Ata Inemesịt Nso Idi Ukpọhọde?
ẸKEBOT mme owo man ẹkop inemesịt. Ntak emi nnyịn ikemede ndinịm oro ke akpanikọ? Ọfọn, kere ban̄a ntọn̄ọ owo.
Jehovah Abasi okobot akpa owo iba oro ye ukeme ndikop inemesịt. Ẹkenịm Adam ye Eve ke paradise, in̄wan̄ inemesịt ẹkotde Eden. Andibot ama ọnọ mmọ kpukpru n̄kpọ obụkidem oro uwem oyomde. In̄wan̄ oro ama enyene “kpukpru eto eke ẹnemde ndise ẹnyụn̄ ẹfọnde ndidia.” (Genesis 2:9) Adam ye Eve ẹma ẹnyene nsọn̄idem, ẹkop odudu, ẹnyụn̄ ẹye uyai—mmọ ẹma ẹfọn ẹma ẹnyụn̄ ẹnyene ata inemesịt.
Nte ededi, nso ikedi ukpọhọde inemesịt mmọ? Nte ekedi ebietidụn̄ paradise mmọ m̀mê mfọnmma ikpọkidem mmọ? Mme enọ ẹtode Abasi mi ẹma ẹtịp ẹsịn ke mmọ ndikop inem uwem. Edi inemesịt mmọ ikọkọn̄ọke ke mme utọ n̄kpọ oro ẹkụtde ke enyịn do. In̄wan̄ Eden ama akan ediye itie nduọkodudu. Enye ekedi edisana ebiet, itie utuakibuot nnọ Abasi. Ukpọhọde nsinsi inemesịt mmọ ekedi ukeme mmọ nditọn̄ọ nnyụn̄ nsọn̄ọ mmụm ima ima itie ebuana ye Andibot n̄kama. Man ẹkop inemesịt, akana mmọ ẹbem iso ẹnyene udọn̄ n̄kpọ eke spirit.—Men Matthew 5:3 domo.
Idaha eke Spirit Ada Esịm Inemesịt
Adam ke ntọn̄ọ ntọn̄ọ ama enyene itie ebuana eke spirit ye Abasi. Enye ekedi ima ima, inem inem itie ebuana nte eke eyen ye ete. (Luke 3:38) Ke in̄wan̄ Eden, Adam ye Eve ẹma ẹnyene nti idaha ẹmi akanamde mmọ ẹyụhọ udọn̄ mmọ ndituak ibuot. Ebede ke unyịme unyịme, ima ima n̄kopitem mmọ nnọ Jehovah, mmọ ẹma ẹda ukpono ye ubọn̄ ẹsọk Abasi ke usụn̄ okponde akan enye oro edibotn̄kpọ ẹdide unam ẹkedade ẹsọk. Mmọ ke usụn̄ owụtde ifiọk ẹma ẹkeme nditoro Abasi kaban̄a mme utịbe utịbe edu esie ẹnyụn̄ ẹkeme ndinọ itie edikara esie ibetedem. Mmọ n̄ko ẹkpeka iso ndibọ ima ima ye mbọm mbọm ukpeme Jehovah.
Itie ebuana emi ye Andibot ye edikop item nnọ mme ibet esie ẹma ẹda ata inemesịt ẹsọk akpa ete ye eka nnyịn. (Luke 11:28) Ikoyomke Adam ye Eve ẹdomo emi m̀mê oko ẹse ke ediwak isua mbemiso ẹkụtde ukpọhọde inemesịt. Mmọ ẹma ẹkop inemesịt kpa ke ndondo oro ẹkebotde mmọ. Ndikodu ke emem ye Abasi nnyụn̄ nsụk ibuot nnọ odudu ukara esie ama anam mmọ ẹkop inemesịt.
