Mmọ Ẹma Ẹnam Uduak Jehovah

Ete Emi Ọsọpde Ndidahado

ẸKOT enye akakan ibio mbụk oro akanam ẹwetde—ye eti ntak. N̄ke Jesus aban̄ade ima emi ete enyenede ọnọ eyen esie oro okosopde etie nte window emi nnyịn ikemede ndinen̄ede nda n̄kụt mbọm oro Abasi owụtde mme anamidiọk ẹmi ẹkabarede esịt.

Ama Osop Ndien Ẹkụt

Ete kiet ekenyene nditọiren iba. Udọ ọdọhọ enye ete: ‘Nyom n̄kpọ akpa mi idahaemi, nyomke ndibet tutu afo akpa.’ Ete ama enyịme, iso-ọfọn ọnọde enye mbahade kiet ke itie ita ke otu ofụri inyene esie—udeme oro ibet ekenyịmede ẹnọ udọ ke ini ẹnyenede nditọiren iba. (Deuteronomy 21:17) Akparawa oro ama ọsọsọp atan̄ inyene esie onyụn̄ anam isan̄ aka anyan ebiet emi enye akabiatde ofụri okụk esie ke ndidu uwem nditaha.—Luke 15:11-13.

Ekem ọkpọsọn̄ akan̄ ama etịbe. Ke mbrenyịn, akparawa oro ama enyịme ndinam utom nte ọbọk edi—utom emi mme Jew ẹkesede ke ndek. (Leviticus 11:7, 8) Udia ama anana tutu enye ọtọn̄ọ ndinyan̄a ikpọk udia oro ekedide udia edi! Ke akpatre, enyịn ama an̄wan̄a akparawa oro. Enye ama ekere ke esịt esie ete: ‘Se nditọufọk ete mi ẹdiade ọfọn akan emi! Nyafiak nnyọn̄ ufọk, n̄katua n̄kpọfiọk, nnyụn̄ mben̄e nditie nte kiet ke otu mbonutom ete mi.’a—Luke 15:14-19.

Akparawa oro ama ọtọn̄ọ isan̄ anyan usụn̄ ndinyọn̄ ufọk. Nte eyịghe mîdụhe nte enye eketiede ama okpụhọde akamba akamba. Kpa ye oro, ete esie ama ada ọdiọn̄ọ enye “ke ini enye odude kan̄a nsannsan.” Ke okopde mbọm, enye ama efehe ebịne eyen esie, akafat enye, onyụn̄ “awan̄a enye ke itọn̄.”—Luke 15:20.

Ufiop ufiop idara emi ama anam edi mmemmem n̄kpọ ọnọ akparawa emi nditịn̄ se idude enye ke esịt. Enye ama ọdọhọ ete: “Ete, mmanam idiọkn̄kpọ ndian heaven ye ke iso fo: ndotke aba ndikere eyen fo. [Nam ndi kiet ke otu mbonutom fo, NW].” Ete ama okot ifịn esie ẹdi. Enye ama ọnọ uyo ete: “Ẹwara ẹda ata eti ọfọn̄idem oro ẹdisịne enye; ẹnyụn̄ ẹsịne enye n̄kpanuen ke ubọk ye ikpaukot ke ukot: ẹnyụn̄ ẹda eyenenan̄ emi enyenede isek ẹwot, ẹyak nnyịn idia inyụn̄ idat esịt: koro eyen mi emi ama akpa, onyụn̄ ọtọn̄ọ ntak odu uwem; enye ama osop, ndien ikụt enye.”—Luke 15:21-24.

Ẹma ẹsịn akamba usọrọ, esịnede ikwọ ye unek. Akpan ama okop editịm ke adan̄aemi ọnyọn̄de in̄wan̄ edi. Ke ini enye okokopde ete ke eyeneka imọ ama ọnyọn̄ edi ye nte ke ntak edi oro ẹkediade usọrọ, enye ama ayat esịt. Enye ama ọdọhọ ete esie ete: ‘Mmanam utom nnọ fi ke ediwak isua, akanam nnyụn̄ nnenike uyo fo, edi akananam unọhọ mi ndomo eyenebot kiet nda nnam mbre ye mme ufan mi. Edi idahaemi eyen fo emi akataharede inyene fo ọkọnyọn̄ edi, afo anam usọrọ ọnọ enye.’ Ete esie ama ọbọrọ mbọm mbọm ete: ‘Eyen mi, afo odu mi ye ami kpukpru ini, ndien kpukpru se inyenede mi ẹdi okwo. Edi odot nnyịn ndidara koro eyenuka emi ama akpa onyụn̄ afiak edidu uwem. Enye ama osop ndien imafiak ikụt enye.’—Luke 15:25-32.

