ n̄kpọntịbe ke uwem fo? Ndi afo n̄ko usubuanake mme n̄kpọ oro ẹtiede nte ẹdi n̄kpri n̄kpọ? Ke ukem usụn̄ oro, afo emekeme ndinyene ifụre nditịn̄ mban̄a ikpehe uwem fo ekededi ye Jehovah, ọfiọkde ete ke ‘enye ke ekere fi.’—1 Peter 5:7.
Nte ededi, etie nte itie ufan idibịghike edieke kpukpru nneme fo aban̄ade idemfo. Kpasụk ntre, mme akam nnyịn ikpenyeneke ndidi ibụk ibụk. Nnyịn ikpenyene n̄ko ndiwụt ima ye edikere mban̄a oro inyenede inọ Jehovah ye mme udọn̄ esie. (Matthew 6:9, 10) Akam idịghe sụk ifet ediyom un̄wam nto Abasi edi n̄ko ifet ndikọm nnyụn̄ ntoro enye. (Psalm 34:1; 95:2) ‘Ndikọ ifiọk’ ebe ke ọkpọkpọ ukpepn̄kpọ ofụri ini ayan̄wam nnyịn ke afan̄ emi, nte enye an̄wamde nnyịn itịm imehe ye Jehovah ye mme usụn̄ esie. (John 17:3) Ekeme ndinen̄ede ndi n̄kpọ un̄wam nnọ fi ndikot n̄wed Psalm nnyụn̄ n̄kụt nte mme anam-akpanikọ asan̄autom eken ẹkesemede idemmọ ẹnọ Jehovah.
Itie ufan ye Jehovah enen̄ede edi ọsọn̄urua enọ. Akpakam nnyịn iwụt ite ke nnyịn imadara enye ebe ke ndinam mme akam nnyịn ẹnen̄ede ẹnyene ufiop, ẹdi eke ofụri esịt, ye ọkpọkpọ. Do nnyịn iyenyene inemesịt oro andiwet psalm okowụtde, oro ọkọdọhọde ete: “Ọfọfọn ọnọ owo eke afo edimekde, onyụn̄ anamde asan̄a ekpere fi.”—Psalm 65:4.
[Mme ndise ke page 28]
Nnyịn imekeme ndibọn̄ akam nnọ Abasi kpukpru ini ke usen adan̄a nte ifet ebererede