Inemesịt oro, nte ededi, ama etre ke ndondo oro mmọ ẹkesọn̄de ibuot ye Abasi. Ebede ke ndisọn̄ ibuot, Adam ye Eve ẹma ẹsịbe itie ebuana eke spirit mmọ ye Jehovah ẹfep. Mmọ ikedịghe aba mme ufan Abasi. (Genesis 3:17-19) Osụk etie nte ke ọtọn̄ọde ke usen oro ẹkebịnde mmọ ẹsio ke in̄wan̄ oro, Jehovah ama etre kpukpru nneme ye mmọ. Mmọ ẹma ẹduọk mfọnmma mmọ, idotenyịn edidu uwem ke nsinsi, ye in̄wan̄ ebietidụn̄ mmọ. (Genesis 3:23) Edi ke edide akpan n̄kpọ akan, sia mmọ ẹma ẹkeduọk itie ebuana mmọ ye Abasi, mmọ ẹma ẹduọk ukpọhọde inemesịt.
Ukeme Nnyịn Ndimek
Mbemiso ẹkekpan̄ade, Adam ye Eve ẹma ẹyak mme edu mmọ nte mme owo ẹnọ nditọ mmọ, ndammana ubieresịt mmọ, ye ukeme kaban̄a idaha eke spirit. Owo ikosụhọkede idaha ekpụk ubonowo ikesịm idaha unam. Nnyịn imekeme ndikabade ntie ke emem ye Andibot. (2 Corinth 5:18) Nte mme edibotn̄kpọ oro ẹnyenede ifiọk, mme owo ẹka iso ẹnyene odudu ndimek m̀mê iyokop uyo Abasi m̀mê idikopke. Ẹma ẹnam emi an̄wan̄a ediwak isua ikie ke ukperedem ke ini Jehovah ọkọnọde idụt Israel oro ẹketọn̄ọde obufa obufa ifụre ndimek uwem m̀mê n̄kpa. Ebede ke Moses, anditịn̄ ikọ ke ibuot esie, Abasi ama ọdọhọ ete: “Mmada uwem, ye nti n̄kpọ, ye n̄kpa, ye idiọk, nnịm fi ke iso mfịn emi.”—Deuteronomy 30:15-18.
Idem idahaemi, ediwak tọsịn isua ke ẹma ẹkeduọk akpa Paradise oro, nnyịn mme owo ke isụk ikeme ndinam nnennen edimek. Nnyịn imenyene ubieresịt oro anamde utom ye akpan ukeme ndinịm mme ibet Abasi. Bible etịn̄ aban̄a ‘owo emi odude ke esịt esịt’ ye owo ‘esịtidem.’ (2 Corinth 4:16; Rome 7:22) Mme ikọ ẹmi ẹtịn̄ ẹban̄a ndammana ukeme oro kpukpru nnyịn inyenede ndiwụt edu Abasi, ndikere n̄kpọ nte enye ekerede, ndinyene udọn̄ ke n̄kpọ eke spirit.
Kaban̄a idaha ido uwem ye ubieresịt nnyịn, apostle Paul ekewet ete: “Ke adan̄aemi mme Gentile ẹmi mînyeneke ibet ẹnamde ke edimehe se ibet etemede, edi esịt mmọ ọnọnọ mmọ item, okposụkedi nte mmọ mînyeneke ibet: mmọ ẹyarade edinịm ibet eke item oro ẹwetde ke esịt mmọ etemede, esịt mmọ ẹnyụn̄ ẹtienede edinịm ibet oro ẹdi ntiense mmọ, ekikere mmọ ẹnyụn̄ ẹneni ye kiet eken, ẹdori mmọ ikọ, mîdịghe, ẹtebe mmọ ikpe.”—Rome 2:14, 15.