Ukpepn̄kpọ Odude ọnọ Nnyịn

Ete oro ke n̄ke Jesus ada aban̄a okop-mbọm Abasi nnyịn, Jehovah. Ukem nte eyen oro okosopde, ndusụk owo ẹsikpọn̄ ifụre emi ikọtufọk Abasi ẹnyenede ke ndusụk ini edi ekem ẹfiak ẹnyọn̄ ẹdi. Didie ke Jehovah ese utọ mbon oro? Mbon oro ẹfiakde ẹtiene Jehovah ye ọyọhọ edikabade esịt ẹkeme ndinyene mbuọtidem nte ke “enye itọhọke ke nsinsi; inyụn̄ ikọhọkede ke nsinsi.” (Psalm 103:9) Ke n̄ke oro, ete ama efehe ọkọkọm eyen esie. Kpasụk ntre, idịghe Jehovah ndinyịme kpọt edi enyene udọn̄ ndidahado nnọ mme anamidiọk oro ẹkabarede esịt. Enye “ọsọp ndidahado” onyụn̄ anam ntre “ke ntatara usụn̄.”—Psalm 86:5, NW; Isaiah 55:7, NW; Zechariah 1:3.

Ke n̄ke Jesus, ata ima oro ete enyenede ama anam edi mmemmem n̄kpọ ọnọ eyen oro ndinyene uko ndifiak nnyọn̄. Edi kere: Nso ikpeketịbe edieke ete akpakakan̄de eyen oro mîdịghe ke iyatesịt ọkpọkọdọhọde enye okûdede afiak edi aba? Eyedi utọ edu oro akpakanam ekpri eyen emi osop usụn̄ ke nsinsi.—Men 2 Corinth 2:6, 7 domo.

Ke nditịm ntịn̄, ndien, ete ama eberede usụn̄ ọnọ eyen esie ndifiak nnyọn̄ ndi ke ini enye akadahade. Ke ndusụk ini, mbiowo Christian mfịn ana ẹsio anamidiọk oro mîkabakede esịt ẹfep ke esop. (1 Corinth 5:11, 13) Ke ndinam ntre, mmọ ẹkeme nditọn̄ọ ndiberede usụn̄ nnọ anamidiọk oro ndifiak ndi ebe ke ndisio n̄wụt ke ima ima usụn̄ mme usio-ukot oro enye ekemede ndinam man ẹfiak ẹda enye ke ini iso. Nditi utọ n̄kpeubọk ofụri esịt oro nte ini akade ama anam ediwak mbon oro ẹkesopde ke n̄kan̄ eke spirit ẹtua n̄kpọfiọk onyụn̄ onụk mmọ ndifiak nnyọn̄ mbịne ikọtufọk Abasi.—2 Timothy 4:2.

Ete oro ama owụt mbọm n̄ko ke ini eyen esie akafiakde ọnyọn̄ aka. Ikadaha enye anyanini ndikụt editua n̄kpọfiọk ofụri esịt eyen oro. Ndien, utu ke ndiyịre ndọhọ eyen esie etịn̄ kpukpru idiọkn̄kpọ oro enye akanamde, enye ama anam n̄kpọ ndidara edinyọn̄ esie ndi, ndien enye ama owụt akamba idatesịt ndinam oro. Mme Christian ẹkeme ndikpebe uwụtn̄kpọ emi. Mmọ ẹkpenyene ndidat esịt nte ke ẹfiak ẹkụt owo oro okosopde.—Luke 15:10.

Edinam ete oro ikayakke eyịghe ndomokiet odu nte ke enye ke anyanini ama odori enyịn idiọk eyen esie oro ndifiak nnyọn̄ ndi. Nte ededi, oro edi sụk ukpọn̄ ukpọn̄ n̄kpọ ndiwụt udọn̄ oro Jehovah enyenede ọnọ kpukpru mbon oro ẹkekpọn̄de ikọtufọk esie. Enye “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9, sịghisịghi ubọkn̄wed edi eke nnyịn.) Mbon oro ẹkabarede esịt ẹkpọn̄ idiọkn̄kpọ mmọ ke ntre ẹkeme ndinyene idotenyịn nte ke mmimọ iyọbọ edidiọn̄ ke ‘edidemede ndito ke iso Jehovah nsịm mmimọ.’—Utom 3:19.

[Mme Ikọ idakisọn̄]