Nte Ọkpọnọde Ubieresịt Fo Ukpep

“EDISANA ubieresịt edi mfọnn̄kan udotibuot.” N̄ke eset emi osio ata akpan n̄kpọ owụt: Ke ini itienede ubieresịt nnyịn, nnyịn iyenyene emem ye ifụre esịtidem.

Nte ededi, idịghe kpukpru owo ẹmek ndinam ntre. Adolf Hitler ọkọdọhọ ke utom imọ edi ndinam mme owo ẹbọhọ ukpọk ukpọk, m̀mê abian̄a abian̄a, ekikere ẹdiọn̄ọde nte ubieresịt. Ukara afai esie anam ẹkụt ke mfụhọ mfụhọ usụn̄ nte mme owo ẹkam ẹkemede nditie ibak ibak ke ini mmọ ẹsịnde nditiene ubieresịt mmọ. Nte ededi, ukem oro ke edi ye ediwak mme abiatibet oro ẹnamde afai mfịn—mbon oro ẹdan̄de owo ke n̄kanubọk ẹnyụn̄ ẹwotde owo ye unana edikop mbọm. Ediwak ke otu mme abiatibet ẹmi ẹdi ata n̄kpri nditọ. N̄wed oro odụn̄ọrede n̄kpọntịbe emi ke ntre ama enyene ekpri ibuotikọ ọdọhọde Nditọwọn̄ eke Mînyeneke Ubieresịt.

Ke adan̄aemi edide tutu amama ata ediwak owo idikereke ndibiat ibet ke afai afai usụn̄, esịt ibiomke ediwak owo ke ndisịn idem ke oburobụt ido idan̄, usu nsu, m̀mê abian̄a. Eti ido uwem ke osụhọde ke ofụri ererimbot. Ke etịn̄de aban̄a akwa edisọn̄ ibuot ye utuakibuot akpanikọ, apostle Paul ama ewet ete ke ndusụk Christian ẹyeyak idem ẹnọ odudu ererimbot ndien ke ntem ‘esịt mmọ akabade odoro ufiọn.’ (1 Timothy 4:2) Ndịghe kaban̄a mbiara ido akam etetịm okpon mfịn ke “ukperedem ini” emi. (2 Timothy 3:1) Ke ntre ana mme Christian ẹsịn ọkpọsọn̄ ukeme ndikpeme ubieresịt mmọ. Nnyịn ikeme ndinam emi ebe ke ndinọ enye ukpep nnyụn̄ n̄kọri enye.

Ekikere, Esịt, ye Ubieresịt Fo

Apostle Paul ọkọdọhọ ete: “Mmetịn̄ akpanikọ ke Christ, nsụhu nsu, [ubieresịt] mi onyụn̄ etiene mi edi ntiense ke Edisana Spirit.” (Rome 9:1) Ubieresịt ke ntre ekeme nditie ntiense. Enye ekeme ndidụn̄ọde usụn̄uwem ndien ọnọ enye unyịme mîdịghe obiom enye ikpe. Andibot ama esịn nnyịn n̄kponn̄kan ukeme edifiọk eti ye idiọk ke idem. Edi, imekeme ndibot nnyụn̄ nnọ ubieresịt nnyịn ukpep. Didie? Ebe ke nnyịn ndinyene nnennen ifiọk otode Ikọ Abasi. Apostle Paul ọdọhọ ete: “Ẹkpụhọde, oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:2) Nte afo esịnde mme ekikere ye uduak Abasi ke esịt fo, ubieresịt fo ọtọn̄ọ ndinam n̄kpọ ke usụn̄ Abasi.