Ọniọn̄ Abasi ye N̄kopitem —Ukpọhọde
Owo nte ededi ekeme ndibụp ete, ‘Edieke kpukpru nnyịn inyenede oto-obot udọn̄ ndituak ibuot nnọ Abasi ndien, otode do, inyene ata inemesịt, ntak emi unana inemesịt okponde ntem?’ Emi edi koro man ikop inemesịt, ana nnyịn owo kiet kiet ikọri idaha eke spirit. Okposụkedi ke akpa ẹkebotde ke mbiet Abasi, owo ama adianade ọkpọn̄ Andibot enye. (Ephesus 4:17, 18) Ntem, ana nnyịn owo kiet kiet inam nnennen usio-ukot nditọn̄ọ nnyụn̄ mmụm itie ebuana eke spirit ye Abasi n̄kama. Utọ itie ebuana oro idikọrike ke mbuari.
Jesus ama ọnọ akpan edumbet iba ke ndikọri idaha eke spirit. Kiet edi ndinyene nnennen ifiọk Abasi, ndien enye eken edi ndisụk idem ke n̄kopitem nnọ uduak esie. (John 17:3) Ke okotde oto Ikọ oro Abasi eketịn̄de, Jesus ọkọdọhọ ete: “Ẹma ẹwet ẹte, Idighe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.” (Matthew 4:4) Ke idaha efen, Jesus ama ọdọhọ ete: “Udia Mi edi ndinam utom andidọn̄ Mi, nnyụn̄ mma utom Esie.” (John 4:34) Iyomke nnyịn ibiat ediwak isua ke ndidomo emi m̀mê oko nse kaban̄a inemesịt. Ifiọk eyouwem idịghe ukpọhọde inemesịt. Utu ke oro, edi sụk ọniọn̄ Abasi ye n̄kopitem nnọ Andibot nnyịn ekeme ndida nsịm ata inemesịt ke uwem.—Psalm 19:7, 8; Ecclesiastes 12:13.
Nte an̄wan̄ade, inemesịt oro ẹnyenede ẹto edinyene ọniọn̄ otode Abasi ye edinyene eti idaha ke iso Abasi isọn̄ke ikan nnyịn ndinyene. (Utom 17:26, 27) Ifiọk aban̄ade Jehovah ye uduak esie odu ọnọ kpukpru owo. Ye ediwak miliọn ẹdude ke ediwak usem, Bible aka iso ndidi n̄wed oro ẹsuande atara akan ke ererimbot. Bible ekeme ndin̄wam fi akabade edi ufan Abasi onyụn̄ enyene ata inemesịt, koro N̄wed Abasi asian nnyịn ete ke “ọfọfọn ọnọ mbon eke Jehovah edide Abasi mmọ.”—Psalm 144:15.
[Ekebe ke page 6]
Mme Usụn̄ Ndinyene Inemesịt
1. Wụt Esịtekọm Nyụn̄ Kọri Udọn̄ N̄kpọ Eke Spirit. Jesus Ọkọdọhọ Ete: “Ọfọn Akan Ye Mmọ Ẹmi Ẹkopde Ikọ Abasi, Ẹnyụn̄ Ẹkpemede Ndinam.”—Luke 11:28.
2. Fiọk Ete Ke Unyịme Abasi Edi Akpan N̄kpọ Akan Inyene M̀mê Inem Uwem. Paul Ekewet Ete: “Edi Uten̄e Abasi Edi Akwa Udori, Ke Ini Asan̄ade Ye Esịt Eke Okụtde Ete Se Inyenede Ekem. . . . Edieke Inyenede Se Idiade Ye Se Idade Ifụk Iferi, Nnyịn Iyokụt Ite Oro Ekem.”—1 Timothy 6:6-8.
3. Domo Ndikọri Nnyụn̄ Nnam N̄kpọ Mban̄a Ubieresịt Oro Bible Ọnọde Ukpep.—Rome 2:14, 15.
4. Biere Ndikop Uyo Nnọ Jehovah Abasi, Ntem Odotde Ndidi Kiet Ke Otu Ikọt Esie. David Eke Eset Ekewet Ete: “Ọfọfọn Ọnọ Mbon Eke Jehovah Edide Abasi Mmọ.”—Psalm 144:15.
[Ndise ke page 7]
“Ọfọfọn ọnọ mmọ eke ẹbuenede ke spirit.”—Matthew 5:3