Mme Ntiense Jehovah ẹn̄wam ediwak miliọn owo ke ofụri ererimbot ‘ndifiọk Jehovah Abasi ye Jesus Christ.’ (John 17:3) Ebede ke ndutịm ukpepn̄kpọ Bible mfọn emi mmọ ẹnamde, mmọ ẹkpep mbon esịt akpanikọ mme edumbet Jehovah Abasi kaban̄a idan̄, edida n̄kpọsọn̄ mmịn, ndọ, edinam mbubehe, ye ediwak n̄kpọ eken.a (Mme N̄ke 11:1; Mark 10:6-12; 1 Corinth 6:9, 10; Ephesus 5:28-33) Ndikọ ‘nnennen ifiọk’ emi edi akpan usio-ukot ke ndikọri ubieresịt oro abakde Abasi. (Philippi 1:9) Edi akpanikọ, idem ke Christian ama ekenyene ọyọhọ ifiọk Bible, ana enye aka iso ndiyọhọ esịt esie ye Ikọ Abasi ofụri ini edieke anade ubieresịt esie aka iso enyene nsọn̄idem.—Psalm 1:1-3.

Bible n̄ko abuan ubieresịt ye ndamban̄a esịt, emi abuanade mme ekikere ye mme ntụk nnyịn. (Rome 2:15) Ana ekikere ye esịt ẹnam utom ọtọkiet ke n̄kemuyo edieke anade ubieresịt anam utom nte ọfọnde. Oro ọwọrọ ke ndisịn ntọt kpọt ke esịt fo ikemke. Ana afo n̄ko anam enye akara esịt fo—mme ntụk esịtidem fo, mme udọn̄ fo, ye se afo amade. Ntem n̄wed Mme N̄ke ada mme utọ ikọ nte ‘sịn esịt fo,’ ‘nịm ibuot fo,’ ye “nen̄ede esịt fo sịn.” (Mme N̄ke 2:2; 23:19; 27:23) Usụn̄ kiet ndinam ntre edi nditie n̄kere nnyụn̄ n̄kọk ibuot ke N̄wed Abasi. Psalm 77:12 ọdọhọ ete: “Nyekere kpukpru se afo anamde, nyonyụn̄ n̄kere utom fo.” Nditie n̄kere n̄kpọ an̄wam nnyịn ndisịm mme ntụk esịtidem ye uduak nnyịn.

Yak idọhọ, ke uwụtn̄kpọ, ke afo emenyene ndedehe eduuwem utọ nte mbumehe uda un̄wọn̄. Ukem nte ata ediwak owo, afo nte eyịghe mîdụhe ọmọfiọk n̄kpọndịk oro enye akamade ọnọ nsọn̄idem. Edi, kpa ye edikpak oro mme ufan ye ubon fo ẹkpakde fi, edi ọkpọsọn̄ n̄kpọ afo nditre. Didie ke editie n̄kere etop Bible ekeme ndisọn̄ọ ubieresịt fo idem ke afan̄ emi?

Nte uwụtn̄kpọ, domo nditie n̄kere mme ikọ apostle Paul oro ẹkụtde ke 2 Corinth 7:1: “Sia nnyịn imenyene mme un̄wọn̄ọ ẹmi, ndima mi, ẹyak nnyịn iyet kpukpru se isabarede obụkidem ye spirit ifep ke idem nnyịn, inam nti ido nnyịn ẹfọn ẹma ke edibak Abasi.” Tịm fiọk se mme ikọ ẹmi ẹwọrọde. Bụp idemfo, ‘Nso idedi “mme un̄wọn̄ọ ẹmi” Paul etịn̄de aban̄a mi?’ Ke ndikot udọn̄ikọ oro, afo oyokụt ete ke mme ufan̄ikọ oro ẹkebemde iso ẹdọhọ: “Jehovah ọnọ uyo ete, ẹwọn̄ọ ke otu mmọ, ẹnyụn̄ ẹdianade ẹda. Ẹkûnyụn̄ ẹtụk n̄kpọ ndek baba kiet. Ndien nyadara mbufo, nnyụn̄ ndi Ete mbufo. Ndien mbufo ẹyedi nditọ iren Mi ye nditọ Mi iban. Ntem ke Jehovah Ata Ọkpọsọn̄ ọdọhọ.”—2 Corinth 6:17, 18.

Ewụhọ emi Paul ọnọde ‘ndiyet kpukpru se isabarede obụkidem’ enyene odudu efen efen idahaemi! Nte okopodudu n̄kpọ ndinụk nnyịn inam ntre, Abasi ọn̄wọn̄ọ ‘ndidara nnyịn,’ oro edi, ndinịm nnyịn ke idak ukpeme esie. Afo emekeme ndibụp idemfo, ‘Ndi ami mmenyene n̄kpet n̄kpet itie ebuana ye enye—nte enyeoro eyeneren m̀mê eyenan̄wan enyenede ye ete?’ Nte ekikere edidi se enyene-ọniọn̄ Abasi oro enyenede ima ‘adarade’ m̀mê amade idịghe ata n̄kpọ inemesịt? Edieke ekikere oro etiede fi esen esen, se usụn̄ oro mme ete oro ẹnyenede ima ẹsiwụtde nditọ mmọ ima. Idahaemi kere nte utọ itie ebuana oro odude ke ufọt fo ye Jehovah! Adan̄a nte afo etiede ekere aban̄a emi, ntre ke udọn̄ fo ndinyene utọ itie ebuana oro ọkọri.

Edi tịm fiọk: N̄kpet n̄kpet itie ebuana ye Abasi ekeme ndidu n̄kukụre edieke afo ‘etrede nditụk n̄kpọ ndek.’ Bụp idemfo: ‘Nte mbumehe uda un̄wọn̄ isịneke ke otu “n̄kpọ ndek” oro Abasi obiomde ikpe? Nte edida enye ediwọrọ ‘ndisabade obụkidem,’ nsiode idemmi nnyan nnọ kpukpru orụk n̄kpọndịk oro ẹtụkde nsọn̄idem? Sia Jehovah edide ediden̄i, m̀mê “edisana” Abasi, nte enye ayama ami ndikokoi nsabade idem mi ke usụn̄ emi?’ (1 Peter 1:15, 16) Fiọk ete ke Paul n̄ko ama odụri owo utọn̄ aban̄a ‘owo ndisabade spirit,’ m̀mê ekikere, esie. Bụp idemfo: ‘Nte mbumehe emi akara ekikere mi? Ndi ami nyaka anyan n̄kesịm udomo ekededi ndiyụhọ udọn̄ mi, ndusụk nsịnde nsọn̄idem mi, eke ubon mi, m̀mê idem itie ebuana mi ye Abasi ke itiendịk? Ke nso udomo ke ami nyak mbumehe uda un̄wọn̄ abiat uwem mi?’ Ndikere mban̄a mme ubiak ubiak mbụme ẹmi ekeme ndinen̄ede nnọ fi uko nditre!

Nte ededi, afo emekeme ndiyom un̄wam ye ibetedem nto mbon en̄wen man akan mbumehe uda un̄wọn̄. Kpa ye oro, editie n̄kere se Bible etịn̄de ekeme ndinam ekese ke ndikpep nnyụn̄ nsọn̄ọ ubieresịt fo idem man otodo ekịbe ọbọhọ mbumehe.

Ke Ini Nnyịn Inamde Ndudue

Kpa ye ofụri ukeme nnyịn ndinam se inende, ndusụk ini unana mfọnmma nnyịn esikan nnyịn ubọk nnyịn inyụn̄ inam ndudue. Ekem esịt nnyịn ayamia nnyịn ufen, edi imekeme ndisobo idomo edifụmi enye. Mîdịghe nnyịn imekeme ndikop mmemidem tutu iyom nditre ndinam n̄kpọ Abasi ofụri ofụri. Nte ededi, ti se iketịbede inọ Edidem David. Ke enye ama ekesịn efịbe ye Bath-sheba, esịt esie ama amia enye ufen. Enye etịn̄ ndutụhọ oro ekesịmde enye ete: “Ubọk fo [odobi] mi ke idem ke uwemeyo ye okoneyo: nsek mi asat ke ndaeyo.” (Psalm 32:4) Nte ama abiak enye? Ke akpanikọ ama abiak! Edi mfụhọ ido Abasi emi ama onụk David ndikabade esịt nnyụn̄ n̄kabade ntie ke emem ye Abasi. (Men 2 Corinth 7:10 domo.) Ubiak ubiak eseme oro David ekesemede eben̄e edifen ọnọ uyarade oro ekemde aban̄a edikabade esịt ofụri esịt esie. Ke ntak oro enye akanamde n̄kpọ etiene ubieresịt esie, ẹma ẹn̄wam David anam ukpụhọde ndien ke akpatre afiak enyene idatesịt esie.—Psalm 51.

Ukem oro ekeme nditịbe mfịn. Ndusụk owo ẹma ẹkpep Bible ye Mme Ntiense Jehovah ke ini edem edi ẹtre ke ini mmọ ẹkefiọkde ẹte ke uwem mmimọ idụhe ke n̄kemuyo ye mme n̄kokon̄ idaha Abasi. Ekeme ndidi mmọ ẹkedụn̄ ye owo isio uduot ye unana edidọ ndọ mîdịghe ẹkedụk ufụn ẹnọ ndedehe eduuwem. Esịt mmọ ama amia mmọ ufen!

Edieke afo odude ke utọ idaha oro, kere ban̄a mme ikọ oro apostle Peter eketịn̄de ke usen Pentecost. Ke ini enye akayararede mme idiọkn̄kpọ ekemmọ mbio obio Jew, “esịt amia mmọ.” Utu ke ndikpa mba, mmọ ẹma ẹnam item Peter nte ẹkabade esịt, ndien mmọ ẹma ẹnyene mfọn Abasi. (Utom 2:37-41) Afo emekeme ndinam ukem oro! Utu ke ndikpọn̄ akpanikọ ke ntak emi esịt amiade fi ufen, yak ubieresịt fo onụk fi ‘ndikabade esịt nnyụn̄ mfiak edem.’ (Utom 3:19) Ye ọkpọsọn̄ ubiere ye ukeme, afo emekeme ndinam mme ukpụhọde oro oyomde anam man enyene mfọn Abasi.

“Ẹnyene Esịt eke Asanade”

Edide afo ọtọtọn̄ọ ndikpep mban̄a mme usụn̄ Jehovah m̀mê emenyenyene ifiọkutom ke ediwak isua nte Christian oro ọkọride esịm ọyọhọ idaha, item Peter odot: “Ẹnyene esịt eke asanade.” (1 Peter 3:16) Enye edi eti n̄kpọ, idịghe mbiomo. Nọ enye ukpep ebe ke ndiyọhọ esịt ye ekikere fo ye ọniọn̄ emi esịnede ke Ikọ Abasi, kpa Bible. Tiene ubieresịt fo ke ini enye odụride fi utọn̄. Nyene ntotụn̄ọ ifụre ekikere oro edikop uyo nnọ ubieresịt ekemede ndida ndi.

Nte ẹnyịmede, ndinọ ubieresịt fo ukpep nnyụn̄ nnam enye ọkọri idịghe mmemmem utom. Nte ededi, afo emekeme ndibọn̄ akam nnọ Jehovah Abasi man an̄wam fi. Ye un̄wam esie, afo eyekeme ndinam n̄kpọ Abasi “ye esịt eke mîdiọn̄ọke idiọk ke idemesie, ye ata mbuọtidem.”—1 Timothy 1:5.

[Mme Ikọ idakisọn̄]

[Ndise ke page 6]

Ndikot nnyụn̄ ntie n̄kere Ikọ Abasi an̄wam nnyịn ndinọ ubieresịt nnyịn ukpep